ബന്ധങ്ങൾ
രണ്ടാം ഭാര്യ, ചെറുകഥ വായിക്കാം….
രചന അരുൺ നായർ
“നിങ്ങൾ എൻറെ അമ്മയൊന്നും അല്ലല്ലോ അതുകൊണ്ട് കൂടുതൽ ഭരണമൊന്നും ഇങ്ങോട്ട് വേണ്ട, ഞാൻ ഈ ലോകത്തൊരാളെ വെറുക്കുന്നുണ്ടെങ്കിൽ അത് നിങ്ങളെ ഒരാളെ മാത്രമാണ്…. എനിക്ക് വേണമെങ്കിൽ ഇപ്പോൾ നിങ്ങളോട് പ്രതികാരം ചെയ്യാം പക്ഷെ ഞാനതു ചെയ്യാത്തത് എൻറെ അമ്മയുടെ കൂടെപ്പിറപ്പു ആയതുകൊണ്ട് മാത്രമാണ്….. നിങ്ങൾ എൻറെ അച്ഛന്റെ രണ്ടാം ഭാര്യ മാത്രമാണ് അല്ലാതെ എൻറെ അമ്മ പട്ടം അണിയാൻ എന്റെയടുത്തേക്കു വരണ്ട….. “” ഉറഞ്ഞു തുള്ളികൊണ്ടിരുന്ന പൊന്നുമോളുടെ ദേഷ്യത്തോടെ ഉള്ള സംസാരം കേട്ടപ്പോൾ അനിത മനസുകൊണ്ട് തകർന്നു തരിപ്പണമായി … ഒലിച്ചിറങ്ങിയ കണ്ണുനീർ ധരിച്ചിരുന്ന കോട്ടൺ സാരിയുടെ തുമ്പ് കൊണ്ട് തുടച്ചുകൊണ്ടവർ എന്നോട് പറഞ്ഞു “”മോൾ എന്തൊക്കെ പറഞ്ഞാലും ഈ അമ്മ കേൾക്കാം എന്നാലും മോൾ തെറ്റായ ദിശയിൽ സഞ്ചരിക്കുന്നത് കണ്ടാൽ അമ്മക്ക് സഹിക്കാനാവില്ല….. മോളുടെ ഫോൺ അമ്മ കണ്ടിരുന്നു ആ ബന്ധം ഒന്നും നമുക്ക് ശരിയാവില്ല മോളെ….. അച്ഛൻ അറിഞ്ഞാൽ അദ്ദേഹത്തിനതു താങ്ങാനുള്ള കെൽപ്പു ഉണ്ടാവില്ല മോളെ…… “” സെറ്റിയിൽ കിടന്നിരുന്ന ബാഗും ഫോണും എടുത്തുകൊണ്ടു ഞാൻ തിരിഞ്ഞു പറഞ്ഞു “”നിങ്ങൾ നിങ്ങളുടെ മോന്റെ പോക്ക് എങ്ങനെയാണെന്ന് നോക്കിയാൽ മതി, എനിക്ക് അറിയാം എൻറെ കാര്യങ്ങൾ എങ്ങനെ നോക്കണമെന്ന്…. പിന്നെ അച്ഛൻ എന്ന ആ മനുഷ്യൻ എൻറെ അമ്മയോട് ചെയ്ത തെറ്റുകൾക്കു ഉള്ള പ്രായശ്ചിത്തം ആയിരിക്കുമല്ലോ നിങ്ങളുടെ മകനെക്കാൾ കൂടുതൽ സ്നേഹം എന്നോട് കാണിക്കുന്നത്, ആ അനുകമ്പ എന്നോട് ഇനി കാണിച്ചില്ലെങ്കിലും എനിക്കു കുഴപ്പമില്ലെന്ന് പറഞ്ഞേക്കു….. “” എൻറെ അറത്തുമുറിച്ചുള്ള സംസാരം കേട്ടു അന്തം വിട്ടു നിൽക്കുന്ന രണ്ടാനമ്മയെ ഒന്നുകൂടി നോക്കി കലിച്ചു തുള്ളി ഞാൻ വീടിന്റെ പടിയിറങ്ങി പോയി… മോളെ അച്ഛനറിയാതെ ഇങ്ങനെ പോകരുതെന്ന ഇളയമ്മയുടെ വാക്കുകൾ ഞാൻ കേട്ടതായി നടിച്ചില്ല…. പോകുന്ന വഴിയിൽ ഞാനെന്റെ ജീവിതം അറിയാതെ ഓർത്തു പോയി…. അമ്മയെ കുറിച്ചു ഓർമ വന്നപ്പോൾ കണ്ണ് നനഞ്ഞുവെങ്കിലും അത് ആരും അറിയാതെ ഇരിക്കാൻ അപ്പോൾ തന്നെ എൻറെ എല്ലാം എല്ലാം ആയ കാമുകൻ മനസ്സിലേക്ക് വിരുന്നു എത്തി കഴിഞ്ഞിരുന്നു…. രോഹിത് അവനാണ് തനിക്കിന്നു എല്ലാം…. ഓർമ്മ ഉണ്ടാവുന്ന കാലത്തിനു മുൻപ് തന്നെ അമ്മ ഇല്ലാതെ ആയവൾ ആണ് ഞാൻ…. അച്ഛന്റെയും അമ്മയുടെ അനുജത്തിയുടെയും വഴിവിട്ട ബന്ധം കണ്ടു മനം തകർന്നു വീട് വിട്ടു പോയവൾ ആണ് എൻറെ അമ്മ…. ആ അമ്മയുടെ സ്ഥാനമാണ് ഇപ്പോൾ ചെറിയമ്മ എന്നു ഞാൻ വിളിക്കുന്ന അമ്മയുടെ അനുജത്തി എടുത്തണിയാൻ നോക്കുന്നത്…. സ്വന്തം ചേട്ടനെ പോലെ കണ്ടു സ്നേഹിക്കേണ്ട ചേച്ചിയുടെ ഭർത്താവിനെ സൗന്ദര്യം കാണിച്ചു ആയ കാലത്ത് മയക്കിയെടുത്തവൾ….. സ്വന്തം ഏട്ടനെ പോലെ കാണണ്ടവനെ കണ്ണും കയ്യും കാണിച്ചു മയക്കിയവൾക്കു ഞാൻ ഒരു ചെറുക്കനെ ആത്മാർഥമായി പ്രണയിക്കുന്നത് ഇഷ്ടമായില്ലെന്നു അല്ലേലും ഇങ്ങനെ ഉള്ള സ്ത്രീകൾക്ക് നല്ല രീതിയിൽ ഉള്ള ബന്ധങ്ങൾ ഒന്നും ഇഷ്ടമാകില്ലായിരിക്കും….. ആദ്യമൊക്കെ ഞാനും വിചാരിച്ചിരുന്നത് ഈ സ്ത്രീ എൻറെ അമ്മ ആണെന്നാണ് പിന്നെ ഞങ്ങളുടെ വീട്ടുകാരുമായി അത്രയും രസചേർച്ച ഇല്ലാത്ത അമ്മയുടെ തന്നെ ബന്ധുക്കൾ ആണെന്നിക്കു സത്യം മുഴുവൻ പറഞ്ഞു തന്നത്…. ആ കാര്യങ്ങൾ ഒക്കെ അറിയും വരെ എനിക്ക് എല്ലാവരോടും ഒരുപാട് സ്നേഹം മാത്രമായിരുന്നു…..
