ബന്ധങ്ങൾ
ഏട്ടത്തി, ചെറുക്കഥ വായിക്കാം
രചന : മുഹൈമിൻ
അന്ന് അല്പം വൈകിയാണ് എഴുന്നേറ്റത്. എഴുന്നേറ്റു പല്ല് തേക്കാൻ പുറത്തേക്ക് ഇറങ്ങിയപ്പോഴാണ് ചേട്ടത്തിയുടെ അച്ഛൻ വീട്ടിലേക്ക് നടന്നു വരുന്നത് കണ്ടത് . നടത്തത്തിനു എന്തെന്നില്ലാത്ത വേഗം. ആ അച്ഛനോ? കുറെ നാളായല്ലോ ഈ വഴിക്കൊക്കെ വന്നിട്ട്? പല്ല് തേച്ചു വാ കഴുകി തുപ്പി ഞാൻ ചോദിച്ചു.. നടത്തത്തിന്റെ വേഗം കുറച്ചു അവിടെ നിന്നു അദ്ദേഹം എന്നെയൊന്നു നോക്കി. ഒരു വല്ലാത്ത നോട്ടം.. വരണമെന്ന് തോന്നി. വന്നു. ന്തേ വരുന്നത് നേരുത്തേ കാലത്തെ അറിയിക്കണം എന്നുണ്ടോ? അല്പം ദേഷ്യത്തോടെ അദ്ദേഹം ചോദിച്ചു നിർത്തി… ശെടാ ഇതെന്താ പതിവില്ലാതെ വല്ലാത്ത ദേഷ്യത്തിൽ? ഞാൻ മനസാലെ ചോദിച്ചു… എന്നിട്ട് മുറ്റത്തു നിന്നും ഉറക്കെ വിളിച്ചു പറഞ്ഞു അമ്മേ ദേ ഏട്ടത്തിയുടെ അച്ഛൻ വന്നിരിക്കുന്നു എന്ന്.. അത് കേട്ടിട്ടാകണം അടുക്കളയിൽ പണിയിൽ ആയിരുന്ന അമ്മ സാരിത്തലപ്പ് കൊണ്ട് മുഖമൊക്ക തുടച്ചു ഉമ്മറത്തേക് വന്നത്… എടാ ആ മുറ്റത്തു കിടക്കുന്ന ഓലയങ് മാറ്റി ഇട്ടേ. ഒരു കാര്യം പറയാതെ നോക്കിയും കണ്ടും ചെയ്യരുത്. കേട്ടോ.. അമ്മ എന്നെ നോക്കി പറഞ്ഞു.. ഞാൻ ഓല വലിച്ചു മാറ്റിയിട്ട് ഉമ്മറത്തേക്ക് ചെന്നു. അപ്പോഴും അച്ഛൻ വന്നപാടെ ആരോടും മിണ്ടാതെ ഒറ്റ ഇരിപ്പാണ്… പുറത്തേക്കും നോക്കി.. ഞാൻ പോയി ചായ എടുത്തേച്ചും വരാം എന്ന് പറഞ്ഞു അമ്മ തിരിച്ചു നടന്നു… ഇപ്പൊ ചായയൊന്നും വേണ്ട. അത്യാവശ്യമായി ഒരു കാര്യം പറയണം. അതിന് വന്നതാ… കുറെ ആയി കേൾക്കുന്നു.. സഹിക്കുന്നതിനു ഒരു പരിധിയില്ലേ? ആരുടേയും മുഖത്ത് നോക്കാതെ ഏട്ടത്തിയുടെ അച്ഛൻ പറഞ്ഞു നിർത്തി.. ആ വാസു നായരോ? കുറെ ആയല്ലോ കണ്ടിട്ട്? ഞാൻ രാവിലെ പറമ്പോക്കെ ഒന്ന് കൊത്തി കിളക്കാൻ പോയതാ.. തലയിൽ കെട്ടിയ തോർത്ത്‌ അഴിച്ചു മുഖത്തെയും നെഞ്ചിലേയും വിയർപ്പ് തുള്ളികൾ തുടച്ചു കൊണ്ട് അപ്പോഴേക്കും അച്ഛൻ അവിടേക്കു കയറി വന്നിരുന്നു. അച്ഛൻ ഉമ്മറത്തെ വരാന്തയിൽ ഇരുന്നു.. ഞാൻ വന്നത് എന്റെ മകളെ കൂട്ടിക്കൊണ്ട് പോകാനാ? ആരും എതിരൊന്നും നിൽക്കരുത്, അഞ്ചാറ് കൊല്ലം ആയില്ലേ ഇന്ന് വരും നാളെ വരും എന്ന് പറഞ്ഞു കണ്ണിൽ എണ്ണയൊഴിച് അവൾ ഇവിടെ നിൽക്കാൻ തുടങ്ങിയിട്ട്? മതി… അവൾക്കും വേണ്ടേ ഇനിയൊരു ജീവിതം? വാസു നായരുടെ പറച്ചിൽ കേട്ട് ഞാൻ ഒന്ന് ഞെട്ടി.. കുറച്ചു നേരം മൗനം തളം കെട്ടി നിന്നു… അതിനുമാത്രം എന്താ വാസൂ ഇപ്പൊ ണ്ടായേ? ഇത്രയും നാളും അവൾ ഇവിടല്ലേ കഴിഞ്ഞത്? അച്ഛൻ അയാളുടെ മുഖത്ത് നോക്കി അത് ചോദിച്ചു? അതെ ഇത്രയും നാളും ഇവിടെ നിന്നതിന്റെ ആണല്ലോ കേൾക്കുന്നത്? ഇനിയും കേൾപ്പിക്കണം എന്നില്ല.. മതി… എനിക്ക് അധികം ഒന്നും സംസാരിക്കാൻ ഇല്ല്യ. അവളെയും കൂട്ടി പോകണം. അത്ര തന്നെ.. അതുവരെ മൗനം പാലിച്ച എനിക്ക് ഇതൊക്കെ കേട്ടുകൊണ്ടിരിക്കാനുള്ള ക്ഷമ ഒന്നും ഇല്ലായിരുന്നു.. അച്ഛൻ കുറെ നേരമായല്ലോ സഹിക്കുന്നു.
