Relationship
എന്നെയും മക്കളെയും വിട്ട് പോവാൻ ഹരിയേട്ടനാവില്ല…
രചന: Praji Ck
“ഹരിയേട്ടാ…. എന്താ ഉറങ്ങിയില്ലേ ഇതുവരെ.” ഉറക്കത്തിനിടയിൽ പെട്ടെന്ന് ഉണർന്നതായിരുന്നു രാജി. അപ്പോഴാ റൂമിൽ ഒരു നിഴൽ അനക്കം കണ്ടത് അത് ഹരിയായിരുന്നു. അങ്ങോട്ടും ഇങ്ങോട്ടും സമാധാനം ഇല്ലാത്ത പോലെ നടക്കുവായിരുന്നു ഹരി. അഴിഞ്ഞു തൂങ്ങിയ മുടി വാരികെട്ടി വലതു കണ്ണ് തിരുമ്മിക്കൊണ്ട് രാജി ഹരിയുടെ അടുത്തേക് വന്നു റൂമിലെ ലൈറ്റ് ഇട്ടു. “എന്ത് പറ്റി ഹരിയേട്ടാ ഇന്ന് അത്താഴം പോലും കഴിച്ചില്ലല്ലോ…” വിളിച്ചപ്പോൾ വിശപ്പില്ലെന്ന് പറഞ്ഞോണ്ടല്ലേ ഞാൻ ചോറിൽ വെള്ളം ഒഴിച്ച് വെച്ചത്. ഇപ്പോ നന്നായി വിശക്കുന്നുണ്ടല്ലേ. നിക്ക് ഞാനിപ്പോ ഉപ്പുമാവ് ഉണ്ടാക്കി തരാം ഇത്തിരി റവ ഇരിപ്പുണ്ട്. “എനിക്കൊന്നും വേണ്ടാ”… ഇത്തിരി സ്വൈര്യം തന്നാ മതി,,,,, മിണ്ടാതെ കിടന്നുറങ്ങിക്കൂടെ നിനക്ക് !ഏത് നേരവും മനുഷ്യന് ഒരു സമാധാനം തരാതെ വന്നോളും…. പെട്ടെന്നുള്ള ഹരിയുടെ ദേഷ്യം കണ്ടപ്പോ രാജിയുടെ കണ്ണ് നിറഞ്ഞു തുളുമ്പി… ശബ്ദം ഇടറിക്കൊണ്ട് ആണേലും രാജി പതിയെ പറഞ്ഞു. “ഹരിയേട്ടാ,,, അത്,,, ഞാൻ.. ഹരിയേട്ടനെ ഇങ്ങനെ കണ്ടപ്പോ സഹിക്കാത്തോണ്ടാ.” “മതി എന്റെ മുന്നിൽ നിന്നും പോ….” ഹരിയുടെ വാക്കുകൾക്കു മൂർച്ച കൂടിവന്നു. പൊട്ടിക്കരയാൻ തോന്നിയെങ്കിലും വാ പൊത്തിപിടിച്ചു രാജി കട്ടിലിന്റെ മറുവശത്ത് ശബ്ദം പുറത്ത് കേൾക്കാത്ത രീതിയിൽ കരഞ്ഞു കൊണ്ട് കിടന്നു . അതിനിടയിൽ എപ്പോഴോ രണ്ടുപേരും ഉറങ്ങിപോയിരുന്നു. ന്യൂസ്‌പേപ്പർ ഇടാൻ വരുന്ന പയ്യന്റെ സൈക്കിൾ ബെൽ കേട്ടാണ് രാജി കണ്ണ് തുറന്നത്…. . ഈശ്വരാ,,,,,, നേരം ഒരുപാട് ആയല്ലോ. ഇന്നാണ് ഹരിയേട്ടന്റെ വല്യച്ഛന്റെ മോന്റെ “കല്യാണം” . പെട്ടെന്നു വീട്ടുജോലി എല്ലാം തീർത്തു അങ്ങോട്ട് പോവണം വീട്ടുകാരാണ് വൈകി ചെല്ലുന്നത് മോശമാണ് നാട്ടുകാർ എന്താ പറയാ. ഹരി ഏട്ടൻ ആണേൽ ഇന്നലെ പോലും അങ്ങോട്ടൊന്നു, ചെന്ന് നോക്കിയിട്ടില്ല. “സ്ഥാനം കൊണ്ട് ഹരിയേട്ടൻ ആ വീട്ടിലെ ഏട്ടൻ ആണ്”. രാജി ദൃതി പിടിച്ച് എഴുനേറ്റ് വാതിൽ തുറക്കാൻ തുടങ്ങിയപ്പോൾ ഹരിയെ ഒന്നു തിരിഞ്ഞുനോക്കി. എന്താന്നറിയില്ല വല്ലാത്തൊരു ദേഷ്യം സങ്കടം എല്ലാംകൂടിയാണ് അപ്പോ അവൾക് തോന്നിയത്….. അവൾ വാതിൽ തുറന്ന് പുറത്തേക്ക് പോയി. കുളിയെല്ലാം കഴിഞ്ഞ് അടുക്കളയിൽ കയറി ചായയും പലഹാരവും ഉണ്ടാക്കാൻ തുടങ്ങി. അതിനിടക്ക് അടുത്ത റൂമിൽ കിടന്നുറങ്ങുന്ന രണ്ട് മക്കളെയും തട്ടി വിളിച്ചു എഴുനെല്പിച്ചു. “ന്താ ഇന്നു കല്യാണത്തിന് പോണില്ലേ രണ്ടാളും.” ഉണ്ണാൻ നേരത്തല്ല അങ്ങോട്ട് കേറി ചെല്ലേണ്ടത് . അച്ഛനോ ആ ഒരു ബോധം ഇല്ല ഇനി മക്കളും കൂടെ അങ്ങനെ ആവാനാണോ പരിപാടി . “വേഗം കുളിച്ചിട്ട് വാ രണ്ടാളും അമ്മ കഴിക്കാൻ എടുത്ത് വെക്കാം എന്നിട്ട് വേണം നമുക്ക് അങ്ങോട്ട് പോവാൻ…..” “ഇപ്പോ തന്നെ അവിടെ എല്ലാവരും എത്തിക്കാണും.” “ദേ….. അമ്മേടെ ഫോൺ റിങ് ചെയ്യുന്നു. ചേച്ചിയമ്മയാ രാജിയുടെ ഇളയ മോൻ ബ്രെഷ് ചെയ്തുകൊണ്ട് ഫോൺ എടുത്ത് നോക്കി പറഞ്ഞു.” ദോശ മറിച്ചിട്ട്കൊണ്ട് രാജി മോനോട് ഉറക്കെ വിളിച്ചു പറഞ്ഞു,,, ആ, നീ അതെടുത്തിട്ട് പറഞ്ഞേക്ക് അമ്മ ഇപ്പോ അങ്ങട് തിരിച്ചു വിളിക്കാം ന്ന്. വേഗം ദോശ എല്ലാം ഉണ്ടാക്കി ഫോൺ എടുത്ത് ഉമ്മറത്തു പോയ രാജി ചേച്ചിയെ വിളിക്കാൻ തുടങ്ങി. നീ ഒരുങ്ങിയില്ലേ,,, ,രാജി !ഞാൻ ഇപ്പോൾ അങ്ങട് എത്തും ട്ടോ….. യ്യോ…. അങ്ങോട്ട് പോവല്ലേ ചേച്ചി നേരെ ഇങ്ങോട്ടു വാ നമുക്ക് ഒരുമിച്ച് പോവാം….. ഞാൻ ദേ ഇപ്പോൾ ഒരുങ്ങും അഞ്ചു മിനിറ്റ്. എന്നിട്ട് രാജി മുറിലേക്കു ഓടി സാരി ഉടുക്കാൻ വേണ്ടി അലമാരയിൽ ഒരു പരതൽ തന്നെ നടത്തി.
