Connect with us

Relationship

അവളുടെ കെട്ടിയോന്റെ സ്വഭാവം അവൾക്കല്ലേ അറിയത്തൊള്ളൂ…

Published

on

രചന: അബ്രാമിൻ്റെ പെണ്ണ്

കയ്യിലെ പ്ലേറ്റിലിരിക്കുന്ന പുട്ടിൽ വെറുതെ ഇളക്കിക്കൊണ്ടിരിക്കുകയാണ് അവൾ.. മനസ് ഇവിടെങ്ങുമല്ലെന്ന് കണ്ടാലറിയാം.. കൂട്ടുകാരിയാണ്.. കൂടെപ്പിറക്കാതെ കൂടപ്പിറപ്പായവളാണ്.. ഒരിക്കലും പ്രതീക്ഷിയ്ക്കാതെ അതിരാവിലെ തന്നെ കൊച്ചിനെ കൂട്ടാതെ വീട്ടിലേയ്ക്ക് കയറി വന്നവളെ കണ്ട് നെഞ്ചിലൊരു ആധിയുയർന്നു.. എന്തെങ്കിലും അത്യാവശ്യമില്ലാതെ അവൾ വരില്ല.. “ഡീ.. ആ പുട്ടിനെന്തുവാ നടുവേദനയാന്നോ.. നേരം കൊറേയായല്ലോ തടവാൻ തൊടങ്ങീട്ട്.. ഇങ്ങനിട്ട് തടവിയാൽ പുട്ട് നിന്നെ പ്രാകും.. നീയത് വാരിക്കഴി പെണ്ണേ.. അവളുടെ ചെവിക്കീഴിലേയ്ക്ക് നീങ്ങിയിരുന്നു ഞാൻ ഒച്ചയിട്ടപ്പോൾ പാവമൊന്നു ഞെട്ടി തലയുയർത്തി നോക്കി.. കണ്ണുകൾ നിറഞ്ഞിരിക്കുന്നു.. അത് കണ്ട ഞാൻ അന്തംവിട്ടു നോക്കി.. “നീയവനുമായി വഴക്കിട്ടോ.. കൊച്ചിനെ കൊണ്ടരാതെ നീയൊറ്റയ്ക്ക് വന്നതെന്താ..

അവള് കഴിപ്പ് നിർത്തി പ്ലേറ്റുമെടുത്ത് കൈകഴുകാനായി പോയി..കയ്യും വായും കഴുകി കസേരയെടുത്ത് എന്റരികിൽ വന്നിരുന്നു.. “എനിക്ക് മടുത്തു ചേച്ചീ.. എന്നുമിങ്ങനെ അടിയും വഴക്കും.. അണ്ണന്റെ അടികൊള്ളാത്ത ഒരിഞ്ച് സ്ഥലം എന്റെ ദേഹത്തില്ല. എന്ത് ചെയ്താലും കുറ്റം.. ഒന്നു പറഞ്ഞ് രണ്ടാമത്തേതിന് അയാള് അടിക്കും.. വീട്ടിൽ ഒരു പത്തല് വെട്ടി വെച്ചിട്ടുണ്ട്. കൊച്ചു വളർന്നു വരുവല്ലേ.. അയാൾക്ക് അങ്ങനൊരു വിചാരമില്ല.. കൊച്ചിന്റെ മുന്നിലിട്ട് എന്നെ താറുമാറ് അടീം ഇടീം തൊഴീമാ ചേച്ചീ.. എന്റെയിഷ്ടത്തിന് ഞാൻ കേറിപ്പോയതല്ലേ.. ചോദിക്കാൻ ആരും വരില്ലെന്ന് അയാക്കറിയാം.. അയാടെ ഊദ്രം കാരണം ഞാൻ പൊറുതിമുട്ടി.. പറഞ്ഞതും അവൾ എങ്ങലടിച്ചു കരഞ്ഞു.. “ഇവനെന്തിനാടി ഇങ്ങനെ ഊദ്രിക്കുന്നേ.. അടി കൊണ്ട് ചത്ത ആരുടെയെങ്കിലും ബാധ ഇവന്റെ ദേഹത്ത് കേറിയോ..ശെന്ത് പറയുമെന്ന് പറ.. സഹതപിക്കാനല്ലാതെ ഞാൻ എന്ത് ചെയ്യും.. “എനിക്കുമില്ലേ ചേച്ചീ ആഗ്രഹങ്ങൾ.. നല്ലൊരു തുണിയില്ല.. ആഹാരമില്ല.. ഒരു വീടില്ല..

സ്നേഹത്തോടെ അയാളെന്നോടൊരു വാക്ക് പറയത്തില്ല.. ഇവിടെ അണ്ണൻ ചേച്ചിയെ കൈവെള്ളയിലല്ലേ കൊണ്ട് നടക്കുന്നത്. ചേച്ചി ഭാഗ്യം ചെയ്തവളാ.. അവള് മൂക്ക് ചീറ്റി കട്ടിലിന്റെ വക്കിൽ എന്റങ്ങേര് ജോലിക്ക് പോയപ്പോൾ ഊരിയിട്ടിരുന്ന നിക്കറിലേക്കെറിഞ്ഞു.. കൈവെള്ളയിൽ കൊണ്ട് നടക്കാൻ ഞാനെന്തുവാ തളർവാത രോഗിയാണോ.. എന്റങ്ങേര് കാണിക്കുന്ന പുകിലെന്താണെന്ന് എനിക്കും ദൈവത്തിനും പിന്നെ ഇപ്പൊ ഉണ്ടായ എന്റെ രണ്ട് പിള്ളേർക്കുമേ അറിയത്തൊള്ളൂ..ഞാനത് മുല്ലപ്പെരിയാറിനെ പൊതിഞ്ഞു വെച്ചേക്കുന്ന പോലെ ആരുമറിയാതെ പൊതിഞ്ഞു വെച്ചേക്കുവാ.. എപ്പോളാ മൊത്തത്തിൽ പൊട്ടി പ്രളയം വരുന്നതെന്ന് തമ്പുരാനറിയാം.. അന്നും ഇവളൊക്കെ ഇത് തന്നെ പറഞ്ഞാൽ മതിയാരുന്നു . അവൾ പിന്നെയും എന്റെ കെട്ടിയോനെ പൊക്കിയും അവളുടേതിനെ താഴെയിട്ടും സംസാരിച്ചുകൊണ്ടിരുന്നു.. കാര്യം ശരിയാണ്.. ഞാനും അങ്ങേരും തമ്മിൽ” ശാ ശീ ശൂ “ഒക്കെ ഉണ്ടാകുമെങ്കിലും ഒരു രാത്രിയ്ക്കപ്പുറം ആ പിണക്കം നീണ്ടു നിൽക്കില്ല.. ഇടയ്ക്കെന്നോ ഒരടി തന്നതൊഴിച്ചാൽ അങ്ങേര് അക്രമം കാണിക്കുന്ന ഇനത്തിൽ പെട്ടതല്ല..

അതുകൊണ്ടൊക്കെ നാട്ടുകാരുടെ ഇടയിൽ എന്റെ കെട്ടിയോൻ മാലാഖയാണ്.. ഇവളുടെ പുകഴ്ത്തലൊക്കെ കേട്ടപ്പോ എനിക്കന്നേരം ഏട്ടനെ വിളിക്കാൻ തോന്നി..അവള് കൂടി കാണട്ടെ ഞങ്ങടെ സ്നേഹം.. ഞാൻ ഫോണെടുത്ത് സ്പീക്കറിട്ട് ഏട്ടന്റെ നമ്പറിലേക്ക് വിളിച്ചു.. പത്തു പ്രാവശ്യം ബെല്ലടിച്ചിട്ടും ലങ്ങേര് ഫോണെടുക്കുന്നില്ല.. പതിനൊന്നാമത്തെ പ്രാവശ്യം വിളിച്ചപ്പോ.. “എന്തുവാടീ.. കിതപ്പോടെയുള്ള ആ സ്വരം എന്റെ ചെവിയിൽ വന്ന് വീണു..കൂട്ടാരി എന്റെ മോത്തോട്ട് നോക്കിയിരിപ്പുണ്ട്.. “എത്ര നേരം കൊണ്ട് വിളിക്കുവാ.. എന്താ ഫോണെടുക്കാഞ്ഞേ.. ഞാൻ ചുമ്മാ വിളിച്ചതാ ഏട്ടാ.. ചായ കുടിച്ചോ.. ഞാൻ സ്നേഹത്തോടെ ചോദിച്ചു.. “നീയിത് ചോദിക്കാനാണോ വിളിച്ചത്.. ലോറിപ്പുറത്തു നിന്ന് തടി കേറ്റിക്കൊണ്ട് നിന്നതാ.. അതിന്റെ പൊറത്തൂന്ന് വലിഞ്ഞിറങ്ങാൻ പെട്ട പാട്.. ഞാനറിയാൻ വയ്യാഞ്ഞിട്ട് ചോയ്ക്കുവാ..നിനക്കെന്തിന്റെ കുരുവാ.. അങ്ങേരെനിക്ക് നേരെ ചീറി.. ഞാനങ്ങു ചമ്മിപ്പോയി.. കൂട്ടാരിയിരുന്നു ചിരിക്കുന്നു..നാണക്കേട്… “ഓക്കേ..