ഇനി വയ്യ എന്നൊക്കെ പറയാൻ തുടങ്ങിയിട്ട്? കാര്യം മനസ്സിൽ വെച്ച് ഓരോന്ന് പറഞ്ഞാൽ ഞങ്ങൾക്കത് ഗ്രഹിച്ചെടുക്കാനുള്ള കഴിവൊന്നും ഇല്ല… എന്റെ ശബ്ദം അല്പം കടുപ്പത്തിൽ ആയിരുന്നു.. അയാൾ എന്നെയൊന്നു ഇരുത്തി നോക്കി.. എന്നിട്ട് ഇരിപ്പിടത്തിൽ നിന്നും എഴുന്നേറ്റു.. മുറ്റത്തേക്കു നോക്കി പറഞ്ഞു.. നാട്ടിലൊക്കെ ഇപ്പൊ ഓരോരുത്തർ പറഞ്ഞു തുടങ്ങി… അല്ല ഇപ്പോഴും പറഞ്ഞു നടക്കുന്നു. ഏട്ടത്തിയെ ഇപ്പൊ അനിയൻ…. അയാൾ പറഞ്ഞു മുഴുകിപ്പിച്ചില്ല, കഴിഞ്ഞ ആഴ്ച ചന്തയിൽ വെച്ച് ന്റെ മൂത്ത മകനോട് ആരോ ചോദിച്ചെന്നു പെങ്ങളെ ഭർത്താവിന്റെ അനിയന് കെട്ടിച്ചു കൊടുത്തോ എന്ന്? അച്ഛാ… വിളിച്ചത് ഏട്ടത്തി ആയിരുന്നു… ഓഹ് അപ്പൊ ഇത് പറയാൻ ആയിരുന്നോ അച്ഛൻ വയ്യാഞ്ഞിട്ടും ഇങ്ങോട്ടേക്കു വന്നത്? വേണ്ടിയിരുന്നില്ല അച്ഛാ? കണ്ണുകൾ നിറച്ചു ഏട്ടത്തി അത് പറഞ്ഞിട്ട് എന്നെ നോക്കുന്നുണ്ടായിരുന്നു… കൊല്ലം എത്രയായി മോളെ? ജീവിച്ചിരിപ്പുണ്ടോ? മരിച്ചോ? അതോ ഇനി വേറെ കെട്ടി അവിടെങ്ങാനും? ഒരു കുഞ്ഞിനേയും തന്നിട്ട് ഗൾഫിൽ പോയതല്ലേ അവൻ? ഒരു വിവരവും ഇല്ല. ഇനി അന്വേഷിക്കാൻ വേറെ വഴിയുമില്ല… ഇനിയും കാത്തിരിക്കുന്നതിൽ എന്ത് അർത്ഥമാണ് ഉള്ളത്? വെറുതെ നാട്ടാരെക്കൊണ്ട് ഓരോന്ന് പറയിപ്പിക്കാൻ? അല്പം നീരസത്തോടെ ഏട്ടത്തിയുടെ മുഖത്ത് നോക്കി അയാൾ അത് പറഞ്ഞപ്പോൾ വിഷമം താങ്ങാൻ വയ്യാതെ അമ്മ വിതുമ്പി തുടങ്ങിയിരുന്നു… അച്ഛൻ ഈ താലി കണ്ടോ? ഈ നെറ്റിയിലെ സിന്ദൂരം കണ്ടോ? എന്നും നെറ്റിയിൽ ഈ സിന്ദൂരം തൊടുമ്പോ എനിക്കൊരു വിശ്വാസം ഉണ്ട് ന്റെ ഏട്ടൻ തിരിച്ചു വരുമെന്ന്… ഞാൻ ജീവിക്കുന്നുണ്ട് എങ്കിൽ ന്റെ ഏട്ടന്റെ പെണ്ണായ് തന്നെ ആയിരിക്കും അത് മരിക്കുന്നത് വരെയും അങ്ങനെ തന്നെ… എന്റെ ഏട്ടന്റെ വീടാ ഇത് . എന്റെ വീട്. ആരുടെയൊക്കെയോ വാക്കുകൾ കേട്ട് അച്ഛൻ അത് ചോദിക്കാൻ വന്നതാ അല്ലെ? എന്നെ കൂട്ടിക്കൊണ്ട് പോകാൻ വന്നതാ അല്ലെ? .ദേ ഈ നിൽക്കുന്നവനെ കണ്ടോ അച്ഛൻ. എന്നെ ഇന്ന് വരെ ഏട്ടത്തി അമ്മേ എന്നല്ലാതെ വിളിച്ചിട്ടില്ല അവൻ. ന്റെ ഏട്ടന്റെ അനിയനാ അവൻ. ന്റെ അനിയൻ… അവന്റെ കൂടെ ഒരിടത്തു പോകാനും എനിക്ക് മടിയില്ല. ന്റെ ഏട്ടനോളം കരുതൽ അവനിപ്പോ എനിക്ക് തരുന്നുണ്ട്… ന്റെ ഓരോ കാര്യങ്ങൾക്കും അവനാ ഇപ്പൊ എന്റെ കൂടെ വരുന്നത്. എനിക്കോ കുഞ്ഞിനോ ഒരു പനിയെങ്കിലും വന്നാൽ അവന്റെ കണ്ണാ ഇവിടെ ആദ്യം നിറയുക… ഏട്ടത്തി അതൊക്കെ പറയുമ്പോൾ എന്റെ കണ്ണുകൾ നിറഞ്ഞൊഴുകുന്നുണ്ടായിരുന്നു…. ഞാൻ ആർക്കും മുഖം കൊടുക്കാതെ തിരിഞ്ഞു നിന്നു.. വരില്ല അച്ഛാ ഞാൻ ഇവിടെ നിന്നും എങ്ങോട്ടും. ഈ അച്ഛനെയും അമ്മയെയും ന്റെ അനിയനെയും വിട്ടു ഞാൻ എങ്ങോട്ടുമില്ല… പറഞ്ഞു നടക്കുന്നവർ നടക്കട്ടെ… ആയിരം കാലത്തിന്റെ വാ മൂടിക്കെട്ടാം. ആളുകളുടെ വാ മൂടിക്കെട്ടാൻ പറ്റില്ലല്ലോ.. അവർ പറഞ്ഞു നടക്കട്ടെ… എനിക്ക് അറിയാം എന്റെ അനിയൻ കുട്ടിയെ.. ഇനി ഇത് പറയാനായി അച്ഛൻ ഇവിടേക്ക് വരണം എന്നില്ല… ഇവിടുള്ളവർക്ക് അറിയാം ഞാനും അവനും എങ്ങനെയാണെന്ന്.. ന്റെ ഏട്ടൻ തിരിച്ചു വന്നാലും ന്റെ ഏട്ടനും അത് മനസിലാകും…