ഉള്ളതിൽ വെച്ച് ഏറ്റവും പുതിയത് ഉടുക്കാം കഴിഞ്ഞ ഓണത്തിന് “അമ്മ” എടുത്ത് തന്നതാ !അത് മതി ആരും അതുടുത്ത് കണ്ടിട്ടുമില്ല…. അപ്പോ പിന്നെ ഇന്നു കല്യാണത്തിന് ഷൈൻ ചെയ്യാൻ ഇത് തന്നെ ധാരാളം. രാജി പെട്ടന്ന് തന്നെ ആ സാരി ഒക്കെ ഉടുത്ത് ഒരുങ്ങി മുറിയിൽ നിന്നും ഇറങ്ങാൻ തുടങ്ങുവായിരുന്നു. അപ്പോൾ അവളുടെ മനസ്സ് അവളെ ഹരിയുടെ അടുത്തേക്ക് വലിച്ചു…. രാജി ഹരിയുടെ അടുത്തേക് ചെന്ന് കട്ടിലിൽ ഇരുന്നു പതിയെ ഹരിയുടെ തോളിൽ കൈവെച്ചുകൊണ്ട് ഹരിയെ വിളിച്ചു. ഹരിയേട്ടാ… ഞാനും മക്കളും പോവാ ട്ടോ വല്യച്ഛന്റെ വീട്ടിലേക്ക്. ഡൈനിങ് ടേബിളിൽ ചായ എടുത്ത് വെച്ചിട്ടുണ്ട്, ഷർട്ടും വെള്ള മുണ്ടും തേച് വെച്ചിട്ടുണ്ട്. പിന്നെ,,, ഹരിയേട്ടൻ പെട്ടെന്നു അങ്ങട് വരണേ എല്ലാവരും ചോദിക്കും. മറക്കല്ലേ ട്ടോ പെട്ടെന്നു വരണേ… ഇത്രയും പറഞ്ഞ് രാജി ദൃതിയിൽ എഴുന്നേൽക്കാൻ തുടങ്ങുമ്പോൾ ഹരി അവളുടെ കൈകളിൽ ഒന്നിൽ മുറുകെ പിടിച്ച് അവനിലേക്ക് വലിച്ചടുപ്പിച്ചു കൊണ്ട് അവളെ കെട്ടി പിടിച്ചു… എന്നിട്ട് പതിഞ്ഞ സ്വരത്തിൽ അവളോട് ചോദിച്ചു എന്നോട് വെറുപ്പ് ആണോ നിനക്ക്. ഞാൻ ഇന്നലെ ഒരുപാട് ദേഷ്യപ്പെട്ടു പോയി എന്നോട് എന്റെ മോൾ ക്ഷമിക്ക് ഇനി ഒരിക്കലും ഹരിയേട്ടൻ നിന്നോട് ദേഷ്യപ്പെടില്ല. ഞാൻ നിനക്ക് ഒരുമ്മ തരട്ടെടി ആഗ്രഹം കൊണ്ടാണ്. നീയും എനിക്ക് ഒരുമ്മ തന്നെ എന്റെ നെഞ്ചിൽ ഒന്നു ചേർന്ന് കിടന്നേ…. അയ്യടാ,,, ഹരിയെ തള്ളി മാറ്റി അവിടുന്ന് പെട്ടെന്ന് എഴുനേറ്റ് കൊണ്ട് രാജി പറഞ്ഞു. മോൻ പല്ലൊക്കെ തേച് കുളിച്ച് ചായ കുടിച്ച് കല്യാണത്തിന് വാ…. എന്നിട്ട് ആലോചിക്കാം തിരികെ വന്നിട്ട് ഉമ്മ തരണോ, വാങ്ങണോ എന്നൊക്കെ. രാജി ഡീ ഒരുങ്ങിക്കഴിഞ്ഞില്ലേ നീ ഇതുവരെ മുറ്റത്ത്‌ നിന്നും ചേച്ചിയുടെ വിളി ആയിരുന്നു അത്. ദാ,,,, കഴിഞ്ഞു ചേച്ചി….. ഹരിയേട്ടാ ഞാൻ ഇറങ്ങുവാ. അങ്ങോട്ട് വേഗം വരണേ എന്നും പറഞ്ഞുകൊണ്ട് രാജി മക്കളെയും കൂട്ടി വീട്ടിൽ നിന്നും ഇറങ്ങി. രാജിയും മക്കളും അവിടെ എത്തി ഏകദേശം ഒരു മണിക്കൂർ കഴിഞ്ഞപ്പോ തുടങ്ങിയത രാജിയുടെ ഫോണിലേക്കു ഹരിയുടെ വിളി. നിങ്ങളിങ്ങനെ ഫോണിൽ വിളിക്കാതെ ഇങ്ങോട്ട് വേഗം വാ മനുഷ്യാ കുടുംബക്കാർ എല്ലാം അന്വേഷിക്കുന്നുണ്ട്. അത്,,, പിന്നെ ഞാൻ വരാൻ ഇത്തിരി വൈകും രാജി എന്നെ കാത്തു നിൽക്കണ്ട നീ ഊണ് കഴിച്ചിട്ട് എന്നെ ഒന്ന് വിളിക് ട്ടോ മറക്കല്ലേ. ന്താ ഹരിയേട്ടാ ഇത്,,, എന്ന് പറയും മുൻപ് ഹരിയുടെ കാൾ കട്ട്‌ ആയിരുന്നു. ഒരു പത്തു മിനിറ്റിനു ശേഷം ഹരി രാജിയെ വീണ്ടും വിളിച്ചു ഇങ്ങനെ ഒരുപാട് തവണ രാജിയെ വിളിച്ചു കൊണ്ടിരുന്നു. അവസാനം രാജി അങ്ങോട്ട് വിളിച്ചു ഹരിയേട്ടാ എല്ലാവരും കഴിച്ചു ഇനി ഞാനും ചേച്ചിയും ഇരിക്കുവാ ട്ടോ. ആ എന്നാ പിന്നേ നീ കഴിച്ചിട്ട് എന്നെ ഒന്നുടെ വിളിക്കണേ എന്തായാലും വിളിക്കണം. എന്താടി നിന്റെ കെട്ട്യോന് ഇന്ന് ഒടുക്കത്തെ സ്നേഹം ആണല്ലോ എന്താ കാര്യം ചേച്ചി കളിയാക്കികൊണ്ട് ചോദിച്ചു. അതുകേട്ടപ്പോൾ രാജിക്ക് നന്നായി സുഖിച്ചു എന്നാലും ഉള്ളിലെ സന്തോഷം പുറത്ത് കാണിക്കാതെ ഊണ് കഴിച്ചു കഴിഞ്ഞ് രാജി എഴുന്നേറ്റ് കൈകഴുകാൻ പോയി. വന്നിട്ട് ഫോൺ എടുത്ത് ഹരിയെ തിരികെ വിളിച്ചു റിങ് ചെയ്യുന്നുണ്ട് എന്നാൽ ഹരി കാൾ എടുത്തില്ല. ഇങ്ങേര് ഇതെവിടെ പോയിരിക്കുവാ ഫോൺ ബെൽ അടിയുന്നത് കേൾക്കുന്നില്ലേ ആവോ…. രാജി അങ്ങനെ പറഞ്ഞോണ്ടിരിക്കുമ്പോൾ ദേ ഹരിയുടെ കാൾ ഇങ്ങോട്ട് വരുന്നു. രാജി ഫോൺ എടുത്തു ഹരിയേട്ടാ…. ഞങ്ങൾ കഴിച്ചുകഴിഞ്ഞു ട്ടോ. എടി ഞാൻ ഇപ്പോ വിളിച്ചത് വേറൊരു കാര്യം പറയാനാ ഞാൻ നിനക്ക് പുതിയ സാരി വാങ്ങിച്ചു തരണം എന്ന് വിചാരിച്ചിരുന്നത അതിന് കഴിഞ്ഞില്ല. നിനക്ക് അതിൽ വിഷമം ഉണ്ടാവുംന്ന് എനിക്കറിയാം. ഹരിയേട്ടന്റെ കയ്യിൽ ഒന്നും ഇല്ലാത്ത അവസ്ഥ ആയിപോയി നീ എന്നെ വെറുക്കല്ലേ മോളെ…. അയ്യേ എന്റെ ഹരിച്ചെക്കന് ഇന്ന് എന്താ പറ്റിയത് ഫുൾ സങ്കടം സ്നേഹം എല്ലാം വാരിക്കോരി ചൊരിയുവാണല്ലോ.. എനിക്ക് ഒരു വിഷമോം ഇല്ല്യ ട്ടോ….. ഞാൻ പുതിയ സാരി തന്നെയാ ഉടുത്തിരിക്കുന്നത്. ന്നാലും,,,, നീ ഒരുപാട് ആശിച്ചതായിരുന്നില്ലേ ഞാൻ വാങ്ങിച്ചു തന്നില്ലല്ലോ…. അതോർക്കുമ്പോൾ “സങ്കടം തന്നെയാടി ഈ നെഞ്ചിനുള്ളിൽ”….. എന്തായാലും ന്റെ മോൾക്ക് ഞാൻ രണ്ട് പുതിയ നൈറ്റി വാങ്ങിച്ചു വെച്ചിട്ടുണ്ട്. ഇന്നു മുതൽ വീട്ടിൽ അത് ഇട്ടാൽ മതി. പഴയത് എല്ലാം പിഞ്ഞി തുടങ്ങിയതല്ലേ ആളുകൾ കണ്ടാൽ,,, അത് ഇനി വേണ്ടാ…. നീ വീട്ടിൽ എത്തിയാൽ ഞാൻ പറഞ്ഞത് പോലെ അതിലൊരെണ്ണം എടുത്ത് ഇടണം. ഞാൻ വരുമ്പോൾ എനിക്ക് അങ്ങനെ കാണണം നിന്നെ. ന്നാ,,,, ശരി നീയും മക്കളും പെട്ടെന്ന് ഇങ്ങട് വരണ്ട വൈകുന്നേരം എത്തിയാൽ മതി നീ വരുമ്പോൾ ഞാൻ ഇവിടെ ണ്ടാവില്ല പുറത്തോട്ട് ഒന്ന് ഇറങ്ങുവാ ഞാൻ. അപ്പൊ ഇനി വിളിക്കണ്ട.
