രചന: Preeja Vinu

കല്ലുവച്ച നെക്ക്ളേസും പട്ടു സാരിയും ഉടുത്തു ഓഡിറ്റോറിയത്തിനു മുന്നിൽ നിൽക്കുന്ന എന്റെ സൗന്ദര്യം കണ്ട് അന്താളിച്ചവരോട് ഒന്നേ പറയാനുള്ളു… ബ്രൂട്ടീഷൻ നുമ്മ ചെയ്യാറില്ല…. കാരണവന്മാർ ഇച്ചിരി സൗന്ദര്യ കൂടുതൽ ഉള്ളവരായി പോയി…. എന്താ ചെയ്യാ അല്ലേ 😜. വരുന്നവരോടൊക്കെ കൈ കൂപ്പി തലയാട്ടി തലയാട്ടി തല ഇപ്പോ നേരെ നിൽക്കുന്നില്ലേന്നൊരു സംശയം.വരുന്നതിൽ അധികവും പുരുഷന്മാർ.. അവർ ആണേൽ മാലാഖ ഭൂമിയിൽ പുനർജനിച്ച പോലെ അതിശയത്തോടെ എന്നെ തന്നെ നോക്കുവാ.. എന്താ ചെയ്യാനാ എന്നെ കൊണ്ട് ഞാൻ തന്നെ തോറ്റു… അങ്ങനെ മുഹൂർത്തതിന് സമയമാകാറായി. കല്യാണ ചെക്കൻ, കൂട്ടുകാരുടെ കൂടെ വരുന്നുണ്ട്…വിയർത്തു കുളിച്ചു.. നല്ല ടെൻഷൻ ഉണ്ട്… ദയനീയമായി ഇതു വേണോന്നു എന്നെ നോക്കി പറയാതെ പറഞ്ഞ കല്യാണ പയ്യനെ, കൈ മുറുകെ പിടിച്ചു, ഞാൻ ഇല്ലേ കൂടെ പിന്നെ എന്തിനാ ടെൻഷൻ എന്ന് ധയ്ര്യം കൊടുത്ത്. അച്ഛാ All the Best എന്ന് പറഞ്ഞു രണ്ടു പുത്രന്മാരും കൂടെ തന്നെ നിന്നു…. സ്വന്തം ഭർത്താവിന്റെ രണ്ടാം വിവാഹം നടത്തി കൊടുക്കുന്ന യുവതി… അതും യുവതിയുടെ ആഗ്രഹപ്രകാരം….

Tv ന്യൂസ്‌ ചാനലുകൾ ഈ കല്യാണം കവർ ചെയ്യാൻ വന്നിട്ടുണ്ട്.. എല്ലാരുടെയും മുന്നിൽ താരമായി ഞാനും. എങ്ങനെ പ്രശസ്തയവകാമെന്നു ആലോചിച്ചു കൂട്ടിയപ്പോ മനസ്സിൽ തോന്നിയ ബുദ്ധിയാ…ബഷീർ ബഷിയുടെ family vlogs കണ്ടപ്പോൾ തോന്നിയ ഇൻസ്പിറേഷൻ ആയപ്പോൾ എല്ലാം പൂർത്തിയായി. . ഇതൊന്നും പിടിക്കാത്ത കുറച്ചു ടീംസ് ഓഡിടോറിയത്തിന് ഉള്ളിൽ ഒരു അരികിൽ മാറി നിൽക്കുന്നുണ്ട്….. കൂട്ടുകാരന്മാരുടെ ഭാര്യമാർ… അവറ്റകളെ മുഖം കണ്ടാൽ അറിയാം, എന്നെ അവരുടെ കയ്യിൽ കിട്ടിയാൽ….ചാരം നേരിട്ട് പുഴയിൽ പോയി ഒഴുക്കിയാ മതീ…. വിറക് ലാഭം തന്നെ…. എങ്ങനെ നോക്കിയാലും പുള്ളികാരന് രാജയോഗം തന്നേ…. അവളുമാരുടെ അടുത്ത് ഞാൻ പോയില്ല, എന്തിനാ അവളുമാരെ, വെറുതെ കൊലപാതകിയാക്കുന്നത്… എന്റെ കേട്ടിയോനോട് എനിക്ക് ഉള്ള സ്നേഹത്തിന്റെ ഒരംശം പോലും ഇല്ലാത്തവളുമാര😏. മുഹൂർത്തതിന് സമയമായി, പെണ്ണ് മണ്ഡപത്തിലേക്കു ഇറങ്ങാലായി,1..2…3…4… മാല, ഹോ സമാധാനമായി….2 സഹകരണ ബാങ്കിലെ കടം തീർന്നു കിട്ടും…. കല്യാണചെക്കനും പെണ്ണും അടുത്തടുത്ത് ഇരുന്ന്… പുള്ളിക്കാരൻ ഇടം കണ്ണിട്ടു എന്നെ നോക്കി, കണ്ണിറുക്കി കാട്ടി, കട്ടക്ക് കൂടെയുണ്ടെന്നു ധയ്ര്യം കൊടുത്ത് നമ്മളും.. വിയർത്തു കുളിച്ച പുള്ളിക്കാരന്റെ മുഖം ഇപ്പോൾ പൂർണചന്ദ്രൻ ഉദിച്ചപോലുണ്ട്….. അവളുടെ മുഖത്തു വീണ മുടി അങ്ങേരു ഒതുക്കി കൊടുത്തു… പുള്ളികാരന്റെ ചെവിയിൽ അവൾ എന്തോ രഹസ്യം പറഞ്ഞു. രണ്ടാളും കൂടി പൊട്ടിച്ചിരിച്ചു…. മുഹൂർത്തത്തിനു സമയമായി, ഏതോ അമ്മാവൻ വിളിച്ചു പറഞ്ഞു…. അപ്പോൾ അതാ ഒരു പെരുമ്പറ മുട്ടുന്ന ശബ്ദം….