അമ്മ നോക്കും പോലെ സ്നേഹിക്കുകയും കാര്യങ്ങൾ എല്ലാം നോക്കുകയും ചെയ്യുമായിരുന്നു അവരുടെ മകൾ അല്ലെങ്കിൽ കൂടി ചെറിയമ്മ ഒരുപക്ഷെ എൻറെ അമ്മയോട് ചെയ്ത തെറ്റിന് ഉള്ള പരിഹാരം ആകാം അതെല്ലാം അതുപോലെ തന്നെ അച്ഛനും ഇളയമ്മക്കും ജനിച്ച മോൻ, അതായത് എൻറെ അനിയനെക്കാൾ സ്നേഹം എന്നോട് തന്നെയാണ് കാണിച്ചിരുന്നത്…. എത്രയൊക്കെ സ്നേഹം കാണിച്ചാലും സ്വന്തം അമ്മയുടെ ജീവിതം തകർത്തവരെ ഞാൻ എങ്ങനെ മനസ്സുകൊണ്ട് സ്നേഹിക്കും അങ്ങനെ സ്നേഹിക്കാൻ ആരും ഇല്ലാതെ അലഞ്ഞ എൻറെ മനസ്സിനുള്ളിൽ മരുഭൂമിയിൽ പെയ്തു ഇറങ്ങും മഴ പോലെ കുളിരേകി എൻറെ ജീവിതത്തിലേക്ക് കടന്നു വന്നവനാണ് എൻറെ രോഹിത്…. രോഹിത് ആള് കോളേജിൽ എൻറെ സീനിയർ ആയിരുന്നു, ഇപ്പോൾ ഡിഗ്രി ഒക്കെ കഴിഞ്ഞു ജോലി റെഡി ആയി…എൻറെ പഠിത്തവും കൂടി കഴിഞ്ഞാൽ വീട്ടിൽ വന്നു പെണ്ണ് ചോദിക്കാമെന്ന് എനിക്ക് ഉറപ്പു നൽകിയിട്ടുണ്ട്…. പറഞ്ഞാൽ പറഞ്ഞത് പോലെ വാക്ക് പാലിക്കുന്ന ആണൊരുത്തനെ ഞാൻ വേറെ ഇതുവരെ കണ്ടിട്ടില്ല… എന്നെ സ്നേഹം കൊണ്ടു മൂടുമ്പോളും ഇടയ്ക്കു ഇടയ്ക്കു എൻറെ കുറുമ്പ് കാണുമ്പോൾ ദേഷ്യപ്പെടും…. എനിക്ക് ആ ദേഷ്യം കാണുന്നത് വളരെ ഇഷ്ടമാണ്… അല്ലാതെ സാധാരണ കാമുകന്മാരെ പോലെ മൂക്കിട്ട ഒലിപ്പിച്ചു കാമുകിയുടെ ബാക്കും താങ്ങി നടക്കുന്നവൻ അല്ലല്ലോ എൻറെ ചെറുക്കൻ എന്നോർത്തപ്പോൾ എനിക്ക് അഭിമാനവും സന്തോഷവും തോന്നി….. ഞാൻ അവിടെ എത്തിയപ്പോൾ ആൾ ആൾറെഡി അവിടെ ഉണ്ടായിരുന്നു… അല്ലേലും ആൾ പറഞ്ഞാൽ പറഞ്ഞതാണ് ഞാനും എത്തിയേനെ ഇളയമ്മയുടെ വഴക്ക് കൂടി കുറച്ചു സമയം പോയി അതുകൊണ്ട് താമസിച്ചതാണ്…. എൻറെ ഉള്ളിലെ ദുഃഖങ്ങൾ എല്ലാം മനഃപൂർവം മറന്നുകൊണ്ട് ഞാൻ സന്തോഷവതിയായി….. എൻറെ കാമുകന്റെ തമാശയും, ദേഷ്യവും എല്ലാം ആസ്വദിച്ചുകൊണ്ട് ഞാൻ ഇരുന്നു….. പ്രണയത്തിൽ ആറടി ഇരുന്നതുകൊണ്ടു തന്നെ സൂര്യൻ അകന്നു പോയത് ഞങ്ങൾ അറിഞ്ഞില്ല അതിനിടക്ക് അവൻ അവന്റെ ഒരു ആഗ്രഹം എന്നോട് പറഞ്ഞു…. അടുത്ത രണ്ടു മൂന്ന് ദിവസം അവൻ ഫ്രീയാണ്…. കോളേജിൽ എന്തെങ്കിലും ടൂർ പ്രോഗ്രാം ഉണ്ടെന്നു പറഞ്ഞു ഞാനും വീട്ടിൽ നിന്നും ചാടിയാൽ മൂന്ന് ദിവസം മൂന്നാറിന്റെ ഭംഗി ആസ്വദിച്ചു പ്രണയിക്കാമെന്നു….. എൻറെ യഥാർത്ഥ സ്വഭാവത്തിന് ഞാനൊരു അടി കൊടുക്കേണ്ടതാണ് പക്ഷെ എല്ലാ കാമുകിമാരെ പോലെ ഞാനും എൻറെ കാമുകനിൽ പൂർണമായി വിശ്വസിച്ചു….. അതുമാത്രമല്ല ഒരിക്കലും ഈ മൂന്നാർ ടൂറിൽ എൻറെ സ്നേഹം അല്ലാതെ ശരീരം ഒരിക്കലും അവൻ സ്നേഹിക്കുകയില്ലെന്നുള്ള ഉറപ്പു… പറഞ്ഞാൽ വാക്ക് പാലിക്കുന്ന കാമുകനോട് ഉള്ള വിശ്വാസത്തിൽ വീട്ടിൽ എന്തെങ്കിലും പറഞ്ഞു സമ്മതിപ്പിക്കാമെന്നു ഞാനവന് ഉറപ്പു കൊടുത്തു…. നാളെ രാവിലെ മൂന്നാറിലേക്ക് പുറപ്പെടാമെന്നുള്ള സന്തോഷത്തിൽ ഞങ്ങൾ ഇന്നേക്ക് പിരിയുവാൻ തീരുമാനിച്ചു…. പിന്നെ അധികം വൈകാതെ അച്ഛൻ വരും മുൻപ് വീട്ടിൽ എത്താനുള്ള ഓട്ടം ആയിരുന്നു….. വീട്ടിൽ എത്തിയപ്പോൾ കുറച്ചു താമസിച്ചു പോയി അച്ഛൻ എത്തി കഴിഞ്ഞിരുന്നു…. അച്ഛൻ പതിവില്ലാതെ എന്നെ സൂക്ഷിച്ചു നോക്കുന്നത് കണ്ടപ്പോൾ നിങ്ങൾ എന്നെ കുറിച്ചു ആവശ്യമില്ലാത് വല്ലതും പറഞ്ഞോ തള്ളേ എന്നൊരു നോട്ടം ഇളയമ്മക്ക് കൊടുത്തിട്ടു ഞാൻ അകത്തേക്ക് കയറി പോയി…. ഞാൻ മുറിയിലെത്തി രോഹിതിന് മെസ്സേജ് അയച്ച ശേഷം കോളേജ് ടൂർ കാര്യം അച്ഛനെ ബോധിപ്പിക്കാൻ ഹാളിലേക്ക് വന്നു….
