Love
അത്ര മേൽ സ്നേഹിച്ചോരാത്മാവ്…
രചന: Ammu Santhosh
“ദേ കൊച്ചേ നിന്റെ അപ്പൻ ഇങ്ങനെ പോയാ ഇങ്ങേരെ ഞാനങ്ങു കെട്ടും കേട്ടോ. എന്റെ കർത്താവെ എന്നാ മുരടൻ ആണ് ഇങ്ങേര്.. നീ എങ്ങനെ സഹിക്കുന്നെടി കൂവേ?” നിമ്മിച്ചേച്ചിയുടെ വാക്കുകൾ കേട്ട് ഞാനങ് പൊട്ടിച്ചിരിച്ചു പോയി. എന്റെ അപ്പനെ കെട്ടും പോലും. നടന്നത് തന്നെ. ആയ കാലത്ത് പപ്പ സമ്മതിച്ചില്ല നല്ല സുന്ദരി പെൺപിള്ളേർ വന്നു ക്യു നിന്നു എന്നൊക്കെ പപ്പയുടെ അമ്മച്ചി പറയുന്നേ കേട്ടിട്ടുണ്ട്. എന്റെ അമ്മയെ അത്ര ഇഷ്ടമായിരുന്നു പപ്പക്ക്. എന്റെ അമ്മ നല്ല സുന്ദരി ആയിരുന്നു കേട്ടോ. കന്യാമാതാവിന്റെ വിശുദ്ധി നിറഞ്ഞ മുഖം. നല്ല പാലപ്പത്തിന്റ നിറം. എന്നാ അടക്കവും ഒതുക്കവുമാണെന്നോ. ശബ്ദം പുറത്തു കേൾക്കത്തില്ലായിരുന്നു. അമ്മച്ചി പറഞ്ഞു കേട്ട അറിവാ അതൊക്കെ എനിക്ക് ആ മുഖവും നിറവും മത്രേം ഓർമ്മ യുള്ളൂ. ഞാൻ തീരെ കൊച്ചായിരുന്നെന്നെ.. ഞാനും പപ്പയും അമ്മയും കൂടി ബൈക്കിൽ പോവാരുന്നു. ഒരു ലോറി വന്നിടിച്ചതാ. ഞാൻ അങ്ങ് തെറിച്ചു പോയി. പപ്പ നോക്കികിടക്കുമ്പോളാ അമ്മയുടെ ദേഹത്തൂടെ.. പപ്പയുടെ തെറ്റല്ല. എന്നിട്ടും ഇന്നും സങ്കടമാ പപ്പക്ക്. പിന്നെ പപ്പാ ചിരിച്ചിട്ടില്ല. ഭയങ്കര പരുക്കൻ സ്വഭാവമായി. എല്ലാത്തിനും ദേഷ്യം, വാശി.. എന്നോട് വലിയ സ്നേഹാ. പക്ഷെ കാണിക്കത്തില്ല. പെൺപിള്ളേർ അടങ്ങി ഒതുങ്ങി വീട്ടിലിരുന്നോണം ആ രീതിയാണ്. സ്ട്രിക്ട് എന്ന് പറഞ്ഞാൽ എന്നെ ഇടവലം വിടുകേല. അത്രക്ക് സ്ട്രിക്ട്. എനിക്ക് ചിലപ്പോൾ ദേഷ്യം വരും. ഞാൻ വല്ലോം പറഞ്ഞാൽ നല്ല അടി വെച്ച് തരും. അത് പേടിച്ചു ഞാൻ അങ്ങ് അനുസരിക്കും. പപ്പാ പോലിസാ കേട്ടോ. പാവം പപ്പാ യുടെ കയ്യിൽ പെടുന്നവന്റെ കഷ്ടകാലമാ. അവനെ ഇടിച്ചു പപ്പടമാക്കും.. എത്ര സസ്‌പെൻഷൻ ആയീന്നാ.. ഇപ്പൊ ദേ ഇങ്ങോട്ട് വന്നതും അങ്ങനെയാ. പണിഷ്മെന്റ് ട്രാൻസ്ഫർ. ഞങ്ങൾ വാടകക്ക് താമസിക്കുന്നത് നിമ്മി ചേച്ചി യുടെ വീട്ടിലാ. ചേച്ചി പഠിത്തം ഒക്കെ കഴിഞ്ഞു ജോലി ചെയ്യുവാ. പപ്പയോടു ചേച്ചിക്ക് എന്തോ ഒന്നുണ്ട്. ഞാൻ എന്റെ പപ്പയെ പൊക്കിപ്പറയുവല്ല കേട്ടോ. എന്റെ പപ്പാ മമ്മൂട്ടിയെ പോലെയാ ഭയങ്കര സുന്ദരനാ. പിന്നെ നിമ്മി ചേച്ചി നോക്കിയില്ലെങ്കിലല്ലെ അത്ഭുതം ഉള്ളു? പപ്പക്ക് പക്ഷെ ചേച്ചിയെ കണ്ണെടുത്താൽ കണ്ടൂടാ. പിന്നെ ഇത്രയും സൗകര്യത്തിനു വേറെ ഒരു വീട് കിട്ടാനില്ലാത്ത കൊണ്ടാ സഹിക്കുന്നെ. നിമ്മി ചേച്ചിയെ കണ്ടതിൽ പിന്നെയാ ഞാൻ ശരിക്കും സന്തോഷം എന്താ എന്നറിഞ്ഞേ.. ഒത്തിരി കഥ പറഞ്ഞു തരും ചേച്ചി. നന്നായി പാടും. സ്കൂളിൽ എന്ത് പ്രോഗ്രാം ഉണ്ടെങ്കിലും എന്നെ ചേർക്കും. എന്നിട്ട് അതിനെല്ലാം സമ്മാനം വാങ്ങി തരും. പഠിക്കാനുള്ള വിഷയങ്ങൾ പറഞ്ഞു തരുന്നത് എന്ത് രസായിട്ടാ. കഥ പറയും പോലെ. എന്നെ വലിയ ഇഷ്ടാ ചേച്ചിക്ക്. എന്നെ പുറത്തു കൊണ്ട് പോകാൻ ചോദിച്ചതിന് പപ്പാ നല്ല ചീത്ത പറഞ്ഞു കണ്ണ് പൊട്ടിച്ചു ചേച്ചിയുടെ. എന്നാലും ഞങ്ങൾ പോയി. ഒരു സിനിമ ഒരു ഐസ്ക്രീം അത്രേ ഒക്കെ ഉള്ളു. പക്ഷെ അതെന്റെ ജീവിതത്തിലെ ഏറ്റവും നല്ല ദിവസമായിരുന്നു ചേച്ചിയുടെ വിരലിൽ കോർത്തു പിടിച്ചു കാഴ്ചകൾ കണ്ടു റോഡിലൂടെ നടക്കുമ്പോൾ എനിക്ക് എന്ത് സന്തോഷം ആയിരുന്നെന്നോ. ചേച്ചിയുടെ തമാശകൾ.. പൊട്ടിച്ചിരികൾ.. ഇടക്ക് എന്നെ ചേർത്ത് പിടിക്കും. അപ്പൊ തോന്നും ചേച്ചി എന്റെ അമ്മയാണെന്ന്.. അത്ര കരുതൽ ആണ് സ്നേഹം ആണ്. നിധിമോൾക്ക് ഏത് ഐസ്ക്രീം വേണം വാനിലയോ പിസ്തയോ..? മോൾക്ക് കട്ലറ്റ് വേണോ? ജ്യൂസ്‌ വാങ്ങട്ടെ? ക്ഷീണം ഉണ്ടോടാ… ഇങ്ങനെ ഇങ്ങനെ..