ഞാൻ ചുറ്റും നോക്കി,,,, ഈ ശബ്ദം.. അതെ എന്റെ ഉള്ളിൽ നിന്നാണ്…. ഇതേ സമയത്താണ് അങ്ങേരു താലി കയ്യിൽ എടുത്തത്….. നാണത്തോടെ നിൽക്കുന്ന അവളെ കണ്ടതും, എനിലെ നാഗവല്ലി ഉണർന്നതും ഒരേ സമയത്താണ്…. മെസ്സിയുടെ കാലുകളിലെ അതെ വേഗതയോടെ, എന്റെ കാലുകൾ, അവളുടെ ദേഹത്തു പതിഞ്ഞു…. ചക്ക വെട്ടിയിട്ടപോലെ യുള്ള അവളുടെ കിടത്തം കണ്ടു… പൊട്ടി.. പൊട്ടി ചിരിച്ചു ഞാനും. പെട്ടെന്നതാ അയ്യോ… എന്ന നിലവിളി,,, കെട്ടിയോന്റെ അതെ ശബ്ദം… അവളെ ചവിട്ടിയപ്പോൾ ഇയാള് എന്തിനാ കരയുന്നെ….. 🤔 കട്ടിലിനു അടിയിൽ നിന്നും രണ്ടു കയ്യുകൾ എന്റെ നേർക്ക് പൊങ്ങി…. കണ്ണ് തുറന്ന ഞാൻ… ഒന്നും അറിയാത്തപോലെ.. കണ്ണടച്ച് കിടന്നു… പിറ്റേന്നാൾ മുതൽ കെട്ടിയോൻ കിടത്തം ഹാളിലേക്ക് മാറ്റി, ചോദിക്കുമ്പോ പറയുകയാ, കല്യാണം സ്വപ്നം കണ്ടപ്പോ ഇങ്ങനെ, എനി ഹണിമൂൺ എങ്ങാനും കണ്ടാലുള്ള അവസ്ഥ ആലോചിക്കാൻ വയ്യാത്രെ… പാവം ഞാൻ, സ്വപ്നം കാണുന്നത് തെറ്റാണോ 😳😳. 😭

രചന: തൂലിക പ്രേമി

ലക്കി ലൗ ബേഡ്സ്… വാതിൽ തുറന്നപ്പോൾ കണ്ടു റെഡി ആയി സോഫയിൽ ഇരിക്കുന്ന അനിത്രയെ, “ഒരു പത്ത് മിനിട്ട് ഞാൻ വരാം ” ബാഗ് അഴിച്ച് വെച്ച് റൂമിൽ പോയി കുളിച്ചു ഡ്രസ്സ് മാറി വന്നു. “വാ പോവാം ” ഒന്നും മിണ്ടാതെ തൻ്റെ പുറകെ വന്നു അവൾ, കാറിൽ ഇരിക്കുമ്പോഴും ഇരുവരും പരസ്പരം ഒന്നും സംസാരിച്ചില്ല. തല ചെരിച്ചു അവളെ ഒന്ന് നോക്കി ശാന്ത ഭാവം, സന്ധ്യ മയങ്ങുന്നു… കിളികൾ കൂട്ടിൽ എത്താൻ കൂട്ടം ആയി ആകാശത്തിൽ കൂടെ പറന്ന് പോകുന്നുണ്ട്. റോഡിൽ തിരക്കിന് ഒരു കുറവും ഇല്ല, ദിവസക്കൂലിക്കര് അന്നന്ന് വേണ്ട പലവഞ്ജനം വാങ്ങി കൊണ്ടുപോകുന്നു. ജോലി കഴിഞ്ഞ് വീട്ടിലേക്ക് എത്താൻ തിരക്ക് കൂട്ടുന്ന ആളുകളും… ഡോറിൻ്റെ സൈഡിൽ തല ചാരി വെച്ച് ഇരുന്നു. സ്പീക്കർ നിന്ന് അർജിത്ത് സിംഗ് ഇൻ്റെ മധുരിതമായ ശബ്ദം, കണ്ണുകൾ പതിയെ അടച്ച് ആ ശബ്ദം ആസ്വദിച്ചു. “അനിത്ര സ്ഥലം എത്തി ……” അലോകിൻ്റെ ശബ്ദം കേട്ട് ആണ് കണ്ണുകൾ തുറന്നത്. ഡോറ് തുറന്നു പുറത്തേക്കു ഇറങ്ങി സാരി തുമ്പ് ഒന്ന് ശെരി ആക്കി മുന്നിലേക്ക് നടന്നു. ഫ്രണ്ടിൻ്റെ വിവാഹം ആണ് ഒപ്പം പഠിച്ചവർ എല്ലാം വന്നിട്ടുണ്ട് അവരെ കണ്ടപ്പോൾ അടുത്ത് പോയി സംസാരിച്ചു. അലോക് ആണുങ്ങളുടെ ഗാങ്ങിൽ ആണ് വെൽകം ഡ്രിങ്ക് ഇൻ്റെ ഗ്ലാസ്സ് കയിൽ ഉണ്ട് കൂട്ടുകാരോട് എന്തൊക്കയോ സംസാരിക്കുന്നുണ്ട്, കുറച്ചു നേരം ഞാൻ എൻ്റെ കൂട്ടുകാരോടും സംസാരിച്ചു ഇരുന്നു. ഫോട്ടോ എടുത്തതിനു ശേഷം ഭക്ഷണം കഴിക്കാൻ ഇരുന്നു. എൻ്റെ ഒപ്പോസിട് ഉള്ള സീറ്റിൽ അലോകും ഇരുന്നു. “ഹ അങ്ങനെ നമ്മുടെ ഗാങ്ങിലെ അവസാനത്തെ അളുടെയും കല്യാണം കഴിഞ്ഞു” എല്ലാവരും ഒന്ന് ചിരിച്ചു… “ചെക്കനെ കാണാൻ അത്ര പോര അല്ലേ ?” “ഹേയ് അത്ര മോശം ഒന്നും അല്ല….” സ്ഥിരം പല്ലവി പോലെ കല്യാണ ചെക്കനെയും പെണ്ണിനെയും വിലയിരുത്തുന്നു കൂടുതൽ തല ഇടാൻ പോയ്യില്ല… “എന്തൊക്കെ ആയാലും നമ്മുടെ ഗ്രൂപ്പിലെ ലക്കി ലൗ ബിർഡ്സ് അലോകും അനിത്രയും ആണ്” അത് പറഞ്ഞപ്പോൾ ഇരുവരുടെയും കണ്ണുകൾ ഒന്ന് കോർത്തു പ്രത്യേകിച്ച് ഭവവെത്യസം ഒന്നും ഉണ്ടായിരുന്നില്ല, നോട്ടം മാറ്റി. “എന്തൊക്കെ ആയിരുന്നു കോളജിൽ പ്രേമം …..ബൈക് റൈഡ്….ബീച്ച്….അത് കഴിഞ്ഞ് രണ്ട് പേർക്കും ജോലി …..വീട്ടിൽ പറഞ്ഞപ്പോൾ ഫുൾ സപ്പോർട്ടും …..രണ്ടു മാസത്തിനു ശേഷം നാടുമോത്തം വിളിച്ച് ഒരു ഗംഭീര കല്യാണം…….” ഞാൻ പതിയെ ഒന്ന് ചിരിക്കാൻ ശ്രമിച്ചു പരാജയപ്പെട്ടു, അവിടെയും അതെ ഭാവം… *യോഗം ഇല്ല്യ അമ്മിണിയെ ……” ഫ്രണ്ട് പറഞ്ഞത് കേട്ട് മറ്റുള്ളവർ ചിരിച്ചു ഭക്ഷണം കഴിഞ്ഞ് സംസാരിച്ചു നിൽക്കുമ്പോൾ ആണ് മായ അടുത്തേക്ക് വന്നത് “എന്താടോ വന്നപ്പോൾ മുതൽ മുഖത്തിന് ഒരു വാട്ടം” “ഏയ് ഒന്നും ഇല്ല ” തോളിൽ തട്ടി ചോദിച്ചവളെ നോക്കി ചിരിച്ചുകൊണ്ട് മറുപടി പറഞ്ഞു “അല്ല എന്തോ ഉണ്ട് ……എന്തെ അലോകും ആയി എന്തേലും പ്രശ്നം ഉണ്ടോ ” “എന്ത് പ്രശ്നം നീ ഒന്ന് പോടി…..”