ശരിയേട്ടാ.. വെക്കട്ടെ.. ഉംംംംംംംമ്മ..വയ്യിട്ട് നേരത്തെ വരണേ.. “വെച്ചിട്ട് പോടീ.. ട്ടക്കെന്ന് ഫോൺ കട്ടായി.. തെറ്റ് എന്റെ ഭാഗത്താണ്.. ഓരോ തവണ ബെല്ലടിക്കുമ്പോളും ആരാണ്ടോ പറയുന്നുണ്ടാരുന്നു “നിങ്ങൾ വിളിക്കുന്ന വ്യക്തി തിരക്കിലാണെന്ന് “.. ശെടാ..ഇത്രേം തിരക്കൊണ്ടാരുന്നെന്ന് ഞാനറിഞ്ഞോ..ചമ്മൽ മറച്ചു പിടിച്ച് ഞാൻ കൂട്ടാരിക്ക് നേരെ തിരിഞ്ഞു.. “പെണ്ണേ.. കുടുംബമെന്ന് പറയുന്നത് സൂക്ഷിച്ചു കൈകാര്യം ചെയ്യേണ്ട ഒന്നാ.. ചിലതൊക്കെ കണ്ടില്ല കേട്ടില്ലെന്ന് വെയ്ക്കണം.. വഴക്ക് തുടങ്ങുമ്പോൾ രണ്ടിലൊരാൾ മിണ്ടാതിരുന്നാൽ ആ വഴക്ക് പെട്ടെന്ന് തീരും.. രണ്ടാളും കൂടെ ഒരുപോലെ ചെലയ്ക്കരുത്. ഇവിടെ ഇങ്ങേരെന്തെങ്കിലും പറഞ്ഞാൽ ഞാനിത്തിരി പച്ചവെള്ളമെടുത്ത് വായിൽ കൊണ്ട് നിക്കും.. കുടിയ്ക്കത്തുമില്ല തുപ്പിക്കളയത്തുമില്ല.. നമ്മൾ പ്രതികരിക്കാതിരിക്കുമ്പോ അവരടങ്ങും.. അവളെന്റെ വായിലേക്ക് നോക്കിയിരിക്കുവാ.. “എനിക്കയാള് കുടിച്ചേച്ചും വരുമ്പോ പിന്നെ കലിയാ ചേച്ചീ.. കാണുന്നേ ഇഷ്ടമല്ല.. ദാണ്ടേ കിടക്കുന്നു ചട്ടീം കലോം.. “എടീ പൊട്ടീ. കുടിച്ചിട്ട് വന്നെന്ന് കരുതി കലി കാണിക്കാവോ.. ഒരു കൊച്ചായെന്ന് കരുതി റൊമാൻസൊന്നും കാണിക്കാതിരിക്കരുത്..ഇവരുടെ സ്വഭാവം മാറ്റാൻ സ്നേഹം കൊണ്ടേ പറ്റു..

എന്റങ്ങേര് ഇതിനപ്പുറമാരുന്നു. കുടിച്ചിട്ട് വരുന്നതിന്റെ അന്ന് വഴക്ക് തുടങ്ങുമ്പോ ഞാനങ്ങോട്ടു പിറകിൽ കൂടെ ചെന്ന് കെട്ടിപ്പിടിച്ചൊരു ഉമ്മയങ്ങു കൊടുക്കും.. പിന്നങ്ങേര് വഴക്കിന്റെ കാര്യം മറന്നു പോകും..ഒന്നിച്ചിരുന്നു ചോറ് കഴിക്കുമ്പോ ഇത്തിരി വാരി നിന്റെ അണ്ണന്റെ വായിലോട്ടു കൂടെ വെച്ചു കൊടുക്കണം.. വേണ്ടെന്നൊക്കെ പറഞ്ഞാലും നമ്മൾ നിർബന്ധിക്കണം..പ്രേമിച്ച കാലത്തെ ഓരോ നിമിഷങ്ങളൊക്കെയൊന്ന് പറഞ്ഞു നോക്ക്.. അവൻ നീ വിചാരിക്കുന്നിടത്ത് വരും..അതൊക്കെയാടീ കെട്ടിയോന്മാർക്ക് ഇഷ്ടം.. നീയതുപോലൊന്ന് ചെയ്ത് നോക്ക്..പിന്നെ അടിക്കാനോ ഇടിക്കാനോ വരുമ്പോ അങ്ങോട്ടോ ഇങ്ങോട്ടോ ഓടി മാറണം.. ഇടിക്കുന്നത് അവനാണെങ്കിലും കൊള്ളുന്നത് നിനക്കല്ലിയോ.. ഞാൻ പറഞ്ഞങ്ങോട്ട് കൊടുത്തു.. ചേതമില്ലാത്ത ഉപകാരമല്ലേ.. “ഞാനെങ്ങോട്ടോടാനാ ചേച്ചീ.. താഴോട്ടോടിയാൽ ആറ്.. മേലോട്ടോടിയാൽ റോഡ്.ആൾക്കാര് കാണത്തില്ലേ.. അവിടെക്കിടന്ന് അടികൊള്ളാനാ എന്റെ വിധി…അതിനിടെ ചേച്ചി പറയുന്നത് പോലൊക്കെ നടക്കോ.. ലോണ്ടേ ലവക്ക് പിന്നേം സംശയം.. “പിന്നെ നടക്കാതെ.. നീയൊന്നു മനസ് വെച്ചാൽ എല്ലാം നടക്കും.. നീ സമാധാനത്തോടെ പോയിട്ട് വാ.. ഉച്ച കഴിഞ്ഞ് അവളങ്ങു പോയി.. എന്തോരം സൈസ് ആൾക്കാരാണല്ലേ നമുക്ക് ചുറ്റും.. അവള് പോയ അന്ന് രാത്രി ഞാനുറങ്ങീട്ടില്ല.. അവൻ വരുന്നതും ലവള് പിറകിൽ കൂടെ കെട്ടിപ്പിടിക്കുന്നതും ചോറ് വാരി അങ്ങോട്ടുമിങ്ങോട്ടും കൊടുക്കുന്നതും അവസാനം രണ്ട് കുരുവികൾ കൊക്കുരുമ്മുന്ന സീനൊടെ പാട്ട് അവസാനിക്കുന്നതൊക്കെ ഓർത്ത് എപ്പോളോ ഉറങ്ങിപ്പോയി..

പിറ്റേന്ന് രാവിലെ അവളെ വിളിച്ചപ്പോ സ്വിച്ച് ഓഫ്‌.. എണീറ്റ് കാണത്തില്ലായിരിക്കും.. എന്റങ്ങേര് ജോലിക്ക് പോയ ഉടനെ ഞാൻ തുണികളൊക്കെ കഴുകാൻ തുടങ്ങി… അപ്പൊ ഫോൺ ബെല്ലടിക്കുന്നു.. കയ്യിലെ സോപ്പ് പത നൈറ്റിയിൽ തുടച്ച് ഞാനോടിപ്പോയി ഫോണെടുത്തു..കൂട്ടാരിയാണ്.. ആകാംക്ഷയോടെ ഞാൻ ഫോണെടുത്തു.. “എന്തായെടീ… ഞാൻ പറഞ്ഞ പോലെ കാര്യങ്ങൾ മംഗളമായി അവസാനിച്ചില്ലേ.. മറുവശത്തു മൗനം.. “ഹലോ.. ഹലോ.. കേക്കുന്നില്ലേ… ങ്‌ഹേ ഫോണിനെന്തോ പറ്റി.. ഒന്നും കേക്കുന്നില്ലല്ലോ.. ഞാൻ ഫോൺ കൈവെള്ളയിൽ വെച്ച് രണ്ടടിയടിച്ചിട്ട് വീണ്ടും ചെവിയിൽ വെച്ചു.. “ചേച്ചീ.. മറുവശത്തു നിന്ന് കേട്ട കരച്ചിലിൽ എന്റെ ഉള്ളം കിടുങ്ങി.. “കരയാതെ കാര്യം പറ പെണ്ണേ.. ആധികേറി ഞാനപ്പോ ചാവും.. “ഇന്നലെ ചേച്ചി പറഞ്ഞപോലെ അണ്ണൻ വന്ന് വഴക്ക് തുടങ്ങിയപ്പോ ഞാൻ പൊറകീക്കൂടെ ചെന്ന് കെട്ടിപ്പിടിച്ചു.. അണ്ണൻ വിചാരിച്ചത് എന്നും എന്നെ അടിക്കുന്നതിൽ സഹികെട്ട് ഞാൻ തിരിച്ചടിക്കാൻ ചെന്നതാണെന്നാ.. അണ്ണനങ്ങു പേടിച്ചുപോയി.. എന്നെ തള്ളി തറേലിട്ടു.. ഒത്തിരി അടിച്ചു.. കെട്ടിപ്പിടിച്ചതുകൊണ്ട് എന്നും അടിക്കുന്നതിലും കൂടുതലടിച്ചു.. എന്നോടിത് വേണ്ടാരുന്നു ചേച്ചീ.. ഞാനായിട്ട് ചേച്ചിക്ക് ഇന്നേവരെ ഒരു ദ്രോഹോം ചെയ്തിട്ടില്ലല്ലോ..എനിക്ക് നേരെ നിക്കാൻ വയ്യ..