വരും ഒരു ദിവസം.. അമ്പിളീ എന്നു വിളിച്ചു. എല്ലാരും നോക്കിക്കോ… അപ്പോഴേക്കും ഏട്ടത്തിയുടെ കരച്ചിൽ ഉച്ചത്തിൽ ആയി തുടങ്ങിയിരുന്നു… മോളെ ഞാൻ… ഓരോന്ന് കേൾക്കുമ്പോൾ ഈ അച്ഛന്റെ മനസു പിടക്കും… അവിടെയും ഉണ്ടല്ലോ ഇവിടുത്തെ അമ്മയെപ്പോലെ ഒരു അമ്മ.. നിന്റെ കാര്യം പറഞ്ഞു എപ്പോഴും കരച്ചിലാണ്… ഇതൊക്കെ കേൾക്കുമ്പോൾ അവളും… എനിക്ക് പകരം ഇന്ന് നിന്റെ ആങ്ങളമാർ വരാൻ ഇരുന്നതാ? ഒരുപക്ഷെ അവർ വന്നിരുന്നേൽ…. ഒന്നും സംഭവിക്കില്ല അച്ഛാ? എന്നെ എന്റെ ഏട്ടന്മാർക്ക് മനസിലായില്ലെങ്കി പിന്നെ ആർക്കാ മനസ്സിലാകുക. ഏട്ടനെക്കുറിച്ചു ഒരു അറിവും കിട്ടാഞ്ഞപ്പോ കുഞ്ഞേട്ടൻ എന്നോട് അന്ന് വന്നു പറഞ്ഞിരുന്നു. നീ വീട്ടിലേക്ക് വാ. കുറച്ചു ദിവസം അവിടെ വന്നു നിൽക്കാൻ.. അന്നെനിക്ക് മനസിലായിരുന്നു. എന്തിനാ എന്നെ വീട്ടിലേക്ക് വിളിപ്പിക്കുന്നത് എന്ന്… ആർക്കും എന്തും പറഞ്ഞു നടക്കാമല്ലോ വാസുവേ? അതുകേട്ടു നീ ഇവിടെ വന്നു അത് ചോദിക്കേണ്ടിയിരുന്നില്ല.. അച്ഛൻ അയാളുടെ മുഖത്ത് നോക്കി അത് പറഞ്ഞു… കൂട്ടിക്കൊണ്ട് പോകണം എന്ന് കരുതി തന്നെയാ വന്നത്… കൂട്ടിക്കൊണ്ട് വരുമെന്ന് അവൾക്ക് വാക്കും കൊടുത്തിരുന്നു. ഇനിയിപ്പോ എല്ലാം സഹിക്കുക തന്നെ… ന്റെ മോള് പറഞ്ഞപോലെ പറഞ്ഞു നടക്കുന്നവർ നടക്കട്ടെ… എനിക്കറിയാം അങ്ങനൊന്നും ഇല്ലെന്ന്.. എന്നാലും… കുറച്ചു നേരം ആരും ഒന്നും മിണ്ടാതെ അവിടെ നിന്നു… ഏട്ടത്തി പോകണം ഇപ്പൊ അച്ഛന്റെ കൂടെ. കുറച്ചു ദിവസം അവിടെ നിന്നിട്ടൊക്കെ വാ. ഇവിടിപ്പോ ഞാൻ ഉണ്ടല്ലോ? ഞാൻ വിറയാർന്ന ശബ്ദത്തോടെ ഏട്ടത്തിയുടെ മുഖത്തേക്ക് നോക്കാതെ പറഞ്ഞു… അപ്പൊ ഞാൻ പോകണം എന്നാണ് എല്ലാരുടെയും മനസിൽ അല്ലെ? എല്ലാരുടെയും മനസിൽ മരിച്ചോ എന്റെ ഏട്ടൻ? പറ അമ്മേ പോകണോ ഞാൻ? അത് പറഞ്ഞു ഏട്ടത്തി അമ്മയെക്കെട്ടിപ്പിടിച്ചു വിതുമ്പി തുടങ്ങിയിരുന്നു… അപ്പോഴേക്കും ഉണ്ണി അച്ഛാ എന്നു വിളിച്ചു അവിടേക്കു വന്നിരുന്നു… അതെ എന്റെ ഏട്ടന്റെ മകൻ… അവൻ എന്നെ അച്ഛാ എന്നാണ് വിളിക്കുന്നത്… എന്റെ മകൻ… ന്തിനാ അമ്മ കരയുന്നെ? ഏ അച്ഛാ? അത് പറഞ്ഞു അവൻ എന്റെ വിരലിൽ പിടിച്ചു വലിച്ചു തുടങ്ങിയിരുന്നു… അപ്പോഴേക്കും ഞാൻ അവനെ പൊക്കി എടുത്തു കവിളുകളിൽ മാറി മാറി തുരു തുരെ ചുംബിച്ചു… ഇല്ല അച്ഛാ എങ്ങോട്ടും വിടില്ല ന്റെ ഏട്ടത്തിയെ… ഏട്ടൻ വരും. ഒരിക്കൽ ഈ വീട്ടിലേക്ക് വരും… അന്നെനിക്ക് അഭിമാനത്തോടെ പറയണം ന്റെ ഏട്ടൻ ഭാഗ്യം ചെയ്തവനാ എന്ന്. ഇങ്ങനൊരു പെണ്ണിന്റെ കഴുത്തിൽ താലി കെട്ടാൻ ഭാഗ്യം ലഭിച്ചല്ലോ എന്ന്… അത്രയും കേട്ടു കഴിഞ്ഞപ്പോഴേക്കും മറുപടി ഒന്നും പറയാതെ കൊച്ചുമകനെ ചുംബിച്ചിട്ട് അച്ഛൻ പടികൾ ഇറങ്ങി നടന്നു തുടങ്ങിയിരുന്നു…. എല്ലാവരും അകത്തേക്കു കയറി… എന്നാലും ആരാകും ഇങ്ങനൊക്കെ പറഞ്ഞു നടക്കുന്നവർ… ഞാൻ മുറ്റത്തേക്കിറങ്ങി… ഏട്ടാ ഇതൊക്കെ അറിയുന്നുണ്ടോ? ഒരു ദിവസം വരണം. ഒരു ദിവസത്തേക്കെങ്കിലും. ആ കണ്ണിലെ കണ്ണുനീർ വന്നോന്നു തുടക്കണം. ഏട്ടനറിയോ ഏട്ടന്റെ മകൻ എന്നെ അച്ഛാ എന്ന വിളിക്കുന്നത്. അതെ ഞാൻ അവനിക്ക് അച്ഛനാണ്.. ചെറിയച്ഛൻ അല്ല അച്ഛൻ… അവൻ അങ്ങനെ വിളിക്കുമ്പോൾ കിട്ടുന്ന സന്തോഷം ഉണ്ടല്ലോ ഏട്ടാ? എന്റെ കണ്ണുകൾ നിറഞ്ഞു കവിഞ്ഞു തുടങ്ങിയിരുന്നു …. അവർ ഇന്നും കാത്തിരിപ്പാണ് പാതിരാവിന്റെ നിശബ്ദതയിൽ അഞ്ചാറ് വർഷങ്ങൾക്കപ്പുറം കേട്ട് മറന്ന അച്ഛാ അമ്മേ അമ്പിളീ എന്നുള്ള വിളി കേൾക്കാൻ.. ശുഭം ❤ (നിങ്ങൾ സ്വയം എഴുതിയ നിങ്ങളുടെ ചെറുകഥകൾ, തുടർക്കഥകൾ എന്നിവ വളപ്പൊട്ടുകൾ പേജിൽ ഉൾപ്പെടുത്താൻ പേജ് ഇൻബോക്സിലേക്ക് ഇപ്പോൾ തന്നെ മെസേജ് അയക്കൂ….)