അവളുടെ കവിളിൽ നുളളി കളിയായി പറഞ്ഞു “ഹ ഇപ്പൊ ഓക്കേ …….” വീണ്ടും എന്തൊക്കയോ അവള് പറഞ്ഞുകൊണ്ടിരുന്നു എല്ലാത്തിനും മൂളി കൊടുത്തു ഇടയിൽ കൂട്ടത്തിൽ നിൽക്കുന്നവനിൽ കണ്ണുകൾ ഉടക്കി ആരോ ശ്രദ്ധിക്കുന്നുണ്ട് എന്ന് തോന്നിയപ്പോൾ ആകാം അവനും തല ചെരിച്ച് അവളെ നോക്കി ഇമ ചിമ്മാതെ നോക്കുന്നവളെ നോക്കി പുരികം പൊക്കി എന്താണ് എന്ന് ചോദിച്ചു അപ്പോള് തന്നെ ഒന്നും ഇല്ലെന്ന് ചുമൽ കൂചി ഒരു മറുപടിയും കിട്ടി ഫംഗ്ഷൻ കഴിഞ്ഞ് തിരികെ വരുമ്പോഴും നിശബ്ദം ആയിരുന്നു ‘ലക്കി ലൗ ബേഡ്സ്’ അവരുടെ പ്രയോഗം ഓർക്കും തോറും ചിരി വന്നു അനിത്രക്ക് അതെ എല്ലാവർക്കും അസൂയ തോന്നും വിധം തന്നെ ആയിരുന്നു ഞങളുടെ പ്രണയം ഊണിലും ഉറക്കത്തിലും ഓരോ നിമിഷവും പ്രണയിക്കുക ആയിരുന്നു പിന്നെ എപ്പോഴാണ് പ്രണയത്തിന് വിള്ളൽ വീണത് അറിയില്ല വിള്ളൽ വീണുവോ ഇല്ല എന്നാല് പ്രണയിക്കുന്നുണ്ടോ ഇല്ല പൂർണമായി ഇല്ലെന്ന് പറയാൻ പറ്റുവോ അതും ഇല്ല പ്രണയിക്കുന്നു ഇപ്പോഴും …..ജീവന് തുല്യം എപ്പോഴും അങ്ങനെ തന്നെ ആയിരിക്കും എന്നാല്….. അറിയില്ല …… പഴയ ആ ഒരു അടുപ്പം എവിടെയോ നഷ്ടപെട്ട പോലെ ചിന്തിച്ചിരുന്നപ്പോൾ ഫ്ലാറ്റ് എത്തിയത് അറിഞ്ഞില്ല “എനിക്ക് കുറച്ചു നോട്ട് റെഡി ആക്കാൻ ഉണ്ട് അലോക് കിടന്നോളു ” വേഷം മാറി ഞാൻ ചെന്ന് കിടന്നു ഉറക്കം വരുന്നില്ല കുറച്ച് നാളുകൾ ആയി ഇങ്ങനെ ആണ് എന്തോ മനസിന് വല്ലാത്ത ഭാരം പോലെ കുറച്ചു കഴിഞ്ഞപ്പോൾ അവള് റൂമിലേക്ക് വന്നത് അറിഞ്ഞു സാരി മാറുക ആണ് വെറുതെ നോക്കി കിടന്നു പണ്ട് ചെയ്തിരുന്ന കുസൃതികൾ മനസിലൂടെ കടന്ന് പോയി തൊട്ടപ്പുറത്ത് വന്ന് കിടന്നപ്പോൾ തല ചെരിച്ചു നോക്കി അഴിഞ്ഞു കിടക്കുന്ന അവളുടെ മുടിയിഴകളിലൂടെ പതിയെ വിരൽ ഓടിച്ചു എന്താണ് തങ്ങൾക്കു ഇടയിൽ സംഭവിച്ചത് അറിയില്ല ഓർമ്മകിളിൽ നിന്നും പഴയ അലോകിനെയും അനിത്രയേയും പൊടി തട്ടി എടുത്ത് വാ തോരാതെ സംസാരിക്കുന്നവൾ അത് എല്ലാം കേക്കാൻ തയ്യാറായി താനും കുസൃതി ആയാലും കുറുമ്പ് ആയാലും ഒരുമിച്ചയിരുന്നു “ഹോ കുട്ടികളി ഒന്ന് നിർത്താന പെണ്ണുക്കെട്ടിച്ചേ അതിപ്പോ പൊല്ലാപ്പ് ആയല്ലോ എന്റെ കൃഷ്ണ………”