പക്ഷെ ഞങ്ങൾ അന്ന് വീട്ടിൽ വന്നപ്പോൾ പപ്പാ മുറ്റത്തുണ്ട്. കയ്യിൽ വലിയ ചൂരലും. ഞാൻ ചേച്ചി യുടെ പിന്നിലൊളിച്ചു.പക്ഷെ എന്നെ വലിച്ചു മുറ്റത്തോട്ട് തള്ളി പപ്പാ എന്നെ തല്ലി. ഒരു അടിയെ അടിച്ചുള്ളു. ചേച്ചി മുന്നിൽ വന്നു മറഞ്ഞു. പാവം പപ്പയുടെ അടി മുഴുവൻ ആ ദേഹത്താ കൊണ്ടത്. കണ്ണടച്ച് നിന്നു ഏറ്റുവാങ്ങി പാവം. അമ്മച്ചി ഓടി വന്നു പിടിച്ചില്ലായിരുന്നെങ്കിൽ പപ്പാ കൊന്നേനെ. “നിധിമോളുടെ അമ്മ ജീവിച്ചിരുന്നെങ്കിൽ ഇന്ന് നിങ്ങളെ വെറുത്തേനെ ” ചേച്ചി പൊട്ടിത്തെറിച്ചത് കേട്ട് പപ്പാ അനങ്ങാതെ നിക്കുന്ന കണ്ടു. ആ മുഖം ദേഷ്യം കൊണ്ട് ചുവന്നു “അതിനെ വല്ലപ്പോഴും ഒന്ന് പുറത്തു കൊണ്ട് പോണം സ്കൂളും വീടും മാത്രം അല്ല ലോകം. അതിന്റ അമ്മയുണ്ടായിരുന്നെങ്കിൽ.” “മതി ഇറങ്ങിപോടീ.. അവൾക്ക് അമ്മയില്ല. എന്റെ കുഞ്ഞിന് അമ്മ ഇല്ല. അതിങ്ങനെ ആവർത്തിക്കണ്ട. അതിന്റ അമ്മയാകാനും നോക്കണ്ട. അവൾക്ക് പപ്പാ മതി.. കേട്ടല്ലോ” പപ്പാ അലറി “നിങ്ങൾ നന്നാവില്ല.” ചേച്ചിദേഷ്യത്തോടെ പറഞ്ഞിട്ട് ഇറങ്ങി പോയി. അങ്ങനെ ഒക്കെ പറഞ്ഞെങ്കിലും പപ്പക്ക് നല്ല മനസ്താപമുണ്ടായിരുന്നു കേട്ടോ. അമ്മാതിരി അടി അല്ലെ അടിച്ചേ.. എന്നോട് പതിവില്ലാതെ വലിയ സ്നേഹം ആയിരുന്നു. രാത്രി വന്നു എന്റെ അരികിൽ കിടന്നു തലോടുന്നതും ഉമ്മ വെക്കുന്നതും ഒക്കെ ഞാൻ അറിഞ്ഞു. അപ്പൊ എന്റെ പപ്പാ കരയുന്നുണ്ടായിരുന്നു. പപ്പയുടെ കണ്ണീർ എന്റെ തലയിൽ മഴ പോലെ പെയ്തു കൊണ്ടിരുന്നു. പപ്പയെ വിഷമിപ്പിക്കുന്നതൊന്നും ചെയ്യില്ല എന്ന് ഞാൻ അപ്പൊ തീരുമാനിച്ചു. നിമ്മി ചേച്ചിയെ രണ്ടു മൂന്നു ദിവസം കാണാഞ്ഞപ്പോൾ പതിവില്ലാതെ പപ്പാ തന്നെ എന്നോട് ചോദിച്ചു. നിന്റെ ചേച്ചി എവിടെ എന്ന്. അങ്ങനെ ആ ഞായറാഴ്ച പപ്പയും ഞാനും കൂടി ചേച്ചിയുടെ വീട്ടിൽ ചെന്നു. ചേച്ചിക്ക് പനി ആയിരുന്നു എന്ന് പറഞ്ഞു. വെറുതെയ പപ്പയോടു പിണങ്ങിയ വരാതിരുന്നേ. എനിക്ക് മനസിലായി. ആൾ ക്ഷീണിച്ചു വല്ലാണ്ടായി. പപ്പാ ഇടക്കൊക്കെ ചേച്ചി യെ നോക്കുന്നത് ഞാൻ കണ്ടു പക്ഷെ ചേച്ചി നോക്കുന്നില്ല. അതെന്താണാവോ.. ഇപ്പൊ ചേച്ചി വീട്ടിൽ വന്നു എത്ര ബഹളം വെച്ചാലും പപ്പാ ഇപ്പൊ വഴക്ക് ഒന്നും പറയാറില്ല. വീട്ടിൽ ഉണ്ടെങ്കിൽ മുറിയിൽ ഇരിക്കും. ചേച്ചിയുടെ കയ്യിലും കാലിലും ഒക്കെ അന്നത്തെ അടിയുടെ പാട് കരിനീലിച്ചു കിടപ്പുണ്ടായിരുന്നു. ഇടക്ക് എപ്പോഴോ ഞാൻ അടുക്കളയിൽ അമ്മച്ചിയുടെ അടുത്ത് നിന്നു പുറത്തേക്ക് വന്നപ്പോൾ പപ്പാ ചേച്ചി യോട് എന്തോ പറയുന്നതും ആ കൈയിൽ അടി കൊണ്ട പാടുകളിൽ തൊടുന്നതും കണ്ടു ഞാൻ അങ്ങോട്ട് പോകാൻ മടിച്ചു. ഞാൻ സിനിമയിൽ ഒക്കെ കണ്ടിട്ടുണ്ട് അതൊക്കെ. ചേച്ചിയുടെ മുഖം താഴ്ന്നു ചുവന്നിരുന്നു. പപ്പയെന്താ പറഞ്ഞെ എന്ന് ഞാൻ പിന്നെ ചോദിച്ചു. സോറി പറഞ്ഞതാ ചേച്ചി മെല്ലെ ചിരിച്ചു. എനിക്കും സന്തോഷമായി. ചേച്ചിക്ക് ഒരു കല്യാണാലോചന വന്നത് ആ സമയത്തായിരുന്നു. ഡോക്ടർ ആണത്രേ.എന്നോടും പപ്പയോടും ഒന്നിച്ചാണ് ചേച്ചി അത് പറഞ്ഞത്. ചേച്ചി കല്യാണം കഴിച്ച് പോയാൽ ഞാൻ വീണ്ടും ഒറ്റയ്ക്കാകുമല്ലോ എന്നോർത്ത് സങ്കടപ്പെട്ട് പപ്പയുടെ മുഖത്തേക്ക് നോക്കുമ്പോൾ ആ കണ്ണും നിറഞ്ഞിരിക്കുന്നു. അന്ന് സ്കൂൾ വിട്ട് വന്നപ്പോൾ ചേച്ചിയുടെ സ്കൂട്ടി മുറ്റത്തുണ്ട്. പപ്പയുടെ കാറും ഉണ്ട് “ഞാൻ എന്താ പറയേണ്ടത്?” ചേച്ചി ചോദിക്കുന്നു “സമ്മതം പറയണം “പപ്പാ പറയുന്നു “ഉള്ളിൽ തട്ടി പറയുവാണോ ഇത്?” “പിന്നല്ലാതെ. നല്ല ബന്ധം ആണ്. നന്നായി വരും” “ദേ പോലിസ് ആണെന്നൊന്നും നോക്കുകേല ഒരിടി വെച്ചു തരും കേട്ടോ. എന്റെ മനുഷ്യാ നിങ്ങളെ എനിക്ക് ഭയങ്കര ഇഷ്ടാണെന്നു.” “എനിക്ക് അതില്ലെങ്കിലോ?” പപ്പയുടെ ശബ്ദം ചേച്ചിയുടെ കണ്ണ് നിറഞ്ഞൊഴുകുന്നത് ഞാൻ കണ്ടു. ഞാൻ സ്കൂൾ വിട്ട് വന്നത് അവർ അറിഞ്ഞില്ല.