ഞാൻ പതിവില്ലാതെ അങ്ങോട്ട്‌ ഇറങ്ങി ചെന്നപ്പോൾ അച്ഛൻ പറഞ്ഞു…. “”പൊന്നുമോൾ ഇങ്ങോട്ട് വന്നോ… അച്ഛൻ മോളുടെ പഠിത്തം ഇന്നത്തെ മുടക്കാൻ അങ്ങോട്ട്‌ വരാൻ ഇരിക്കുക ആയിരുന്നു… ഇനി ഇപ്പോൾ ഇവിടെ ഇരുന്നാകാം സംസാരം… അല്ല, മോൾ എന്താണ് ഈ സീരിയൽ കാണുന്ന സഭയിൽ മോൾക്ക്‌ അതൊന്നും ഇഷ്ടമല്ലല്ലോ…..? “” “”അത് അച്ഛാ വേറെ ഒന്നും ഇല്ല…. നാളെ മുതൽ മൂന്നു ദിവസതെക്കു കോളേജിൽ നിന്നും ടൂർ പോകുന്നുണ്ട്…. അതിനു അച്ഛനോട് സമ്മതം ചോദിക്കാനും പിന്നെ സാധനങ്ങൾ വാങ്ങാൻ കുറച്ചു പൈസയും ചോദിക്കാനാണ് ഞാൻ വന്നത്…. അതും പറഞ്ഞു ഞാൻ അച്ഛന്റെ മുൻപിൽ തല കുനിച്ചു നിന്നു അച്ഛന്റെ സമ്മതത്തിനായി…. “” “”അതിനെന്താണ് കോളേജിൽ നിന്നും അല്ലെ, മോൾ പോയിട്ട് വാ… എന്നാലും മൂന്നു ദിവസം മോളെ കാണാതെ എങ്ങനെ ഇരിക്കും ഓർക്കുമ്പോൾ ആണ് ചങ്കു പിടയുന്നത് അത് കുഴപ്പമില്ല മോൾടെ സന്തോഷം ആണ് അച്ഛന് വലുത് മോൾ കൂട്ടുകാരുടെ കൂടെ ആഘോഷിച്ചു വാ…. പിന്നെ എത്ര രൂപ വേണമെങ്കിലും അമ്മയോട് ചോദിച്ചോ അമ്മ തന്നോളും….. “” അച്ഛന്റെ അനുവാദം കിട്ടിയ സന്തോഷത്തിൽ ഞാനതു രോഹിതിനെ അറിയിക്കാനായി മുറിയിലേക്ക് പോകാൻ തുടങ്ങിയപ്പോൾ അച്ഛൻ എന്നെ വിളിച്ചു “”മോളെ, അച്ഛന് കുറച്ചു സംസാരിക്കാൻ ഉണ്ട് ഇനിയും സംസാരിച്ചില്ലെങ്കിൽ ചിലപ്പോൾ താമസിച്ചു പോകും…. എന്തിനു വേണ്ടി അച്ഛനും അമ്മയും ജീവിച്ചോ അതെല്ലാം ജീവിതത്തിന്റെ നഷ്ടമാകും….. “” മുറിയിലേക്ക് പോകാനായി മുൻപോട്ട് വെച്ച കാലെടുത്തു ഞാൻ അച്ഛന്റെ കൂടെ സെറ്റിയിൽ ഇരുന്നു “”അച്ഛന് എന്താണ് എന്നോട് പറയാൻ ഉള്ളത് അതിനു എന്തിനാണ് അച്ഛാ മുഖവുരയൊക്കെ, ഞാൻ അച്ഛന്റെ സ്വന്തം മോളല്ലേ…. “” അങ്ങനെ പറഞ്ഞത് ചെറിയമ്മക്ക് കൊള്ളാൻ വേണ്ടി തന്നെയാണ്…. അവരുടെ മോൾ ആണ് ഞാനെന്നുള്ള ചിന്ത മാറാനും…. “”മോൾ ഇന്ന് അമ്മയോട് അവൾ അച്ഛന്റെ രണ്ടാം ഭാര്യ മാത്രമാണെന്ന് പറഞ്ഞോ… അങ്ങനെ പറഞ്ഞു എങ്കിൽ ആ കാലിൽ വീണു മാപ്പ് ചോദിക്ക്…. “” “”അച്ഛൻ അല്ല ദൈവം തമ്പുരാൻ വന്നു പറഞ്ഞാലും എൻറെ അമ്മയുടെ ജീവിതം നശിപ്പിച്ച അവരുടെ കാലിൽ വീഴാൻ എനിക്ക് ആവില്ലായിരുന്നു….”” അച്ഛൻ അവിടെ നിന്നിട്ടു കൂടെ ഞാനറിയാതെ എൻറെ നാവിൽ നിന്നും അത് വെളിയിൽ വന്നു…. “”നിന്റെ അമ്മയുടെ ജീവിതം ആരാണ് നശിപ്പിച്ചതെ”” ന്നും ചോദിച്ചു അച്ഛൻ എന്നെ തല്ലാൻ വന്നപ്പോൾ ചെറിയമ്മ ഇടയ്ക്കു കയറി അത് തടഞ്ഞു…. അത് കണ്ടപ്പോൾ അതിലും ഭേദം അച്ഛൻ എന്നെ തല്ലുന്നത് ആയിരുന്നെന്നു എനിക്ക് തോന്നി പോയി….. ഒന്ന് ദേഷ്യം അടങ്ങിയപ്പോൾ അച്ഛൻ എന്നെ ആ നെഞ്ചോടു ചേർത്ത് നിർത്തി പറഞ്ഞു…. “”മോളെ, അച്ഛൻ ഇപ്പോൾ പറയുന്നത് മോൾക്ക്‌ കേൾക്കാൻ ഒട്ടും സുഖം ഇല്ലാത്ത കാര്യങ്ങൾ ആണ്…. നിന്റെ അമ്മ അതായത് ഞാൻ നാലാള് അറിഞ്ഞു താലി കെട്ടി കൂടെ കൂട്ടിയവൾക്കു ഒരു കാമുകൻ ഉണ്ടായിരുന്നു ഞാൻ കെട്ടും മുൻപ്…. നീ ഉണ്ടായതിനു ശേഷവും അവരുടെ ബന്ധം തുടർന്ന്…. ഞങ്ങൾ ആരും സി ഐ ഡി കളിച്ചു കണ്ടു പിടിച്ചതൊന്നും അല്ല അവളുടെ രഹസ്യം…. കാരണം അത്രക്കും വിശ്വാസം ആയിരുന്നു എനിക്ക് അവളെ, അതുകൊണ്ട് ചതിയുടെ യാതൊരു വിധത്തിലുള്ള ദുർഗന്ധവും എന്റെയുള്ളിൽ ഉണ്ടായില്ല… പക്ഷെ മോൾക്ക്‌ ഒരു വയസ്സ് ആയപ്പോൾ അവൾ വീണ്ടും ഗർഭിണി ആയി, ജോലി കഴിഞ്ഞു സന്തോഷത്തോടെ വീട്ടിലേക്കു വന്ന അച്ഛനോട് അവളുടെ വയറ്റിൽ വളരുന്ന ആ കുഞ്ഞു കാമുകന്റേത് ആണെന്ന് പറഞ്ഞു…. അച്ഛനപ്പോൾ അവളെ കൊന്നു കളയാൻ ആണ് തോന്നിയത് പക്ഷെ മോളുടെ കള്ള ചിരികൾ കണ്ടപ്പോൾ ഒന്നിന് വേണ്ടിയും അത് നശിപ്പിക്കാൻ അച്ഛന് സാധിച്ചില്ല…. പിന്നെ മോളെ പ്രസവിച്ച അവളുടെയും കാമുകന്റെയും ആവശ്യപ്രകാരം അവരെ ഈ നാട്ടിൽ നിന്നും ഒരു ദിവസം രാത്രിയിൽ നാട് കടത്തി കൊടുത്തു ആ കാര്യങ്ങൾ എല്ലാം അറിയാവുന്ന ഒരാൾ നീ ഇപ്പോൾ ഈ പുച്ഛിക്കുന്ന ഇളയമ്മയും നിന്റെ അമ്മൂമ്മയും ആയിരുന്നു….