അമ്മയുടെ വാക്കുകൾ ചുണ്ടിൽ അറിയാതെ ഒരു പുഞ്ചിരി വിരിഞ്ഞു അടുത്ത നിമിഷം അത് മായുകയും ചെയ്തു എവിടെ ആണ് എപ്പോഴാണ് ആ കളിച്ചിരികൾ മാഞ് പോയത് അറിയില്ല ……. രാവിലെ മുതൽ ഉള്ള ഓട്ടപ്രദക്ഷിണത്തിൻ്റെ ഫലം ആയി വന്ന ക്ഷീണം കൺപോളകൾ അടച്ചു പിറ്റേന്ന് കുക്കറിൻ്റെ വിസിൽ ശബ്ദം കേട്ടാണ് കണ്ണുകൾ തുറന്നത് പുതപ്പ് മാറ്റി എഴുനേറ്റു സ്ഥിരം പല്ലവി പോലെ അവൻ കിടക്ക വിരി വൃത്തിക്ക് വിരിച്ച് പുതപ്പ് മടക്കി തലയണയുടെ അടിയിലേക്ക് വെച്ചു ഫ്രഷ് ആയി വന്നപ്പോഴേക്കും ഡൈനിങ് ടാബിളിമെ തൻ്റെ കോഫി മൂടി വെച്ചിരിക്കുന്നത് കണ്ടു അത് ചെന്ന് എടുത്ത് വരും വഴി അടുക്കളയിലേക്ക് ഒന്ന് നോക്കി രാവിലത്തേക്കും ഉച്ചക്കിലേക്കും ഉള്ള ഭക്ഷണം തയാറാക്കുന്ന തിരക്കിൽ ആണ് ചോറ് ഊറ്റുന്നു…..ദോശ മറിച്ച് ഇടുന്നു കറിയിലേക്ക് കടുക് താളിക്കുന്നു …. ദിർതിയിൽ ആണ് എല്ലാം ചെയ്യുന്നത് പത്രം എടുത്ത് സോഫയിൽ വന്നിരുന്നു ഒരു കവിൾ കാപ്പി ഇറക്കി പത്രം വായിക്കാൻ തുടങ്ങി അവസാന പേജിൽ വായിച്ച് പേപ്പർ നാലായി മടക്കി വെച്ചു റൂമിലേക്ക് ചെന്ന് ഐയേൺ ബോക്സ് ഇൻ്റെ പ്ലഗ് കണക്ട് ആക്കി അലമാരയിൽ നിന്ന് പാൻ്റും ഷർട്ടും അവളുടെ ഒരു സാരിയും ചോളിയും എടുത്തു ചൂട് ആയോ എന്ന് പെട്ടന്ന് ഒന്ന് തൊട്ട് നോക്കി തേക്കാൻ തുടങ്ങി സാരി ഹാങ്കറിലേക്ക് ഇടുന്നതിനു മുന്നേ തൻ്റെ നാസികയോട് അടുപ്പിച്ചു തനിക്ക് ഏറെ ഇഷ്ട്ടപെട്ട ഒരു ഗന്ധം അതിൽ നിന്ന് വരുന്നത് തോന്നി അവന് അനിത്ര റൂമിലേക്ക് കയറി വന്ന് ടവ്വൽ എടുത്ത് കുളിക്കാൻ കയറി ഞാൻ അടുക്കളയിലേക്ക് ചെന്നു അലിഖിത നിയമം പോലെ സിങ്കിൽ കിടക്കുന്ന പാത്രങ്ങൾ കഴുകുവാൻ തുടങ്ങി ബാക്കി എല്ലാം അവള് വൃത്തി ആക്കിയിട്ടുണ്ട് കഴുകി കഴിഞ്ഞ് പ്ലേറ്റിൽ മൂന്ന് ദോശയും ചമ്മന്തിയും എടുത്ത് കഴിച്ചു തീരാർ ആയപ്പോഴേക്കും റെഡി ആയി അവള് വന്നു ഞാൻ കൈ കഴുകി കുളിക്കാൻ കയറി കുളിക്കുന്നതിൻ്റെ ഇടയിൽ അവളുടെ ശബ്ദം കേട്ടു “ഞാൻ ഇറങ്ങാട്ടോ…” “ആ…… ” റെഡി ആയി ഞാനും ഓഫീസിലേക്ക് ഇറങ്ങി കമ്പ്യൂട്ടറിന് മുന്നിൽ വെച്ചിട്ടുള്ള ഞങളുടെ ഫ്രെയിം ചെയ്ത ഫോട്ടോയിലെക്ക് നോക്കി കല്യാണം കഴിഞ്ഞ് ഹണി മൂണിന് പോയപ്പോൾ എടുത്ത ഫോട്ടോ ആണ് ചിരിക്കുന്ന അവളുടെ മുഖത്തേക്ക് നോക്കി എത്ര നാളായി ഇതുപോലെ ഒന്ന് ചിരിച്ച് കണ്ടിട്ട് ……. കുട്ടികളുടെ മുന്നിൽ നിന്ന് ക്ലാസ്സ് എടുക്കുമ്പോഴും മനസിന് വലായ്മ തോന്നി ……..