“ശര്യാ എന്നെ ഇഷ്ടമാവില്ല. അറിയാം. ഞാനാരാ ബഹളക്കാരി, തന്നിഷ്ടക്കാരി, അഹങ്കാരി.. കാണാനും ആവറേജ്. നിധിമോളുടെ അമ്മയുടെ ഭംഗി ഒന്നുല്ല എനിക്ക്. ഞാൻ.. ചേച്ചി കരയുന്ന ശബ്ദം കേൾക്കാം.. “ക്ഷമിക്ക് എന്നോട്.. സ്നേഹിച്ചു പോയതിന്.. നിങ്ങളെ പിരിയുന്നതിലും വേദന മോളെ പിരിയുന്നതിലാ. മോളെ പിരിയുന്നതോർക്കുമ്പോൾ ചത്താലോ എന്ന തോന്നുക അത്ര വേദനയാ..” പൊട്ടിക്കരയുന്ന ശബ്ദം “പക്ഷെ ഞാൻ ഇനി ശല്യപ്പെടുത്തുകേല.. ഈ മുന്നിൽ വരികേല.. പോവാ “അതും പറഞ്ഞു ചേച്ചി ഓടിയിറങ്ങി പോയി. ചേച്ചി യുടെ സ്കൂട്ടി അകന്ന് പോയി കഴിഞ്ഞാണ് പപ്പാ എന്നെ കണ്ടത്. ഞാൻ എല്ലാം കേട്ടെന്നു. പപ്പക്ക് മനസ്സിലായിക്കാണും “പപ്പാ എന്തിനാ നുണ പറഞ്ഞത്?” ഞാൻ ചോദിച്ചു പപ്പാ മുഖം തിരിച്ചു കളഞ്ഞു “പപ്പക്ക് ഇഷ്ടം ല്ലേ ചേച്ചിയെ? പിന്നെ എന്തിനാ കള്ളം പറഞ്ഞത്? ചേച്ചി പാവമല്ലേ? പപ്പയോടെന്തു സ്നേഹാ ചേച്ചി ക്ക്? എന്നെ എന്തിഷ്ട… “ഞാൻ കരഞ്ഞു. പപ്പാ എന്നെ നെഞ്ചോട് ചേർത്ത് നിർത്തി “മോൾക്ക് വളരുമ്പോൾ മനസിലാകും എല്ലാം” അപ്പൊ ആ ഒച്ചയും ഇടറിയിരുന്നു. പക്ഷെ ചേച്ചിക്ക് ആക്‌സിഡന്റ് ആയിന്നറിഞ്ഞപ്പോ ഞാൻ അത് വരെ കണ്ട പപ്പയെ ആയിരുന്നില്ല പിന്നെ. ഒരു ഭ്രാന്തനെ പോലെ പപ്പാ ആശുപത്രിയിലേക്ക് ഓടി.എന്നെ പോലും മറന്നു കൊണ്ട്.. മൂന്നു ദിവസം.. ചേച്ചി യുടെ ബോധം മറഞ്ഞ മൂന്നു ദിവസം ആ ആശുപത്രിയിൽ പപ്പാ നിന്നു ഒരു ഇറ്റു വെള്ളം കുടിക്കാതെ.. ആഹാരം കഴിക്കാതെ എല്ലാം മറന്ന്.. എന്റെ പപ്പാ ചേച്ചിയെ ജീവനെ പോലെ സ്നേഹിക്കുന്നു എന്ന് തിരിച്ചറിഞ്ഞത് ആദ്യം ഞാൻ തന്നെയാണ്. . ഇന്ന് ഞങ്ങൾ ഞാനും പപ്പയും ചേച്ചിയും ഈ നാട്ടിൽ നിന്നു പോവാണ്. ഇത് പണിഷ്മെന്റ് ട്രാൻസ്ഫർ അല്ല കേട്ടോ. എന്റെ പപ്പാ ഒത്തിരി മാറി. ദേഷ്യം വാശി ഒക്കെ പോയി.. ചേച്ചിയുടെ വീട്ടുകാർക്ക് ആദ്യം എതിർപ്പ് ആയിരുന്നു എങ്കിലും പപ്പയെ മനസിലാക്കിയപ്പോ അത് ഇല്ലാതായി.. ചേച്ചി ഇപ്പോഴും പഴയ പോലെ തന്നെ എന്റെ ഒപ്പം കളിച്ച് എന്നെ ലാളിച്ചു സ്നേഹിച്ച്… അപ്പൊ പപ്പാ കളിയാക്കുമ്പോൾ ചേച്ചി പറയും “ഞാൻ ആദ്യം സ്നേഹിച്ചത് എന്റെ നിധിമോളെയാണ്.. എന്റെ മോളു കഴിഞ്ഞേയുള്ളു എനിക്കി ലോകത്തിലെന്തും” പപ്പാ ചിരിക്കും എനിക്ക് അപ്പൊ തോന്നുക എന്തെന്നോ എന്റെ അമ്മയുടെ ആത്മാവ് ആണ് നിമ്മിച്ചേച്ചിയിൽ എന്ന്.. എന്നെ കൊതി തീരെ സ്നേഹിച്ചു മതിയാവാതെ പോയ ആ പാവം ആത്മാവ്… ലൈക്ക് ചെയ്ത് അഭിപ്രായങ്ങൾ കുറിക്കൂ…
രചന: ഭാഗ്യലക്ഷ്മി. കെ. സി.