അമ്മൂമ്മ പിന്നെ സങ്കടം ഒന്നും സഹിക്കാതെ പോയി…. നിനക്ക് അറിയുമോ മോളെ, സ്വന്തം ഭാര്യയെ കാമുകന്റെ കൂടെ സുരക്ഷആയി ഇറക്കി വിടേണ്ടി വന്നവനാണ് ഈ അച്ഛൻ, ആ എന്റെ ദുഖവും പിന്നെ നിന്നെ എനിക്ക് ഒറ്റയ്ക്ക് നോക്കാനുള്ള ബുദ്ധിമുട്ടും കണ്ടു സഹിക്കാനാവാതെ, അന്ന് പോസ്റ്റ്‌ ഗ്രാജുവേഷൻ ചെയ്യുകയായിരുന്ന ഇവൾ അത് നിർത്തി നിനക്ക് അമ്മയായി ഈ വീട്ടിൽ ഒതുങ്ങി കൂടിയതാണ്…. ആ അവളാണ് നിനക്കിപ്പോൾ എന്റെ രണ്ടാം ഭാര്യ മാത്രമായി പോയത്…. ഒരു ദിവസം മാത്രമല്ല മോളെ ഈ ജീവിതം മുഴുവൻ നീയും ഞാനും അവളോട് കടപ്പെട്ടു വേണം ജീവിക്കാൻ….. “” അച്ഛന്റെ നെഞ്ചിൽ കിടന്നു അച്ഛന്റെയും ഇളയമ്മയുടെയും ജീവിതത്തിൽ ഉണ്ടായ നീറുന്ന കാര്യങ്ങൾ കേട്ടപ്പോൾ എനിക്ക് എന്നോട് തന്നെ ദേഷ്യം തോന്നി… മനസ്സിൽ ഞാൻ ഉറപ്പിച്ചു ഇനി ഒരിക്കലും എനിക്ക് ആ സ്ത്രീ ഇളയമ്മ അല്ല എൻറെ അമ്മ തന്നെയാണെന്ന്…. എങ്കിലും എൻറെ ഉള്ളിൽ ഒരു സംശയം തോന്നി…. “”അച്ഛാ, അച്ഛനോ ഇളയമ്മക്കോ ഇതൊക്കെ എന്നോട് നേരത്തെ തന്നെ പറഞ്ഞു കൂടായിരുന്നോ…. പറഞ്ഞിരുന്നു എങ്കിൽ ഞാനൊരിക്കലും അമ്മയെ വേദനിപ്പിക്കില്ലായിരുന്നു…. “” “‘അറിയിക്കാമായിരുന്നു, പക്ഷെ മോൾ ഒരിക്കലും പെറ്റമ്മയെ കുറിച്ചു മോശമായി ചിന്തിക്കേണ്ട കരുതി ഞങ്ങൾ മറച്ചു വെച്ചതാണ്…. മോളെ അമ്മയുടെ ബന്ധുക്കൾ കള്ളത്തരം അറിയിച്ചുവെന്നു അറിഞ്ഞെങ്കിലും അതുകൊണ്ട് മോൾക്ക്‌ ഞങ്ങളോട് ശത്രുത ഉണ്ടായെന്നു ഇന്നാണ് ഞങ്ങൾക്ക് മനസ്സിലായത്…. അതുകൊണ്ട് ഇന്ന് തന്നെ അത് തിരുത്തിയത്….. “” കരച്ചിൽ വന്നുവെങ്കിലും ഞാൻ അച്ഛനോട് ഒന്നും പിന്നെ ചോദിക്കാനും പറയാനും പോയില്ല…. എൻറെ അച്ഛനെയും അമ്മയെയും ചേർത്ത് നിർത്തി ഉമ്മകൾ കൊണ്ടു മൂടിയിട്ടു ഞാനവരുടെ പഴയ പൊന്നുമോൾ ആയി മുറിയിലേക്ക് ഓടി പോയി….. ഫോൺ എടുത്തു രോഹിതിനെ അറിയിച്ചു…. “”അതെ മൂന്നാർ പോക്കൊക്കെ കല്യാണം കഴിഞ്ഞിട്ട് ആകാം…. എൻറെ പഠിത്തം കഴിഞ്ഞു വന്നു ചോദിച്ചു കെട്ടി കൂടെ കൂട്ടി ടൂർ പോയി തകർക്കാം നമുക്ക്….. ഇപ്പോൾ എനിക്ക് എൻറെ അച്ഛന്റെയും അമ്മയുടെയും നിസ്വാർത്ഥമായ സ്നേഹം ആവോളം ആസ്വദിക്കണം….. “” ശുഭം
രചന: ഉണ്ണി കെ പാർത്ഥൻ
“ഇവള് ഇത് എവിടെ പോയി കിടക്കുവാ.. വിളിച്ചിട്ട് എടുക്കുന്നില്ല ലോ..” പലവട്ടം ഫോൺ വിളിച്ചിട്ടും കാൾ അറ്റൻഡ് ചെയ്യാതിരുന്ന ഭാര്യയെ മനസ്സിൽ ആവോളം തെറി വിളിച്ചു കൊണ്ട് സുധി ബസിന്റെ സീറ്റിലേക്ക് ഒന്നുടെ ചാരിയിരുന്നു.. “വാട്സാപ്പ് ചെയ്തു നോക്കാം..” മൊബൈൽ ഒന്നുടെ എടുത്തു നെറ്റ് ഓൺ ചെയ്തു.. “ആഹാ.. ഇവൾ ഓൺലൈനിൽ ഉണ്ടല്ലോ… ഡീ..” സുധി ഒരു മെസ്സേജ് വാട്സാപ്പ് ചെയ്തു.. ഒരു മിനിറ്റ്.. രണ്ട് മിനിറ്റ്.. നിമിഷങ്ങൾ അങ്ങനെ കടന്നു പോയി.. അപ്പുറത്ത് ഓൺലൈൻ തെളിഞ്ഞു കിടപ്പുണ്ട്… “ഡീ..” സുധി ഒന്നുടെ മെസ്സേജ് ചെയ്തു… നോ രെക്ഷ.. “എങ്കിൽ ഒന്നുടെ വിളിച്ചു നോക്കാം..” വാട്സാപ്പ് കാൾ ചെയ്തു… അനക്കമില്ല..
“ഇവള് ഈ മൊബൈലും കു ത്തി ഇരുന്നു ഉറങ്ങിപോയോ…” മനസ്സിൽ ഒന്നുടെ പറഞ്ഞിട്ട് സുധി നോട്ടം തൊട്ടടുത്ത സീറ്റിൽ ഇരിക്കുന്ന ചെറുപ്പകാരന്റെ മൊബൈലിലേക്ക് ഒരു നിമിഷം പാളി നോക്കി.. “ങ്ങേ… ഇത് ദേവി അല്ലേ.. എന്റെ ഭാര്യ.. ഇവളെ എങ്ങനെ ഇയ്യാൾക്ക് അറിയാം..” ആ ചെറുപ്പക്കാരൻ ഇടതടവില്ലാതെ വാട്സാപ്പ് മെസ്സേജ് ദേവിക്ക് അയച്ചു കൊണ്ടേ ഇരിക്കുന്നുണ്ടായിരുന്നു.. അപ്പുറത്ത് നിന്നും ഉരുളക്ക് ഉപ്പേരി പോലേ റിപ്ലൈയും.. “ചേട്ടാ.. ഒരു മിനിറ്റ്.. ആ ഫോൺ ഒന്ന് തരോ.. എന്റെ ഭാര്യക്ക് ഒരു മെസ്സേജ് ഇടാൻ ആണ്..” ആ ചെറുപ്പക്കാരനെ നോക്കി സുധി പതിയേ ചോദിച്ചു… “പിന്നെന്താ.. ദാ ചേട്ടാ ഫോൺ..” വിനീത പുളകിതനായി അയ്യാൾ ഫോൺ സുധിക്ക് നേരെ നീട്ടി.. “ഡീ.. ഞാൻ നിന്നെ കൊറേ നേരമായി വിളിക്കുന്നു… മെസ്സേജ് ഇടുന്നു..