കാര്യം ആക്കിയില്ല ശീലം ആയ പോലെ ആരും ഇല്ലാത്ത പോലെ താങ്ങായും തണൽ ആയും കുറച്ചു നേരം മനസ്സ് തുറന്നു സംസാരിക്കാൻ ആരും ഇല്ലാത്ത പോലെ ഉച്ചക്ക് ഫോൺ എടുത്ത് വാനിക്കേണ്ട സാധനങ്ങളുടെ ലിസ്റ്റ് അയച്ച് കൊടുത്ത് പരിപ്പ് പഞ്ചസാര സോപ്പ് പച്ചക്കറി ലാസ്റ്റ് സീൻ രാവിലെ ഏഴുമണിക്ക് ആണ് ഓഫീസിൽ തിരക്ക് ഉണ്ടാവും കലോത്സവം ആയതുകൊണ്ട് ഉച്ചക്ക് ശേഷം ക്ലാസ്സ് ഇല്ല വെറുതെ ഇരുന്നു ഫോൺ നോക്കി പിന്നേ നോട്ട്സ് കറക്റ്റ് ചെയ്തു ….. നാലര ആയപ്പോൾ തിരികെ പോന്നു സോഫയിലേക്ക് വീഴുക ആയിരുന്നു കുറച്ച് നേരം ഇരുന്ന ശേഷം ഒരു ചായ വെച്ച് കുടിച്ചു വീണ്ടും പണികളിലേക്ക് അടിച്ച് വാരി തുടച്ചു അലക്കാൻ ഉള്ളത് വാഷിംഗ് മെഷീനിൽ ഇട്ടു ചപ്പാത്തി കുഴക്കുമ്പോൾ ആണ് അലോക് വന്നത് വൈകീട്ട് ചായ പതിവ് ഇല്ല അലോകിന് ടിവിയുടെ ശബ്ദം കേട്ടു ‘നാളെ കേരളത്തിൽ ഹർത്താൽ …..’ വാർത്താ കേട്ടപ്പോൾ അടുക്കളയിൽ നിന്ന് വന്നു ഇപ്പൊ തുടങ്ങും കുട്ടികളുടെ ഫോൺ കാൾ നാളെ കലോത്സവം വെച്ചിരുന്നു നാളെ അത് ഉണ്ടാവുമോ മാറ്റുമോ എന്നത്തിക്ക മാറ്റുക ഒരായിരം ചോദ്യങ്ങൾ ഉണ്ടാവും “നാളെ അല്ലേ നിൻ്റെ സ്കൂളിൽ മത്സരങ്ങൾ …..” “മം….അത് മാറ്റും ……” പറഞ്ഞ് നേരെ അടുകളിലേക്ക് ചെന്നു കുറച്ചു കഴിഞ്ഞപ്പോൾ ടിവി ഓഫ് ചെയ്ത് ഞാൻ വാഷിംഗ് മെഷീനിൽ ഉള്ള തുണി എടുത്ത് ഫ്ലാറ്റിൻ്റെ ഏറ്റവും മുകളിലെ ടെറസ് നിലയിലേക്ക് ചെന്ന് എല്ലാം വിരിച്ചിട്ടു പോരാൻ തുടങ്ങുമ്പോഴാണ് എന്തോ ശബ്ദം കേട്ടത് ബക്കറ്റ് കയിൽ.പിടിച്ച് ടെറസിലെ സൈഡിലേക്ക് ചെന്നു ഞങ്ങളുടെ നേരെ ഉള്ള ഫ്ളാറ്റിലെ സാമും അപ്പുറത്തെ ബ്ലോക്കിലെ ഒരു പെൺകുട്ടിയും നിന്ന് സംസാരിക്കുന്നുണ്ട് കോളജ് പിള്ളേര് ആണ് ഫ്രണ്ട്സ് ആണെന്ന് എല്ലാവരോടും പറയുമെങ്കിലും രണ്ടും ഇഷ്ട്ടത്തിൽ ആണ് എന്ന് ഒട്ടുമിക്ക എല്ലാവർക്കും അറിയാം അവരെ കണ്ടപ്പോൾ എന്തെന്ന് ഇല്ലാത്ത ഒരു അസൂയ തൊന്നി കുറച്ചു കുശുമ്പും……

അവരെ ശല്യം ചെയ്യാതെ ഇറങ്ങി…. വേറെ ജോലി ഒന്നും ഉണ്ടായിരുന്നില്ല ഫോൺ നോക്കി ഇരുന്നു കുറച്ചു കഴിഞ്ഞപ്പോൾ അവളും വന്നിരുന്നു മിണ്ടാൻ ഒന്നും ഇല്ലാത്ത പോലെ അവളും ഫോണിൽ ആണ് ഇടക്ക് കുട്ടികളുടെ കോളും അത്താഴം കഴിച്ച് കിടന്നു പിറ്റേന്ന് ഹർത്താൽ ആയത്കൊണ്ട് നേരം വൈകി ആണ് ഇരുവരും എഴുനേറ്റത് പതിവില്ലാത്ത മടി ഇരുവർക്കും തോന്നി പണിയെല്ലാം ഒതുക്കി വയ്യ ഇനിയും ഇങ്ങനെ അകൽച്ച ഒട്ടും പറ്റുന്നില്ല അകാരണം ആണ് അലോക് ബാൽക്കണിയിൽ ഉണ്ട് ഞാനും അങ്ങോട്ട് ചെന്നു എന്നെ ഒന്ന് നോക്കി തൊണ്ടയിൽ നിന്ന് വാക്കുകൾ പുറത്തേക്ക് വരാത്ത പോലെ പതിവില്ലാത്ത പരവേശം പോലെ “എനിയ്ക്ക് സംസാരിക്കണം ” അവൻ എൻ്റെ നേരെ തിരിഞ്ഞ് നിന്നു “എനിക്കും …” കണ്ണുകൾ ഉടക്കി എൻ്റെ കണ്ണ് നിറയുന്നത് അറിഞ്ഞു “I miss those days…….” “എനിക്കും………എന്താ നമുക്ക് ഇടയിൽ പറ്റിയത് ?” ഒരുത്തരം ഞങളുടെ ഇരുവരുടെയും കയിൽ ഉണ്ടായിരുന്നില്ല അവൻ്റെ കൈകൾ എൻ്റെ കൈകളെ പൊതിയുന്നത് അറിഞ്ഞു “ദിവസവും ഏറ്റവും കുറഞ്ഞത് ഒരു പത്ത് മിനുട്ട് ഇങ്ങനെ ഇരിക്കാമോ…… അപ്പോ ശെരി ആവും എന്ന് തോന്നുന്നു …..