രചന: ഉണ്ണി കെ പാർത്ഥൻ
“ഇവള് ഇത് എവിടെ പോയി കിടക്കുവാ.. വിളിച്ചിട്ട് എടുക്കുന്നില്ല ലോ..” പലവട്ടം ഫോൺ വിളിച്ചിട്ടും കാൾ അറ്റൻഡ് ചെയ്യാതിരുന്ന ഭാര്യയെ മനസ്സിൽ ആവോളം തെറി വിളിച്ചു കൊണ്ട് സുധി ബസിന്റെ സീറ്റിലേക്ക് ഒന്നുടെ ചാരിയിരുന്നു.. “വാട്സാപ്പ് ചെയ്തു നോക്കാം..” മൊബൈൽ ഒന്നുടെ എടുത്തു നെറ്റ് ഓൺ ചെയ്തു.. “ആഹാ.. ഇവൾ ഓൺലൈനിൽ ഉണ്ടല്ലോ… ഡീ..” സുധി ഒരു മെസ്സേജ് വാട്സാപ്പ് ചെയ്തു.. ഒരു മിനിറ്റ്.. രണ്ട് മിനിറ്റ്.. നിമിഷങ്ങൾ അങ്ങനെ കടന്നു പോയി.. അപ്പുറത്ത് ഓൺലൈൻ തെളിഞ്ഞു കിടപ്പുണ്ട്… “ഡീ..” സുധി ഒന്നുടെ മെസ്സേജ് ചെയ്തു… നോ രെക്ഷ.. “എങ്കിൽ ഒന്നുടെ വിളിച്ചു നോക്കാം..” വാട്സാപ്പ് കാൾ ചെയ്തു… അനക്കമില്ല..
“ഇവള് ഈ മൊബൈലും കു ത്തി ഇരുന്നു ഉറങ്ങിപോയോ…” മനസ്സിൽ ഒന്നുടെ പറഞ്ഞിട്ട് സുധി നോട്ടം തൊട്ടടുത്ത സീറ്റിൽ ഇരിക്കുന്ന ചെറുപ്പകാരന്റെ മൊബൈലിലേക്ക് ഒരു നിമിഷം പാളി നോക്കി.. “ങ്ങേ… ഇത് ദേവി അല്ലേ.. എന്റെ ഭാര്യ.. ഇവളെ എങ്ങനെ ഇയ്യാൾക്ക് അറിയാം..” ആ ചെറുപ്പക്കാരൻ ഇടതടവില്ലാതെ വാട്സാപ്പ് മെസ്സേജ് ദേവിക്ക് അയച്ചു കൊണ്ടേ ഇരിക്കുന്നുണ്ടായിരുന്നു.. അപ്പുറത്ത് നിന്നും ഉരുളക്ക് ഉപ്പേരി പോലേ റിപ്ലൈയും.. “ചേട്ടാ.. ഒരു മിനിറ്റ്.. ആ ഫോൺ ഒന്ന് തരോ.. എന്റെ ഭാര്യക്ക് ഒരു മെസ്സേജ് ഇടാൻ ആണ്..” ആ ചെറുപ്പക്കാരനെ നോക്കി സുധി പതിയേ ചോദിച്ചു… “പിന്നെന്താ.. ദാ ചേട്ടാ ഫോൺ..” വിനീത പുളകിതനായി അയ്യാൾ ഫോൺ സുധിക്ക് നേരെ നീട്ടി.. “ഡീ.. ഞാൻ നിന്നെ കൊറേ നേരമായി വിളിക്കുന്നു… മെസ്സേജ് ഇടുന്നു..
നീ എന്റെ മെസ്സേജ് തുറന്നു നോക്കിയില്ല ലോ.. ഇത് ആരാ നിന്റെ ഫ്രണ്ട് ആണോ.. എന്റെ തൊട്ടടുത്ത സീറ്റിൽ ഇരിക്കുന്നത് കൊണ്ട് ഞാൻ ഈ ചേട്ടന്റെ ഫോൺ വാങ്ങി മെസ്സേജ് ഇടുവാ.. അതേ.. ഞാൻ ഇന്ന് വീട്ടിലേക്ക് വരുന്നുണ്ട്…വൈകുന്നേരം ആവുമ്പോളേക്കും എത്തും ട്ടോ..” മെസ്സേജ് സെന്റ്… “ങ്ങേ..” അപ്പുറത്തു നിന്നു മറുപടി വിത്ത് സ്മൈലി.. “ഓൾക്ക് മനസിലായില്ല ന്ന് തോന്നുന്നു… ചേട്ടാ മ്മക്ക് ഒരു സെൽഫി എടുത്താലോ..” ആ ചെറുപ്പക്കാരനെ ചേർത്ത് പിടിച്ചു സുധി ഒരു സെൽഫി എടുത്തു പിക്ക് ദേവിക്ക് സെന്റ് ചെയ്തു… അപ്പുറം മെസ്സേജ് ഓപ്പൺ ചെയ്തു… അപ്പുറത്ത് നിന്നു ഒരു റിപ്ലൈയും ഇല്ല… “ഓൾടെ നെറ്റ് കഴിഞ്ഞു കാണും.. അതാണ് റിപ്ലൈ ഇല്ലാത്തത്.. സർപ്രൈസ് കൊടുക്കാന്നു കരുതിയതാ.. ഇനി ഇപ്പൊ അത് വേണ്ടാ ലോ…” മൊബൈൽ തിരിച്ചു നൽകി കൊണ്ട് നിഷ്കളങ്കമായി സുധി ആ ചെറുപ്പക്കാരനെ നോക്കി.. “ചേട്ടാ ആളിറങ്ങാൻ ണ്ട്..” ചെറുപ്പക്കാരൻ സീറ്റിൽ നിന്നും ചാടിയെഴുന്നേറ്റ് കണ്ടക്ടറേ നോക്കി ഉറക്കേ വിളിച്ചു പറഞ്ഞു… “ഇനി അടുത്ത സ്റ്റോപ്പ്‌ കൊല്ലത്തു ആണ്..”
കണ്ടക്ടർ വിളിച്ചു പറഞ്ഞു… “അതൊന്നും പറ്റില്ല.. എനിക്ക് ഇവിടെ ഇപ്പൊ ഇറങ്ങണം…” ചെറുപ്പക്കാരൻ ബെൽ അടിച്ചു.. ഡ്രൈവർ വണ്ടി നിർത്തി.. ചെറുപ്പക്കാരൻ ഇറങ്ങി.. തിരിഞ്ഞു നോക്കാതെ ഓടി… സുധി മൊബൈൽ എടുത്തു ഒന്നുടെ ഭാര്യയെ വിളിച്ചു… “നിങ്ങൾ വിളിക്കുന്ന നമ്പർ മറ്റൊരു കോളിൽ ആണ്… ദയവായി അൽപ്പനേരം കഴിഞ്ഞു വിളിക്കുക..” സുധി ഒന്നുടെ വിളിച്ചു… “നിങ്ങൾ വിളിക്കുന്ന നമ്പർ ഇപ്പൊ സ്വിച് ഓഫ് ആണ്.. ദയവായി അൽപ്പ നേരം കഴിഞ്ഞു വിളിക്കുക…” “ഇന്നലെ നല്ല മഴ അല്ലായിരുന്നോ.. ഫോൺ ചാർജ് പോയി കാണും..” അതും പറഞ്ഞു സുധി സീറ്റിലേക്ക് ചാരി കണ്ണുകൾ അടച്ചു… ശുഭം.. ഉണ്ണി കെ പാർത്ഥന്റെ സ്റ്റോറി എന്തേ ഇങ്ങനെ എന്ന് ചോദിക്കുന്നവരോട് മാത്രമായി രണ്ട് വരി.. വിഡ്ഢിത്തത്തോടെ ചില ആശയങ്ങളേ കൂടെ കൂട്ടി നോക്കും.. അത് പണ്ട് മുതലേ ഉള്ള ശീലമാണ്.. സാമാന്യ യുക്തിക്ക് നിരക്കാത്തത് എന്ന് വേണേൽ പറയാം.. എഴുതി നോക്കും.. വായിക്കുന്നവരുടെ അഭിരുചിക്ക് വിടും.. അവരേ കേൾക്കും അതാണ് പതിവ്.. ജീവനുള്ള കഥയുമായി വീണ്ടും കാണാം..