മൊബൈലും അവളും
ഒരു സ്മാർട്ട് ഫോൺ കിട്ടിയതോടെ അവളാകെ മാറി. ഓഫീസ് വിട്ടുവന്നാൽ തനിക്ക് അവളുടെ വ൪ത്തമാനം കേൾക്കലായിരുന്നു ഏറ്റവും വലിയ ബോറടി. പകൽമുഴുവൻ തനിച്ചിരിക്കുന്നതല്ലേ.. ഒന്നും എതി൪ത്ത് പറയാനും വയ്യ.. അഥവാ വല്ലതും പറഞ്ഞാൽ കരച്ചിലായി, പരിഭവമായി.. മക്കൾ രണ്ടുപേരും ഹോസ്റ്റലിലല്ലേ.. എനിക്ക് സംസാരിക്കാൻ നിങ്ങളല്ലാതെ പിന്നാരാണുള്ളത്… അവളുടെ സ്ഥിരം പരിഭവമാണ്.. അപ്പോഴാണ് യാദൃച്ഛികമായി ഒരു സുഹൃത്ത് ഗൾഫിൽനിന്നും കൊണ്ടുവന്ന മൊബൈൽ ഫോൺ തന്നത്. തനിക്ക് വിലകൂടിയ ഒരെണ്ണം ഉള്ളതുകൊണ്ടും അതിലെ നമ്പേ൪സും മറ്റ് ഡാറ്റാസും അടുത്തതിലേക്ക് മാറ്റാനുള്ള മടികൊണ്ടുമാണ് അത് അവൾക്ക് കൊടുത്തത്.. ആദ്യമൊക്കെ അവൾക്ക് വലിയ താത്പര്യമൊന്നുമില്ലായിരുന്നു. പിന്നീട് പതിയെ ഓരോന്ന് പഠിച്ചെടുത്തതോടെ അവൾ സോഷ്യൽ മീഡിയയിൽ സജീവമായി. വാട്സാപ്പ് ഗ്രൂപ്പുകൾ, അവയിൽ പഴയ സുഹൃത്തുക്കൾ ഒക്കെ ആയതോടെ നിലത്തൊന്നുമായിരുന്നില്ല അവൾ. എപ്പോഴും ചാറ്റും കമന്റും സന്തോഷവും തന്നെയായിരുന്നു.
വൈകുന്നേരങ്ങൾ അവളുടെ പരിഭവമോ ഗോസിപ്പോ കേൾക്കാതെ കുറച്ചുസമയം ന്യൂസ് കാണാൻ സാധിച്ചതോടെ താനും ഹാപ്പിയായി. പക്ഷേ പൊടുന്നനെ ഒരു ദിവസം അവൾ മൊബൈൽ സോഫയിലേക്ക് വലിച്ചെറിഞ്ഞു. എന്താ.. എന്തുപറ്റി? തന്റെ ചോദ്യത്തിന് അവളുത്തരമൊന്നും തരാതെ പോയി കിടന്നു. തന്റെ തലയിൽ സംശയങ്ങൾ പെരുകാൻ തുടങ്ങി. പതിയെ അടുത്തുപോയി വളരെ മൃദുവായി ചോദിച്ചുനോക്കി.. എന്താ..? ആരെങ്കിലും പിണങ്ങിയോ? അതോ വഴക്കിട്ടോ? മൌനം മാത്രം മറുപടി. ആഹാരമൊക്കെ കഴിച്ച് പോയികിടന്നപ്പോൾ വീണ്ടും ചോദിച്ചുനോക്കി.. എന്തിനാ നേരത്തെ ഫോൺ വലിച്ചെറിഞ്ഞത്? ഒന്നൂല്ല… അവൾ പുതപ്പ് വലിച്ച് മുഖം മൂടിക്കിടന്നു. പക്ഷേ അവൾ കരയുന്നുണ്ടോ… തന്റെയുള്ളിൽ സംശയം കിളി൪ക്കാൻ തുടങ്ങി. അവളെന്തോ ഒളിക്കുന്നുണ്ട്.. കണ്ടുപിടിക്കുക തന്നെ.. പക്ഷേ പാസ് വേ൪ഡ് എങ്ങനെ അറിയും. മകനാണ് എല്ലാം സെറ്റ്‌ചെയ്തു കൊടുത്തത്. തനിക്കും വലുതായൊന്നും മൊബൈലിനെക്കുറിച്ച് അറിയില്ല. അവനാണ് എല്ലാം പറഞ്ഞുതന്നത്. അവനിനി അടുത്ത പ്രാവശ്യം ബാംഗ്ലൂർനിന്ന് വരണം. അപ്പോഴേ ചോദിക്കാൻ പറ്റൂ.. അതുവരെ ക്ഷമയോടെ കാത്തിരിക്കുകതന്നെ. അടുത്തദിവസം ഓഫീസിൽ പോയിട്ട് ഇരിക്കപ്പൊറുതി കിട്ടിയില്ല. ഇവൾക്ക് എന്തുപറ്റിയതാണെന്നറിയാതെ ആകെ ഒരു വല്ലായ്ക.. നേരിട്ട് ഗൌരവമായി ചോദിച്ചാലോ.. വലിയ വഴക്കാകുമോ.. അതോ വല്ല കള്ളത്തരവും കണ്ടുവെച്ചിട്ടുണ്ടാവുമോ പറയാൻ… ഒരുവിധം വൈകുന്നേരമാക്കി. ബസ്സിറങ്ങി, അത്യാവശ്യം പച്ചക്കറികളും സാധനങ്ങളും വാങ്ങി ഓട്ടോപിടിച്ച് ഓടിവന്നു. നോക്കുമ്പോൾ ചെടികൾക്ക് വെള്ളമൊഴിച്ചും മൂളിപ്പാട്ട് പാടിയും സന്തോഷമായി നിൽക്കുന്ന അവളെയാണ് കണ്ടത്.