വീട്ടിലെ ജോലി ….ഓഫീസ് സ്ട്രെസ്സ് …. എനിക്ക് മതിയായി …..” അവൻ്റെ ചോദ്യത്തിൽ ഒരു നിസ്സഹായത പോലെ എൻ്റെ ഉള്ളിലുണ്ടായിരുന്ന ഒരു അപേക്ഷ ആയിരുന്നു അവൻ എന്നോട് തിരികെ ചോദിച്ചത് എൻ്റെ വിരലുകളുടെ.മുറുക്കം കൂടി ….. എൻ്റെ മറുപടി മനസിലാക്കി എന്ന് തോന്നുന്നു ഒരു നറുപുഞ്ചിരി അവൻ്റെ ചുണ്ടുകളിൽ ഞാൻ കണ്ടു പതിയെ അവൻ്റെ തോളിലേക്ക് ഞാൻ ചാഞ്ഞു …… “അതെ നാളെ എന്നെ ഒരു റൈഡിന് കൊണ്ടുവോ…” നെറുകയിൽ അവൻ്റെ അധരങ്ങളുടെ ചൂട് അറിഞ്ഞു …… പ്രതിഫലം ആയി എൻ്റെ ചുണ്ടിൽ ഒരു വിടർന്ന പുഞ്ചിരിയും …. ശുഭം

രചന: Ammu Santhosh

“അച്ചായൻ ഒന്നും പറഞ്ഞില്ലല്ലോ ” നാൻസി കിടക്ക കുടഞ്ഞു വിരിച്ചു കൊണ്ട് ജോഷിയോട് ചോദിച്ചു. “എന്താ പറയുക..?ജോജുവിന്റ ഭാര്യ നിമ്മിയുടെ ഡെലിവറി ഡേറ്റ് ആകാറായി. അമ്മ ഒരു മാസം വന്നു നിൽക്കുമോ എന്ന് ജോജു..ഇതല്ലേ?” “അമ്മ മാത്രം അല്ല പപ്പയും.അച്ചായനോടും പറഞ്ഞല്ലോ അവൻ? ” “പറഞ്ഞു. പക്ഷെ എന്റെ കാര്യം,അത് നടക്കില്ല മോളെ തോട്ടത്തിലെ കാര്യങ്ങൾ വിട്ട് എനിക്ക് വരാൻ പറ്റുകേല.നീ പൊയ്ക്കോ ” നാൻസിയുടെ മുഖം വാടി “ആ കൊച്ചിന് അമ്മയും പപ്പയുമില്ലല്ലോ. പറയത്തക്ക ബന്ധുക്കളുമില്ല കിച്ചണിൽ ഒരു സ്ത്രീ ഉണ്ട് സഹായിക്കാൻ അത് മതിയോ?. പാവം.. പ്രസവം ന്നു പറഞ്ഞാൽ ശരീരവും മനസുമങ്ങ് ദുർബലമായിരിക്കുന്ന സമയമല്ലിയോ? അവന് ജോലിക്ക് പോകണ്ടേ? ഇവിടെ നിന്ന് ദൂരകൂടുതലല്ലേ ഓഫീസിലേക്ക്?അതല്ലെങ്കിൽ ഞാൻ ഇങ്ങോട്ട് കൂട്ടി കൊണ്ട് വന്നേനെ.. ഈ സമയത്താ അമ്മയുടെ വിലയറിയുക പെൺപിള്ളേർ.. ” “ഞാൻ ഒറ്റയ്ക്കാകും അല്ലിയോ കൊച്ചേ? ” ഉള്ളിൽ എന്തൊ ഒന്ന് നീറിപ്പിടിച്ച പോലെ നാൻസി അയാളെ നോക്കി. പതിനെട്ടു വയസ്സിൽ കൈ പിടിച്ചതാണ്.ഈ ദിവസം വരെ പിരിഞ്ഞു നിന്നിട്ടില്ല. ആദ്യമായി.. അവരുടെ മുഖത്തെ സങ്കടം കണ്ടപ്പോൾ പെട്ടെന്ന് അയാൾ സാധാരണ നിലയിലായി “ഞാൻ വെറുതെ പറഞ്ഞതാ. നമുക്കൊന്നിച്ച് പോകാം. ഡെലിവറി കഴിഞ്ഞു വൈകുന്നേരം ഞാൻ ഇങ്ങു പോരും. നീ നിന്നോ ” അയാൾ കിടക്കയിലേക്ക് കിടന്നു കണ്ണുകൾ അടച്ചു. നാൻസി ഒരു നിമിഷം അത് നോക്കി നിന്നിട്ട് ലൈറ്റ് അണച്ചു നിമ്മി കുഞ്ഞിനെ നോക്കി കിടന്നു. ഈ മുഖം കാണുമ്പോൾ കഴിഞ്ഞു പോയ സർജറിയുടെ വേദന അവൾ മറന്നു “കുഞ്ഞിന് പാൽ കൊടുത്തോളു മോളെ “നാൻസി പുഞ്ചിരി യോടെ പറഞ്ഞു. കല്യാണം കഴിഞ്ഞു ജോജുവിന്റെ അമ്മയുടെയും പപ്പയുടെയും കൂടെ അധികം നിന്നിട്ടില്ല അവൾ. വല്ലപ്പോഴും ഫോൺ ചെയ്യുമെന്ന് മാത്രം.