ഉം,,, ന്നാൽ ഞാൻ വൈകുന്നേരം എത്തിക്കോളാം ഹരിയേട്ടൻ പൊയ്ക്കോളൂ. ഇടക് സമയം കിട്ടിയപ്പോൾ എല്ലാം രാജി ഹരിയെ വിളിക്കുന്നുണ്ടായിരുന്നു. പക്ഷെ ഹരി ഫോൺ എടുത്തിരുന്നില്ല. വൈകുന്നേരം വീട്ടിൽ എത്തിയ രാജി ഹരി പറഞ്ഞത് പോലെ ബെഡ്‌റൂമിൽ എടുത്തുവെച്ചിരുന്ന നൈറ്റികളിൽ ഒരെണ്ണം എടുത്ത് നോക്കി. അതിൽ ഹരിക്കിഷ്ടപ്പെട്ട വയലറ്റ് കളർ നൈറ്റി തന്നെ എടുത്ത് കുളിക്കാൻ പോയി. അത് ഇട്ടുകൊണ്ട് അടുക്കളയിൽ ചെന്ന് ഒരു കട്ടൻ ഉണ്ടാകാനുള്ള പരിപാടിയിലായിരുന്നു രാജി. പെട്ടെന്നു തിരിച്ചു പോയ ചേച്ചിയമ്മയും വല്യച്ചനും അനിയനും പുതുപെണ്ണും എല്ലാവരും കൂടെ വീട്ടിലേക്കു വരുന്നത് അടുക്കളയുടെ ജനലിലൂടെ രാജിയുടെ കണ്ണിൽ ഉടക്കി…. ഇതെന്താ, ഇപ്പൊ ഇവരെല്ലാം കൂടെ ഇങ്ങോട്ട്? എന്ന് പറഞ്ഞുകൊണ്ട് ചായക് ഓണാക്കിയ ഗ്യാസ്സ്റ്റവ് ഓഫാക്കി രാജി ഉമ്മറത്തേക്ക് ചെന്നു. എന്താ എല്ലാരും കൂടെ ഇങ്ങോട്ട്. അവൾക് അത്ഭുതവും അതിലപ്പുറം മനസിലൊരു ആദിയും കേറിതിളക്കാൻ തുടങ്ങി….. മോളെ നീ അകത്തോട്ടു ചെല്ല് രാജിയുടെ കൈ പിടിച്ചു വല്യച്ഛൻ അവളെ നോക്കികൊണ്ട് കരയാൻ തുടങ്ങിയിരുന്നു. എന്താ വല്യച്ചാ? എന്താ പറ്റിയത്? ചേച്ചീ എന്താ??? എന്തോ ഉണ്ട്? എന്തോ സംഭവിച്ചിട്ടുണ്ട് നിങ്ങളെല്ലാരും കൂടെ എന്തിനാ ഇങ്ങോട്ട് വന്നത് പറ ചേച്ചീ… അത് രാജി നിന്നോട് എങ്ങനാടി ഞാൻ പറയുക എന്ന് പറഞ്ഞുകൊണ്ട് ചേച്ചിയും അവളെ കെട്ടിപിടിച്ചു കൊണ്ട് കരയാൻ തുടങ്ങി. നിങ്ങളെല്ലാരും എന്താ ഇങ്ങനൊക്കെ,,,, ആരും ഒന്നും പറയുന്നില്ല ല്ലോ ഞാൻ ഹരിയേട്ടനെ ഒന്ന് വിളിച്ചു പറയട്ടെ. രാജി ഡൈനിങ്ങ് ടേബിളിൽ ഇരുന്ന ഫോൺ എടുക്കാൻ തിരിഞ്ഞതും രാജിയെ കൈനീട്ടി തടഞ്ഞു കൊണ്ട് അനിയൻ പറഞ്ഞു. രാജിയേച്ചീ നിങ്ങളിപ്പോ ഹരിയേട്ടനെ വിളിക്കണ്ട…. ഏട്ടൻ ഫോൺ എടുക്കില്ല. അതെന്താടാ അങ്ങനെ രാജി അവനെ സംശയത്തോടെ ഒന്ന് നോക്കി . ഹരിയേട്ടൻ നമ്മളെ വിട്ട് പോയി ഇനി ഏട്ടൻ നമ്മളോട് സംസാരിക്കില്ല…. പെട്ടെന്നു ശബ്ദം നിലച്ചപോലെ രാജി മിണ്ടാതായി സെക്കന്റ്‌കൾക്കുള്ളിൽ അവിടെ കുഴഞ്ഞു വീണു… അപ്പോഴേക്കും നാട്ടുകാരും ബന്ധുക്കളും എല്ലാം വീട്ടിലേക്ക് വന്നുതുടങ്ങിയിരുന്നു. രാജിക്ക് ബോധം തെളിഞ്ഞില്ല കുറച്ചു പേര് ചേർന്ന് അവളെ ഹോസ്പിറ്റലിലേക്ക് കൊണ്ടുപോയി. അവിടെ അബോധവസ്ഥയിൽ കിടന്നിരുന്ന രാജി ഇടക്ക് കണ്ണുകൾ തുറന്നു ചുറ്റും നോക്കി. ചേച്ചി അവളുടെ അടുത്ത് തന്നെ ഇരിപ്പുണ്ടായിരുന്നു. ദയനീയമായി അവൾ ചേച്ചിയെ ഒന്ന് നോക്കി എന്നിട്ട് ശബ്ദം ഇടറിക്കൊണ്ട് യാചിച്ചു എനിക്ക് എന്റെ ഹരിയേട്ടനെ ഒന്ന് കാണണം. ഇവിടുന്നു പോവാം എന്നെ ഒന്നു കൊണ്ടോയി കാണിക്ക് എനിക്ക് ഹരിയേട്ടൻ ഇല്ലാതെ ജീവിക്കാൻ പറ്റില്ലന്ന് എന്റെ ഹരിയേട്ടനറിയാം. എന്നെയും മക്കളെയും വിട്ട് പോവാൻ ഹരിയേട്ടനാവില്ല ചേച്ചിയുടെ കൈകളിൽ പിടിച്ചു അവളുടെ നെഞ്ചോട് ചേർത്ത് വാവിട്ട് കരഞ്ഞുകൊണ്ട് രാജി നിർത്താതെ പുലമ്പിക്കൊണ്ടിരുന്നു… എല്ലാം കണ്ട് കൊണ്ടിരിക്കുന്ന ഹരിയുടെ ഒരു സുഹൃത്ത്,,,, രാജിയുടെ അടുത്തേക് വന്നു എന്നിട്ട് ഒരു കത്ത് എടുത്ത് അവൾക്ക് നേരെ നീട്ടി…. രാജി… ഇതവൻ പോകും മുൻപ് എന്നെ ഏൽപ്പിച്ചതാണ് നിനക്ക് തരാൻ. അവൻ ഇങ്ങനൊരു കടുംകൈ ചെയ്യാൻ പോകുകയാണെന്ന് ഞാൻ കരുതിയില്ല അറിഞ്ഞിരുന്നെങ്കിൽ ഞാൻ ഒരിക്കലും അനുവദിക്കില്ലായിരുന്നു. രാജി ആ കത്ത് വാങ്ങിച്ചു തുറന്ന് വായിക്കാൻ ശ്രമിച്ചു… കണ്ണുനീർ നിറഞ്ഞൊഴുകുന്നതുകൊണ്ട് അവൾക് അക്ഷരങ്ങൾ പോലും വ്യക്തമായിരുന്നില്ല. എന്നിട്ടും അവൾ വായിക്കാൻ ശ്രമിച്ചു…. രാജി നീ എന്നോട് പൊറുക്കണം ! ഒരിക്കലും പൊറുക്കാൻ പറ്റുന്ന തെറ്റല്ല ഞാൻ നിന്നോട് ചെയ്യുന്നത്. എന്നാൽ എനിക്ക് ഇതല്ലാതെ വേറെ വഴിയില്ല മോളെ,, ,,, ഹരിയേട്ടൻ ഒരു കോടീശ്വരൻ ഒന്നും അല്ലന്ന് നിനക്കറിയാലോ ഉള്ളതുകൊണ്ട് ജീവിക്കാൻ നമുക്ക് കഴിഞ്ഞിരുന്നു…. എന്നിട്ടും അതിനിടക്ക് ഒരത്യാവശ്യം വന്നപ്പോൾ നിന്റെ ഹരിയേട്ടന് കടക്കാരൻ ആവേണ്ടി വന്നു. ഓർമ്മ വെച്ചനാൾമുതൽ ഇന്നുവരെ ആരുടെയും മുൻപിൽ കടക്കാരനായി നിൽക്കേണ്ടി വന്നിട്ടില്ല ഈ ഹരിക്ക് . കുറച്ചു നാൾ മുൻപ് രാമേട്ടനോട് ഞാൻ 5000 രൂപ വാങ്ങിയിരുന്നു നിന്നോട് അത് പറഞ്ഞിരുന്നില്ല….. മനഃപൂർവം പറയാതിരുന്നതാണ്. ഒരു മാസം ആയി അത് തിരിച്ചു കൊടുക്കാനുള്ള സമയം കഴിഞ്ഞിട്ട്. രാമേട്ടൻ മൂന്ന് നാലു തവണ ചോദിച്ചിരുന്നു കൊടുക്കാൻ കഴിയാത്ത അവസ്ഥ ആയിപോയി എനിക്ക്. പറഞ്ഞവാക്കിനു വില ഇല്ലാതെ മാനം കെട്ട് ജീവിക്കാൻ നിന്റെ ഹരിയേട്ടന് ആവില്ലെടി….. അതുകൊണ്ട് ഞാൻ പോകുവാ…. നീ കരയരുത്. നമ്മുടെ മക്കൾക്കുവേണ്ടി നീ ജീവിക്കണം. ഹരിയേട്ടന്റെ പ്രാണൻ ആണ് നീ…. എല്ലാം വായിച്ച ശേഷം ഒന്നൂടെ വാവിട്ട് നിലവിളിച്ചു കൊണ്ടവൾ പറഞ്ഞു എന്നെയും കൂടെ കൂട്ടായിരുന്നില്ലേ ഹരിയേട്ടാ… ജീവിക്കാൻ ആണേലും മരിക്കാൻ ആണേലും ഈ രാജി കൂടെ ഉണ്ടാവുമെന്ന് അറിഞ്ഞിട്ടും എന്നെ തനിച്ചാക്കി പോയില്ലേ ഹരിയേട്ടാ…. അപ്പോഴേക്കും രാജിയുടെ കരച്ചിൽ അവിടെ ഉണ്ടായിരുന്നവരെ ആകെ കണ്ണീരിലാഴ്ത്തികഴിഞ്ഞിരുന്നു….