പെട്ടെന്ന് ഒന്നും ചോദിക്കാൻ തോന്നിയില്ല. വരട്ടെ, പതുക്കെ ചോദിക്കാം.. മനസ്സിൽ കരുതി. തന്നെ കണ്ടതും അവൾ ഓടിവന്ന് സാധനങ്ങൾ വാങ്ങി. ഇന്നെന്താ നേരത്തേ ഇറങ്ങിയോ? ഉം.. ഞാൻ കപ്പ പുഴുങ്ങിവെച്ചിട്ടുണ്ട്.. മത്തി മുളകിട്ടതും.. വേഗം കുളിച്ചിട്ട് വന്നോളൂ.. അവൾ ചായവെക്കാൻ അടുക്കളയിലേക്ക് പോയി. അവളുടെ മൊബൈൽ ടീപ്പോയിൽ അനാഥമായി കിടക്കുന്നു. ഇതാദ്യമായാണ് ഇങ്ങനെ കാണുന്നത്. എപ്പോഴും അതും കൈയിൽ വെച്ചുകൊണ്ടല്ലാതെ അവളെ കാണാറില്ല. താനാ മൊബൈൽ എടുത്ത് തിരിച്ചും മറിച്ചും നോക്കി. ഒന്നും ചെയ്യാനാകാതെ അവിടെത്തന്നെ വെച്ചു. കുളിച്ചുവരുമ്പോഴേക്കും ഡൈനിങ് ടേബിളിൽ അവൾ പലതും കഴിക്കാനായി നിരത്തിയിരുന്നു. വിശപ്പോടെ എല്ലാം ആസ്വദിച്ച് കഴിച്ചു. പഴയതുപോലെ അവൾ ഓരോന്ന് പറഞ്ഞുകൊണ്ടിരുന്നു. അടുത്തവീട്ടിലെ പൂച്ച നാല് കുഞ്ഞുങ്ങളെ പ്രസവിച്ചതും പറമ്പിലെ വാഴ കുലച്ചതും എല്ലാം പറഞ്ഞുകഴിഞ്ഞപ്പോൾ പതിയെ ചോദിച്ചു: ഇന്നെന്താ… എഫ്ബീയിലൊന്നും കയറിയില്ലേ? ഇല്ല.. ഇനി കയറുന്നില്ല… അവൾ മുഖംകറുപ്പിച്ച് പാത്രങ്ങളുമെടുത്ത് അകത്തേക്ക് പോയി. വീണ്ടും ടെൻഷൻ.. ടെൻഷൻ… ആവുന്നത്ര മയപ്പെടുത്തി വീണ്ടും പിറകേനടന്ന് ചോദിച്ചു: അതെന്താ? നിന്റെ പാചകഗ്രൂപ്പിൽ ആരും പുതിയ റെസിപ്പിയൊന്നും ഇട്ടില്ലേ? മൊബൈൽ തുറന്നാൽപ്പിന്നെ വേണ്ടാത്ത ഓരോന്ന് കയറിവരും.. അത് വായിച്ചാൽ എന്റെ മനഃസ്സമാധാനം പോകും.. എന്ത്..? നിങ്ങളുടെ കഴുത്തിന്റെ ഇവിടെ വേദനയുണ്ടോ.. സൂക്ഷിക്കുക, നിങ്ങൾ രാത്രി ഉറങ്ങുന്നത് ഇങ്ങനെയാണോ.. ശ്രദ്ധിക്കുക, നിങ്ങളുടെ കാലിൽ ഈ പാടുകളുണ്ടെങ്കിൽ ഉറപ്പായും എത്രയും പെട്ടെന്ന് ഡോക്ടറുടെ സഹായം തേടുക, എന്നിങ്ങനെ എപ്പോഴും ഒരോ പോസ്റ്റുകൾ കാണാം.. വായിച്ചുവായിച്ച് എനിക്കില്ലാത്ത രോഗങ്ങളില്ല എന്നായിട്ടുണ്ട്… ഇനി വയ്യ… അവൾ പാത്രംകഴുകൽ തുട൪ന്നു. താൻ പതിയെ അടുക്കളയിൽനിന്ന് പിൻവാങ്ങി പൂമുഖത്ത് പോയിരുന്ന് വിസ്തരിച്ചൊന്ന് ചിരിച്ചു… ആശ്വാസത്തോടെ.
രചന: സജി തൈപ്പറമ്പ്
“മോളേ ചാരു … അമ്മേടെ ഫോണെന്തേടാ?” ഹാളിലിരുന്ന് ടിവി കാണുന്ന മകളോട് ഊർമ്മിള ചോദിച്ചു. “അതുമെടുത്തോണ്ടാണ്, രാവിലെ അച്ഛൻ പുറത്തോട്ട് പോയത്” “ങ് ഹേ, അപ്പോൾ അച്ഛൻ്റെ ഫോണെന്ത്യേ?” അതില് ചാർജ്ജ് തീർന്ന് പോയെന്ന് പറഞ്ഞ് ,മുറിയിൽ കുത്തിയിട്ടിരിക്കുവാ ഓഹ് നിൻ്റെ അച്ഛൻ്റെയൊരു കാര്യം? എനിക്കെൻ്റെ അമ്മയെ ഒന്ന് വിളിക്കണമായിരുന്നല്ലോ? അതാണോ കാര്യം? അമ്മമ്മയെ വിളിക്കണമെങ്കിൽ, അച്ഛൻ്റെ ഫോണിൽ നിന്ന് വിളിച്ചാൽ പോരെ? അത് നേരാണല്ലോ ? ഞാനെന്ത് മണ്ടിയാണ് ? അതിപ്പഴാണോ അമ്മയ്ക്ക് മനസ്സിലായത്? ഡീ ഡീ … ,നീയങ്ങനെയെന്നെ കൊച്ചാക്കണ്ട കെട്ടാ ?, ഞാൻ മണ്ടിയാണെങ്കിലേ, നീ വെറും കഴുതയാ… മരക്കഴുത.., മകളോട് പരിഭവിച്ചിട്ട്, ഊർമിള നേരെ ബെഡ് റൂമിലേക്ക് പോയി. അവിടെ ചാർജ് ചെയ്തിട്ടിരുന്ന ഭർത്താവിൻ്റെ ഫോണെടുത്തിട്ട് കോണ്ടാക്ട്സ് ഓപ്പൺ ചെയ്തപ്പോൾ,