ഇപ്പൊഴാണ് ആ നൻമ കരുതൽ സ്നേഹം ഒക്കെ അനുഭവിക്കുന്നത്.പക്ഷെ എപ്പോഴും അമ്മയുടെ മുഖത്തു ഒരു സങ്കടം ഉണ്ടെന്ന് അവൾ കണ്ടു പിടിച്ചു. പപ്പയുടെ ഫോൺ വരാൻ താമസിച്ചാൽ, പപ്പാ കാൾ എടുക്കാൻ വൈകിയാൽ ഒക്കെ അമ്മ വിഷമിക്കുന്നത് അവൾ കണ്ടിട്ടുണ്ട്. “അമ്മ ശരിക്കും ഭക്ഷണം കഴിക്കുന്നില്ലേ? ക്ഷീണം ആണല്ലോ? “ജോജു നിമ്മിയോട്‌ ചോദിച്ചു. “അമ്മക്ക് എന്തോ സങ്കടം ഉണ്ട്.. പപ്പയെ ഓർത്താവും “ജോജു അൽപനേരം ആലോചിച്ചു നിന്നിട്ട് അടുക്കളയിൽചെന്നു “ഇന്നെന്താ അമ്മേ സ്പെഷ്യൽ? ” “മട്ടൻ പാൽ കറി.. അപ്പത്തിന് അച്ചായന് ഏറ്റവും ഇഷ്ടം ഉള്ളതാ “അവർ വിഷാദത്തോടെ ചിരിച്ചു “പപ്പയ്ക്ക് അവിടെ പപ്പയുടെ അമ്മച്ചി വെച്ചു കൊടുക്കുണ്ടാവും ഇപ്പൊ ഇത് ” അവൻ ചിരിയോടെ പറഞ്ഞു അപ്പൊ വീട്ടിൽ ജോഷി അമ്മച്ചി വിളമ്പിയ കപ്പപ്പുഴുക്കിലേക്ക് മത്തിക്കറിയുടെ ചാറ് മെല്ലെ ഒഴിച്ച് കുഴച്ച് ഒരു ഉരുള എടുക്കുകയായിരുന്നു “അച്ചായാ എനിക്കാദ്യം ” അയാൾ ഞെട്ടി നോക്കി അടുത്ത് അവളില്ല.. അവളുടെ ശബ്ദം അല്ലെ കേട്ടെ? എന്ത് കഴിച്ചാലും ആദ്യത്തെ ഒരു ഉരുള അവളുടെ അവകാശമാ. മകൻ ആയപ്പോൾ പോലും അതിന് മാറ്റം വരാൻ അവൾ സമ്മതിച്ചിട്ടില്ല “ഞാൻ കഴിഞ്ഞു മതി മോൻ .. ഞാനാ ഇച്ചായന്റെ എല്ലാം..” നുണക്കുഴി വിരിയിച്ച് ഒരു കള്ളച്ചിരി ചിരിക്കും അപ്പൊ.. പൂർണചന്ദ്രൻ ഉദിച്ച പോലെ.. “അവളില്ലാഞ്ഞിട്ട് എന്തൊ പോലെ.ഒരു മാസം കഴിഞ്ഞല്ലോ? ഇനി ഇങ്ങ് വിളിച്ചു കൊണ്ട് പോരെടാ ” അമ്മച്ചി താടിക്ക് കയ്യും കൊടുത്തു വിഷാദത്തോടെ പറഞ്ഞത് അയാൾ കേട്ടു.. അവളില്ലാഞ്ഞിട്ട് എന്തൊ പോലെ എന്നല്ല. ഒന്നുമില്ലാത്ത പോലെ എന്നതാണ് സത്യം. ഇടയ്ക്ക് അവിടെ പോയി ഒന്ന് രണ്ടു ദിവസം നിന്നു പക്ഷെ ഒരു സ്വാതന്ത്ര്യം ഇല്ലാത്ത പോലെ… മറ്റൊരു വീട്.. അവിടെ അവൾക്കും അവളാകാൻ പറ്റുന്നില്ലാത്ത പോലെ.. പകലിന് തെളിച്ചമില്ല. മുറികളിൽ എന്തൊരു ശൂന്യതയാണ്. അവളുടെ ഒച്ചയനക്കങ്ങളില്ലാതെ, അവളുടെ ഗന്ധമില്ലാതെ.. “എടാ ഇച്ചായാ ” ആരും ഇല്ലാത്തപ്പോൾ വിളിക്കും തനിക്കുമിഷ്ടമാണ് ആ വിളി “എനിക്ക് കള്ളും കപ്പയും വേണമെടാ ഇച്ചായാ “അപ്പോഴും ഉണ്ടാകും കണ്ണിറുക്കി ആ കള്ളച്ചിരി എന്തൊരു കഷ്ടാണ് ഇത്?ഈ ഒറ്റപ്പെടല്.

അവൾക്ക് തന്നെ കാണണം എന്ന് തോന്നുന്നില്ലേ? അയാളുടെ കയ്യിൽ ഇരുന്ന മൊബൈൽ ശബ്ദിച്ചു “ഇച്ചായാ…”ആ വിളിയൊച്ചയിൽ ഒരു നനവുണ്ട് “ഉം “അയാളൊന്നു മൂളി “വരുമോ നാളെ?” “ഉം..” “എന്താ എന്നോട് ഒന്നും പറയാത്തെ?” “ഞാൻ നാളെ വരും.. കൂടെ പോരണം.. നീയില്ലാതെ.. വയ്യെടി ” അയാൾ വേഗം ഫോൺ കട്ട്‌ ചെയ്തു നാൻസിയുടെ കണ്ണുകൾ പെയ്തു കൊണ്ടിരുന്നു “അമ്മച്ചി?” അവർ പെട്ടെന്ന് കണ്ണ് തുടച്ചു നിമ്മിയെ നോക്കി “അമ്മയെന്താ കരയുന്നെ? പപ്പാ ആയിരുന്നോ ഫോണിൽ?” അവർ തലയാട്ടി “ഇവിടെയിപ്പോ ഞാൻ തനിച്ച് മതി.. ഓക്കേ ആയി എനിക്ക്.. പിന്നെ ജലജചേച്ചി വരുമല്ലോ അടുക്കളയിൽ സഹായിക്കാൻ.. അമ്മ പൊയ്ക്കോ.. ഞാൻ ജോജുവിനോട് പറയാം കൊണ്ട് വിടാൻ ” അവർ പിന്നെയും നിറഞ്ഞ കണ്ണുകളോടെ അവളെ ചേർത്ത് പിടിച്ചു “ഒന്നും തോന്നല്ലേ മോളെ.. എന്ത് ബുദ്ധിമുട്ട് വന്നാലും വിളിച്ചാ മതി.. അമ്മ വരും.. ഇത് പോലെ കുറെ ദിവസം ഒന്നും പറ്റില്ല എങ്കിലും വരും.. പപ്പയെ പിരിഞ്ഞു നിക്കുമ്പോ കരയിൽ പിടിച്ചിട്ട മീനിന്റെ ഒരു അവസ്ഥയാ അതാ..” “എനിക്ക് മനസിലാകുമത് ” അവൾ ചിരിച്ചു “പപ്പാ ഭാഗ്യവാനാ ” അവൾ വീണ്ടും പറഞ്ഞു “പപ്പ മാത്രമല്ല അമ്മയും.. ഇങ്ങനെ ഒക്കെ എങ്ങനെയ സ്നേഹിക്കുക? ” അമ്മയുടെ മുഖം ചുവന്നു. നാണം കൊണ്ട് പൂത്ത മുഖം.. “അത്..സ്‌നേഹിക്കുമ്പോൾ ലോകം ഒരാളിൽ മാത്രം ആകുവാ , നമ്മൾ ചിന്തിക്കുന്നതെല്ലാം ഒരാളിൽ ചെന്നങ്ങ് നിക്കുവാ .. മുന്നോട്ട് വഴിയില്ലാതെ ചില ഡെഡ് എൻഡ് പോലെയുള്ള റോഡുകളില്ലേ? അത് പോലെ.. അങ്ങനെയാ സ്നേഹം..ഇച്ചായനെ നോക്കുമ്പോൾ എപ്പോഴാണെങ്കിലും ആദ്യം കാണും പോലെയാ എനിക്ക്.. ഇച്ചായനെന്താ ഇഷ്ടം അത് എനിക്കുമിഷ്ടം. എന്റെ ഇഷ്ടം എന്താ അത് തന്നെ ആണ് ആൾക്കും .. ചില ആണുങ്ങൾ ഭാര്യമാരോടു പെരുമാറുന്നത് ഞാൻ ശ്രദ്ധിച്ചിട്ടുണ്ട്.. പുറത്ത് നിന്ന് വരുമ്പോൾ,അല്ല വീട്ടിൽ ഉള്ളപ്പോൾ തന്നെ കല്പനകൾ ആണ്.എവിടെ ചായ,?എവിടെ ചോറ്,? എവിടെ എന്റെ ഷർട്ട്‌? എവിടെ എന്റെ പാന്റ്? നിനക്ക് എന്താ ഇവിടെ പണി? അങ്ങനെ അങ്ങനെ.. ഇച്ചായൻ അങ്ങനെ അല്ലാട്ടോ ഞാൻ അടുക്കളയിൽ ആണെങ്കിൽ ആളും പച്ചക്കറികൾ ഒക്കെ മുറിച്ചു കൊണ്ട് അവിടെ തന്നെ..