(NB: ലക്ഷങ്ങൾ കടങ്ങൾ ഉള്ള എത്രയോ പേര് ജീവിക്കുന്ന നാട്ടിൽ ഇതുപോലുള്ള ഹരിമാരും ഉണ്ട് ആരും അറിയാതെ പോകുന്ന ആത്മാഭിമാനം ഒരുപാട് ഉള്ള ജീവിച്ച് കൊതി തീരാത്ത ഹരിമാർ…. )
രചന: Unni K Parthan
#ഇനിയും.. “പഠിക്കാൻ ആഗ്രഹം ഇല്ലാഞ്ഞിട്ട് അല്ല ഏട്ടാ.. വിവാഹം കഴിഞ്ഞു ഇത്രേം മാസമല്ലേ ആയുള്ളൂ.. ഏട്ടന്റെ അമ്മയും അച്ഛനുമൊക്കെ ന്ത് വിചാരിക്കും..” ദേവികയുടെ ചോദ്യം കേട്ട് നിഖിൽ ചിരിച്ചു.. “നീ പഠിക്കാൻ പോകുന്നതിനു അവർക്ക് ന്താ ന്നേ… മാത്രല്ല നീ എന്റെ ഭാര്യയല്ലേ.. എന്റെ ഭാര്യ എന്ത് ചെയ്യണമെന്ന് ഞാൻ അല്ലെ തീരുമാനിക്കേണ്ടത്..” നിഖിൽ പറഞ്ഞത് കേട്ട് ദേവിക ഒന്ന് പതറി.. “അറിയാലോ ഏട്ടാ.. വീട്ടിലേ സാഹചര്യം.. മാത്രമല്ല നമ്മുടെ ലവ് മാര്യേജ് ആണ്.. ഏട്ടന്റെ അമ്മയ്ക്ക് ഒട്ടും താല്പര്യമില്ലായിരുന്നു എന്നേ.. ഏട്ടന്റെ നിർബന്ധം കൊണ്ടല്ലേ.. ഞാൻ ഈ വീട്ടിൽ വലതു കാൽ വച്ചു കയറിയത്..” ദേവികയുടെ ശബ്ദം ഇടറി.. “എനിക്ക് വിശക്കുന്നു.. നീ കഴിക്കാൻ എടുത്തു വെച്ചേ.. ഞാൻ കുളിച്ചിട്ട് താഴേക്ക് വരാം.. നേരത്തെ ഉറങ്ങണം.. രാവിലെ നേരത്തെ എണിക്കണം എനിക്ക്..” കൂടുതൽ ഒന്നും പറയാതെ നിഖിൽ.. ബാത്‌റൂമിലേക്ക് നടന്നു.. ദേവിക എഴുന്നേറ്റു താഴേക്ക് ചെന്നു.. “നിഖിൽ എവിടെ മോളേ..” പത്മാവതി ദേവികയോട് ചോദിച്ചു.. “കുളിക്കാൻ കേറി.. കഴിക്കാൻ എടുത്തു വെയ്ക്കാൻ പറഞ്ഞു ഏട്ടൻ..” “മ്മ്.. മോള് ഇങ്ങോട്ട് ഇരുന്നേ..” സെറ്റിയിൽ തനിക്കു അരികിലേക്ക് പത്മാവതി ദേവികയേ വിളിച്ചു.. “ന്തേ.. പഠിക്കാൻ പോണുണ്ടോ എന്നിട്ട്..” പത്മാവതിയുടെ ചോദ്യം കേട്ട് ദേവിക ഒന്ന് ഞെട്ടി… “കൃഷ്ണാ.. കൊല്ലാൻ ആണോ വളർത്താൻ ആണോ..” ദേവിക മനസ്സിൽ ചോദിച്ചു.. “അത് പിന്നേ…” ദേവിക വിക്കി.. ”
മോൾക്ക് ഇപ്പോളും എന്നേ മോളുടെ അമ്മയായി കാണാൻ കഴിഞ്ഞിട്ടില്ല ല്ലേ..” പത്മാവതിയുടെ ചോദ്യം കേട്ട് ദേവിക ഒന്ന് പിടിഞ്ഞു.. “ന്തേ..അമ്മ അങ്ങനെ ചോദിച്ചത്..” “അമ്മയേ മാത്രം അല്ല അച്ഛനേയും മോൾക്ക് അങ്ങനെ കാണാൻ കഴിഞ്ഞിട്ടില്ല ലോ..” ഹരി ദേവികയേ നോക്കി പുഞ്ചിരിച്ചു കൊണ്ട് ചോദിച്ചു.. ദേവിക നിന്നിടത്തു നിന്ന് ഉരുകി.. “മോളേ..” പത്മാവതിയുടെ വിളി കേട്ട് ദേവിക തലയുയർത്തി നോക്കി.. “ഈ വിവാഹത്തിന് ഇഷ്ടകുറവ് ഉണ്ടായിരുന്നു എന്നുള്ളത് സത്യം.. പക്ഷെ.. ഈ വീട്ടിൽ വലതു കാൽ വെച്ച് കയറിയതു മുതൽ ഇന്ന് വരെയുള്ള ഈ നിമിഷം വരെ ഞങ്ങൾക്ക് മോള്.. ഞങ്ങളുടെ മോളാണ്.. ഇനി എന്നും മുന്നോട്ട് അങ്ങനെ തന്നേയായിരിക്കും.. പൊരുത്തപെടൽ മോൾക്ക് അൽപ്പം ബുദ്ധിമുട്ട് ഉള്ള കാര്യം ആണെന്ന് മനസിലായി.. പക്ഷെ.. മോള് പേടിക്കേണ്ട മോളേ ഞങ്ങൾക്ക് ഇഷ്ടാണ്.. ഞങ്ങൾ പറഞ്ഞിട്ടാണ് മോളോട് തുടർന്നു പഠിക്കാൻ മോൻ പറഞ്ഞത്.. കാരണം മോൾക്ക് മുന്നിൽ ഒരു നല്ല ഭാവിയുണ്ട്.. ഇത്രേം നാളും കഷ്ടപാടുകൾക്ക് ഇടയിൽ നിന്നും പട വെട്ടി പൊരുതി നേടിയത് എല്ലാം ഒരു സുപ്രഭാതം കൊണ്ട് ഇല്ലാതാക്കണ്ട ന്നേ..
ഇനി മോൾക്ക് കഷ്ടപാടുകൾ ഉണ്ടാവില്ല.. ഇന്ന് നിഖിലിന്റെ ഭാര്യ എന്ന് അറിയപ്പെടുന്ന മോള് കാലം കൊറേ കഴിയുമ്പോൾ ദേവികയുടെ ഭർത്താവാണ് എന്നുള്ള നിലയിലേക്കുള്ള വളർച്ചയുണ്ടാകും.. വിവാഹം ഒന്നിന്റെയും അവസാനമല്ല തുടക്കമാണ്.. പുതിയ ജീവിതവും പുതിയ ചുറ്റുപാടും.. അതിലെ പുതിയ അനുഭവങ്ങളും എല്ലാം മോൾക്ക് കരുത്തു നൽകുന്നത് മാത്രമാവും.. നാളേയുടെ പുലരികൾ.. ഞങ്ങൾ മോൾക്ക് വെളിച്ചമായ് മുന്നിൽ ഉണ്ടാവും.. കാലം മോൾക്ക് മുന്നിൽ കാത്തു വെച്ച നിധിയെന്ന സ്വപ്നം.. മോളുടെ ഭാവി.. എല്ലാം ഇനി ഭദ്രമായിരിക്കും.. പത്മാവതി പറഞ്ഞു നിർത്തി.. ദേവിക ഇരു കൈയ്യും കൂപ്പി പൊട്ടി കരഞ്ഞു.. “കരയല്ലേ പെണ്ണേ.. നീ ചിരിക്കാൻ നോക്ക്..” ഹരി പറഞ്ഞത് കേട്ട് ദേവിക ചിരിച്ചു.. ചുമരിൽ കൈയ്യും കെട്ടി തന്നെ നോക്കി നിൽക്കുന്ന നിഖിലിനെ നോക്കി ദേവിക ചിരിച്ചു.. മിഴികൾ സന്തോഷം കൊണ്ട് നിറഞ്ഞു… ശുഭം..
രചന: Seema Binu
പ്രണയം വരും വഴി “ങാ അഖീ പറ ” തോളിനും ചെവിക്കുമിടയിൽ ഫോണും പിടിച്ചു സംസാരിച്ചുകൊണ്ട് രണ്ടു് കയ്യിലും സാധങ്ങളുമായി വിദ്യ ഊണുമുറിയിലേയ്ക്ക് വന്നു . “ഹരിയേട്ടാ അവിടെ മേശപ്പുറത്ത് കഴിക്കാനുള്ളതും ടിഫിനും വച്ചിട്ടുണ്ട് . ഞാൻ പിള്ളേരെ എഴുന്നേൽപ്പിച്ചു സ്കൂളിൽ വിടാൻ നോക്കട്ടെ .” കഴിക്കാനായി വന്ന ഹരിയോട് അത്രയും പറഞ്ഞു കയ്യിലെ വെള്ളം ഇട്ടിരുന്ന നെറ്റിയിൽ തുടച്ചു ഫോണിൽ സംസാരിച്ചുകൊണ്ടു തന്നെ വിദ്യ അകത്തേയ്ക്ക് പോയി . ഇവൾക്കിപ്പോൾ എന്നോടു സംസാരിക്കാനോ എന്റെ കാര്യം നോക്കാനോ തീരെ സമയമില്ല . എന്തു പറഞ്ഞാലും ഒരു അഖി .. വിദ്യയുടെ പെരുമാറ്റം ഹരിയേ ചൊടിപ്പിച്ചു . അപ്പോഴേയ്ക്കും ഹരിക്കു കൊണ്ടുപോകാനുള്ള ബാഗുമായി വിദ്യയെത്തി . “നിനക്കെന്താ വിദ്യേ എന്നേ കണ്ണിൽ പിടിക്കുന്നില്ലേ ? നീ എന്നോടൊന്ന് ശരിക്കും സംസാരിച്ചിട്ട് എത്ര നാളായെന്നറിയാമോ ? എപ്പോൾ നോക്കിയാലും ഫോണിൽ തന്നെ .” അവൾ ഒരു നിമിഷം നിശബ്ദയായി . “അതിന് ഹരിയേട്ടൻ എപ്പോഴാ എന്നോട് സംസാരിച്ചിട്ടുള്ളത് ? പിന്നാലെ നടന്ന് എന്തെങ്കിലും പറഞ്ഞാൽ തന്നെ ഒന്നു നിർത്തുന്നുണ്ടോ എന്ന് പറഞ്ഞ് ഒച്ച വയ്ക്കും . ഞാനുമൊരു മനുഷ്യ ജീവിയല്ലേ ? എന്നേ കേൾക്കുന്ന ആരോടെങ്കിലും ഞാനും സംസാരിക്കട്ടെന്നേ ” “നിന്റെ ശബ്ദത്തിനെന്താ പതിവില്ലാത്തൊരു കടുപ്പം ?” ഹരിയുടെ ചോദ്യത്തിന് മറുപടി പറയാതെ അവൾ കുട്ടികളേ ഉണർത്താൻ പോയി . ശബ്ദത്തിന് കടുപ്പം പോലും ..