നീ എന്റെ മെസ്സേജ് തുറന്നു നോക്കിയില്ല ലോ.. ഇത് ആരാ നിന്റെ ഫ്രണ്ട് ആണോ.. എന്റെ തൊട്ടടുത്ത സീറ്റിൽ ഇരിക്കുന്നത് കൊണ്ട് ഞാൻ ഈ ചേട്ടന്റെ ഫോൺ വാങ്ങി മെസ്സേജ് ഇടുവാ.. അതേ.. ഞാൻ ഇന്ന് വീട്ടിലേക്ക് വരുന്നുണ്ട്…വൈകുന്നേരം ആവുമ്പോളേക്കും എത്തും ട്ടോ..” മെസ്സേജ് സെന്റ്… “ങ്ങേ..” അപ്പുറത്തു നിന്നു മറുപടി വിത്ത് സ്മൈലി.. “ഓൾക്ക് മനസിലായില്ല ന്ന് തോന്നുന്നു… ചേട്ടാ മ്മക്ക് ഒരു സെൽഫി എടുത്താലോ..” ആ ചെറുപ്പക്കാരനെ ചേർത്ത് പിടിച്ചു സുധി ഒരു സെൽഫി എടുത്തു പിക്ക് ദേവിക്ക് സെന്റ് ചെയ്തു… അപ്പുറം മെസ്സേജ് ഓപ്പൺ ചെയ്തു… അപ്പുറത്ത് നിന്നു ഒരു റിപ്ലൈയും ഇല്ല… “ഓൾടെ നെറ്റ് കഴിഞ്ഞു കാണും.. അതാണ് റിപ്ലൈ ഇല്ലാത്തത്.. സർപ്രൈസ് കൊടുക്കാന്നു കരുതിയതാ.. ഇനി ഇപ്പൊ അത് വേണ്ടാ ലോ…” മൊബൈൽ തിരിച്ചു നൽകി കൊണ്ട് നിഷ്കളങ്കമായി സുധി ആ ചെറുപ്പക്കാരനെ നോക്കി.. “ചേട്ടാ ആളിറങ്ങാൻ ണ്ട്..” ചെറുപ്പക്കാരൻ സീറ്റിൽ നിന്നും ചാടിയെഴുന്നേറ്റ് കണ്ടക്ടറേ നോക്കി ഉറക്കേ വിളിച്ചു പറഞ്ഞു… “ഇനി അടുത്ത സ്റ്റോപ്പ്‌ കൊല്ലത്തു ആണ്..”
കണ്ടക്ടർ വിളിച്ചു പറഞ്ഞു… “അതൊന്നും പറ്റില്ല.. എനിക്ക് ഇവിടെ ഇപ്പൊ ഇറങ്ങണം…” ചെറുപ്പക്കാരൻ ബെൽ അടിച്ചു.. ഡ്രൈവർ വണ്ടി നിർത്തി.. ചെറുപ്പക്കാരൻ ഇറങ്ങി.. തിരിഞ്ഞു നോക്കാതെ ഓടി… സുധി മൊബൈൽ എടുത്തു ഒന്നുടെ ഭാര്യയെ വിളിച്ചു… “നിങ്ങൾ വിളിക്കുന്ന നമ്പർ മറ്റൊരു കോളിൽ ആണ്… ദയവായി അൽപ്പനേരം കഴിഞ്ഞു വിളിക്കുക..” സുധി ഒന്നുടെ വിളിച്ചു… “നിങ്ങൾ വിളിക്കുന്ന നമ്പർ ഇപ്പൊ സ്വിച് ഓഫ് ആണ്.. ദയവായി അൽപ്പ നേരം കഴിഞ്ഞു വിളിക്കുക…” “ഇന്നലെ നല്ല മഴ അല്ലായിരുന്നോ.. ഫോൺ ചാർജ് പോയി കാണും..” അതും പറഞ്ഞു സുധി സീറ്റിലേക്ക് ചാരി കണ്ണുകൾ അടച്ചു… ശുഭം.. ഉണ്ണി കെ പാർത്ഥന്റെ സ്റ്റോറി എന്തേ ഇങ്ങനെ എന്ന് ചോദിക്കുന്നവരോട് മാത്രമായി രണ്ട് വരി.. വിഡ്ഢിത്തത്തോടെ ചില ആശയങ്ങളേ കൂടെ കൂട്ടി നോക്കും.. അത് പണ്ട് മുതലേ ഉള്ള ശീലമാണ്.. സാമാന്യ യുക്തിക്ക് നിരക്കാത്തത് എന്ന് വേണേൽ പറയാം.. എഴുതി നോക്കും.. വായിക്കുന്നവരുടെ അഭിരുചിക്ക് വിടും.. അവരേ കേൾക്കും അതാണ് പതിവ്.. ജീവനുള്ള കഥയുമായി വീണ്ടും കാണാം..
രചന: സജി തൈപ്പറമ്പ്
“ചേട്ടാ.. ഈ സാരിയുടെ ഞൊറിയൊന്ന് പിടിച്ചേ” “പിന്നേ.. എനിക്കതല്ലേ ജോലി ?,ചുരിദാറിട്ടിരുന്നേൽ ഈ പാടുണ്ടായിരുന്നോ? ഈ നേരമില്ലാത്ത നേരത്ത്,സാരിയുടുക്കാൻ നിന്നോടാരെങ്കിലും പറഞ്ഞോ?” “എന്താ ജയേട്ടാ.. ഈ പറയുന്നത്? ഇതൊരു സാധാരണ കല്യാണമല്ലല്ലോ? എൻ്റെ വല്യച്ഛൻ്റെ മകൾടെ കല്യാണമല്ലേ? അവിടെയുള്ളവർക്കൊക്കെ സാരിയെടുത്ത കൂട്ടത്തിൽ എനിക്കും വല്യച്ഛൻ,സാരിയെടുത്ത് തന്നത്, കല്യാണത്തിന് ഉടുക്കാൻ വേണ്ടിയല്ലേ?” ഓഹ് പിന്നേ, സാരിയുടുക്കാൻ പറ്റിയൊരു കോലം, നീയൊന്ന് വേഗമിറങ്ങാൻ നോക്ക് , പുശ്ചത്തോടെ പറഞ്ഞിട്ട് ജയേട്ടൻ പുറത്തേയ്ക്ക് പോയപ്പോൾ ,എനിക്ക് കടുത്ത നിരാശ തോന്നി. രാവിലെ മുതല് തുടങ്ങിയ കഷ്ടപ്പാടാണ് ,നന്നായൊന്ന് ഒരുങ്ങിയിട്ട് എത്ര നാളായി, രണ്ട് കൊല്ലം മുൻപ് അനുജത്തിയുടെ കല്യാണത്തിനാണ് ഇതിന് മുമ്പ് സമയമെടുത്തൊന്ന് ഒരുങ്ങിയത് ,അല്ലാതെയുള്ള എന്ത് ചടങ്ങിന് പോയാലും ജയേട്ടൻ്റെ ധൃതി കാരണം ഏതെങ്കിലുമൊരു ചുരിദാറുമെടുത്തിട്ട് വെളിച്ചെണ്ണ തേച്ച മുടിയൊന്ന് കോതിയൊതുക്കി കണ്ണാടിയിലൊട്ടിച്ചിരിക്കുന്ന ഒരു പൊട്ടുമെടുത്ത് നെറ്റിയിലൊട്ടിച്ചിട്ട് വേഗം ഇറങ്ങാറാണ് പതിവ്, ഇതിപ്പോൾ പുറം നാട്ടിലൊക്കെ പോയിട്ട് വന്ന കസിൻസെല്ലാം കെട്ടിയൊരുങ്ങി വരുമെന്നറിയാവുന്നത് കൊണ്ട് ,അവരുടെ മുന്നിൽ ചെറുതാവണ്ടന്ന് കരുതിയാണ്, ഇന്നലെ രാത്രി മുതൽ പോയസൗന്ദര്യമൊന്ന് തിരിച്ച് പിടിക്കാനുള്ള ശ്രമം തുടങ്ങിയത് രാത്രി തന്നെ പറമ്പിൽ നിന്ന് കറ്റാർവാഴയുടെ തണ്ട് മുറിച്ചെടുത്ത്, തൊലി കളഞ്ഞ്, അതിൻ്റെ മുകളിൽ അരിപ്പൊടി വിതറി മുഖത്ത് തേച്ച് വച്ചു, ഏറെ നേരം കഴിഞ്ഞു് അത് കഴുകിയതിന് ശേഷമാണ്, ഇന്നലെ ഉറങ്ങാൻ കിടന്നത് തന്നെ എന്നിട്ട് അതിരാവിലെയെഴുന്നേറ്റ് ബാക്കിയുണ്ടായിരുന്ന കറ്റാർവാഴയുടെ ജെല്ലെടുത്ത് ജ്യൂസാക്കി, തലയിൽ തേച്ച് പിടിപ്പിച്ചു ,മുടിക്ക് തിളക്കം കിട്ടുമെന്നാരോ മുമ്പ് പറഞ്ഞത് കൊണ്ടാണങ്ങനെ ചെയ്തത് അങ്ങേതിലെ ശോഭേച്ചി മിക്കപ്പോഴും ബ്യൂട്ടി പാർലറിൽ പോകുമ്പോൾ ചോദിക്കാറുണ്ട്, ഗീതയ്ക്ക് ബ്യൂട്ടി പാർലറിലൊന്നും പോകാൻ താല്പര്യമില്ലേന്ന്?