ചേച്ചി പറഞ്ഞിട്ടാ ഞാൻ കെട്ടിപ്പിടിച്ചതെന്ന് അണ്ണനോട് പറഞ്ഞപ്പോളാ അടി നിർത്തിയത്.. അണ്ണൻ മിക്കവാറും അങ്ങോട്ട് വരും.. ഞാനെന്തെങ്കിലും പറയുന്നേനു മുന്നേ അവള് ഫോണും വെച്ച്.. ആഹാ.. കൊള്ളാവല്ലോ.. ഇപ്പൊ വാദി പ്രതിയായോ..ഒരുപകാരം ചെയ്തതിന്റെ നന്ദി കാണിക്കണ്ട.. നന്ദികെട്ട വർത്താനം പറയാവോ.. ഞാനങ്ങനെ പറഞ്ഞെന്നും കരുതി അവളുടെ കെട്ടിയോന്റെ സ്വഭാവം അവൾക്കല്ലേ അറിയത്തൊള്ളൂ.. ഇവിടിരിക്കുന്ന ഞാനെങ്ങനെ അറിയും.. എന്റങ്ങേരെ കെട്ടിപ്പിടിക്കുമ്പോ ഞങ്ങടെ വഴക്ക് തീരും.. അവൾടവന് കെട്ടിപ്പിടിക്കുന്നത് പേടിയാണെന്ന് ഞാനറിഞ്ഞോ..ചില പെണ്ണുങ്ങൾക്ക് സ്വന്തം കെട്ടിയോന്മാരെക്കാളും വിശ്വാസം വേറെ ചില പെണ്ണുങ്ങളെയാ.. അവര് പറയുന്നത് കേട്ടോണ്ട് കണ്ട ഏടാകൂടത്തിലൊക്കെ ചാടിക്കൊടുക്കും..

അവൾടവൻ ചോദിക്കാൻ വരുന്നുണ്ട് പോലും.. ഇങ്ങു വരട്ടെ… മറുപടി ഞാൻ കൊടുത്തോളാം.. തുണി കഴുകിയിട്ട് കൊച്ചിനെയും കുളിപ്പിച്ചൊരുക്കി ഞാനെന്റെ അമ്മയുടെ കുടുംബത്തോട്ട് പോയി..ജാതക പ്രകാരം കണ്ടകശനിയാരുന്നു.. ലവൻ ചോദിക്കാൻ വരുമ്പോ നാട്ടുകാരാരെങ്കിലും കേട്ടാൽ മോശമല്ലേ.. അവരെന്റെ ഏട്ടനോടെങ്ങാനും പറഞ്ഞു കൊടുത്താൽ ഒരുമ്മയിലൊന്നും ഞങ്ങടെ വീട്ടിലെ വഴക്ക് നിന്നില്ലെന്ന് വരും.. പിന്നെ ഇന്നീ നിമിഷം വരെ അവരുടെ കുടുംബവഴക്കിൽ ഞാനൊരു അഭിപ്രായം പറയാൻ പോയിട്ടില്ല.. അവരായി. അവരുടെ പാടായി.. നമ്മളില്ലേ…..

Relationship

പഠിക്കാൻ ആഗ്രഹം ഇല്ലാഞ്ഞിട്ട് അല്ല ഏട്ടാ വിവാഹം കഴിഞ്ഞു ഇത്രേം മാസമല്ലേ ആയുള്ളൂ…

Published

on

By

രചന: Unni K Parthan

#ഇനിയും.. “പഠിക്കാൻ ആഗ്രഹം ഇല്ലാഞ്ഞിട്ട് അല്ല ഏട്ടാ.. വിവാഹം കഴിഞ്ഞു ഇത്രേം മാസമല്ലേ ആയുള്ളൂ.. ഏട്ടന്റെ അമ്മയും അച്ഛനുമൊക്കെ ന്ത് വിചാരിക്കും..” ദേവികയുടെ ചോദ്യം കേട്ട് നിഖിൽ ചിരിച്ചു.. “നീ പഠിക്കാൻ പോകുന്നതിനു അവർക്ക് ന്താ ന്നേ… മാത്രല്ല നീ എന്റെ ഭാര്യയല്ലേ.. എന്റെ ഭാര്യ എന്ത് ചെയ്യണമെന്ന് ഞാൻ അല്ലെ തീരുമാനിക്കേണ്ടത്..” നിഖിൽ പറഞ്ഞത് കേട്ട് ദേവിക ഒന്ന് പതറി.. “അറിയാലോ ഏട്ടാ.. വീട്ടിലേ സാഹചര്യം.. മാത്രമല്ല നമ്മുടെ ലവ് മാര്യേജ് ആണ്.. ഏട്ടന്റെ അമ്മയ്ക്ക് ഒട്ടും താല്പര്യമില്ലായിരുന്നു എന്നേ.. ഏട്ടന്റെ നിർബന്ധം കൊണ്ടല്ലേ.. ഞാൻ ഈ വീട്ടിൽ വലതു കാൽ വച്ചു കയറിയത്..” ദേവികയുടെ ശബ്ദം ഇടറി.. “എനിക്ക് വിശക്കുന്നു.. നീ കഴിക്കാൻ എടുത്തു വെച്ചേ.. ഞാൻ കുളിച്ചിട്ട് താഴേക്ക് വരാം.. നേരത്തെ ഉറങ്ങണം.. രാവിലെ നേരത്തെ എണിക്കണം എനിക്ക്..” കൂടുതൽ ഒന്നും പറയാതെ നിഖിൽ.. ബാത്‌റൂമിലേക്ക് നടന്നു.. ദേവിക എഴുന്നേറ്റു താഴേക്ക് ചെന്നു.. “നിഖിൽ എവിടെ മോളേ..” പത്മാവതി ദേവികയോട് ചോദിച്ചു.. “കുളിക്കാൻ കേറി.. കഴിക്കാൻ എടുത്തു വെയ്ക്കാൻ പറഞ്ഞു ഏട്ടൻ..” “മ്മ്.. മോള് ഇങ്ങോട്ട് ഇരുന്നേ..” സെറ്റിയിൽ തനിക്കു അരികിലേക്ക് പത്മാവതി ദേവികയേ വിളിച്ചു.. “ന്തേ.. പഠിക്കാൻ പോണുണ്ടോ എന്നിട്ട്..” പത്മാവതിയുടെ ചോദ്യം കേട്ട് ദേവിക ഒന്ന് ഞെട്ടി… “കൃഷ്ണാ.. കൊല്ലാൻ ആണോ വളർത്താൻ ആണോ..” ദേവിക മനസ്സിൽ ചോദിച്ചു.. “അത് പിന്നേ…” ദേവിക വിക്കി.. ”

മോൾക്ക് ഇപ്പോളും എന്നേ മോളുടെ അമ്മയായി കാണാൻ കഴിഞ്ഞിട്ടില്ല ല്ലേ..” പത്മാവതിയുടെ ചോദ്യം കേട്ട് ദേവിക ഒന്ന് പിടിഞ്ഞു.. “ന്തേ..അമ്മ അങ്ങനെ ചോദിച്ചത്..” “അമ്മയേ മാത്രം അല്ല അച്ഛനേയും മോൾക്ക്‌ അങ്ങനെ കാണാൻ കഴിഞ്ഞിട്ടില്ല ലോ..” ഹരി ദേവികയേ നോക്കി പുഞ്ചിരിച്ചു കൊണ്ട് ചോദിച്ചു.. ദേവിക നിന്നിടത്തു നിന്ന് ഉരുകി.. “മോളേ..” പത്മാവതിയുടെ വിളി കേട്ട് ദേവിക തലയുയർത്തി നോക്കി.. “ഈ വിവാഹത്തിന് ഇഷ്ടകുറവ് ഉണ്ടായിരുന്നു എന്നുള്ളത് സത്യം.. പക്ഷെ.. ഈ വീട്ടിൽ വലതു കാൽ വെച്ച് കയറിയതു മുതൽ ഇന്ന് വരെയുള്ള ഈ നിമിഷം വരെ ഞങ്ങൾക്ക് മോള്.. ഞങ്ങളുടെ മോളാണ്.. ഇനി എന്നും മുന്നോട്ട് അങ്ങനെ തന്നേയായിരിക്കും.. പൊരുത്തപെടൽ മോൾക്ക് അൽപ്പം ബുദ്ധിമുട്ട് ഉള്ള കാര്യം ആണെന്ന് മനസിലായി.. പക്ഷെ.. മോള് പേടിക്കേണ്ട മോളേ ഞങ്ങൾക്ക് ഇഷ്ടാണ്.. ഞങ്ങൾ പറഞ്ഞിട്ടാണ് മോളോട് തുടർന്നു പഠിക്കാൻ മോൻ പറഞ്ഞത്.. കാരണം മോൾക്ക്‌ മുന്നിൽ ഒരു നല്ല ഭാവിയുണ്ട്.. ഇത്രേം നാളും കഷ്ടപാടുകൾക്ക് ഇടയിൽ നിന്നും പട വെട്ടി പൊരുതി നേടിയത് എല്ലാം ഒരു സുപ്രഭാതം കൊണ്ട് ഇല്ലാതാക്കണ്ട ന്നേ..