രചന: സജി തൈപ്പറമ്പ്
“ചേട്ടാ.. ഈ സാരിയുടെ ഞൊറിയൊന്ന് പിടിച്ചേ” “പിന്നേ.. എനിക്കതല്ലേ ജോലി ?,ചുരിദാറിട്ടിരുന്നേൽ ഈ പാടുണ്ടായിരുന്നോ? ഈ നേരമില്ലാത്ത നേരത്ത്,സാരിയുടുക്കാൻ നിന്നോടാരെങ്കിലും പറഞ്ഞോ?” “എന്താ ജയേട്ടാ.. ഈ പറയുന്നത്? ഇതൊരു സാധാരണ കല്യാണമല്ലല്ലോ? എൻ്റെ വല്യച്ഛൻ്റെ മകൾടെ കല്യാണമല്ലേ? അവിടെയുള്ളവർക്കൊക്കെ സാരിയെടുത്ത കൂട്ടത്തിൽ എനിക്കും വല്യച്ഛൻ,സാരിയെടുത്ത് തന്നത്, കല്യാണത്തിന് ഉടുക്കാൻ വേണ്ടിയല്ലേ?” ഓഹ് പിന്നേ, സാരിയുടുക്കാൻ പറ്റിയൊരു കോലം, നീയൊന്ന് വേഗമിറങ്ങാൻ നോക്ക് , പുശ്ചത്തോടെ പറഞ്ഞിട്ട് ജയേട്ടൻ പുറത്തേയ്ക്ക് പോയപ്പോൾ ,എനിക്ക് കടുത്ത നിരാശ തോന്നി. രാവിലെ മുതല് തുടങ്ങിയ കഷ്ടപ്പാടാണ് ,നന്നായൊന്ന് ഒരുങ്ങിയിട്ട് എത്ര നാളായി, രണ്ട് കൊല്ലം മുൻപ് അനുജത്തിയുടെ കല്യാണത്തിനാണ് ഇതിന് മുമ്പ് സമയമെടുത്തൊന്ന് ഒരുങ്ങിയത് ,അല്ലാതെയുള്ള എന്ത് ചടങ്ങിന് പോയാലും ജയേട്ടൻ്റെ ധൃതി കാരണം ഏതെങ്കിലുമൊരു ചുരിദാറുമെടുത്തിട്ട് വെളിച്ചെണ്ണ തേച്ച മുടിയൊന്ന് കോതിയൊതുക്കി കണ്ണാടിയിലൊട്ടിച്ചിരിക്കുന്ന ഒരു പൊട്ടുമെടുത്ത് നെറ്റിയിലൊട്ടിച്ചിട്ട് വേഗം ഇറങ്ങാറാണ് പതിവ്, ഇതിപ്പോൾ പുറം നാട്ടിലൊക്കെ പോയിട്ട് വന്ന കസിൻസെല്ലാം കെട്ടിയൊരുങ്ങി വരുമെന്നറിയാവുന്നത് കൊണ്ട് ,അവരുടെ മുന്നിൽ ചെറുതാവണ്ടന്ന് കരുതിയാണ്, ഇന്നലെ രാത്രി മുതൽ പോയസൗന്ദര്യമൊന്ന് തിരിച്ച് പിടിക്കാനുള്ള ശ്രമം തുടങ്ങിയത് രാത്രി തന്നെ പറമ്പിൽ നിന്ന് കറ്റാർവാഴയുടെ തണ്ട് മുറിച്ചെടുത്ത്, തൊലി കളഞ്ഞ്, അതിൻ്റെ മുകളിൽ അരിപ്പൊടി വിതറി മുഖത്ത് തേച്ച് വച്ചു, ഏറെ നേരം കഴിഞ്ഞു് അത് കഴുകിയതിന് ശേഷമാണ്, ഇന്നലെ ഉറങ്ങാൻ കിടന്നത് തന്നെ എന്നിട്ട് അതിരാവിലെയെഴുന്നേറ്റ് ബാക്കിയുണ്ടായിരുന്ന കറ്റാർവാഴയുടെ ജെല്ലെടുത്ത് ജ്യൂസാക്കി, തലയിൽ തേച്ച് പിടിപ്പിച്ചു ,മുടിക്ക് തിളക്കം കിട്ടുമെന്നാരോ മുമ്പ് പറഞ്ഞത് കൊണ്ടാണങ്ങനെ ചെയ്തത് അങ്ങേതിലെ ശോഭേച്ചി മിക്കപ്പോഴും ബ്യൂട്ടി പാർലറിൽ പോകുമ്പോൾ ചോദിക്കാറുണ്ട്, ഗീതയ്ക്ക് ബ്യൂട്ടി പാർലറിലൊന്നും പോകാൻ താല്പര്യമില്ലേന്ന്?