തൻ്റെ നല്ല തിക്നസ്സുള്ള മുടിയല്ലേ? ഒന്ന് സ്ട്രെയ്റ്റ് ചെയ്തിട്ടിരുന്നേൽ നല്ല വെറ്റായി കിടന്നേനെയെന്ന് അത് കേട്ടപ്പോഴെനിക്ക് ആത്മനിന്ദയാണ് തോന്നി . ഏത് പെണ്ണുങ്ങൾക്കാണ്, ബ്യൂട്ടി പാർലറിൽ പോകാനും, ഫേഷ്യല് ചെയ്യാനും ,മുടിയൊന്ന് സ്ട്രെയ്റ്റ് ചെയ്യാനുമൊക്കെ ആഗ്രഹമില്ലാത്തത്? ,പക്ഷേ അതിനൊക്കെ സപ്പോർട്ട് ചെയ്യുന്നൊരു ഹസ്ബൻ്റ് കൂടിയുണ്ടാവണ്ടെ? വെറും മുപ്പത് രൂപാ മുടക്കി പുരികമൊന്ന് ത്രെഡ് ചെയ്യാൻ പോലും, പുള്ളിക്കാരൻ പൈസ തരില്ല, പഠിക്കാൻ പോയ സമയത്ത്, അമ്മ ഒരുപാട് പറഞ്ഞതാണ്, മോളേ.. നീയെങ്കിലും പഠിച്ച് ഒരു ജോലി വാങ്ങാൻ നോക്ക്, ഇല്ലെങ്കിൽ കല്യാണം കഴിയുമ്പോൾ ,അമ്മയെ പോലെ സ്വന്തം ആവശ്യങ്ങൾക്കെല്ലാം ഭർത്താവിൻ്റെ മുന്നിൽ കൈ നീട്ടി നില്ക്കേണ്ടി വരുമെന്ന് , ആര് കേൾക്കാൻ ? അതിൻ്റെയാണീ അനുഭവിക്കുന്നത്, ഞാനൊരുവിധം സാരി അരക്കെട്ടിലുറപ്പിച്ചു. അമ്പലത്തിൽ വച്ചായിരുന്നു വിവാഹം അവിടെ ചെന്നയുടനെ എന്നെയും മക്കളെയും മണ്ഡപത്തിലേക്ക് പറഞ്ഞ് വിട്ടിട്ട് ജയേട്ടൻ കൂട്ടുകാരുടെയടുത്തേയ്ക്ക് പോയി. ഹായ് നാത്തൂനെ, ഇതെന്തായീ കാണുന്നത്? കാവിലെ ഭഗവതി നേരിട്ടിറങ്ങി വന്നതോ ? ചുവന്ന പട്ട് സാരി, നാത്തൂന് നന്നായി ചേരുന്നുണ്ട് കെട്ടോ? വല്യച്ഛൻ്റെ ഇളയ മരുമകള് വന്നെന്നോടങ്ങനെ പറഞ്ഞപ്പോൾ മനസ്സിനൊരു കുളിർമ്മ തോന്നി ,അവളങ്ങനെ ആരെയും പുകഴ്ത്തിപ്പറയുന്നൊരാളല്ല ങ്ഹാ ഗീതേച്ചി… പൊളിച്ചല്ലോ ? നിങ്ങൾക്കൊരു പത്ത് വയസ്സ് കുറഞ്ഞിട്ടുണ്ട്, ഗീതേച്ചി വെളുത്തതായത് കൊണ്ടാവാം ചുവപ്പ് നിറം നന്നായി മാച്ച് ചെയ്യുന്നുണ്ട്, അത് മാത്രമല്ല രശ്മി ,ഗീതേച്ചിക്ക് നല്ല ബോഡി ഷെയ്പുള്ളത് കൊണ്ട് സാരി നന്നായി ചേരുന്നുമുണ്ട് എൻ്റെ കൃഷ്ണാ … എനിക്കിനി മരിച്ചാലും വേണ്ടില്ല ബാംഗ്ളൂരിൽ മോഡലിങ്ങ് ചെയ്യുന്ന അമ്മാവൻ്റെ മക്കളാണത് പറഞ്ഞത് ഇതിൽപരം ഈയുള്ളവർക്ക് മറ്റൊന്നും വേണ്ട അതോടെ എൻ്റെ മൂഡ് ഔട്ടെല്ലാം മാറി. താലികെട്ടും, സദ്യയുമൊക്കെ കഴിഞ്ഞപ്പോൾ തിരിച്ച് പോകാൻ ജയേട്ടൻ ധൃതിവച്ചു. കുറച്ച് കൂടി നില്ക്ക് ജയേട്ടാ… ഇത്രവേഗം തിരിച്ച് പോകാൻ നമ്മള് അന്യരൊന്നുമല്ലല്ലോ? മനസ്സില്ലാ മനസ്സോടെയാണെങ്കിലും പുള്ളിക്കാരൻ കുറച്ച് നേരം കൂടി നിന്നു.
നാല് മണിയായപ്പോൾ ജയേട്ടന് പോയിട്ട് തിരക്കുണ്ടെന്ന് വല്യച്ഛനോട് കളവ് പറഞ്ഞിട്ട് ഞങ്ങളവിടുന്നിറങ്ങി. ഗീതേ .. നീ മുന്നിലോട്ടിരിക്ക് മക്കള് രണ്ട് പേരും കൂടി പിന്നിലിരുന്നോളും കാറിൻ്റെ പിൻഡോറ് തുറക്കാനൊരുങ്ങിയ എന്നോടത് പറഞ്ഞത്, ജയേട്ടൻ തന്നെയാണോ,? എന്ന് വിശ്വസിക്കാനാവാതെ ആ മുഖത്തേയ്ക്ക് ഞാൻ പകച്ച് നോക്കി . കുറച്ച് നാളുകളായി പത്താം ക്ളാസ്സിൽ പഠിക്കുന്ന മൂത്ത മകനാണ്, എന്നും ഇടത് വശത്തെ ഫ്രണ്ട് സീറ്റിലിരിക്കുന്നത്, ഒരു ദിവസം അവനോട് ഞാൻ ബാക്ക് സീറ്റിലേക്കിരിക്കാൻ പറഞ്ഞപ്പോൾ ജയേട്ടൻ സമ്മതിച്ചില്ല നിനക്ക് മുന്നിൽ തന്നെയിരിക്കണമെന്ന് ഇത്ര നിർബന്ധമെന്താണ്? ആ ചോദ്യം അന്നെന്നെ വല്ലാതെ വേദനിപ്പിച്ചിരുന്നു. വേണ്ട, ഞാനിവിടെ തന്നെയിരുന്ന് കൊള്ളാം ഉള്ളിലെ സന്തോഷം മറച്ച് പിടിച്ച്, ഞാൻ വെറുതെയൊരു നമ്പരിറക്കി. ഹാ, പറയുന്നത് കേൾക്ക് ഗീതേ .. എനിക്കത് മതിയായിരുന്നു, എൻ്റെ ഭർത്താവ് എന്നെ നിർബന്ധിച്ചാലേ, ഞാനിനി മുൻ സീറ്റിലിരിക്കു, എന്നൊരു പിടിവാശി എനിക്കന്നുണ്ടായിരുന്നു. അല്ല, നമ്മളിതെങ്ങോട്ടാ പോകുന്നത് ? വീട്ടിലേക്കുള്ള റോഡിലേക്ക് തിരിയാതെ, കാറ് ഹൈവേയിലൂടെ തന്നെ സഞ്ചരിക്കുന്നത് കണ്ട് ,ഞാൻ ജിജ്ഞാസയോടെ ചോദിച്ചു. നീയെപ്പോഴും പറയാറില്ലേ ? ഞാൻ വർക്ക് ചെയ്യുന്ന കമ്പനിയിൽ, ഒരിക്കലൊന്ന് പോകണമെന്നും, അവിടുള്ളവരെയൊക്കെ ഒന്ന് പരിചയപ്പെടണമെന്നുമൊക്കെ അയ്യോ അങ്ങോട്ടാണോ പോകുന്നത്? ,ജയേട്ടാ .. ഞാനീ പട്ട് സാരിയൊക്കെയുടുത്ത് വന്നാൽ ,അവരെന്ത് വിചാരിക്കും? നമുക്ക് വേറൊരു ദിവസം പോകാം ഹേയ് അതൊന്നും സാരമില്ല, ഇന്നാണ് അതിന് പറ്റിയ ദിവസം ഈ മനുഷ്യനിതെന്ത് പറ്റി? ആകെയൊരു മാറ്റം ?