ഇനി മോൾക്ക്‌ കഷ്ടപാടുകൾ ഉണ്ടാവില്ല.. ഇന്ന് നിഖിലിന്റെ ഭാര്യ എന്ന് അറിയപ്പെടുന്ന മോള് കാലം കൊറേ കഴിയുമ്പോൾ ദേവികയുടെ ഭർത്താവാണ് എന്നുള്ള നിലയിലേക്കുള്ള വളർച്ചയുണ്ടാകും.. വിവാഹം ഒന്നിന്റെയും അവസാനമല്ല തുടക്കമാണ്.. പുതിയ ജീവിതവും പുതിയ ചുറ്റുപാടും.. അതിലെ പുതിയ അനുഭവങ്ങളും എല്ലാം മോൾക്ക് കരുത്തു നൽകുന്നത് മാത്രമാവും.. നാളേയുടെ പുലരികൾ.. ഞങ്ങൾ മോൾക്ക് വെളിച്ചമായ് മുന്നിൽ ഉണ്ടാവും.. കാലം മോൾക്ക് മുന്നിൽ കാത്തു വെച്ച നിധിയെന്ന സ്വപ്നം.. മോളുടെ ഭാവി.. എല്ലാം ഇനി ഭദ്രമായിരിക്കും.. പത്മാവതി പറഞ്ഞു നിർത്തി.. ദേവിക ഇരു കൈയ്യും കൂപ്പി പൊട്ടി കരഞ്ഞു.. “കരയല്ലേ പെണ്ണേ.. നീ ചിരിക്കാൻ നോക്ക്..” ഹരി പറഞ്ഞത് കേട്ട് ദേവിക ചിരിച്ചു.. ചുമരിൽ കൈയ്യും കെട്ടി തന്നെ നോക്കി നിൽക്കുന്ന നിഖിലിനെ നോക്കി ദേവിക ചിരിച്ചു.. മിഴികൾ സന്തോഷം കൊണ്ട് നിറഞ്ഞു… ശുഭം..

Continue Reading

Relationship

അവളുടെ മുഖം കൈക്കുമ്പിളിൽ കോരി ആ നിറഞ്ഞ കണ്ണുകളിൽ ഹരി…

Published

on

രചന: Seema Binu

പ്രണയം വരും വഴി “ങാ അഖീ പറ ” തോളിനും ചെവിക്കുമിടയിൽ ഫോണും പിടിച്ചു സംസാരിച്ചുകൊണ്ട് രണ്ടു് കയ്യിലും സാധങ്ങളുമായി വിദ്യ ഊണുമുറിയിലേയ്ക്ക് വന്നു . “ഹരിയേട്ടാ അവിടെ മേശപ്പുറത്ത് കഴിക്കാനുള്ളതും ടിഫിനും വച്ചിട്ടുണ്ട് . ഞാൻ പിള്ളേരെ എഴുന്നേൽപ്പിച്ചു സ്കൂളിൽ വിടാൻ നോക്കട്ടെ .” കഴിക്കാനായി വന്ന ഹരിയോട് അത്രയും പറഞ്ഞു കയ്യിലെ വെള്ളം ഇട്ടിരുന്ന നെറ്റിയിൽ തുടച്ചു ഫോണിൽ സംസാരിച്ചുകൊണ്ടു തന്നെ വിദ്യ അകത്തേയ്ക്ക് പോയി . ഇവൾക്കിപ്പോൾ എന്നോടു സംസാരിക്കാനോ എന്റെ കാര്യം നോക്കാനോ തീരെ സമയമില്ല . എന്തു പറഞ്ഞാലും ഒരു അഖി .. വിദ്യയുടെ പെരുമാറ്റം ഹരിയേ ചൊടിപ്പിച്ചു . അപ്പോഴേയ്ക്കും ഹരിക്കു കൊണ്ടുപോകാനുള്ള ബാഗുമായി വിദ്യയെത്തി . “നിനക്കെന്താ വിദ്യേ എന്നേ കണ്ണിൽ പിടിക്കുന്നില്ലേ ? നീ എന്നോടൊന്ന് ശരിക്കും സംസാരിച്ചിട്ട് എത്ര നാളായെന്നറിയാമോ ? എപ്പോൾ നോക്കിയാലും ഫോണിൽ തന്നെ .” അവൾ ഒരു നിമിഷം നിശബ്ദയായി . “അതിന് ഹരിയേട്ടൻ എപ്പോഴാ എന്നോട് സംസാരിച്ചിട്ടുള്ളത് ? പിന്നാലെ നടന്ന് എന്തെങ്കിലും പറഞ്ഞാൽ തന്നെ ഒന്നു നിർത്തുന്നുണ്ടോ എന്ന് പറഞ്ഞ് ഒച്ച വയ്ക്കും . ഞാനുമൊരു മനുഷ്യ ജീവിയല്ലേ ? എന്നേ കേൾക്കുന്ന ആരോടെങ്കിലും ഞാനും സംസാരിക്കട്ടെന്നേ ” “നിന്റെ ശബ്ദത്തിനെന്താ പതിവില്ലാത്തൊരു കടുപ്പം ?” ഹരിയുടെ ചോദ്യത്തിന് മറുപടി പറയാതെ അവൾ കുട്ടികളേ ഉണർത്താൻ പോയി . ശബ്ദത്തിന് കടുപ്പം പോലും ..

വെളുപ്പിന് അഞ്ചു മാണിക്കു തുടങ്ങുന്ന അങ്കമാ . എന്തെങ്കിലും ഒന്നു സഹായിക്കാൻ പറഞ്ഞാൽ അപ്പോൾ പറയും ഞങ്ങൾ അഞ്ചു മക്കളുടേം അച്ഛന്റേം പിന്നെ വീട്ടിലെ എല്ലാ പണീം ചെയ്തിട്ടും എന്റമ്മ ഒരു പരാതീം പറഞ്ഞിരുന്നില്ലല്ലോ എന്ന് .അതുപോലാണോ എനിക്ക് എന്നെങ്ങാനും പറഞ്ഞു പോയാൽ ഉടൻ വരും നിനക്ക് ജോലിയുണ്ടെന്നുള്ള അഹങ്കാരമാ എന്ന് .. അവൾക്ക് ദേഷ്യം വന്നു . വിദ്യ കുട്ടികളേ എഴുനെല്പിച്ചു റെഡിയാക്കി എങ്ങനെയൊക്ക്വയോ ബ്രേക്ക് ഫാസ്റ് കഴിപ്പിച്ചു സ്കൂൾ ബസിൽ കയറ്റി വീട്ടു . ഹരിയും കുട്ടികളും പോയപ്പോൾ അവൾ ടീ വി ഓണാക്കി സൗണ്ട് കുറച്ചു വച്ചു .ഫോൺ എടുത്തു നോക്കിയപ്പോൾ ഹരീടെ പെങ്ങളുടെ മൂന്നു മിസ്ഡ് കോൾ .. .അവൾ ഹിമയുടെ നമ്പർ ഡയൽ ചെയ്തു . ആദ്യത്തെ റിങ്ങിൽ തന്നെ ആള് ഫോണെടുത്തു . “നീ ഇത് എവിടെയാ വിദ്യേ ? എത്ര നേരം കൊണ്ട് ഞാൻ വിളിക്കുവാ ?” “അനിയന്റെ ദേഷ്യം അങ്ങോട്ടും പകർന്നോ ?”വിദ്യ ശബ്ദമില്ലാതെ ചിരിച്ചു . “നീ ഇന്നു ഓഫീസിൽ പോയില്ലേ ? “ഇല്ല ചേച്ചീ .. ഇന്നൊരു ലീവെടുത്തു . എന്റെ കൂടെ വർക്കു ചെയ്യുന്ന ഒരാളുടെ ബെർത്ത് ഡേ യാ . അതിനൊന്നു പോകണം ” “ലീവെടുത്തു പോകാനും മാത്രം ഇതാരാ ഇത്ര വല്യ ആള് ? അഖിയാണോ ??” “ങേ !!! ചേച്ചിക്ക് എങ്ങനെ മനസിലായി ?” “ങ ചേച്ചിക്കു പലതും മനസ്സിലാവുന്നുണ്ട് .