കാൾ രജിസ്റ്ററാണ് ആദ്യം കണ്ടത് അതിൽ ഏറ്റവും മുകളിൽ, ഇൻകമിങ്ങ് കോളായി വന്നിരിക്കുന്ന പേര് കണ്ട്, ഊർമ്മിള, ഞെട്ടലോടെ അതിലേക്ക് സൂക്ഷിച്ച് നോക്കി. സെക്കൻ്റ് വൈഫ് .,,, വിശ്വാസം വരാതെ, വീണ്ടും വീണ്ടും ഇംഗ്ളീഷ് അക്ഷരങ്ങൾ അവൾ കൂട്ടി വായിച്ചു. അതെ, സെക്കൻ്റ് വൈഫ് എന്ന് തന്നെയാണ് എഴുതിയിരിക്കുന്നത്, ഈശ്വരാ… തൻ്റെ ഭർത്താവിന് താനറിയാതെ ഒരു രണ്ടാം ഭാര്യയോ? അവൾക്ക് തല കറങ്ങുന്നത് പോലെ തോന്നി ,വീണ് പോകാതിരിക്കാൻ, കട്ടിലിൻ്റെ ക്രാസിയിൽ, വിറയ്ക്കുന്ന കൈകൾ കൊണ്ടവൾ മുറുകെ പിടിച്ചു. എന്നാലും ജീവന് തുല്യം സ്നേഹിച്ച തന്നെ ചതിക്കാൻ തൻ്റെ രമേശേട്ടന് എങ്ങനെ തോന്നി? മ്ഹും രമേശേട്ടൻ, ഇനി മുതൽ തനിക്കങ്ങനെ വിളിക്കാൻ കഴിയില്ല ,ദുഷ്ടനാണയാൾ ഫോൺ കൈയ്യിൽ പിടിച്ച് കൊണ്ട്,
എന്ത് ചെയ്യണമെന്നറിയാതെ, അവൾ ബെഡ്ഡിലേക്ക് തളർന്നിരുന്നു. തൻ്റെ ഭർത്താവിനെ തട്ടിയെടുത്ത ആ എരണം കെട്ടവളെ, വിളിച്ച് രണ്ട് വർത്തമാനം പറയണമെന്ന് ഊർമിളയ്ക്ക് തോന്നി. അവൾ, സെക്കൻ്റ് വൈഫൈന്നെഴുതിയ, ആ നമ്പർ ഡയൽ ചെയ്തു. പക്ഷേ, അത് എൻഗേജ്ഡായിരുന്നു ഛെ! അസ്വസ്ഥതയോടെ അവൾ തല കുടഞ്ഞു. അടുത്ത നിമിഷം ഊർമ്മിളയുടെ കൈയ്യിലിരുന്ന ഫോൺ റിങ്ങ് ചെയ്തു. സെക്കൻ്റ് വൈഫ് കോളിങ്ങ് എന്ന് ഡിസ്പ്ളേയിൽ കണ്ടപ്പോൾ, അരിശത്തോടെ അവൾ കോൾ അറ്റൻറ് ചെയ്തു. സത്യം പറയെടീ… ആരാടീ നീ? നിനക്ക് സ്വന്തമാക്കാൻ എൻ്റെ ഭർത്താവിനെ മാത്രമേ കിട്ടിയുള്ളോ? എടീ.. ഊർമ്മിളേ… നിനക്കെന്താ ഭ്രാന്തായോ ? എടീ ഇത് ഞാനാണ് , നിൻ്റെ ഭർത്താവ് രമേശൻ ങ്ഹേ, അപ്പോൾ നിങ്ങൾ അവളുടെയടുത്തേക്കാണല്ലേ? രാവിലെ കാപ്പി പോലും കുടിക്കാൻ നില്ക്കാതെ ഓടിപ്പോയത് ? നീയാരുടെ കാര്യമാണീ പറയുന്നത് ? ഓഹ്, ഒന്നുമറിയാത്ത പോലെ ? നിങ്ങളിപ്പോഴുള്ളത് സെക്കൻ്റ് വൈഫിൻ്റെ കൂടെയല്ലേ?
നിങ്ങളിപ്പോൾ വിളിക്കുന്നത് അവളുടെ ഫോണിൽ നിന്നല്ലേ? ഓഹ് അപ്പോൾ അതാണ് കാര്യം? എടീ കഴുതേ… ഞാൻ വിളിക്കുന്നത് നിൻ്റെ ഫോണിൽ നിന്ന് തന്നെയാണ് ,നീയാ നമ്പരൊന്ന് നോക്കിക്കേ ? ഇന്നലെ നീ പുതിയൊരു സിം കൂടി അതിനകത്തിട്ടില്ലേ? നിൻ്റെ പഴയ നമ്പര് വൈഫ് എന്നാണ് എൻ്റെ ഫോണിൽ സേവ് ചെയ്തിരിക്കുന്നതെന്ന് നിനക്കറിയാമല്ലോ ?അപ്പോൾ നിൻ്റെ രണ്ടാമത്തെ നമ്പരാണിതെന്ന് തിരിച്ചറിയാനാണ് ,ഞാൻ സെക്കൻ്റ് വൈഫ് എന്നെഴുതി സേവ് ചെയ്തത് ,അതിന് നീയിത്ര വലിയ ഭൂകമ്പമുണ്ടാക്കണോ? അത് ശരി ,എൻ്റെ മനുഷ്യാ… വൈഫിൻ്റെ രണ്ടാമത്തെ ഫോൺ നമ്പര് സേവ് ചെയ്യുമ്പോൾ, വൈഫ് സെക്കൻ്റെന്നല്ലേ എഴുതേണ്ടത്, അതിന് പകരം സെക്കൻ്റ് വൈഫെന്നെഴുതിയ നിങ്ങളല്ലേ യഥാർത്ഥ കഴുത, ഓഹ് അത് ശരിയാണല്ലോ ? വൈഫ് സെക്കൻ്റ് എന്നത് തിരിച്ചെഴുതിയപ്പോൾ, അതിൻ്റെയർത്ഥം ഇത്രയും വ്യത്യാസം വരുമെന്ന് ഞാൻ ചിന്തിച്ചില്ല ,സോറി എൻ്റെ ഫസ്റ്റ് വൈഫേ… അല്ല വെറുംവൈഫേ..’ അതും പറഞ്ഞയാൾ ചിരിച്ചപ്പോൾ, ഊർമിളയ്ക്കും ചിരി അടക്കാനായില്ല
രചന: വയലിനെ പ്രണയിക്കുന്നവൻ
രാവിലെ ഫോൺ എടുത്തുനോക്കിയപ്പോൾ കുറെ നോട്ടിഫിക്കേഷൻ വന്നുകിടക്കുന്നു അതിൽ എനിക്ക് പരിചയമുള്ള ഒരു പെൺകുട്ടിയുടെയും നാട്ടിൽ ഉണ്ടായിരുന്നപ്പോൾ ഞാൻ എപ്പോഴും ശ്രദ്ധിക്കുമായിരുന്നു ആ കുട്ടിയെ…. നല്ലൊരു കുട്ടിയാണ് എപ്പോഴും അമ്പലത്തിൽ പോകുകയും മുടിയിൽ തുളസിക്കതിർ വെക്കുകയും എല്ലാം ചെയുന്ന (ഇപ്പോഴത്തെകാലത്തു ഇങ്ങനെയുള്ള കുട്ടികളെ കാണാൻ ഇല്ല )ഒരു തനി നാട്ടിൻപുറത്തുകാരി കുട്ടി…. ആദ്യം ഓർത്തു ഒരു റിക്വസ്റ്റ് അയച്ചാലോയെന്നു പിന്നെ വിചാരിച്ചു വേണ്ട… ഒരു മെസ്സേജ് അയച്ചുനോക്കാം എന്നിട്ട് അതിനു റിപ്ലൈ കിട്ടുവാണേൽ ചോദിച്ചിട്ട് റിക്വസ്റ്റ് അയക്കാമെന്നു… അങ്ങനെ ഒരു മെസ്സേജ് അയച്ചു… പേരും അറിയുമോ എന്നെല്ലാം ചോദിച്ചുകൊണ്ട്…. കുറെ നേരം നോക്കിയിരുന്നിട്ടും റിപ്ലൈ ഒന്നും കിട്ടിയില്ല… വൈകുന്നേരം ജോലിയെല്ലാം കഴിഞ്ഞു റൂമിൽ ചെന്നപ്പോൾ വെറുതെ ഫോൺ എടുത്തു…