എൻ്റെ ജിജ്ഞാസ വർദ്ധിച്ചു. അങ്ങനെ കുറെ നാള് കൊണ്ടുള്ള ആഗ്രഹം സാധിച്ചു. കമ്പനിയിലുള്ള ജയേട്ടൻ്റെ സബ്ഓർഡിനേറ്റ്സൊക്കെ എന്നെ ,മാഡം എന്ന് വിളിച്ച് സംബോധന ചെയ്തപ്പോൾ, ഞാനങ്ങ് വല്ലാതായി. അവിടുന്നിറങ്ങിയിട്ടും, വീട്ടിലേക്ക് പോകാതെ, ജയേട്ടൻ ഞങ്ങളെയും കൊണ്ട് നേരെ ബീച്ചിലേക്കാണ് പോയത്, ൻ്റെ കൃഷ്ണാ… ഇന്ന് മൊത്തം സർപ്രൈസുകളാണല്ലോ? എല്ലാ ദിവസവും, ഈ മനുഷ്യന് ഇങ്ങനെ തോന്നിയിരുന്നെങ്കിയെന്ന്, ഞാൻ വല്ലാതെ കൊതിച്ച് പോയി. ഞാനൊരു കാര്യം ചോദിച്ചാൽ, സത്യം പറയുമോ ? രാത്രിയിൽ ജയേട്ടനൊപ്പം കട്ടിലിൽ കിടക്കുമ്പോൾ, ഞാനദ്ദേഹത്തോട് ചോദിച്ചു ഉം ചോദിക്ക്, ഇന്നെന്താ ജയേട്ടന് പറ്റിയത്? ഇപ്പഴും എനിക്ക്, ഒന്നുമങ്ങട്ട് വിശ്വസിക്കാനാവുന്നില്ല, ചില തിരിച്ചറിവുകളുണ്ടാകുന്നത് മറ്റുള്ളവരിൽ നിന്നാണ് ,കല്യാണ പന്തലിൽ വച്ച് ,എനിക്കങ്ങനെയൊരു തിരിച്ചറിവ് കിട്ടി ,ഇപ്പോൾ നീ അത്രയും മനസ്സിലാക്കിയാൽ മതി. ################### അതാരാ ചേട്ടാ… ആ ചുവന്ന സാരിയുടുത്ത് നില്ക്കുന്നത്, എന്തൊരു ലുക്കാണ് ആ ചേച്ചിക്ക്? അറിയില്ലെടാ, പക്ഷേ ഒരു കാര്യം ഉറപ്പാണ്, ഏതോ ഭാഗ്യം ചെയ്തവൻ്റെ ഭാര്യയാണ് , ഈശ്വരാ … നമുക്കൊന്നും നീ ഇത് പോലൊരു ഭാര്യയെ തന്നില്ലല്ലോ? ശരിയാ ചേട്ടാ… ഇതിനെയൊക്കെ കാണുമ്പോഴാണ് ,സുരാജേട്ടൻ പറഞ്ഞത് പോലെ വീട്ടിലിരിക്കുന്നതിനെയെടുത്ത് കിണറ്റിലെറിയാൻ തോന്നുന്നത് #################### കല്യാണ പന്തലിൽ വച്ച് ,ഗീതയെ ചൂണ്ടിക്കാണിച്ച്, ക്യാമറാമാൻ്റെ സഹായിയായ പയ്യൻ ചോദിച്ച സംശയവും, അതിനയാൾ കൊടുത്ത മറുപടിയുമാണ്, തന്നിലുണ്ടായ മാറ്റത്തിന് കാരണമെന്ന് അയാൾ ഗീതയോട് പറഞ്ഞില്ല. NB :- ശരീരത്തിൽ കസ്തൂരിയുണ്ടെന്നറിയാതെ അതിൻ്റെ സുഗന്ധമന്വേഷിച്ച് നടക്കുന്ന മാനുകളെ പോലെയാണ് ചില പുരുഷൻമാർ, എന്ന് പറയാതെ വയ്യ ലൈക്ക് കമന്റ് ചെയ്യണേ…
രചന: Anu Swaroop
വീട്ടിലെ രണ്ടുപെണ്മക്കളിൽ ഇളയത് ആണെങ്കിലും വീട്ടുകാർക്ക് എന്നും ഒരു ഭാരം ആയിരുന്നു ഞാൻ,, ഞാൻ ജനിച്ചു പിറ്റേദിവസം ഒരു ആക്സിഡന്റ് പറ്റി അച്ഛൻ മരിച്ചു എന്ന കാരണം പറഞ്ഞു ആയിരുന്നു എന്നെ വീട്ടിലെ ഭാഗ്യദോഷി ആക്കിയത്, അമ്മക്ക് എന്നും പ്രിയപെട്ടവൾ ചേച്ചി തന്നെ ആയിരുന്നു, അമ്മയുടെ ഓരോ വാക്കിലും, പ്രവർത്തിയിലും അത് പ്രകടമായിരുന്നു എന്നേക്കാൾ രണ്ടു വയസ്സിനു മൂത്ത ചേച്ചി സ്കൂൾ പഠനം കഴിഞ്ഞു പട്ടണത്തിലെ കോളേജിൽ പോയപ്പോൾ ഞാനും ഒരുപാട് ആഗ്രഹിച്ചു,, പെൺകുട്ടികൾ പഠിച്ചിട്ട് എന്ത് കിട്ടാനാ എന്നുള്ള ചോദ്യം ആയിരുന്നു മറുപടി,.. അമ്മയെ വിധവയാക്കിയവൾ എന്ന പട്ടം നേരത്തെ ചാർത്തി കിട്ടിയതിനാൽ ബാല്യത്തിന്റെ നിറവും സ്വപ്നങ്ങളും ഒക്കെ എന്നേ പൊഴിഞ്ഞു പോയിരുന്നു,.. അമ്മയും ചേച്ചിയും ഉണ്ടായിട്ടും ഒരിറ്റ് സ്നേഹം തരാൻ ആരും ഇല്ലാതെ ഒറ്റപെട്ട ജീവിതം ആയിരുന്നു എന്നും,,.. കുത്തുവാക്കുകളും, ശാപവാക്കുകളും കേട്ടു കണ്ണുനീര് തുടക്കാൻ വേണ്ടി മാത്രം ഒരു ജന്മം,, എന്റെ ജന്മത്തെ ഞാൻ തന്നെ വെറുത്ത ദിനങ്ങൾ,,