തൻ്റെ നല്ല തിക്നസ്സുള്ള മുടിയല്ലേ? ഒന്ന് സ്ട്രെയ്റ്റ് ചെയ്തിട്ടിരുന്നേൽ നല്ല വെറ്റായി കിടന്നേനെയെന്ന് അത് കേട്ടപ്പോഴെനിക്ക് ആത്മനിന്ദയാണ് തോന്നി . ഏത് പെണ്ണുങ്ങൾക്കാണ്, ബ്യൂട്ടി പാർലറിൽ പോകാനും, ഫേഷ്യല് ചെയ്യാനും ,മുടിയൊന്ന് സ്ട്രെയ്റ്റ് ചെയ്യാനുമൊക്കെ ആഗ്രഹമില്ലാത്തത്? ,പക്ഷേ അതിനൊക്കെ സപ്പോർട്ട് ചെയ്യുന്നൊരു ഹസ്ബൻ്റ് കൂടിയുണ്ടാവണ്ടെ? വെറും മുപ്പത് രൂപാ മുടക്കി പുരികമൊന്ന് ത്രെഡ് ചെയ്യാൻ പോലും, പുള്ളിക്കാരൻ പൈസ തരില്ല, പഠിക്കാൻ പോയ സമയത്ത്, അമ്മ ഒരുപാട് പറഞ്ഞതാണ്, മോളേ.. നീയെങ്കിലും പഠിച്ച് ഒരു ജോലി വാങ്ങാൻ നോക്ക്, ഇല്ലെങ്കിൽ കല്യാണം കഴിയുമ്പോൾ ,അമ്മയെ പോലെ സ്വന്തം ആവശ്യങ്ങൾക്കെല്ലാം ഭർത്താവിൻ്റെ മുന്നിൽ കൈ നീട്ടി നില്ക്കേണ്ടി വരുമെന്ന് , ആര് കേൾക്കാൻ ? അതിൻ്റെയാണീ അനുഭവിക്കുന്നത്, ഞാനൊരുവിധം സാരി അരക്കെട്ടിലുറപ്പിച്ചു. അമ്പലത്തിൽ വച്ചായിരുന്നു വിവാഹം അവിടെ ചെന്നയുടനെ എന്നെയും മക്കളെയും മണ്ഡപത്തിലേക്ക് പറഞ്ഞ് വിട്ടിട്ട് ജയേട്ടൻ കൂട്ടുകാരുടെയടുത്തേയ്ക്ക് പോയി. ഹായ് നാത്തൂനെ, ഇതെന്തായീ കാണുന്നത്? കാവിലെ ഭഗവതി നേരിട്ടിറങ്ങി വന്നതോ ? ചുവന്ന പട്ട് സാരി, നാത്തൂന് നന്നായി ചേരുന്നുണ്ട് കെട്ടോ? വല്യച്ഛൻ്റെ ഇളയ മരുമകള് വന്നെന്നോടങ്ങനെ പറഞ്ഞപ്പോൾ മനസ്സിനൊരു കുളിർമ്മ തോന്നി ,അവളങ്ങനെ ആരെയും പുകഴ്ത്തിപ്പറയുന്നൊരാളല്ല ങ്ഹാ ഗീതേച്ചി… പൊളിച്ചല്ലോ ? നിങ്ങൾക്കൊരു പത്ത് വയസ്സ് കുറഞ്ഞിട്ടുണ്ട്, ഗീതേച്ചി വെളുത്തതായത് കൊണ്ടാവാം ചുവപ്പ് നിറം നന്നായി മാച്ച് ചെയ്യുന്നുണ്ട്, അത് മാത്രമല്ല രശ്മി ,ഗീതേച്ചിക്ക് നല്ല ബോഡി ഷെയ്പുള്ളത് കൊണ്ട് സാരി നന്നായി ചേരുന്നുമുണ്ട് എൻ്റെ കൃഷ്ണാ … എനിക്കിനി മരിച്ചാലും വേണ്ടില്ല ബാംഗ്ളൂരിൽ മോഡലിങ്ങ് ചെയ്യുന്ന അമ്മാവൻ്റെ മക്കളാണത് പറഞ്ഞത് ഇതിൽപരം ഈയുള്ളവർക്ക് മറ്റൊന്നും വേണ്ട അതോടെ എൻ്റെ മൂഡ് ഔട്ടെല്ലാം മാറി. താലികെട്ടും, സദ്യയുമൊക്കെ കഴിഞ്ഞപ്പോൾ തിരിച്ച് പോകാൻ ജയേട്ടൻ ധൃതിവച്ചു. കുറച്ച് കൂടി നില്ക്ക് ജയേട്ടാ… ഇത്രവേഗം തിരിച്ച് പോകാൻ നമ്മള് അന്യരൊന്നുമല്ലല്ലോ? മനസ്സില്ലാ മനസ്സോടെയാണെങ്കിലും പുള്ളിക്കാരൻ കുറച്ച് നേരം കൂടി നിന്നു.
നാല് മണിയായപ്പോൾ ജയേട്ടന് പോയിട്ട് തിരക്കുണ്ടെന്ന് വല്യച്ഛനോട് കളവ് പറഞ്ഞിട്ട് ഞങ്ങളവിടുന്നിറങ്ങി. ഗീതേ .. നീ മുന്നിലോട്ടിരിക്ക് മക്കള് രണ്ട് പേരും കൂടി പിന്നിലിരുന്നോളും കാറിൻ്റെ പിൻഡോറ് തുറക്കാനൊരുങ്ങിയ എന്നോടത് പറഞ്ഞത്, ജയേട്ടൻ തന്നെയാണോ,? എന്ന് വിശ്വസിക്കാനാവാതെ ആ മുഖത്തേയ്ക്ക് ഞാൻ പകച്ച് നോക്കി . കുറച്ച് നാളുകളായി പത്താം ക്ളാസ്സിൽ പഠിക്കുന്ന മൂത്ത മകനാണ്, എന്നും ഇടത് വശത്തെ ഫ്രണ്ട് സീറ്റിലിരിക്കുന്നത്, ഒരു ദിവസം അവനോട് ഞാൻ ബാക്ക് സീറ്റിലേക്കിരിക്കാൻ പറഞ്ഞപ്പോൾ ജയേട്ടൻ സമ്മതിച്ചില്ല നിനക്ക് മുന്നിൽ തന്നെയിരിക്കണമെന്ന് ഇത്ര നിർബന്ധമെന്താണ്? ആ ചോദ്യം അന്നെന്നെ വല്ലാതെ വേദനിപ്പിച്ചിരുന്നു. വേണ്ട, ഞാനിവിടെ തന്നെയിരുന്ന് കൊള്ളാം ഉള്ളിലെ സന്തോഷം മറച്ച് പിടിച്ച്, ഞാൻ വെറുതെയൊരു നമ്പരിറക്കി. ഹാ, പറയുന്നത് കേൾക്ക് ഗീതേ .. എനിക്കത് മതിയായിരുന്നു, എൻ്റെ ഭർത്താവ് എന്നെ നിർബന്ധിച്ചാലേ, ഞാനിനി മുൻ സീറ്റിലിരിക്കു, എന്നൊരു പിടിവാശി എനിക്കന്നുണ്ടായിരുന്നു. അല്ല, നമ്മളിതെങ്ങോട്ടാ പോകുന്നത് ? വീട്ടിലേക്കുള്ള റോഡിലേക്ക് തിരിയാതെ, കാറ് ഹൈവേയിലൂടെ തന്നെ സഞ്ചരിക്കുന്നത് കണ്ട് ,ഞാൻ ജിജ്ഞാസയോടെ ചോദിച്ചു. നീയെപ്പോഴും പറയാറില്ലേ ? ഞാൻ വർക്ക് ചെയ്യുന്ന കമ്പനിയിൽ, ഒരിക്കലൊന്ന് പോകണമെന്നും, അവിടുള്ളവരെയൊക്കെ ഒന്ന് പരിചയപ്പെടണമെന്നുമൊക്കെ അയ്യോ അങ്ങോട്ടാണോ പോകുന്നത്? ,ജയേട്ടാ .. ഞാനീ പട്ട് സാരിയൊക്കെയുടുത്ത് വന്നാൽ ,അവരെന്ത് വിചാരിക്കും? നമുക്ക് വേറൊരു ദിവസം പോകാം ഹേയ് അതൊന്നും സാരമില്ല, ഇന്നാണ് അതിന് പറ്റിയ ദിവസം ഈ മനുഷ്യനിതെന്ത് പറ്റി? ആകെയൊരു മാറ്റം ?