എന്താ വിദ്യേ നിന്റെ ഉദ്ദേശം ?” കുറച്ചു നേരം വിദ്യ ഒന്നും മിണ്ടിയില്ല . “ചേച്ചിക്ക് എന്താ അറിയേണ്ടത് ?” “ആരാ ഈ അഖി ? അയാളുമായി നിനക്കെന്താ ബന്ധം ?” “ഓ ഇത്രേയുള്ളോ ? അഖി .. അഖി എന്റൊപ്പം വർക്ക് ചെയ്യുന്ന വിവാഹമോചനം ഒക്കെ കഴിഞ്ഞ നല്ല സ്വീറ്റ് ആയ ഒരാൾ .. അഖിയെ എല്ലാർക്കും ഇഷ്ടമാ .. എനിക്കും . അഖി അടുത്തുള്ളപ്പോൾ ഞാൻ ഹാപ്പിയാ ചേച്ചീ …. ” “വിദ്യേ .. നീ … നീയെന്തൊക്കെയാ ഈ പറയുന്നത് എന്ന് നിനക്കു വല്ല ബോധവുമുണ്ടോ ? ഇതൊക്കെ ഹരി അറിഞ്ഞാൽ എന്തായിരിക്കും ഉണ്ടാവുക എന്നു വല്ലോം നീ ചിന്തിച്ചിട്ടുണ്ടോ ?? “ഹരിയേട്ടന് അറിയാല്ലോ ഞങ്ങളടെ ഫ്രണ്ട്ഷിപ്പിനെ പറ്റി .” വിദ്യ വാക്കുകളിൽ ദുഃഖത്തിന്റെ മേമ്പൊടിയിട്ടു. “ചേച്ചിക്കറിയാമോ വിവാഹം കഴിഞ്ഞുള്ള ഉപാധികളില്ലാത്ത പ്രണയത്തോടായിരുന്നു ബാലൻമാഷിന്റ മകൾക്കു പ്രണയം .. മനസിലും ശരീരത്തിലും ഒരാളേ മാത്രം നിറച്ചു ആ ആളിന്റെ രണ്ടു് മക്കളെ പ്രസവിച്ച എനിക്ക് പക്ഷേ ഈ പതിമൂന്നു വർഷങ്ങൾക്കിപ്പുറവും അറിയില്ല എന്താണ് പ്രണയമെന്ന് ?? ഞാനുമൊരു മനുഷ്യ സ്ത്രീ തന്നെയല്ലേ ? ഇനി എന്തിന്റെ പേരിലായാലും അഖിയുമായുള്ള സൗഹൃദം വേണ്ടെന്നു വയ്ക്കാൻ ഞാൻ തയ്യാറല്ല ചേച്ചീ ..” “എടീ ബാലൻ മാഷിന്റെ മോളേ…എന്റെ അനിയൻ കെട്ടിക്കൊണ്ടു വരുമ്പോഴല്ല നിന്നേ ഞാൻ ആദ്യമായി കാണുന്നത് കേട്ടോ . എന്തായാലും ഞാനൊന്നു കാണുന്നുണ്ട് നിന്റെയീ അഖിയേ . നിന്നെയൊക്കെ നേർവഴിക്ക് നടത്താൻ പറ്റുമോന്ന് ഞാനൊന്ന് നോക്കട്ടെ .” അടുത്ത ദിവസം തന്നെ ഹിമയുടെ കോൾ ഹരിക്ക് ചെന്നു . “ഹരീ പ്രശ്നം നമ്മള് കരുതിയതിലും സീരിയസ് ആണ് കേട്ടോ . നി ഇപ്പൊഴും നമ്മുടെ അച്ഛനെ റോൾ മോഡലാക്കി ഇരുന്നോ .ഇതു പണ്ടത്തെ കാലമൊന്നുമല്ല . അവളും ഈ പറഞ്ഞ അഖിയും ട്രാൻസ്ഫെറിന് ട്രൈ ചെയ്യുന്നെന്നാ കേട്ടത് .അവൾ അവളുടെ പാട്ടിനു പോകും . പോകട്ടെ അതാ നല്ലത് .. പറയുന്നത് കൊണ്ടൊന്നും തോന്നല്ലേ ഹരീ .. അവളേ പ്പോലൊരു പെണ്ണിനേ നീ അർഹിക്കുന്നില്ല .

അതാ സത്യം .” അപ്പുറത്ത് ഫോൺ കട്ടാകുന്ന ശബ്ദം കേട്ടിട്ടും അനങ്ങാനാവാതെ ഇരുന്നു ഹരി . സമയം കളയാതെ വീട്ടിലേയ്ക്ക് തിരിച്ചു . വീട്ടിലെത്തിയ ഹരി കാണുന്നത് എവിടേക്കോ പോകാൻ തയ്യാറായി പുറത്തേയ്ക്ക് വരുന്ന വിദ്യയെയാണ് . ഇവളിതെങ്ങോട്ടാ കെട്ടിയൊരുങ്ങി ??ഓർത്തത് അങ്ങനെയാണെങ്കിലും ചോദിച്ചത് മറ്റൊന്നാണ് . “ങേ. അടിപൊളിയാണല്ലോ .. എങ്ങോട്ടാ യാത്ര ??” ഹരീടെ ചോദ്യത്തിൽ കിളിപോയി നിന്നു വിദ്യ . “എന്താ ?” “അല്ല സാരിയൊക്കെ ഉടുത്ത് സുന്ദരി ആയിട്ട് എങ്ങോട്ടാണെന്ന് ചോദിച്ചതാ ” “അത് .. അത് കുറച്ചു സാധനങ്ങൾ വാങ്ങണം . പിന്നെ ഒരു ഫ്രണ്ടിന്റെ ബെർത്ഡേയാ .. അതിനും ഒന്നു പോകണം .” “വരാൻ വൈകുമോ ? പിക് ചെയ്യാൻ ഞാൻ വരണോ ?” വിദ്യയ്ക്ക് വീണ്ടും ഞെട്ടൽ .. “ഓ വേണ്ട … ഞാനിങ്ങു വന്നോളാം . പിന്നെ കുട്ടികൾ വരുമ്പോൾ ചായേം സ്നാക്സും എടുത്തു കൊടുക്കണേ ..” അവൾ പോകുന്നതു ഹരി നോക്കി നിന്നു . അവളുടെ ഉള്ളിൽ എന്താണെന്ന് ഒരു പിടിയും കിട്ടുന്നില്ലല്ലോ . ഇനി ചേച്ചി പറഞ്ഞതു പോലെ എന്തെങ്കിലും ??? ഏയ് .,,എങ്കിലും ഈയിടെയായി അവൾ തന്നേ അവഗണിക്കുന്നുണ്ടോന്നൊരു സംശയം .. തോന്നലാവും .. കുട്ടികൾ വന്നിട്ട് കുറച്ചു നേരം കൂടി കഴിഞ്ഞാണ് വിദ്യ എത്തിയത് . “ബെർത്ത് ഡേ പാർട്ടി എങ്ങെനെ ഉണ്ടായിരുന്നു ? എല്ലാവരും കൂടി അടിച്ചു പൊളിച്ചോ ?” ഹരിയുടെ ചോദ്യമാണ് അവളേ വരവേറ്റത് .അങ്ങനൊരു ചോദ്യം ഹരിയിൽ നിന്ന് പ്രതീക്ഷിച്ചില്ല . അതുകൊണ്ടുതന്നെ മറുപടി പറയാൻ ഇത്തിരി വൈകി . “എല്ലാവരുമൊന്നുമില്ല ..