വെളുപ്പിന് അഞ്ചു മാണിക്കു തുടങ്ങുന്ന അങ്കമാ . എന്തെങ്കിലും ഒന്നു സഹായിക്കാൻ പറഞ്ഞാൽ അപ്പോൾ പറയും ഞങ്ങൾ അഞ്ചു മക്കളുടേം അച്ഛന്റേം പിന്നെ വീട്ടിലെ എല്ലാ പണീം ചെയ്തിട്ടും എന്റമ്മ ഒരു പരാതീം പറഞ്ഞിരുന്നില്ലല്ലോ എന്ന് .അതുപോലാണോ എനിക്ക് എന്നെങ്ങാനും പറഞ്ഞു പോയാൽ ഉടൻ വരും നിനക്ക് ജോലിയുണ്ടെന്നുള്ള അഹങ്കാരമാ എന്ന് .. അവൾക്ക് ദേഷ്യം വന്നു . വിദ്യ കുട്ടികളേ എഴുനെല്പിച്ചു റെഡിയാക്കി എങ്ങനെയൊക്ക്വയോ ബ്രേക്ക് ഫാസ്റ് കഴിപ്പിച്ചു സ്കൂൾ ബസിൽ കയറ്റി വീട്ടു . ഹരിയും കുട്ടികളും പോയപ്പോൾ അവൾ ടീ വി ഓണാക്കി സൗണ്ട് കുറച്ചു വച്ചു .ഫോൺ എടുത്തു നോക്കിയപ്പോൾ ഹരീടെ പെങ്ങളുടെ മൂന്നു മിസ്ഡ് കോൾ .. .അവൾ ഹിമയുടെ നമ്പർ ഡയൽ ചെയ്തു . ആദ്യത്തെ റിങ്ങിൽ തന്നെ ആള് ഫോണെടുത്തു . “നീ ഇത് എവിടെയാ വിദ്യേ ? എത്ര നേരം കൊണ്ട് ഞാൻ വിളിക്കുവാ ?” “അനിയന്റെ ദേഷ്യം അങ്ങോട്ടും പകർന്നോ ?”വിദ്യ ശബ്ദമില്ലാതെ ചിരിച്ചു . “നീ ഇന്നു ഓഫീസിൽ പോയില്ലേ ? “ഇല്ല ചേച്ചീ .. ഇന്നൊരു ലീവെടുത്തു . എന്റെ കൂടെ വർക്കു ചെയ്യുന്ന ഒരാളുടെ ബെർത്ത് ഡേ യാ . അതിനൊന്നു പോകണം ” “ലീവെടുത്തു പോകാനും മാത്രം ഇതാരാ ഇത്ര വല്യ ആള് ? അഖിയാണോ ??” “ങേ !!! ചേച്ചിക്ക് എങ്ങനെ മനസിലായി ?” “ങ ചേച്ചിക്കു പലതും മനസ്സിലാവുന്നുണ്ട് .
എന്താ വിദ്യേ നിന്റെ ഉദ്ദേശം ?” കുറച്ചു നേരം വിദ്യ ഒന്നും മിണ്ടിയില്ല . “ചേച്ചിക്ക് എന്താ അറിയേണ്ടത് ?” “ആരാ ഈ അഖി ? അയാളുമായി നിനക്കെന്താ ബന്ധം ?” “ഓ ഇത്രേയുള്ളോ ? അഖി .. അഖി എന്റൊപ്പം വർക്ക് ചെയ്യുന്ന വിവാഹമോചനം ഒക്കെ കഴിഞ്ഞ നല്ല സ്വീറ്റ് ആയ ഒരാൾ .. അഖിയെ എല്ലാർക്കും ഇഷ്ടമാ .. എനിക്കും . അഖി അടുത്തുള്ളപ്പോൾ ഞാൻ ഹാപ്പിയാ ചേച്ചീ …. ” “വിദ്യേ .. നീ … നീയെന്തൊക്കെയാ ഈ പറയുന്നത് എന്ന് നിനക്കു വല്ല ബോധവുമുണ്ടോ ? ഇതൊക്കെ ഹരി അറിഞ്ഞാൽ എന്തായിരിക്കും ഉണ്ടാവുക എന്നു വല്ലോം നീ ചിന്തിച്ചിട്ടുണ്ടോ ?? “ഹരിയേട്ടന് അറിയാല്ലോ ഞങ്ങളടെ ഫ്രണ്ട്ഷിപ്പിനെ പറ്റി .” വിദ്യ വാക്കുകളിൽ ദുഃഖത്തിന്റെ മേമ്പൊടിയിട്ടു. “ചേച്ചിക്കറിയാമോ വിവാഹം കഴിഞ്ഞുള്ള ഉപാധികളില്ലാത്ത പ്രണയത്തോടായിരുന്നു ബാലൻമാഷിന്റ മകൾക്കു പ്രണയം .. മനസിലും ശരീരത്തിലും ഒരാളേ മാത്രം നിറച്ചു ആ ആളിന്റെ രണ്ടു് മക്കളെ പ്രസവിച്ച എനിക്ക് പക്ഷേ ഈ പതിമൂന്നു വർഷങ്ങൾക്കിപ്പുറവും അറിയില്ല എന്താണ് പ്രണയമെന്ന് ?? ഞാനുമൊരു മനുഷ്യ സ്ത്രീ തന്നെയല്ലേ ? ഇനി എന്തിന്റെ പേരിലായാലും അഖിയുമായുള്ള സൗഹൃദം വേണ്ടെന്നു വയ്ക്കാൻ ഞാൻ തയ്യാറല്ല ചേച്ചീ ..” “എടീ ബാലൻ മാഷിന്റെ മോളേ…എന്റെ അനിയൻ കെട്ടിക്കൊണ്ടു വരുമ്പോഴല്ല നിന്നേ ഞാൻ ആദ്യമായി കാണുന്നത് കേട്ടോ . എന്തായാലും ഞാനൊന്നു കാണുന്നുണ്ട് നിന്റെയീ അഖിയേ . നിന്നെയൊക്കെ നേർവഴിക്ക് നടത്താൻ പറ്റുമോന്ന് ഞാനൊന്ന് നോക്കട്ടെ .” അടുത്ത ദിവസം തന്നെ ഹിമയുടെ കോൾ ഹരിക്ക് ചെന്നു . “ഹരീ പ്രശ്നം നമ്മള് കരുതിയതിലും സീരിയസ് ആണ് കേട്ടോ . നി ഇപ്പൊഴും നമ്മുടെ അച്ഛനെ റോൾ മോഡലാക്കി ഇരുന്നോ .ഇതു പണ്ടത്തെ കാലമൊന്നുമല്ല . അവളും ഈ പറഞ്ഞ അഖിയും ട്രാൻസ്ഫെറിന് ട്രൈ ചെയ്യുന്നെന്നാ കേട്ടത് .അവൾ അവളുടെ പാട്ടിനു പോകും . പോകട്ടെ അതാ നല്ലത് .. പറയുന്നത് കൊണ്ടൊന്നും തോന്നല്ലേ ഹരീ .. അവളേ പ്പോലൊരു പെണ്ണിനേ നീ അർഹിക്കുന്നില്ല .
അതാ സത്യം .” അപ്പുറത്ത് ഫോൺ കട്ടാകുന്ന ശബ്ദം കേട്ടിട്ടും അനങ്ങാനാവാതെ ഇരുന്നു ഹരി . സമയം കളയാതെ വീട്ടിലേയ്ക്ക് തിരിച്ചു . വീട്ടിലെത്തിയ ഹരി കാണുന്നത് എവിടേക്കോ പോകാൻ തയ്യാറായി പുറത്തേയ്ക്ക് വരുന്ന വിദ്യയെയാണ് . ഇവളിതെങ്ങോട്ടാ കെട്ടിയൊരുങ്ങി ??ഓർത്തത് അങ്ങനെയാണെങ്കിലും ചോദിച്ചത് മറ്റൊന്നാണ് . “ങേ. അടിപൊളിയാണല്ലോ .. എങ്ങോട്ടാ യാത്ര ??” ഹരീടെ ചോദ്യത്തിൽ കിളിപോയി നിന്നു വിദ്യ . “എന്താ ?” “അല്ല സാരിയൊക്കെ ഉടുത്ത് സുന്ദരി ആയിട്ട് എങ്ങോട്ടാണെന്ന് ചോദിച്ചതാ ” “അത് .. അത് കുറച്ചു സാധനങ്ങൾ വാങ്ങണം . പിന്നെ ഒരു ഫ്രണ്ടിന്റെ ബെർത്ഡേയാ .. അതിനും ഒന്നു പോകണം .” “വരാൻ വൈകുമോ ? പിക് ചെയ്യാൻ ഞാൻ വരണോ ?” വിദ്യയ്ക്ക് വീണ്ടും ഞെട്ടൽ .. “ഓ വേണ്ട … ഞാനിങ്ങു വന്നോളാം . പിന്നെ കുട്ടികൾ വരുമ്പോൾ ചായേം സ്നാക്സും എടുത്തു കൊടുക്കണേ ..” അവൾ പോകുന്നതു ഹരി നോക്കി നിന്നു . അവളുടെ ഉള്ളിൽ എന്താണെന്ന് ഒരു പിടിയും കിട്ടുന്നില്ലല്ലോ . ഇനി ചേച്ചി പറഞ്ഞതു പോലെ എന്തെങ്കിലും ??? ഏയ് .,,എങ്കിലും ഈയിടെയായി അവൾ തന്നേ അവഗണിക്കുന്നുണ്ടോന്നൊരു സംശയം .. തോന്നലാവും .. കുട്ടികൾ വന്നിട്ട് കുറച്ചു നേരം കൂടി കഴിഞ്ഞാണ് വിദ്യ എത്തിയത് . “ബെർത്ത് ഡേ പാർട്ടി എങ്ങെനെ ഉണ്ടായിരുന്നു ? എല്ലാവരും കൂടി അടിച്ചു പൊളിച്ചോ ?” ഹരിയുടെ ചോദ്യമാണ് അവളേ വരവേറ്റത് .അങ്ങനൊരു ചോദ്യം ഹരിയിൽ നിന്ന് പ്രതീക്ഷിച്ചില്ല . അതുകൊണ്ടുതന്നെ മറുപടി പറയാൻ ഇത്തിരി വൈകി . “എല്ലാവരുമൊന്നുമില്ല ..