എൻ്റെ ജിജ്ഞാസ വർദ്ധിച്ചു. അങ്ങനെ കുറെ നാള് കൊണ്ടുള്ള ആഗ്രഹം സാധിച്ചു. കമ്പനിയിലുള്ള ജയേട്ടൻ്റെ സബ്ഓർഡിനേറ്റ്സൊക്കെ എന്നെ ,മാഡം എന്ന് വിളിച്ച് സംബോധന ചെയ്തപ്പോൾ, ഞാനങ്ങ് വല്ലാതായി. അവിടുന്നിറങ്ങിയിട്ടും, വീട്ടിലേക്ക് പോകാതെ, ജയേട്ടൻ ഞങ്ങളെയും കൊണ്ട് നേരെ ബീച്ചിലേക്കാണ് പോയത്, ൻ്റെ കൃഷ്ണാ… ഇന്ന് മൊത്തം സർപ്രൈസുകളാണല്ലോ? എല്ലാ ദിവസവും, ഈ മനുഷ്യന് ഇങ്ങനെ തോന്നിയിരുന്നെങ്കിയെന്ന്, ഞാൻ വല്ലാതെ കൊതിച്ച് പോയി. ഞാനൊരു കാര്യം ചോദിച്ചാൽ, സത്യം പറയുമോ ? രാത്രിയിൽ ജയേട്ടനൊപ്പം കട്ടിലിൽ കിടക്കുമ്പോൾ, ഞാനദ്ദേഹത്തോട് ചോദിച്ചു ഉം ചോദിക്ക്, ഇന്നെന്താ ജയേട്ടന് പറ്റിയത്? ഇപ്പഴും എനിക്ക്, ഒന്നുമങ്ങട്ട് വിശ്വസിക്കാനാവുന്നില്ല, ചില തിരിച്ചറിവുകളുണ്ടാകുന്നത് മറ്റുള്ളവരിൽ നിന്നാണ് ,കല്യാണ പന്തലിൽ വച്ച് ,എനിക്കങ്ങനെയൊരു തിരിച്ചറിവ് കിട്ടി ,ഇപ്പോൾ നീ അത്രയും മനസ്സിലാക്കിയാൽ മതി. ################### അതാരാ ചേട്ടാ… ആ ചുവന്ന സാരിയുടുത്ത് നില്ക്കുന്നത്, എന്തൊരു ലുക്കാണ് ആ ചേച്ചിക്ക്? അറിയില്ലെടാ, പക്ഷേ ഒരു കാര്യം ഉറപ്പാണ്, ഏതോ ഭാഗ്യം ചെയ്തവൻ്റെ ഭാര്യയാണ് , ഈശ്വരാ … നമുക്കൊന്നും നീ ഇത് പോലൊരു ഭാര്യയെ തന്നില്ലല്ലോ? ശരിയാ ചേട്ടാ… ഇതിനെയൊക്കെ കാണുമ്പോഴാണ് ,സുരാജേട്ടൻ പറഞ്ഞത് പോലെ വീട്ടിലിരിക്കുന്നതിനെയെടുത്ത് കിണറ്റിലെറിയാൻ തോന്നുന്നത് #################### കല്യാണ പന്തലിൽ വച്ച് ,ഗീതയെ ചൂണ്ടിക്കാണിച്ച്, ക്യാമറാമാൻ്റെ സഹായിയായ പയ്യൻ ചോദിച്ച സംശയവും, അതിനയാൾ കൊടുത്ത മറുപടിയുമാണ്, തന്നിലുണ്ടായ മാറ്റത്തിന് കാരണമെന്ന് അയാൾ ഗീതയോട് പറഞ്ഞില്ല. NB :- ശരീരത്തിൽ കസ്തൂരിയുണ്ടെന്നറിയാതെ അതിൻ്റെ സുഗന്ധമന്വേഷിച്ച് നടക്കുന്ന മാനുകളെ പോലെയാണ് ചില പുരുഷൻമാർ, എന്ന് പറയാതെ വയ്യ ലൈക്ക് കമന്റ് ചെയ്യണേ…
രചന: Anu Swaroop
വീട്ടിലെ രണ്ടുപെണ്മക്കളിൽ ഇളയത് ആണെങ്കിലും വീട്ടുകാർക്ക് എന്നും ഒരു ഭാരം ആയിരുന്നു ഞാൻ,, ഞാൻ ജനിച്ചു പിറ്റേദിവസം ഒരു ആക്സിഡന്റ് പറ്റി അച്ഛൻ മരിച്ചു എന്ന കാരണം പറഞ്ഞു ആയിരുന്നു എന്നെ വീട്ടിലെ ഭാഗ്യദോഷി ആക്കിയത്, അമ്മക്ക് എന്നും പ്രിയപെട്ടവൾ ചേച്ചി തന്നെ ആയിരുന്നു, അമ്മയുടെ ഓരോ വാക്കിലും, പ്രവർത്തിയിലും അത് പ്രകടമായിരുന്നു എന്നേക്കാൾ രണ്ടു വയസ്സിനു മൂത്ത ചേച്ചി സ്കൂൾ പഠനം കഴിഞ്ഞു പട്ടണത്തിലെ കോളേജിൽ പോയപ്പോൾ ഞാനും ഒരുപാട് ആഗ്രഹിച്ചു,, പെൺകുട്ടികൾ പഠിച്ചിട്ട് എന്ത് കിട്ടാനാ എന്നുള്ള ചോദ്യം ആയിരുന്നു മറുപടി,.. അമ്മയെ വിധവയാക്കിയവൾ എന്ന പട്ടം നേരത്തെ ചാർത്തി കിട്ടിയതിനാൽ ബാല്യത്തിന്റെ നിറവും സ്വപ്നങ്ങളും ഒക്കെ എന്നേ പൊഴിഞ്ഞു പോയിരുന്നു,.. അമ്മയും ചേച്ചിയും ഉണ്ടായിട്ടും ഒരിറ്റ് സ്നേഹം തരാൻ ആരും ഇല്ലാതെ ഒറ്റപെട്ട ജീവിതം ആയിരുന്നു എന്നും,,.. കുത്തുവാക്കുകളും, ശാപവാക്കുകളും കേട്ടു കണ്ണുനീര് തുടക്കാൻ വേണ്ടി മാത്രം ഒരു ജന്മം,, എന്റെ ജന്മത്തെ ഞാൻ തന്നെ വെറുത്ത ദിനങ്ങൾ,,