ഞാനും അഖിയും മാത്രമുള്ളോരു കുഞ്ഞാഘോഷം .. പിന്നെ പാലട ഇഷ്ടമാണെന്നും പറഞ്ഞ് അതു വാങ്ങി വച്ചിരുന്നു . ഞാൻ ചെന്നിട്ട് അതുണ്ടാക്കി . ഒരു കേക്കും മുറിച്ചു തീർന്നു ആഘോഷം . എങ്കിലും നന്നായിരുന്നു .” “പാലടയോ ?? കൊള്ളാല്ലോ .. നീയിവിടെ പാലട ഉണ്ടാക്കിയിട്ട് ഒത്തിരി നാളായില്ലേ ?” “ഒരിക്കൽ ഞാൻ ഉണ്ടാക്കിയപ്പോൾ ഹരിയേട്ടന് ഇഷ്ടമല്ല അതുകൊണ്ട് ഇനി ഉണ്ടാക്കണ്ടാ എന്ന് പറഞ്ഞത് മറന്നു പോയോ ?” “അത് .. അതു പോട്ടെ . ഈ പറഞ്ഞ അഖിക്ക് ഇഷ്ടമാണോ ഈ വക സാധനങ്ങളൊക്കെ ?” “അഖിക്കല്ല .. എനിക്കിഷ്ടമാണെന്നറിഞ്ഞ് വാങ്ങിയതാ ” വിദ്യ അകത്തു കയറി പ്പോയിട്ടും ഹരി അതേ നിൽപ്പു നിന്നു . നിന്റെ ഇഷ്ടങ്ങളൊക്കെ അങ്ങു നിന്റെ വീട്ടിൽ . ഇവിടെ ഞാൻ പറയുന്നത് ഉണ്ടാക്കിയാൽ മതി …പണ്ടെന്നോ പറഞ്ഞ വാക്കുകൾ ഓർത്ത് ഹരിക്കു സ്വയം പുച്ഛം തോന്നി . ഒപ്പം വിദ്യയും അഖിയും മാത്രമുള്ള പാർട്ടി എന്നോർത്തൊരു അസ്വസ്ഥതയും ഹരിയേ പൊതിഞ്ഞു . വൈകിട്ട് കുട്ടികളേ പഠിപ്പിക്കാൻ ചെന്ന ഹരിയേ അവര് കണ്ടം വഴി ഓടിച്ചു . “അമ്മ ഞങ്ങളേ ഹോംവർക്ക് ചെയ്യിച്ചാൽ മതി .അച്ഛനറിയില്ല ഞങ്ങൾക്ക് പഠിക്കേണ്ടത് എന്തൊക്കെയാണെന്ന് .. ” “ആരു പറഞ്ഞു അച്ഛന് അറിയില്ലെന്ന് ?നിങ്ങൾക്കറിയാമോ അച്ഛൻ ജോലി കിട്ടുന്നതിന് മുൻപ് കുറേ നാള് പാരലൽ കോളേജിൽ പഠിപ്പിച്ചിട്ടുണ്ട് .. വന്നേ ഇന്ന് അച്ഛൻ പഠിപ്പിക്കാം . അതുമല്ല അമ്മയ്ക്ക് കിച്ചണിൽ ഒത്തിരി ജോലിയുണ്ട് ..” “അമ്മയ്ക്കെന്നും ഉണ്ടല്ലോ ഒത്തിരി ജോലി .. പിന്നെന്താ ഇന്ന് ? അച്ഛൻ പോ .ഞങ്ങളെ അമ്മ പഠിപ്പിച്ചാൽ മതി .” ഹരി മെല്ലെ ബെഡ്‌റൂമിലേക്ക് നടന്നു . വിദ്യയെ അവിടെ കാണാത്തതു കൊണ്ട് അടുക്കളയിൽ ചെന്ന് നോക്കിയപ്പോൾ ചപ്പാത്തിക്ക്‌ മാവ് കുഴയ്ക്കുന്നു . “ഇന്നെന്താ ചപ്പാത്തിയാ ? ഇങ്ങു താ . ഞാൻ ചുട്ടെടുക്കാം . നീ ചെന്ന് പിള്ളേരുടെ ഹോംവർക്ക് ചെയ്യിക്ക് ..” “വേണ്ടാ .. ” “അതു വിദ്യേ .. നിനക്കെല്ലാം കൂടി ബുദ്ധിമുട്ടാകില്ലേ ? ” വിദ്യ കുറച്ചു നേരം അനങ്ങാതെ നിന്നു . “എനിക്കു ബുദ്ധിമുട്ടൊന്നുമില്ല . ഹരിയേട്ടൻ പോയി റസ്റ്റ് എടുത്തോ . ” ഇനിയൊന്നും പറയാനില്ലാത്തതു പോലെ വിദ്യ തന്റെ ജോലി തുടർന്നു . “നീ ട്രാൻസ്ഫെറിന് ട്രൈ ചെയ്യുന്നെന്ന് ചേച്ചി പറഞ്ഞു ” “ങാ നോക്കുന്നുണ്ട് . ” “നീ പോയാൽ ഇവിടുത്തെ കാര്യങ്ങൾ ഒക്കെ എങ്ങനാ ?” “ഞാൻ ഇല്ലേലും ഇവിടെ ഒന്നും സംഭവിക്കില്ല ഹരിയേട്ടാ . അത്രയ്ക്ക് പറ്റില്ലെങ്കിൽ ഒരു ജോലിക്കാരിയെ വയ്ക്കണം . പിന്നെ രാത്രിയിലെ കാര്യത്തിന് പൈസ ഇത്തിരി കൂടുതൽ കൊടുക്കേണ്ടി വരുമായിരിക്കും .

എന്നാലും എല്ലാം നടക്കേണ്ടേ ??” “രാ ..രാത്രിയിലെ എന്തു കാര്യം ?”ഹരി നിന്നു വിക്കി . “പിള്ളേരുടെ പഠിപ്പീര് . അല്ലാതെന്താ ?അവരു ഹരിയേട്ടനെ അടുപ്പിക്കില്ലല്ലോ . അപ്പൊൾ പിന്നെ ട്യൂഷന് ആളിനേ നിർത്തണം . അവർക്ക് ഒക്കെ ഇപ്പോൾ എന്തു ഡിമാൻഡ് ആണെന്നറിയാമോ ?”അവൾ തിരിഞ്ഞു നോക്കിയപ്പോൾ ഹരി നിന്നിടം ശൂന്യം . പൊട്ടി വന്ന ചിരിയടക്കി വിദ്യ തന്റെ ജോലി തുടർന്നു . ഹരിയിൽ കാണപ്പെട്ട ചെറിയ ചില മാറ്റങ്ങൾ ഒഴിച്ചാൽ എന്നത്തേയും പോലെ വിദ്യയുടെ ആ ദിനവും പോയി മറഞ്ഞു . അടുത്ത ദിവസങ്ങളിൽ അവളേ ജോലിയിൽ സഹായിക്കാനും കുട്ടികളേ റെഡിയാക്കാനും ഒക്കെയായി ഹരി പിന്നാലെയുണ്ടായിരുന്നു . ഒന്നും പുറത്തു കാണിച്ചില്ലെങ്കിലും ഒരു കുഞ്ഞു സന്തോഷം തോന്നി അവൾക്ക് . ഒരു വെള്ളിയാഴ്ച വിദ്യ ജോലി കഴിഞ്ഞെത്തിയപ്പോൾ ഹരി മാത്രമേയുള്ളു വീട്ടിൽ . “പിള്ളേര് എന്തിയെ ? “അവൾ ഹരിയേ നോക്കി . “അതു ഞാൻ പറയാൻ വീട്ടു പോയി . ഇന്ന് അച്ഛനും അമ്മയും വന്നിട്ടുണ്ടായിരുന്നു . അവരുടെ കൂടെ പോകണമെന്ന് പിള്ളേർക്ക് ഒരേ നിർബന്ധം . പിന്നെ ഞാനും ഓർത്തു ശനിയും ഞായറുമല്ലേ . രണ്ടു ദിവസം അവിടെ നിൽക്കട്ടെ എന്ന് . ” “അവിടെ കായലും വെള്ളോമൊക്കെയുള്ളതല്ലേ .. നമ്മളില്ലാതെ അവരെ വിടേണ്ടിയിരുന്നില്ല .” “എന്റച്ഛനും അമ്മയുമില്ലേ ? എന്നേ വളർത്തിയ അവർക്കറിയില്ലേ എന്റെ പിള്ളേരെ എങ്ങനെ നോക്കണമെന്ന് ?” ങാ അതിന്റെ ഗുണം എനിക്കല്ലേ അറിയൂ . അവൾ മനസ്സിൽ പറഞ്ഞു . രാത്രിയിലേക്കുള്ള ഭക്ഷണം തയ്യാറാക്കുക ആയിരുന്ന വിദ്യയെ പിന്നിൽ നിന്നും ഹരി കെട്ടിപ്പിടിച്ചു . അവൾ ഞെട്ടിപ്പോയി . “ഹരിയേട്ടനിതെന്താ ? ഞാൻ ഇവിടെ ജോലി ചെയ്യുന്നത് കാണാൻ മേലേ ?” “അതു കൊള്ളാം എനിക്കെന്റെ ഭാര്യയേ ഒന്നു കെട്ടിപ്പിടിക്കണമെങ്കിൽ നേരോം കാലോം നോക്കണോ ?” “ആരുടെ ഉപദേശമാ ?” “എന്ത് ?” “അല്ല ഇപ്പോൾ ഈ കാട്ടിക്കൂട്ടിയത് ആരുടെ ഉപദേശമനുസരിച്ചാണെന്നാ ചോദിച്ചത് ?” “എനിക്കു നിന്നേ സ്നേഹിക്കാൻ ആരുടെയെങ്കിലും ഉപദേശം വേണോ ?” ” സ്നേഹിച്ചതാരുന്നോ ? ശീലമില്ലാത്തതു കൊണ്ടാവും എനിക്കങ്ങോട്ടു മനസിലായില്ല കേട്ടോ. സോറി ഹരിയേട്ടാ .. ” “നിന്റെ പരിഹാസം ഒക്കെ എനിക്കു മനസ്സിലാകുന്നുണ്ട് . ഞാനിനി എങ്ങനാ നിന്നേ പ്രീതിപ്പെടുത്തേണ്ടത് ? എന്റെ സ്നേഹം പോരാഞ്ഞിട്ടാണോ നീ …” “എന്തേ നിർത്തിക്കളഞ്ഞത് ? ” വിദ്യ ഹരിക്കു നേരേ നിന്നു . “ഞാനിനി മുഴുവൻ പറഞ്ഞാലേ നിനക്കു മനസിലാകൂ?” “എന്താണെങ്കിലും പറയാൻ വന്നത് മുഴുവൻ പറയെന്നേ . അല്ലാതെ ഞാൻ എങ്ങനെ അറിയും ?” “എന്നാൽ നീ അറിയണ്ടാ .” ഹരിക്ക് ദേഷ്യം വന്നു . “ഓക്കേ അത് ഹരിയേട്ടന് ഇഷ്ടമുള്ളപ്പോൾ പറഞ്ഞാൽ മതി .