ഞാനും അഖിയും മാത്രമുള്ളോരു കുഞ്ഞാഘോഷം .. പിന്നെ പാലട ഇഷ്ടമാണെന്നും പറഞ്ഞ് അതു വാങ്ങി വച്ചിരുന്നു . ഞാൻ ചെന്നിട്ട് അതുണ്ടാക്കി . ഒരു കേക്കും മുറിച്ചു തീർന്നു ആഘോഷം . എങ്കിലും നന്നായിരുന്നു .” “പാലടയോ ?? കൊള്ളാല്ലോ .. നീയിവിടെ പാലട ഉണ്ടാക്കിയിട്ട് ഒത്തിരി നാളായില്ലേ ?” “ഒരിക്കൽ ഞാൻ ഉണ്ടാക്കിയപ്പോൾ ഹരിയേട്ടന് ഇഷ്ടമല്ല അതുകൊണ്ട് ഇനി ഉണ്ടാക്കണ്ടാ എന്ന് പറഞ്ഞത് മറന്നു പോയോ ?” “അത് .. അതു പോട്ടെ . ഈ പറഞ്ഞ അഖിക്ക് ഇഷ്ടമാണോ ഈ വക സാധനങ്ങളൊക്കെ ?” “അഖിക്കല്ല .. എനിക്കിഷ്ടമാണെന്നറിഞ്ഞ് വാങ്ങിയതാ ” വിദ്യ അകത്തു കയറി പ്പോയിട്ടും ഹരി അതേ നിൽപ്പു നിന്നു . നിന്റെ ഇഷ്ടങ്ങളൊക്കെ അങ്ങു നിന്റെ വീട്ടിൽ . ഇവിടെ ഞാൻ പറയുന്നത് ഉണ്ടാക്കിയാൽ മതി …പണ്ടെന്നോ പറഞ്ഞ വാക്കുകൾ ഓർത്ത് ഹരിക്കു സ്വയം പുച്ഛം തോന്നി . ഒപ്പം വിദ്യയും അഖിയും മാത്രമുള്ള പാർട്ടി എന്നോർത്തൊരു അസ്വസ്ഥതയും ഹരിയേ പൊതിഞ്ഞു . വൈകിട്ട് കുട്ടികളേ പഠിപ്പിക്കാൻ ചെന്ന ഹരിയേ അവര് കണ്ടം വഴി ഓടിച്ചു . “അമ്മ ഞങ്ങളേ ഹോംവർക്ക് ചെയ്യിച്ചാൽ മതി .അച്ഛനറിയില്ല ഞങ്ങൾക്ക് പഠിക്കേണ്ടത് എന്തൊക്കെയാണെന്ന് .. ” “ആരു പറഞ്ഞു അച്ഛന് അറിയില്ലെന്ന് ?നിങ്ങൾക്കറിയാമോ അച്ഛൻ ജോലി കിട്ടുന്നതിന് മുൻപ് കുറേ നാള് പാരലൽ കോളേജിൽ പഠിപ്പിച്ചിട്ടുണ്ട് .. വന്നേ ഇന്ന് അച്ഛൻ പഠിപ്പിക്കാം . അതുമല്ല അമ്മയ്ക്ക് കിച്ചണിൽ ഒത്തിരി ജോലിയുണ്ട് ..” “അമ്മയ്ക്കെന്നും ഉണ്ടല്ലോ ഒത്തിരി ജോലി .. പിന്നെന്താ ഇന്ന് ? അച്ഛൻ പോ .ഞങ്ങളെ അമ്മ പഠിപ്പിച്ചാൽ മതി .” ഹരി മെല്ലെ ബെഡ്‌റൂമിലേക്ക് നടന്നു . വിദ്യയെ അവിടെ കാണാത്തതു കൊണ്ട് അടുക്കളയിൽ ചെന്ന് നോക്കിയപ്പോൾ ചപ്പാത്തിക്ക്‌ മാവ് കുഴയ്ക്കുന്നു . “ഇന്നെന്താ ചപ്പാത്തിയാ ? ഇങ്ങു താ . ഞാൻ ചുട്ടെടുക്കാം . നീ ചെന്ന് പിള്ളേരുടെ ഹോംവർക്ക് ചെയ്യിക്ക് ..” “വേണ്ടാ .. ” “അതു വിദ്യേ .. നിനക്കെല്ലാം കൂടി ബുദ്ധിമുട്ടാകില്ലേ ? ” വിദ്യ കുറച്ചു നേരം അനങ്ങാതെ നിന്നു . “എനിക്കു ബുദ്ധിമുട്ടൊന്നുമില്ല . ഹരിയേട്ടൻ പോയി റസ്റ്റ് എടുത്തോ . ” ഇനിയൊന്നും പറയാനില്ലാത്തതു പോലെ വിദ്യ തന്റെ ജോലി തുടർന്നു . “നീ ട്രാൻസ്ഫെറിന് ട്രൈ ചെയ്യുന്നെന്ന് ചേച്ചി പറഞ്ഞു ” “ങാ നോക്കുന്നുണ്ട് . ” “നീ പോയാൽ ഇവിടുത്തെ കാര്യങ്ങൾ ഒക്കെ എങ്ങനാ ?” “ഞാൻ ഇല്ലേലും ഇവിടെ ഒന്നും സംഭവിക്കില്ല ഹരിയേട്ടാ . അത്രയ്ക്ക് പറ്റില്ലെങ്കിൽ ഒരു ജോലിക്കാരിയെ വയ്ക്കണം . പിന്നെ രാത്രിയിലെ കാര്യത്തിന് പൈസ ഇത്തിരി കൂടുതൽ കൊടുക്കേണ്ടി വരുമായിരിക്കും .