അവൾ എന്റെ മെസ്സേജ് സീൻ ചെയ്തോ എന്ന് നോക്കി… അപ്പൊ ജസ്റ്റ്‌ സീൻ ചെയ്തതെ ഉള്ളു… എന്തോ റിപ്ലൈ ടൈപ്പ് ചെയുന്നു… അവിടെത്തന്നെ നോക്കിയിരുന്നു എന്താവും അവളയ്ക്കുക എന്ന്… അപ്പൊ അവളയച്ചത് അവൾക്ക് ആളെ മനസിലായില്ല എന്ന്… ഞാൻ അപ്പൊ തന്നെ അവൾക്ക് എന്റെ ഒരു ഫോട്ടോ സെന്റ് ചെയ്തുകൊണ്ട് ചോദിച്ചു ഇപ്പൊ മനസ്സിലായോ എന്ന്… അതിനു അറിയാം എന്ന് മറുപടി വന്നു… “”എങ്കിൽ ഞാൻ റിക്വസ്റ്റ് അയക്കട്ടെ”” എന്നുചോദിച്ചപ്പോൾ… “”റിക്വസ്റ്റ് അയക്കണ്ട ചേട്ടൻ എന്തെകിലും ഉണ്ടകിൽ ഇവിടെ വന്നു സംസാരിച്ചാൽ മതിയെന്നു”” പറഞ്ഞു… ഞാൻ പറഞ്ഞു… “”അങ്ങനെ സംസാരിക്കാൻ ഒന്നുമില്ല… വെറുതെ കണ്ടപ്പോൾ ഒന്ന് വിശേഷങ്ങൾ അറിയാൻ ഒരു ആഗ്രഹം… അത്രയും ഉള്ളു… ചേട്ടൻ ഇപ്പൊ ബാംഗ്ലൂർ അല്ലേ… അതേല്ലോ… അതെങ്ങനെ അറിയാം… അതൊക്കെ അറിയാം… ഞാൻ മംഗലാപുരത്താണ് നഴ്സിംഗ് ചെയ്തത്… ആഹാ താൻ നഴ്സിംഗ് എല്ലാം കഴിഞ്ഞോ… കഴിഞ്ഞു…
ചേട്ടൻ കഴിഞ്ഞ തവണ നാട്ടിൽ വന്നപ്പോൾ ഞാൻ കണ്ടിരുന്നു ചേട്ടനെ… പക്ഷെ ചേട്ടൻ എന്നെ കണ്ടില്ല… M ഞാൻ കഴിഞ്ഞ തവണ മൂന്നു ദിവസം ലീവിന് ആണ് വന്നത്… പിന്നെ ഫ്രണ്ട്സിന്റെ എല്ലാം വീട്ടിൽ പോയി തിരിച്ചു പോന്നു… ഇപ്പോഴും കള്ളുകുടി ഉണ്ടോ… അതില്ലാതെയിരിക്കുമോ ബാംഗ്ലൂർ അല്ലേ… എപ്പോ വേണേൽ സാധനം കിട്ടും… പിന്നെ കുടിക്കാതെ ഇരിക്കുമോ… അതും നാട്ടിലെക്കാൾ വിലക്കുറവും.. ചേട്ടന്റെ കല്യാണം എന്തെകിലും ആയോ… ഓ എന്ത് കല്യാണം… അതൊന്നും വേണോന്ന് ഒന്നും ഇല്ല.. ഇപ്പൊ ഈ ലൈഫ് സുഖം ഉണ്ട്… തന്റെയോ..? എന്റെ കല്യാണം വീട്ടുകാർ നോക്കുന്നുണ്ട്… ചേട്ടന് എന്നെ ഇഷ്ടമായിരുന്നു അല്ലേ… അങ്ങനെ തന്നോട് ആരാ പറഞ്ഞത്… ഞാൻ കണ്ടിട്ടുണ്ടല്ലോ ചേട്ടൻ എന്നെ നോക്കുന്നത്.. അതിനു നോക്കി എന്ന് വെച്ചു.. തന്നെ കാണാൻ ഒരു പ്രേത്യേക ഐശ്വര്യം ഉണ്ടായിരുന്നു അതാ നോക്കിയത്… പിന്നെ എന്റെ കാര്യങ്ങൾ എല്ലാം അറിയാല്ലോ…
അറിയാൻ എന്തിരിക്കുന്നു അല്ലേ നാട്ടിൽ പാട്ടല്ലേ… ഒരു പെണ്ണിനെ പ്രണയിച്ചു അവൾ പോയി കഴിഞ്ഞു കള്ളുകുടിച്ചു ജീവിതം നശിപ്പിക്കുന്ന ഒരു മണ്ടൻ അല്ലേ… ഞാൻ വേറെ ഒന്നും വിചാരിച്ചല്ല തന്നെ നോക്കിയത്… അപ്പൊ ചേട്ടന് എന്നെ ഒട്ടും ഇഷ്ടമല്ലായിരുന്നു… ഇഷ്ടം അങ്ങനെ ചോദിച്ചാൽ… എനിക്ക് തന്നോട് ഒരു സ്നേഹം ഉണ്ടായിരുന്നു… കാരണം നമ്മുടെ നാട്ടിൽ ആണെകിലും വേറെ എവിടെ ആണെകിലും തന്നെ പോലെ ഒരു പെൺകുട്ടിയെ കാണാൻ ഇല്ലായിരുന്നു… രാവിലെ കുളിച്ചു തുളസിക്കതിർ എല്ലാം ചൂടി അമ്പലത്തിൽ വരുന്ന ഒരു കുട്ടി… അതിനു ചേട്ടൻ ആ ഉത്സവത്തിന്റെ സമയത്തു മാത്രം അല്ലേ എന്നെ അങ്ങനെ കണ്ടിട്ടുള്ളു… അതെ… ആ സമയത്തു ഫുൾ ടൈം അമ്പലത്തിൽ ആണല്ലോ അതുകൊണ്ട്…