ഇനി ഞാനൊരു കാര്യം പറയട്ടേ .?” എന്താണെന്നുള്ള അർത്ഥത്തിൽ ഹരി അവളേ നോക്കി . “ഞാൻ പറഞ്ഞിരുന്നില്ലേ ഞങ്ങൾ ട്രാൻസ്ഫെറിന് ട്രൈ ചെയ്യുന്നെന്ന് .” “ഞങ്ങളോ ?” “ങ ഞാനും അഖിയും .. അതു ശരിയായി .” “വിദ്യേ …”അറിയാതെ ഹരിയുടെ ശബ്ദം ഉയർന്നു . “ഹരിയേട്ടനെന്തിനാ ഒച്ചയെടുക്കുന്നത് ? ഞാൻ പറഞ്ഞു കഴിഞ്ഞില്ല . ഇപ്പോൾ അഖിക്ക് മാത്രേ ഓർഡർ വന്നുള്ളൂ . അതും ഒരു മ്യൂച്വൽ ട്രാൻസ്ഫർ . എനിക്കും താമസിയാതെ ശരിയാകുമെന്നാ സൂപ്രണ്ട് പറഞ്ഞത് . ങാ പറഞ്ഞു വന്നത് അതല്ല . നാളെ അഖി ഇങ്ങോട്ടു വരാൻ ഇരിക്കുകാരുന്നു .പോകുന്നതിനു മുൻപ് പിള്ളേരേം ഹരിയേട്ടനേം ഒന്നു കാണണം എന്ന് . ഇനിയിപ്പോൾ വരണ്ടാ എന്ന് എങ്ങനാ പറയുന്നേ ? വന്നിട്ട് പോട്ടെ .പിള്ളേരേ ഞാൻ അങ്ങോട്ടു കൊണ്ടുപോയി കാണിക്കാം അല്ലേ ? ഓഫീസിൽ വച്ചുള്ളതോന്നും പോരാഞ്ഞിട്ടായിരിക്കും ഇനി വീട്ടിലും . എന്തായാലും എന്റെ പിള്ളേരേ കൊണ്ട് നീ എവിടെ പോവില്ല. ഹരി മനസ്സിൽ ഉറപ്പിച്ചു . “ഓ വേണ്ടെങ്കിൽ വേണ്ടാ .അതു പോട്ടെ ആദ്യമായിട്ട് വരുവല്ലേ അഖി ഇവിടെ . അപ്പൊൾ ശരിക്കെന്തെങ്കിലും ഉണ്ടാക്കി കൊടുക്കണ്ടേ ? രാവിലെ പോയി കുറച്ചു നല്ല കൊഞ്ചു വാങ്ങിക്കൊണ്ടു വരണേ . അഖിക്ക് കൊഞ്ചു തീയൽ ഭയങ്കര ഇഷ്ടമാ .. ” മറുപടി പറയാതെ ഹരി തിരിഞ്ഞു മുറിയിലേയ്ക്ക് പോയി . നിന്റെ എല്ലാ കൊഞ്ചലും അവസാനിക്കാൻ പോകുവാ .. നാളെയിങ്ങു വരട്ടെ നിന്റെ മറ്റവൻ .കാണിച്ചു കൊടുക്കാം അവന് ഈ ഞാൻ ആരാണെന്ന് . ക്ഷമിക്കുന്നതിനൊക്കെ ഒരു ലിമിറ്റില്ലേ ? അടുത്ത ദിവസം രാവിലേ കോളിംഗ് ബെല്ലിന്റെ ശബ്ദം കേട്ട് ഹരി ക്ലോക്കിലേയ്ക്ക് നോക്കി . നേരം വെളുത്തില്ല അതിനു മുന്പിങ്ങെത്തിയോ ? ഈർഷ്യയോടെ വാതിൽ തുറന്ന ഹരി കണ്ടത് നല്ല ഭംഗിയായി വസ്ത്രധാരണം ചെയ്ത ഇരുപത്തഞ്ചിനും മുപ്പതിനും ഇടയിൽ പ്രായം തോന്നിക്കുന്ന ഒരു സ്ത്രീയെയാണ് . “ആരാ ?” ഹരിയുടെ ചോദ്യത്തിനുള്ള മറുപടിക്കു മുൻപ് വിദ്യ ഇറങ്ങി വന്ന് ആളിനെ അകത്തേയ്ക്ക് കൂട്ടിയിരുന്നു . “ദാ ഇതാ എന്റെ ഹരിയേട്ടൻ ” പിന്നാലെയെത്തിയ ഹരിയെ കൂട്ടുകാരിക്കു വിദ്യ പരിചയപ്പെടുത്തി . “ങാ എനിക്കറിയാം . ഫോട്ടോയിൽ കണ്ടിട്ടുണ്ടല്ലോ .” “ആളിനെ എനിക്കങ്ങോട്ട് പിടി കിട്ടിയില്ല .” ഹരി നിന്നു പരുങ്ങി . “ഞാൻ പറഞ്ഞിട്ടില്ലേ ഒരു അഖിയേ പറ്റി ?” “ഉവ്വ് . അപ്പൊൾ ഇത് അഖീടെ ??” “അഖീടെ ആരുമല്ല .

അഖി തന്നെയാ . എന്നു വച്ചാൽ അഖില .. അഖിയെന്നുള്ളത് അവളുടെ വിളിപ്പേരാ .. അല്ലേടാ ?” “ഞാൻ കരുതി ….”ഹരി എന്തു പറയണം എന്നറിയാതെ കുഴങ്ങി . “അഖി എന്റെ ബോയ് ഫ്രണ്ടാണെന്ന് അല്ലേ ?” “ഏ … ഏയ് .. അല്ല .. അതെന്തിനാ അങ്ങനെ കരുതുന്നത് ? നിങ്ങൾ സംസാരിക്ക് .. ഞാൻ ഒന്നു പുറത്തു പോയിട്ടു വരാം ..” “ഉം ഉം .ഒക്കെ ” ഹരി നിന്നു വിക്കുന്നത് കണ്ടു വിദ്യ ചിരിയടക്കി . അഖിലയുടെ ഇഷ്ടവിഭങ്ങൾ ഒക്കെ ഒരുക്കി വയറും മനസും നിറച്ചാണ് വിദ്യയും ഹരിയും അവളേ യാത്രയാക്കിയത് . കുട്ടികളേ കാണാൻ കഴിഞ്ഞില്ലല്ലോ എന്നു സങ്കടം പറഞ്ഞ അഖിയോട് അഖില പോകുന്നതിനു മുൻപൊരു ദിവസം കുട്ടികളേം കൊണ്ടു ഞങ്ങൾ അങ്ങോട്ടിറങ്ങാം .. എന്നു സന്തോഷത്തോടെ പറഞ്ഞു ഹരി. “അഖിലയല്ല ഹരിയേട്ടാ അഖി ” വിദ്യ ചിരിയോടെ തിരുത്തി. “എന്നേ കുഴക്കിയത് ഈ പേരാണ് . എന്നാലും അഖി മതി .. അതാ ഒരു ഭംഗി ..” ഹരിയും അവരുടെ ചിരിയിൽ പങ്കു ചേർന്നു . “കളഞ്ഞിട്ടു പോകുമെന്നു കരുതിയോ ?” അഖില പോകുന്നത് നോക്കി നിന്ന ഹരിയുടെ കണ്ണിലേക്ക് നോക്കി വിദ്യ . മറുപടിയായി ഹരി അവളേ വലിച്ചു നെഞ്ചോടു ചേർത്തിരുന്നു .