എന്നാലും എല്ലാം നടക്കേണ്ടേ ??” “രാ ..രാത്രിയിലെ എന്തു കാര്യം ?”ഹരി നിന്നു വിക്കി . “പിള്ളേരുടെ പഠിപ്പീര് . അല്ലാതെന്താ ?അവരു ഹരിയേട്ടനെ അടുപ്പിക്കില്ലല്ലോ . അപ്പൊൾ പിന്നെ ട്യൂഷന് ആളിനേ നിർത്തണം . അവർക്ക് ഒക്കെ ഇപ്പോൾ എന്തു ഡിമാൻഡ് ആണെന്നറിയാമോ ?”അവൾ തിരിഞ്ഞു നോക്കിയപ്പോൾ ഹരി നിന്നിടം ശൂന്യം . പൊട്ടി വന്ന ചിരിയടക്കി വിദ്യ തന്റെ ജോലി തുടർന്നു . ഹരിയിൽ കാണപ്പെട്ട ചെറിയ ചില മാറ്റങ്ങൾ ഒഴിച്ചാൽ എന്നത്തേയും പോലെ വിദ്യയുടെ ആ ദിനവും പോയി മറഞ്ഞു . അടുത്ത ദിവസങ്ങളിൽ അവളേ ജോലിയിൽ സഹായിക്കാനും കുട്ടികളേ റെഡിയാക്കാനും ഒക്കെയായി ഹരി പിന്നാലെയുണ്ടായിരുന്നു . ഒന്നും പുറത്തു കാണിച്ചില്ലെങ്കിലും ഒരു കുഞ്ഞു സന്തോഷം തോന്നി അവൾക്ക് . ഒരു വെള്ളിയാഴ്ച വിദ്യ ജോലി കഴിഞ്ഞെത്തിയപ്പോൾ ഹരി മാത്രമേയുള്ളു വീട്ടിൽ . “പിള്ളേര് എന്തിയെ ? “അവൾ ഹരിയേ നോക്കി . “അതു ഞാൻ പറയാൻ വീട്ടു പോയി . ഇന്ന് അച്ഛനും അമ്മയും വന്നിട്ടുണ്ടായിരുന്നു . അവരുടെ കൂടെ പോകണമെന്ന് പിള്ളേർക്ക് ഒരേ നിർബന്ധം . പിന്നെ ഞാനും ഓർത്തു ശനിയും ഞായറുമല്ലേ . രണ്ടു ദിവസം അവിടെ നിൽക്കട്ടെ എന്ന് . ” “അവിടെ കായലും വെള്ളോമൊക്കെയുള്ളതല്ലേ .. നമ്മളില്ലാതെ അവരെ വിടേണ്ടിയിരുന്നില്ല .” “എന്റച്ഛനും അമ്മയുമില്ലേ ? എന്നേ വളർത്തിയ അവർക്കറിയില്ലേ എന്റെ പിള്ളേരെ എങ്ങനെ നോക്കണമെന്ന് ?” ങാ അതിന്റെ ഗുണം എനിക്കല്ലേ അറിയൂ . അവൾ മനസ്സിൽ പറഞ്ഞു . രാത്രിയിലേക്കുള്ള ഭക്ഷണം തയ്യാറാക്കുക ആയിരുന്ന വിദ്യയെ പിന്നിൽ നിന്നും ഹരി കെട്ടിപ്പിടിച്ചു . അവൾ ഞെട്ടിപ്പോയി . “ഹരിയേട്ടനിതെന്താ ? ഞാൻ ഇവിടെ ജോലി ചെയ്യുന്നത് കാണാൻ മേലേ ?” “അതു കൊള്ളാം എനിക്കെന്റെ ഭാര്യയേ ഒന്നു കെട്ടിപ്പിടിക്കണമെങ്കിൽ നേരോം കാലോം നോക്കണോ ?” “ആരുടെ ഉപദേശമാ ?” “എന്ത് ?” “അല്ല ഇപ്പോൾ ഈ കാട്ടിക്കൂട്ടിയത് ആരുടെ ഉപദേശമനുസരിച്ചാണെന്നാ ചോദിച്ചത് ?” “എനിക്കു നിന്നേ സ്നേഹിക്കാൻ ആരുടെയെങ്കിലും ഉപദേശം വേണോ ?” ” സ്നേഹിച്ചതാരുന്നോ ? ശീലമില്ലാത്തതു കൊണ്ടാവും എനിക്കങ്ങോട്ടു മനസിലായില്ല കേട്ടോ. സോറി ഹരിയേട്ടാ .. ” “നിന്റെ പരിഹാസം ഒക്കെ എനിക്കു മനസ്സിലാകുന്നുണ്ട് . ഞാനിനി എങ്ങനാ നിന്നേ പ്രീതിപ്പെടുത്തേണ്ടത് ? എന്റെ സ്നേഹം പോരാഞ്ഞിട്ടാണോ നീ …” “എന്തേ നിർത്തിക്കളഞ്ഞത് ? ” വിദ്യ ഹരിക്കു നേരേ നിന്നു . “ഞാനിനി മുഴുവൻ പറഞ്ഞാലേ നിനക്കു മനസിലാകൂ?” “എന്താണെങ്കിലും പറയാൻ വന്നത് മുഴുവൻ പറയെന്നേ . അല്ലാതെ ഞാൻ എങ്ങനെ അറിയും ?” “എന്നാൽ നീ അറിയണ്ടാ .” ഹരിക്ക് ദേഷ്യം വന്നു . “ഓക്കേ അത് ഹരിയേട്ടന് ഇഷ്ടമുള്ളപ്പോൾ പറഞ്ഞാൽ മതി .
ഇനി ഞാനൊരു കാര്യം പറയട്ടേ .?” എന്താണെന്നുള്ള അർത്ഥത്തിൽ ഹരി അവളേ നോക്കി . “ഞാൻ പറഞ്ഞിരുന്നില്ലേ ഞങ്ങൾ ട്രാൻസ്ഫെറിന് ട്രൈ ചെയ്യുന്നെന്ന് .” “ഞങ്ങളോ ?” “ങ ഞാനും അഖിയും .. അതു ശരിയായി .” “വിദ്യേ …”അറിയാതെ ഹരിയുടെ ശബ്ദം ഉയർന്നു . “ഹരിയേട്ടനെന്തിനാ ഒച്ചയെടുക്കുന്നത് ? ഞാൻ പറഞ്ഞു കഴിഞ്ഞില്ല . ഇപ്പോൾ അഖിക്ക് മാത്രേ ഓർഡർ വന്നുള്ളൂ . അതും ഒരു മ്യൂച്വൽ ട്രാൻസ്ഫർ . എനിക്കും താമസിയാതെ ശരിയാകുമെന്നാ സൂപ്രണ്ട് പറഞ്ഞത് . ങാ പറഞ്ഞു വന്നത് അതല്ല . നാളെ അഖി ഇങ്ങോട്ടു വരാൻ ഇരിക്കുകാരുന്നു .പോകുന്നതിനു മുൻപ് പിള്ളേരേം ഹരിയേട്ടനേം ഒന്നു കാണണം എന്ന് . ഇനിയിപ്പോൾ വരണ്ടാ എന്ന് എങ്ങനാ പറയുന്നേ ? വന്നിട്ട് പോട്ടെ .പിള്ളേരേ ഞാൻ അങ്ങോട്ടു കൊണ്ടുപോയി കാണിക്കാം അല്ലേ ? ഓഫീസിൽ വച്ചുള്ളതോന്നും പോരാഞ്ഞിട്ടായിരിക്കും ഇനി വീട്ടിലും . എന്തായാലും എന്റെ പിള്ളേരേ കൊണ്ട് നീ എവിടെ പോവില്ല. ഹരി മനസ്സിൽ ഉറപ്പിച്ചു . “ഓ വേണ്ടെങ്കിൽ വേണ്ടാ .അതു പോട്ടെ ആദ്യമായിട്ട് വരുവല്ലേ അഖി ഇവിടെ . അപ്പൊൾ ശരിക്കെന്തെങ്കിലും ഉണ്ടാക്കി കൊടുക്കണ്ടേ ? രാവിലെ പോയി കുറച്ചു നല്ല കൊഞ്ചു വാങ്ങിക്കൊണ്ടു വരണേ . അഖിക്ക് കൊഞ്ചു തീയൽ ഭയങ്കര ഇഷ്ടമാ .. ” മറുപടി പറയാതെ ഹരി തിരിഞ്ഞു മുറിയിലേയ്ക്ക് പോയി . നിന്റെ എല്ലാ കൊഞ്ചലും അവസാനിക്കാൻ പോകുവാ .. നാളെയിങ്ങു വരട്ടെ നിന്റെ മറ്റവൻ .കാണിച്ചു കൊടുക്കാം അവന് ഈ ഞാൻ ആരാണെന്ന് . ക്ഷമിക്കുന്നതിനൊക്കെ ഒരു ലിമിറ്റില്ലേ ? അടുത്ത ദിവസം രാവിലേ കോളിംഗ് ബെല്ലിന്റെ ശബ്ദം കേട്ട് ഹരി ക്ലോക്കിലേയ്ക്ക് നോക്കി . നേരം വെളുത്തില്ല അതിനു മുന്പിങ്ങെത്തിയോ ? ഈർഷ്യയോടെ വാതിൽ തുറന്ന ഹരി കണ്ടത് നല്ല ഭംഗിയായി വസ്ത്രധാരണം ചെയ്ത ഇരുപത്തഞ്ചിനും മുപ്പതിനും ഇടയിൽ പ്രായം തോന്നിക്കുന്ന ഒരു സ്ത്രീയെയാണ് . “ആരാ ?” ഹരിയുടെ ചോദ്യത്തിനുള്ള മറുപടിക്കു മുൻപ് വിദ്യ ഇറങ്ങി വന്ന് ആളിനെ അകത്തേയ്ക്ക് കൂട്ടിയിരുന്നു . “ദാ ഇതാ എന്റെ ഹരിയേട്ടൻ ” പിന്നാലെയെത്തിയ ഹരിയെ കൂട്ടുകാരിക്കു വിദ്യ പരിചയപ്പെടുത്തി . “ങാ എനിക്കറിയാം . ഫോട്ടോയിൽ കണ്ടിട്ടുണ്ടല്ലോ .” “ആളിനെ എനിക്കങ്ങോട്ട് പിടി കിട്ടിയില്ല .” ഹരി നിന്നു പരുങ്ങി . “ഞാൻ പറഞ്ഞിട്ടില്ലേ ഒരു അഖിയേ പറ്റി ?” “ഉവ്വ് . അപ്പൊൾ ഇത് അഖീടെ ??” “അഖീടെ ആരുമല്ല .
അഖി തന്നെയാ . എന്നു വച്ചാൽ അഖില .. അഖിയെന്നുള്ളത് അവളുടെ വിളിപ്പേരാ .. അല്ലേടാ ?” “ഞാൻ കരുതി ….”ഹരി എന്തു പറയണം എന്നറിയാതെ കുഴങ്ങി . “അഖി എന്റെ ബോയ് ഫ്രണ്ടാണെന്ന് അല്ലേ ?” “ഏ … ഏയ് .. അല്ല .. അതെന്തിനാ അങ്ങനെ കരുതുന്നത് ? നിങ്ങൾ സംസാരിക്ക് .. ഞാൻ ഒന്നു പുറത്തു പോയിട്ടു വരാം ..” “ഉം ഉം .ഒക്കെ ” ഹരി നിന്നു വിക്കുന്നത് കണ്ടു വിദ്യ ചിരിയടക്കി . അഖിലയുടെ ഇഷ്ടവിഭങ്ങൾ ഒക്കെ ഒരുക്കി വയറും മനസും നിറച്ചാണ് വിദ്യയും ഹരിയും അവളേ യാത്രയാക്കിയത് . കുട്ടികളേ കാണാൻ കഴിഞ്ഞില്ലല്ലോ എന്നു സങ്കടം പറഞ്ഞ അഖിയോട് അഖില പോകുന്നതിനു മുൻപൊരു ദിവസം കുട്ടികളേം കൊണ്ടു ഞങ്ങൾ അങ്ങോട്ടിറങ്ങാം .. എന്നു സന്തോഷത്തോടെ പറഞ്ഞു ഹരി. “അഖിലയല്ല ഹരിയേട്ടാ അഖി ” വിദ്യ ചിരിയോടെ തിരുത്തി. “എന്നേ കുഴക്കിയത് ഈ പേരാണ് . എന്നാലും അഖി മതി .. അതാ ഒരു ഭംഗി ..” ഹരിയും അവരുടെ ചിരിയിൽ പങ്കു ചേർന്നു . “കളഞ്ഞിട്ടു പോകുമെന്നു കരുതിയോ ?” അഖില പോകുന്നത് നോക്കി നിന്ന ഹരിയുടെ കണ്ണിലേക്ക് നോക്കി വിദ്യ . മറുപടിയായി ഹരി അവളേ വലിച്ചു നെഞ്ചോടു ചേർത്തിരുന്നു .