ബാക്കി എല്ലാദിവസവും അടിച്ചുപൂക്കുറ്റിയായി കിടന്നുറങ്ങിയാൽ പിന്നെ എഴുനേൽക്കാൻ പാടാനല്ലേ… അതെ സത്യം… ഉത്സവത്തിന്റെ സമയത്തും ആ കൗണ്ടറിൽ ഇരിക്കുമ്പോഴും ആരെകിലും രസീത് എഴുതാൻ ഉണ്ടെകിൽ ചേട്ടൻ പോയി രണ്ടെണ്ണം അടിച്ചിട്ടല്ലേ അവിടെവന്നിരിക്കുക… ഇതൊക്കെ തനിക്ക് എങ്ങനെ അറിയാം… അതോ… അത് പിന്നെ പറയാം… ഹ കഷ്ടമുണ്ട്ട്ടോ പറഞ്ഞിട്ട് പോ… പറയാം… പക്ഷെ ഇനി കള്ളുകുടിക്കരുത്… അത് അങ്ങനെ പെട്ടന്ന് നിർത്താൻ പറ്റുമോ… ഇനി എന്നെകിലും ഒരിക്കൽ എന്നെ സ്നേഹിക്കാൻ ഒരു പെണ്ണ് വരട്ടെ… അപ്പൊ അവള് പറയുവാണേൽ അപ്പൊ നോക്കാം… ഞാൻ മതിയോ… ഞാൻ ചേട്ടനെ സ്നേഹിക്കാം.. അപ്പൊ ഞാൻ പറയുന്നതെല്ലാം ചേട്ടൻ കേൾക്കുമോ.. എന്താ… എന്താ പറഞ്ഞത്… അതോ ഒരു ദിവസം അമ്പലത്തിന്റെ അടുത്തുവെച്ചു ഞാനും അമ്മയും അതിലെ പോകുവായിരുന്നു… അപ്പൊ ചേട്ടനും കൂട്ടുകാരും എല്ലാവരും അവിടെ നിൽക്കുന്നുണ്ടായിരുന്നു… ചേട്ടൻ ആണേൽ അടിച്ചു നല്ല പൂസ്… ഞാൻ അമ്മയോട് ചോദിച്ചു “” ആ ചേട്ടൻ ആണേൽ എനിക്ക് അമ്മ ഞങ്ങളുടെ കല്യാണത്തിന് സമ്മതിക്കുമോ എന്ന് “”…
അപ്പൊ അമ്മ പറഞ്ഞു… “” ആ കള്ളുകുടിയനോ എന്ന്.. ഒരിക്കലും ഇല്ല എന്ന് “”… അപ്പൊ ഞാൻ പറഞ്ഞു “”അമ്മേ ആ ചേട്ടൻ ആ ചേച്ചി ഇട്ടിട്ട് പോയതുകൊണ്ട് അല്ലേ ഇങ്ങനെ ആയതു എന്ന്… ആ ചേട്ടന് ആ ചേച്ചിയെ അത്രയും ഇഷ്ടം ആയിട്ടല്ലേ… ഇങ്ങനെ ചങ്ക് പറിച്ചു സ്നേഹിക്കുന്ന ഒരാളെ അല്ലേ അമ്മേ എല്ലാ പെണ്ണും ആഗ്രഹിക്കുക എന്ന്.. “”… എന്നിട്ടോ എന്നിട്ട് അമ്മ പറഞ്ഞു അവൻ എന്നെകിലും നന്നായി വരുവണേൽ നിന്നെ അവനു ഇഷ്ടം ആണേൽ അവൻ ഇവിടെ ഞങ്ങളോട് വന്നു ചോദിക്കട്ടെ എന്ന്… എന്നിട്ട് ഇതൊക്കെ എന്താ താൻ അന്ന് പറയാതെയിരുന്നത്…. അത് പിന്നെ ഞാൻ പറയാൻ ആഗ്രഹിച്ച സമയത്തു ചേട്ടനെ കണ്ടില്ല… പിന്നെ ചേട്ടന് എന്നെ ഇഷ്ടമാണെകിൽ എന്നോട് വന്നു പറയട്ടെ എന്ന് വിചാരിച്ചു… ചേട്ടൻ അത് പറഞ്ഞതും ഇല്ല… പിന്നെ എനിക്ക് നഴ്സിംഗ് അഡ്മിഷൻ കിട്ടി ഞാൻ അങ്ങോട്ട് പോയി… പിന്നെ അമ്മയെ വിളിക്കുമ്പോൾ ചേട്ടനെപ്പറ്റി ചോദിക്കുമായിരുന്നു… കുറെ നാൾ ഇവിടെ ഉണ്ടെന്ന് പറഞ്ഞു കേട്ടു… പിന്നെ ബാംഗ്ലൂർ പോയി എന്നും കെട്ടു… കോൺടാക്ട് ചെയ്യാൻ ഒത്തിരി നോക്കി പക്ഷെ കിട്ടിയില്ല… ഇനി പറ ഞാൻ പറഞ്ഞാൽ കേൾക്കുമോ…?.. ഇനി എന്റെ ലൈഫിൽ ഒരു പെണ്ണ്… അത് ശെരിയാവുമെന്നു തോന്നുന്നില്ല…
പിന്നെ ഇനി എനിക്ക് പഴയതുപോലെ ആവാൻ പറ്റുമെന്നും തോന്നുന്നില്ല… അതൊക്കെ ഞാൻ ശെരിയാക്കി എടുത്തോളാം… മര്യാദക്ക് കള്ളുകുടിക്കാതെ വീട്ടിൽ പോയി നമ്മുടെ കാര്യം സംസാരിച്ചോളണം… ഇനി അവധിക്കു വരുമ്പോൾ… പിന്നെ ചേട്ടനെ കള്ളുകുടി എല്ലാം നിർത്തി ശെരിയാക്കി എടുക്കുന്നകാര്യം ഞാൻ ഏറ്റു… അവൾ ഇതുപറഞ്ഞപ്പോഴാണ് ഒരു കാര്യം ഓർത്തത് ഒരു പെണ്ണ് പോയതുകൊണ്ട് ഇങ്ങനെ കള്ളുകുടിച്ചു കുറെ ജീവിതം കളഞ്ഞു… ഇപ്പൊ നല്ല ഒരു പെൺകുട്ടി… അവളുടെ ജീവിതം നശിപ്പിച്ചുകൊണ്ട് എന്റെ ജീവിതം നന്നാക്കാൻ എന്റെ ലൈഫിലേക്ക് വരാൻ റെഡിയായിനിൽക്കുവാണ്… ഇതുപോലൊരു സ്നേഹം ഇനി ഒരിക്കലും കിട്ടി എന്ന് വരില്ല… നമ്മൾ സ്നേഹിക്കുന്നവരെ നമ്മളെ സ്നേഹിക്കുന്നവരെ നമ്മൾ സ്നേഹിക്കാൻ… ഇനി ഇതിന്റെ സ്നേഹം വേണ്ട എന്ന് വെക്കാൻ ആവില്ല… ….. എങ്കിൽ അവളുടെ വീട്ടിൽ ഒരു ദിവസം എങ്കിലും കള്ളുകുടിക്കാതെ ഡീസന്റ് ആയി പോയി ചോദിച്ചു നോക്കാം അല്ലേ…?… കെട്ടിച്ചുതരുവാണേൽ തരട്ടെ അല്ലേ…?.. പക്ഷെ കെട്ടിക്കഴിഞ്ഞു ഒരു തുള്ളിപോലും അവൾ കുടിപ്പിക്കാതെ ഇരിക്കുമോ എന്നാണ് സംശയം……