അവൾ അനങ്ങാതെ നിന്നു . “ഹരിയേട്ടാ ..” “എന്താ ?? ഇനി ഇതും അഭിനയമാണെന്നാണോ ??” ഹരിയുടെ ശബ്ദം അടഞ്ഞിരുന്നു . അവൾ ശബ്ദമില്ലാതെ ചിരിച്ചു കൊണ്ട് ഒന്നുകൂടി അവനോടു ചേർന്നു നിന്നു .. “ഈ കുറച്ചു ദിവസങ്ങൾ കൊണ്ട് ഞാനങ്ങ് ഇല്ലാതായിപ്പോയി .”അവൻ ആ നെറുകയിൽ മെല്ലെ തലോടി . “അത്രയ്ക്കിഷ്ടമാ എന്നേ ??” മറുപടി പറയാതെ അവളുടെ നെറുകിൽ ചുണ്ടു ചേർത്തു ഹരി . “കുട്ടികളേ കൂട്ടിക്കൊണ്ടു വരാൻ എപ്പോഴാ പോകേണ്ടത് ?” “അവരു രണ്ടു് ദിവസം അവിടെ വെള്ളത്തിലും കായലിലും ഒക്കെ കളിക്കട്ടെന്നേ ” “ശരിക്കും ? ” “ആന്നേ .. ഇന്നിവിടെ നമ്മളു മാത്രം മതി .. ” അവന്റെ കണ്ണിൽ കുസൃതി മിന്നി . “ഇന്ന് എനിക്കെന്റെ പെണ്ണിനേ ശരിക്കൊന്നു സ്നേഹിക്കണം .” അവൾ കണ്ണു കൂർപ്പിച്ചു . “ഇന്നു മാത്രമല്ല ഇനിയെന്നും …” അവളുടെ മുഖം കൈക്കുമ്പിളിൽ കോരി ആ നിറഞ്ഞ കണ്ണുകളിൽ ഹരി ചുണ്ടു ചേർക്കുമ്പോൾ അനിയനെ നന്നാക്കാൻ ബുദ്ധി ഉപദേശിച്ച ഹിമയ്ക്ക് മനസുകൊണ്ട് നന്ദി പറയുന്ന തിരക്കിലായിരുന്നു വിദ്യ .

Continue Reading

Relationship

ചിലപ്പോഴെങ്കിലും നമ്മുടെ ഓരോരുത്തരുടെയും ജീവിതത്തിലെ ഒരു ദിവസമാകാം ഇത്…

Published

on

By

രചന: വിദ്യ പ്രദീപ്‌ ❤

നേരം രാത്രിയായി.. അടുക്കള ജോലിയെല്ലാം തീർത്തു അന്നും അവൾ കുളിച്ചു അയാളെയും കാത്തു മുറിയിൽ സമയം ചിലവഴിച്ചു… എന്തുകൊണ്ടോ മനസ്സിൽ കുറെ പരാതികളും പരിഭവങ്ങളും അവളുടെ ഉറക്കം കെടുത്തി…. ഇവൾ ലക്ഷ്മി… ആളൊരു പാവമാണ്… “ഏട്ടൻ വന്നിട്ടു വേണം കുറച്ചെങ്കിലും എന്തെങ്കിലും സംസാരിക്കാൻ..” മോനെ വേഗം ഉറക്കി ഫോണിൽ നോക്കി ലക്ഷ്മി സമയം ചിലവഴിച്ചു… കുറച്ചു കഴിഞ്ഞ് ഒരുപാട് ടെൻഷനോടെയും പകലന്തിയോളം പണിയെടുത്തു ഓടിനടന്നതിന്റെ ക്ഷീണത്തിൽ ഉറക്ക ചടപ്പോടെ അയാൾ റൂമിലെത്തി ഒന്ന് കിടന്നാൽ മതിയെന്ന ഭാവത്തിൽ… ഇതാണ് ലക്ഷ്മിയുടെ ഭർത്താവ്.. മാർച്ച്‌ ഏപ്രിൽ മാസത്തെ കൊടും ചൂടിൽ വീട്ടിലെ ഏറ്റവും ചൂട് കൂടിയ റൂമിനു ഉടമയായിരുന്നു അവർ..

മുറിയിൽ ചിലവഴിക്കുന്ന സമയം മുഴുവൻ അയാൾക്ക് അരോചകമായിരുന്നു.. വന്നു….വെള്ളം കുടിച്ചു…. ക്ഷീണത്താൽ കിടന്നു… ഒരു ചെറു ചിരിയോടെ അവൾ അവനെ നോക്കി. കണ്ണുകളടച്ചു പാതി ചെരിഞ്ഞു കിടക്കുന്ന അയാളുടെ മനസ് മുഴുവൻ ഒരുപാട് ചിന്തകളായിരുന്നു… ആരോടും തുറന്നു പറയാതെ അടക്കി പിടിക്കുന്ന ഒരുപാട് കാര്യങ്ങൾ…. കണ്ണുകൾ കള്ളം പറയില്ല എന്നത് കൊണ്ടായിരിക്കാം ആ കണ്ണുകൾ അവൾക്ക് നേരെ അടയുന്നത്… ഒരുപാട് സംസാരിക്കണം.. ഒരു ദിവസത്തിൽ തനിക്ക് ആകെ കിട്ടുന്ന സമയം ഈയൊരു 10മിനുട്ട് ആണ് .. അല്പം ഈഗോ രണ്ടുപേരിലും ഉള്ളതുകൊണ്ടാണോ എന്നറിയില്ല ഒരാളുടെ മൗനം രണ്ടുപേരുടെയും ചിന്തകളെ ഉണർത്തിയില്ല… തണുത്ത കാറ്റിനു പകരം ഫാനിൽ നിന്ന് വരുന്ന ഉഷ്ണവും മാനസിക പിരിമുറുക്കവും അയാളിൽ അരോചകം സൃഷ്ടിച്ചു.. ലക്ഷ്മി അയാളോട് ചേർന്ന് കിടന്നു… മുടിയിഴകൾ പതുക്കെ തലോടി.. നെറ്റിയിൽ ഉമ്മ വെച്ചു… “എന്തെങ്കിലും പറയ് “എന്ന അവളുടെ ചോദ്യം അയാളിൽ ദേഷ്യമുണർത്തി.. “നിനക്കെന്താ പറഞ്ഞാൽ…. ഞാൻ കേൾക്കുന്നുണ്ടല്ലോ…. ഉറക്കം വരുന്നെങ്കിൽ ഉറങ്ങിക്കോ “…എന്ന മറുപടി അവൾക്ക് അസഹ്യമായി… മുറിയിൽ തിങ്ങി നിൽക്കുന്ന മൗനം അവരെ വീർപ്പു മുട്ടിച്ചു… പരസ്പരം കണ്ണുകളിൽ നോക്കി സംസാരിക്കാനോ എന്തിനേറെ ഒരു പുഞ്ചിരി വിടർത്താനോ പോലും അവൾക് ആയില്ല.. നേരത്തെ എണീക്കുന്നത് കൊണ്ടാകാം അവളിൽ അതുവരെയുള്ള അലച്ചിലിന്റെ ക്ഷീണം പതിയെ വന്നു .. ശേഷം ഉറക്കം…. പാതി ഉറക്കത്തിൽ രണ്ടാളും പരസ്പരം ചോദിച്ചു..” നീ ഉറങ്ങിയോ “…. ഇല്ലാ… എന്നാ എന്തേലും പറയ് “.. വീണ്ടും മൗനം…. എന്തുകൊണ്ടോ സ്വന്തം ജീവിതത്തെ കുറിച്ച് ഒന്നും സംസാരിക്കാനില്ലാതെ അവർ നിശ്ശബ്ദരാകും.. രണ്ടാളുടെയും മനസിലുണ്ട് ഒന്ന് കെട്ടിപ്പുണർന്നെങ്കിൽ..

ഉമ്മ വെച്ചിരുന്നെങ്കിൽ…😔 ഒരു ചെറു പുഞ്ചിരി മതി നമ്മുടെ മനസിനെ കുളിർമഴ പെയ്യിക്കാൻ… പതിവുപോലുള്ള മുടി തലോടലിലെ സുഖം കൊണ്ടോ അതുവരെയുള്ള ക്ഷീണം കൊണ്ടോ എന്നറിയില്ല അയാൾ ഉറങ്ങിപ്പോയി… ഉഷ്ണകാറ്റു അയാളുടെ കഴുത്തിലും പുറത്തുമൊക്കെ വിയർപ്പു തുള്ളികൾ സൃഷ്ടിച്ചു.. എന്തെല്ലാമോ പ്രതീക്ഷിച്ചു കാത്തിരുന്ന അവൾ എന്തെ തനിക്കൊരു ഉമ്മ പോലും തരാൻ തോന്നാഞ്ഞു എന്നാലോചിച്ചു സ്വയം കണ്ണീർ വാർത്തു.. ഒരുപക്ഷെ അവനിൽ ആകർഷണം ഉണർത്തി മനസിനെ സന്തോഷിപ്പിക്കാൻ അവൾക്കായില്ല എന്നതാണ് സത്യം… എല്ലാം പെണ്ണിന്റെ തെറ്റായി കാണുന്ന സമൂഹത്തിൽ സ്വന്തം തെറ്റുകളെ സ്വയം ശപിച്ചു വിദൂരതയിലേക്ക് നോക്കി അവൾ സമയം ചിലവഴിച്ചു…. ചിലപ്പോഴെങ്കിലും നമ്മുടെ ഓരോരുത്തരുടെയും ജീവിതത്തിലെ ഒരു ദിവസമാകാം ഇത്….

Continue Reading

Most Popular