ഗ്രാമത്തിലെ തയ്യൽ യൂണിറ്റിലെ തയ്യൽ പഠിത്തവും, വീട്ടിലെ അടുക്കളജോലിയും ആയിരുന്നു അമ്മ എനിക്ക് വേണ്ടി കരുതി വെച്ചിരുന്നത്… ഡിഗ്രി കഴിഞ്ഞു ഇറങ്ങിയ ചേച്ചിക്ക് വേണ്ടി വിവാഹആലോചന തുടങ്ങിയപ്പോൾ ആണ് അമ്മക്ക് ഞാൻ വീണ്ടും ഒരു ബാധ്യത ആവുന്നത്..,, കടമ തീർക്കാൻ എന്ന പേരിൽ ഇരുപത്തിരണ്ടുകാരിയായ തന്നെക്കാൾ ഇരട്ടി പ്രായം ഉള്ള ഒരാളെ ആയിരുന്നു അമ്മ കണ്ടെത്തിയത്,, മറ്റ് ആരുടെയോ നിർബന്ധത്തിൽ ആണ് അയാൾ ഈ വിവാഹത്തിന് സമ്മതിച്ചതെന്ന് ഒറ്റ നോട്ടത്തിൽ തന്നെ തോന്നിക്കും വിധം ആയിരുന്നു അയാളുടെ പെരുമാറ്റം, അത് അമ്മയോട് സൂചിപ്പിച്ച എന്നെ ചേച്ചിയുടെ മുന്നിൽ വെച്ചു തന്നെ പരിഹസിച്ചു വിട്ടു..,, “പിറന്നു വീണതെ എന്റെ താലിചരടും നെറ്റിയിലെ സിന്ദൂരവും മായിച്ചു, ഇനി കഴുത്തിൽ താലി ചാർത്തുന്നവന് എന്തൊക്കെയാണാവോ വരാൻ പോകുന്നത്” അമ്മയുടെ ആക്രോശത്തിനു മുന്നിൽ ഒന്നും പറയാൻ ഇല്ലാതെ തലയും താഴ്ത്തി മിണ്ടാതെ പോരേണ്ടി വന്നു എനിക്ക്,,, രണ്ടുമാസത്തിനപ്പുറം ചേച്ചിയോടൊപ്പം അണിഞ്ഞൊരുങ്ങി മനസ്സിൽ നിറയെ ഭയശങ്കകളോടെ മുഹൂർത്തം പ്രതീക്ഷിച്ചു കാത്തിരിക്കുമ്പോൾ ആണ് വീടിനുള്ളിൽ അടക്കിപിടിച്ച സംസാരവും, കുശുകുശുക്കലും കേട്ടത്… എന്തോ പ്രശ്നം ഉണ്ടെന്നു കൂടെ ഉണ്ടാരുന്നവരുടെ മുഖത്ത് നിന്നും മനസ്സിൽ ആക്കാൻ കഴിഞ്ഞു, ചോദിച്ചിട്ട് ആരും ഒന്നും പറയുന്നില്ല,,
മുറിക്കുള്ളിൽ കൂടി നിന്നവർ ഓരോരുത്തരായി പുറത്തേക്കു ഇറങ്ങി പൊയ്‌കൊണ്ടിരുന്നു എന്താ സംഭവിച്ചേ എന്നു അറിയാൻ ഉള്ള ആകാംഷ കൊണ്ടു ഇരുന്നിടത്തുനിന്നും എഴുന്നേറ്റു വാതിലിനു നേർക്കു നടക്കാൻ തുടങ്ങിയപ്പോൾ ആണ് അമ്മ കൊടുംകാറ്റ് പോലെ ഉള്ളിലേക്ക് കയറി വന്നത്,,… “എന്നോട് എല്ലാവരും പറഞ്ഞതാ ഈ അശ്രീകരത്തെ എന്റെ മോളുടെ കൂടെ പന്തലിൽ ഇറക്കണ്ട എന്നു.., അന്ന് ഞാൻ അത് കേട്ടില്ല,അത് എന്റെ തെറ്റ്‌..,,നിന്നെ താലികെട്ടാൻ വരാം എന്നു സമ്മതിച്ചവൻ വേറെ ഒരു പെണ്ണിനേയും കൊണ്ടു ഓടി പോയെടി… പെൺകുട്ടികൾ ആയാൽ കുറച്ചു ഒക്കെ ഭാഗ്യം വേണം,.. നിനക്കിപ്പോൾ മതിയായല്ലോ എല്ലാം, എന്റെ കുഞ്ഞിന്റെ ജീവിതം കൂടി നീ കാരണം നശിക്കുമല്ലോ എന്റെ ദേവിയെ….” അമ്മേ ഞാൻ….പറയാൻ വന്നത് മുഴുവൻ ആക്കാൻ കഴിയാതെ നിന്നു പോയി താൻ..,, അമ്മ അലമുറ ഇട്ടു കരഞ്ഞു കൊണ്ടിരുന്നു,,
“ലീലേടത്തി… ഇങ്ങനെ കരഞ്ഞു ബഹളം വെച്ചിട്ട് കാര്യം ഒന്നും ഇല്ലല്ലോ?? പ്രശ്നം പരിഹരിക്കാൻ ഉള്ള വഴി അല്ലെ നോക്കണ്ടത് നമ്മൾ… നിങ്ങൾക്ക് സമ്മതം ആണെങ്കിൽ ഒരു പയ്യൻ ഉണ്ട് ഞങ്ങളുടെ കൂടെ, മുഹൂർത്തം തെറ്റാതെ നമുക്ക് നടത്താം ഇത്,.. പയ്യന്റെ അമ്മാവന്റെ മകൻ ആണ് ഇത്, എല്ലാ കാര്യങ്ങൾക്കും അവൻ കൂടെ ഉണ്ടാരുന്നത് കൊണ്ടു ഇനി ഒരു ചർച്ചയുടെ ആവശ്യം വരുന്നില്ല” “അത് വേണോ?? എന്നുള്ള അമ്മയുടെ ചോദ്യത്തിന് അകത്തേക്ക് കയറി വന്ന എന്റെ പ്രിയപ്പെട്ടവൻ തന്നെ ആയിരുന്നു ഉത്തരം കൊടുത്തത്…. “വേണം എനിക്ക് ഇഷ്ടാ ഈ പെൺകുട്ടിയെ…
അവളെ എനിക്ക് തന്നേരെ അമ്മേ….,,,” മഞ്ഞനൂലിൽ കോർത്ത താലി കഴുത്തിൽ ചാർത്തി തന്നു, ഹാരവും അണിയിച്ചു, നെറ്റിയിൽ സിന്ദൂരവും തൊടുവിച്ചു തന്നു, കയ്യോട് കയ്യ് ചേർത്തു പിടിച്ചു മണ്ഡപം ചുറ്റുന്ന ഞങ്ങളെ എവിടെ നിന്നോ വന്ന ഒരിളം കാറ്റ് തഴുകി കടന്നു പോയി…ആ കാറ്റു എന്റെ ചെവിയിൽ പറഞ്ഞു മോളെ അച്ഛന്റെ അനുഗ്രഹം എന്നും മോൾക്ക്‌ ഉണ്ടാവും എന്നു…… അത് അങ്ങനെയാണ് ആരും ഇല്ലാത്തവർക്ക് ദൈവം ഉണ്ടാകും എന്തിനും.. ഏതിനും കൂടെ..,,, ലൈക്ക് ചെയ്ത് അഭിപ്രായങ്ങൾ അറിയിക്കൂ… നിങ്ങളുടെ സ്വന്തം രചനകൾ പേജിലേക്ക് അയച്ചു തരിക…