അവൾ അനങ്ങാതെ നിന്നു . “ഹരിയേട്ടാ ..” “എന്താ ?? ഇനി ഇതും അഭിനയമാണെന്നാണോ ??” ഹരിയുടെ ശബ്ദം അടഞ്ഞിരുന്നു . അവൾ ശബ്ദമില്ലാതെ ചിരിച്ചു കൊണ്ട് ഒന്നുകൂടി അവനോടു ചേർന്നു നിന്നു .. “ഈ കുറച്ചു ദിവസങ്ങൾ കൊണ്ട് ഞാനങ്ങ് ഇല്ലാതായിപ്പോയി .”അവൻ ആ നെറുകയിൽ മെല്ലെ തലോടി . “അത്രയ്ക്കിഷ്ടമാ എന്നേ ??” മറുപടി പറയാതെ അവളുടെ നെറുകിൽ ചുണ്ടു ചേർത്തു ഹരി . “കുട്ടികളേ കൂട്ടിക്കൊണ്ടു വരാൻ എപ്പോഴാ പോകേണ്ടത് ?” “അവരു രണ്ടു് ദിവസം അവിടെ വെള്ളത്തിലും കായലിലും ഒക്കെ കളിക്കട്ടെന്നേ ” “ശരിക്കും ? ” “ആന്നേ .. ഇന്നിവിടെ നമ്മളു മാത്രം മതി .. ” അവന്റെ കണ്ണിൽ കുസൃതി മിന്നി . “ഇന്ന് എനിക്കെന്റെ പെണ്ണിനേ ശരിക്കൊന്നു സ്നേഹിക്കണം .” അവൾ കണ്ണു കൂർപ്പിച്ചു . “ഇന്നു മാത്രമല്ല ഇനിയെന്നും …” അവളുടെ മുഖം കൈക്കുമ്പിളിൽ കോരി ആ നിറഞ്ഞ കണ്ണുകളിൽ ഹരി ചുണ്ടു ചേർക്കുമ്പോൾ അനിയനെ നന്നാക്കാൻ ബുദ്ധി ഉപദേശിച്ച ഹിമയ്ക്ക് മനസുകൊണ്ട് നന്ദി പറയുന്ന തിരക്കിലായിരുന്നു വിദ്യ .
രചന: വിദ്യ പ്രദീപ്‌ ❤
നേരം രാത്രിയായി.. അടുക്കള ജോലിയെല്ലാം തീർത്തു അന്നും അവൾ കുളിച്ചു അയാളെയും കാത്തു മുറിയിൽ സമയം ചിലവഴിച്ചു… എന്തുകൊണ്ടോ മനസ്സിൽ കുറെ പരാതികളും പരിഭവങ്ങളും അവളുടെ ഉറക്കം കെടുത്തി…. ഇവൾ ലക്ഷ്മി… ആളൊരു പാവമാണ്… “ഏട്ടൻ വന്നിട്ടു വേണം കുറച്ചെങ്കിലും എന്തെങ്കിലും സംസാരിക്കാൻ..” മോനെ വേഗം ഉറക്കി ഫോണിൽ നോക്കി ലക്ഷ്മി സമയം ചിലവഴിച്ചു… കുറച്ചു കഴിഞ്ഞ് ഒരുപാട് ടെൻഷനോടെയും പകലന്തിയോളം പണിയെടുത്തു ഓടിനടന്നതിന്റെ ക്ഷീണത്തിൽ ഉറക്ക ചടപ്പോടെ അയാൾ റൂമിലെത്തി ഒന്ന് കിടന്നാൽ മതിയെന്ന ഭാവത്തിൽ… ഇതാണ് ലക്ഷ്മിയുടെ ഭർത്താവ്.. മാർച്ച്‌ ഏപ്രിൽ മാസത്തെ കൊടും ചൂടിൽ വീട്ടിലെ ഏറ്റവും ചൂട് കൂടിയ റൂമിനു ഉടമയായിരുന്നു അവർ..
മുറിയിൽ ചിലവഴിക്കുന്ന സമയം മുഴുവൻ അയാൾക്ക് അരോചകമായിരുന്നു.. വന്നു….വെള്ളം കുടിച്ചു…. ക്ഷീണത്താൽ കിടന്നു… ഒരു ചെറു ചിരിയോടെ അവൾ അവനെ നോക്കി. കണ്ണുകളടച്ചു പാതി ചെരിഞ്ഞു കിടക്കുന്ന അയാളുടെ മനസ് മുഴുവൻ ഒരുപാട് ചിന്തകളായിരുന്നു… ആരോടും തുറന്നു പറയാതെ അടക്കി പിടിക്കുന്ന ഒരുപാട് കാര്യങ്ങൾ…. കണ്ണുകൾ കള്ളം പറയില്ല എന്നത് കൊണ്ടായിരിക്കാം ആ കണ്ണുകൾ അവൾക്ക് നേരെ അടയുന്നത്… ഒരുപാട് സംസാരിക്കണം.. ഒരു ദിവസത്തിൽ തനിക്ക് ആകെ കിട്ടുന്ന സമയം ഈയൊരു 10മിനുട്ട് ആണ് .. അല്പം ഈഗോ രണ്ടുപേരിലും ഉള്ളതുകൊണ്ടാണോ എന്നറിയില്ല ഒരാളുടെ മൗനം രണ്ടുപേരുടെയും ചിന്തകളെ ഉണർത്തിയില്ല… തണുത്ത കാറ്റിനു പകരം ഫാനിൽ നിന്ന് വരുന്ന ഉഷ്ണവും മാനസിക പിരിമുറുക്കവും അയാളിൽ അരോചകം സൃഷ്ടിച്ചു.. ലക്ഷ്മി അയാളോട് ചേർന്ന് കിടന്നു… മുടിയിഴകൾ പതുക്കെ തലോടി.. നെറ്റിയിൽ ഉമ്മ വെച്ചു… “എന്തെങ്കിലും പറയ് “എന്ന അവളുടെ ചോദ്യം അയാളിൽ ദേഷ്യമുണർത്തി.. “നിനക്കെന്താ പറഞ്ഞാൽ…. ഞാൻ കേൾക്കുന്നുണ്ടല്ലോ…. ഉറക്കം വരുന്നെങ്കിൽ ഉറങ്ങിക്കോ “…എന്ന മറുപടി അവൾക്ക് അസഹ്യമായി… മുറിയിൽ തിങ്ങി നിൽക്കുന്ന മൗനം അവരെ വീർപ്പു മുട്ടിച്ചു… പരസ്പരം കണ്ണുകളിൽ നോക്കി സംസാരിക്കാനോ എന്തിനേറെ ഒരു പുഞ്ചിരി വിടർത്താനോ പോലും അവൾക് ആയില്ല.. നേരത്തെ എണീക്കുന്നത് കൊണ്ടാകാം അവളിൽ അതുവരെയുള്ള അലച്ചിലിന്റെ ക്ഷീണം പതിയെ വന്നു .. ശേഷം ഉറക്കം…. പാതി ഉറക്കത്തിൽ രണ്ടാളും പരസ്പരം ചോദിച്ചു..” നീ ഉറങ്ങിയോ “…. ഇല്ലാ… എന്നാ എന്തേലും പറയ് “.. വീണ്ടും മൗനം…. എന്തുകൊണ്ടോ സ്വന്തം ജീവിതത്തെ കുറിച്ച് ഒന്നും സംസാരിക്കാനില്ലാതെ അവർ നിശ്ശബ്ദരാകും.. രണ്ടാളുടെയും മനസിലുണ്ട് ഒന്ന് കെട്ടിപ്പുണർന്നെങ്കിൽ..
ഉമ്മ വെച്ചിരുന്നെങ്കിൽ…😔 ഒരു ചെറു പുഞ്ചിരി മതി നമ്മുടെ മനസിനെ കുളിർമഴ പെയ്യിക്കാൻ… പതിവുപോലുള്ള മുടി തലോടലിലെ സുഖം കൊണ്ടോ അതുവരെയുള്ള ക്ഷീണം കൊണ്ടോ എന്നറിയില്ല അയാൾ ഉറങ്ങിപ്പോയി… ഉഷ്ണകാറ്റു അയാളുടെ കഴുത്തിലും പുറത്തുമൊക്കെ വിയർപ്പു തുള്ളികൾ സൃഷ്ടിച്ചു.. എന്തെല്ലാമോ പ്രതീക്ഷിച്ചു കാത്തിരുന്ന അവൾ എന്തെ തനിക്കൊരു ഉമ്മ പോലും തരാൻ തോന്നാഞ്ഞു എന്നാലോചിച്ചു സ്വയം കണ്ണീർ വാർത്തു.. ഒരുപക്ഷെ അവനിൽ ആകർഷണം ഉണർത്തി മനസിനെ സന്തോഷിപ്പിക്കാൻ അവൾക്കായില്ല എന്നതാണ് സത്യം… എല്ലാം പെണ്ണിന്റെ തെറ്റായി കാണുന്ന സമൂഹത്തിൽ സ്വന്തം തെറ്റുകളെ സ്വയം ശപിച്ചു വിദൂരതയിലേക്ക് നോക്കി അവൾ സമയം ചിലവഴിച്ചു…. ചിലപ്പോഴെങ്കിലും നമ്മുടെ ഓരോരുത്തരുടെയും ജീവിതത്തിലെ ഒരു ദിവസമാകാം ഇത്….