തുണികൾ കഴുകുമ്പോ വിരിക്കാൻ എന്റെ ഒപ്പം തന്നെ.. പറമ്പിൽ പണി ആണെങ്കിലും ഞങ്ങൾ ഒന്നിച്ചാ.. പ്രസവം മാത്ര ഞാൻ തനിച്ചു ചെയ്ത ഒരു കാര്യം.. അന്നും എന്റെ ഒപ്പം ഉണ്ട്. എന്റെ തലയ്ക്കൽ കൈകൾ അമർത്തി പിടിച്ചു കൊണ്ട് ഒന്നുല്ല മോളെ ഞാൻ ഇല്ലേ എന്ന് പറഞ്ഞു കൊണ്ട്.. നെറ്റിയിൽ ഉമ്മയൊക്കെ തന്ന്…ആ ഒറ്റ പ്രസവത്തോടെ എന്റെ കൊച്ച് ഈ പണി നിർത്തിക്കോ എന്നും പറഞ്ഞു. എന്റെ വേദന കണ്ടിട്ടേ ” നിമ്മിയുടെ കണ്ണുകൾ നിറഞ്ഞു “ഇപ്പൊ ഈ ഒരു മാസം എന്റെ ജീവിതത്തിൽ ഞാൻ.. ആദ്യാ..വീട്ടിൽ നിന്ന് മാറി നിൽക്കുന്നെ.അമ്മച്ചി ഉണ്ട് വീട്ടിൽ. പക്ഷെ അച്ചായൻ അമ്മച്ചിയെ കൊണ്ട് ഒന്നും ചെയ്യിപ്പിക്കുകേല വയസ്സായില്ലേ? എല്ലാം ഒറ്റയ്ക്ക്.. ഒറ്റയ്ക്കാക്കാൻ എനിക്ക് പറ്റുകേല മോളെ അതാ..ഇച്ചായനിൽ അലിഞ്ഞു പോയതാ ഞാൻ.. ” അവൾ ചിരിച്ചു “ജോജുവിന് പപ്പയുടെ ഗുണം എല്ലാം ഒന്നും കിട്ടീട്ടില്ല ട്ടൊ അമ്മച്ചി.സ്നേഹം ഉണ്ട്. എന്നാലും അത്ര പോരാ ” “അതിനൊരു വഴിയുണ്ട്. നിങ്ങൾ ഇടക്ക് വീട്ടിൽ വന്നു നിൽക്ക്.. കണ്ടും പഠിക്കുമല്ലോ ചില കാര്യങ്ങൾ.. അവൻ പഠിച്ചതൊക്കെ പുറത്ത് നിന്നായിരുന്നു എന്റെ ആങ്ങളയുടെ കൂടെ.അതാ ” അവർ ചിരിച്ചു “അത് വേണം. പക്ഷെ നിങ്ങൾക്ക് അതൊരു ബുദ്ധിമുട്ട് ആകുമോ?” അവൾ കണ്ണിറുക്കി “പൊ കൊച്ചേ… ഞങ്ങൾക്ക് ഒന്നിച്ചിരുന്നാ മതി.. കാണുക, മിണ്ടുക അത് തന്നെ ആണ് ഏറ്റവും വലിയ സന്തോഷം.. നിങ്ങൾ ഇടക്ക് വന്നു കുറച്ചു ദിവസം നിൽക്ക് ” “ശരി അമ്മേ ” അവൾ സമ്മതിച്ചു പപ്പ വന്നു കൂട്ടിക്കൊണ്ട് പോകുമ്പോൾ നിമ്മിയുട കണ്ണുകൾ നിറഞ്ഞു അമ്മ ഒരു വെളിച്ചമാണ്..ഒരു നിറവാണ്.പപ്പയ്ക്കും തങ്ങൾക്കും.. അവൾ തിരിച്ചു മുറികളിൽ കൂടി നടന്നു. ശൂന്യത ആണ്.. ഒരു വല്ലായ്മ.. എന്ത് മാജിക് ആണ് ഈ അമ്മ ചെയ്തു വെച്ചത്? ഒരു തരത്തിൽ ദൈവത്തിന്റെ ഏറ്റവും വലിയ മാജിക് ആണല്ലോ അമ്മ ? “എടാ ഇച്ചായാ “? കാർ ഓടിക്കുന്നതിനിടയിൽ അയാൾ ഇടം കൈ കൊണ്ടവരെ ചേർത്ത് പിടിച്ചു “എന്താ കൊച്ചേ?” “ലവ് യു “നാൻസി പുഞ്ചിരി യോടെ പറഞ്ഞു അയാൾ മെല്ലെയൊന്നാഞ്ഞ് ആ കവിളിൽ ചുണ്ട് ചേർത്ത് ഒന്ന് കടിച്ചു.. നോവാതെ… ഒട്ടും നോവാതെ…