ഗ്രാമത്തിലെ തയ്യൽ യൂണിറ്റിലെ തയ്യൽ പഠിത്തവും, വീട്ടിലെ അടുക്കളജോലിയും ആയിരുന്നു അമ്മ എനിക്ക് വേണ്ടി കരുതി വെച്ചിരുന്നത്… ഡിഗ്രി കഴിഞ്ഞു ഇറങ്ങിയ ചേച്ചിക്ക് വേണ്ടി വിവാഹആലോചന തുടങ്ങിയപ്പോൾ ആണ് അമ്മക്ക് ഞാൻ വീണ്ടും ഒരു ബാധ്യത ആവുന്നത്..,, കടമ തീർക്കാൻ എന്ന പേരിൽ ഇരുപത്തിരണ്ടുകാരിയായ തന്നെക്കാൾ ഇരട്ടി പ്രായം ഉള്ള ഒരാളെ ആയിരുന്നു അമ്മ കണ്ടെത്തിയത്,, മറ്റ് ആരുടെയോ നിർബന്ധത്തിൽ ആണ് അയാൾ ഈ വിവാഹത്തിന് സമ്മതിച്ചതെന്ന് ഒറ്റ നോട്ടത്തിൽ തന്നെ തോന്നിക്കും വിധം ആയിരുന്നു അയാളുടെ പെരുമാറ്റം, അത് അമ്മയോട് സൂചിപ്പിച്ച എന്നെ ചേച്ചിയുടെ മുന്നിൽ വെച്ചു തന്നെ പരിഹസിച്ചു വിട്ടു..,, “പിറന്നു വീണതെ എന്റെ താലിചരടും നെറ്റിയിലെ സിന്ദൂരവും മായിച്ചു, ഇനി കഴുത്തിൽ താലി ചാർത്തുന്നവന് എന്തൊക്കെയാണാവോ വരാൻ പോകുന്നത്” അമ്മയുടെ ആക്രോശത്തിനു മുന്നിൽ ഒന്നും പറയാൻ ഇല്ലാതെ തലയും താഴ്ത്തി മിണ്ടാതെ പോരേണ്ടി വന്നു എനിക്ക്,,, രണ്ടുമാസത്തിനപ്പുറം ചേച്ചിയോടൊപ്പം അണിഞ്ഞൊരുങ്ങി മനസ്സിൽ നിറയെ ഭയശങ്കകളോടെ മുഹൂർത്തം പ്രതീക്ഷിച്ചു കാത്തിരിക്കുമ്പോൾ ആണ് വീടിനുള്ളിൽ അടക്കിപിടിച്ച സംസാരവും, കുശുകുശുക്കലും കേട്ടത്… എന്തോ പ്രശ്നം ഉണ്ടെന്നു കൂടെ ഉണ്ടാരുന്നവരുടെ മുഖത്ത് നിന്നും മനസ്സിൽ ആക്കാൻ കഴിഞ്ഞു, ചോദിച്ചിട്ട് ആരും ഒന്നും പറയുന്നില്ല,,
മുറിക്കുള്ളിൽ കൂടി നിന്നവർ ഓരോരുത്തരായി പുറത്തേക്കു ഇറങ്ങി പൊയ്‌കൊണ്ടിരുന്നു എന്താ സംഭവിച്ചേ എന്നു അറിയാൻ ഉള്ള ആകാംഷ കൊണ്ടു ഇരുന്നിടത്തുനിന്നും എഴുന്നേറ്റു വാതിലിനു നേർക്കു നടക്കാൻ തുടങ്ങിയപ്പോൾ ആണ് അമ്മ കൊടുംകാറ്റ് പോലെ ഉള്ളിലേക്ക് കയറി വന്നത്,,… “എന്നോട് എല്ലാവരും പറഞ്ഞതാ ഈ അശ്രീകരത്തെ എന്റെ മോളുടെ കൂടെ പന്തലിൽ ഇറക്കണ്ട എന്നു.., അന്ന് ഞാൻ അത് കേട്ടില്ല,അത് എന്റെ തെറ്റ്‌..,,നിന്നെ താലികെട്ടാൻ വരാം എന്നു സമ്മതിച്ചവൻ വേറെ ഒരു പെണ്ണിനേയും കൊണ്ടു ഓടി പോയെടി… പെൺകുട്ടികൾ ആയാൽ കുറച്ചു ഒക്കെ ഭാഗ്യം വേണം,.. നിനക്കിപ്പോൾ മതിയായല്ലോ എല്ലാം, എന്റെ കുഞ്ഞിന്റെ ജീവിതം കൂടി നീ കാരണം നശിക്കുമല്ലോ എന്റെ ദേവിയെ….” അമ്മേ ഞാൻ….പറയാൻ വന്നത് മുഴുവൻ ആക്കാൻ കഴിയാതെ നിന്നു പോയി താൻ..,, അമ്മ അലമുറ ഇട്ടു കരഞ്ഞു കൊണ്ടിരുന്നു,,
“ലീലേടത്തി… ഇങ്ങനെ കരഞ്ഞു ബഹളം വെച്ചിട്ട് കാര്യം ഒന്നും ഇല്ലല്ലോ?? പ്രശ്നം പരിഹരിക്കാൻ ഉള്ള വഴി അല്ലെ നോക്കണ്ടത് നമ്മൾ… നിങ്ങൾക്ക് സമ്മതം ആണെങ്കിൽ ഒരു പയ്യൻ ഉണ്ട് ഞങ്ങളുടെ കൂടെ, മുഹൂർത്തം തെറ്റാതെ നമുക്ക് നടത്താം ഇത്,.. പയ്യന്റെ അമ്മാവന്റെ മകൻ ആണ് ഇത്, എല്ലാ കാര്യങ്ങൾക്കും അവൻ കൂടെ ഉണ്ടാരുന്നത് കൊണ്ടു ഇനി ഒരു ചർച്ചയുടെ ആവശ്യം വരുന്നില്ല” “അത് വേണോ?? എന്നുള്ള അമ്മയുടെ ചോദ്യത്തിന് അകത്തേക്ക് കയറി വന്ന എന്റെ പ്രിയപ്പെട്ടവൻ തന്നെ ആയിരുന്നു ഉത്തരം കൊടുത്തത്…. “വേണം എനിക്ക് ഇഷ്ടാ ഈ പെൺകുട്ടിയെ…
അവളെ എനിക്ക് തന്നേരെ അമ്മേ….,,,” മഞ്ഞനൂലിൽ കോർത്ത താലി കഴുത്തിൽ ചാർത്തി തന്നു, ഹാരവും അണിയിച്ചു, നെറ്റിയിൽ സിന്ദൂരവും തൊടുവിച്ചു തന്നു, കയ്യോട് കയ്യ് ചേർത്തു പിടിച്ചു മണ്ഡപം ചുറ്റുന്ന ഞങ്ങളെ എവിടെ നിന്നോ വന്ന ഒരിളം കാറ്റ് തഴുകി കടന്നു പോയി…ആ കാറ്റു എന്റെ ചെവിയിൽ പറഞ്ഞു മോളെ അച്ഛന്റെ അനുഗ്രഹം എന്നും മോൾക്ക്‌ ഉണ്ടാവും എന്നു…… അത് അങ്ങനെയാണ് ആരും ഇല്ലാത്തവർക്ക് ദൈവം ഉണ്ടാകും എന്തിനും.. ഏതിനും കൂടെ..,,, ലൈക്ക് ചെയ്ത് അഭിപ്രായങ്ങൾ അറിയിക്കൂ… നിങ്ങളുടെ സ്വന്തം രചനകൾ പേജിലേക്ക് അയച്ചു തരിക…