രചന: Alfin Jose

നീലാകാശം പച്ചക്കടൽ ചുവന്ന ഭൂമി , പ്രത്യേകിച്ചു യൂത്തന്മാരായവർ ഒരു യാത്ര തുടങ്ങുമ്പോൾ ഓടി വരുന്ന ഒരു നാലു വാക്കുകളാവും അത് . എവിടൊക്കെയോ ഒരു ചായം കാച്ചൽ പോലായിരുന്നു ഈ യാത്രയും . എനിക്ക് യാത്രയോടാണ് പ്രണയം , ഇവനാണെ പെണ്ണിനോടും ദേ ഈ പുറകിലിരിക്കുന്നവന്റെ കാര്യാ ഈ പറയണേ, ഇപ്പളെ പറഞ്ഞേക്കാം ഇത് എന്റെ കഥയല്ലാട്ടോ ഇവന്റെ കഥയാണെ !ഏതോ സിനിമയിൽ ആരോ പറഞ്ഞപോലെ ഒരു തേരാളിയായി കൂടെ ഉണ്ടാവും, എന്ന പോലെ ആവും ഞാനിതിൽ .

“അരുണേ ടാ രണ്ട് ബഫ് തന്നേ”, അവൻ പുറകിൽ നിന്നും വലിച്ചുകൊണ്ടിരുന്ന സിഗരറ്റ് എന്റെ കൈയിലേക്ക് തന്നു . നീട്ടി വലിച്ചു പുക പുറത്തേക്കു വിടുമ്പോൾ ആ തണുപ്പിൽ നിന്നുമൊരു ചെറിയ ആശ്വാസം കിട്ടിയപോലെ തോന്നി .. മൂന്നു നാലു പുക എടുത്തു പുറകിലേക്ക് കൈ തിരിച്ചു കൊടുത്തപ്പോളെക്കും അവൻ പാതി തീർന്ന സിഗരറ്റ് കൈക്കലാക്കിയിരുന്നു . ഡാ അരുണേ നെറ്റ് വർക്ക് ഉണ്ടോ ? ഇതു വരെ വന്നില്ലടാ മനു ! .. അപ്പൊ ഈ കാട് കഴിയണ വരെ ഉണ്ടാവില്ല അല്ലേ ?.

ഇട തൂർന്ന മരങ്ങൾ നിറഞ്ഞ ആ നാഷണൽ പാർക്കിലൂടെ ബൈക്കിൽ ഒരു 50 ൽ കടന്നു പോവുമ്പോൾ ഇടക്കുള്ള കോട മഞ്ഞിന്റെ തണുപ്പായിരുന്നു അസഹനീയം ..തണുപ്പ് കുറയാൻ ഇടക്കൊക്കെ കത്തിച്ച സിഗരറ്റു ഡ്രൈവിങ്ങിനിടയിലും അവൻ വെച്ച് നീട്ടുന്നത് കൊണ്ട് വലിയൊരു ആശ്വാസം തന്നെ ആയിരുന്നു.

ഓരോ ഹെയർപിൻ വളവുകൾ വലിയ കാഴ്ച തന്നെ കാണിച്ചുകൊണ്ടേ ഇരുന്നു .. ഇടക്കെപ്പഴോ ഒരു വളവിന്റെ അരികിൽ വണ്ടി ഒതുക്കി നിർത്തി, കടല് പോലെ മലയുടെ മുകളിൽ ഒഴുകി നീങ്ങുന്ന മഞ്ഞിന്റെ സൗന്ദര്യം ഓന്നാസ്വധിച്ചു വന്നപ്പോളേക്കും അരുൺ ദൃതി കൂട്ടി … “അളിയാ 10:30 ന് എങ്ങനെ ആണേലും അവിടെ എത്തണം, അതോണ്ട് നമ്മളിങ്ങനെ നിന്ന് നിന്ന് പോയ എത്തുല്ലാട്ടോ”..മറുപടി ഒന്നും പറയാതെ, ബൈക്ക് സ്റ്റാർട്ട്‌ ചെയ്ത് വീണ്ടും യാത്ര തുടങ്ങി. അബി ഇനി ഒരു 120 കിലോമീറ്റർ കൂടി ഉണ്ട്ട്ടോ.. ഒരു 50 എങ്ങനെ എങ്കിലും കഴിഞ്ഞു കിട്ടിയാ മതിയാരുന്നു എന്ന് അവനോടു പറഞ്ഞ് ആക്സിലേറ്റർ കൂട്ടി കൊടുത്തു .. എന്തോ അവൻ എന്നോട് പറഞ്ഞു എന്ന തോന്നലുകൊണ്ടു ഞാൻ അവനോട് ചോദിച്ചു. “എന്തേലും പറഞ്ഞോ” ?, ഇല്ല ഫോണിലാ. നീ അല്ലേ പറഞ്ഞേ നെറ്റ് ഇല്ലാന്ന് . നെറ്റ് ഇല്ലന്നല്ലേ പറഞ്ഞേ റേഞ്ച് ഇല്ലാന്ന് പറഞ്ഞോടാ തെണ്ടി ..

ഓഹോ ഇപ്പൊ അങ്ങനെആയോ ?ആ അങ്ങനെ ആയി.. മര്യാതക്ക് മുന്നോട്ട് നോക്കി വണ്ടി ഓടിക്ക്, ചാച്ചൻ ഈ കാഴ്ച്ച ഒക്കെ കാണട്ടെ … എന്തോ എങ്ങനെ ?. അന്നാ അരുണേ നീ ഓടിക്ക് ഞാൻ സൈഡാക്കി തരാം . ഡാ പുല്ലേ….. വേണ്ട ഞാൻ ഓടിച്ചോളാം … പാട്ട് കേട്ട് ഡ്രൈവ് ചെയ്തില്ലാന്ന പരാതി ഇല്ല, കാരണം അവന്റെ ഫോണിലൂടെയുള്ള “മുത്തേ ,പൊന്നേ” വിളി നല്ല സംഗീതത്തേക്കാൾ മനോഹരമായി തോന്നിപ്പോയി. നമ്മക്കേ പ്രണയം ഇല്ലാന്നൊന്നും പറയണില്ലാട്ടോ . ഉണ്ട് ഏതാണ്ട് ഒരോ കാലം മാറി മറിയണ പോലെ അവൾ കടന്ന് വരും , ഒരു വസന്ത കാലമെന്ന പോലെ . പിന്നെ ഒരാവശ്യമില്ലാത്ത പിണക്കമാണ് , അത് ജിവിതത്തിലെ മനസ്സ് വരണ്ട വേനൽ കാലമാണ് . അബി , പെട്ടന്നുള്ള അവന്റെ വിളി ഏതാണ്ട് ബാക്കി കാണാതെ പോയ സ്വപ്നത്തിന് തുല്യമായിരുന്നു. ഡാ ഒരു കട്ടൻ അടിച്ചാലോ ? ഗൂഡല്ലൂരിന്റെ നിഗൂഡമായ, വഴി പോലും, പാതി വ്യക്തമാകാത്ത ,മഞ്ഞിന്റെ തണുപ്പിൽ ഒരു കട്ടൻ നല്ലതാണെന്ന തോന്നലിൽ ആ പെട്ടിക്കടയോട് ചേർന്ന് ഞാൻ വണ്ടി ഒതുക്കി നിറുത്തി . ഡാ അരുണേ , നിനക്ക് തമിഴ് അറിയാവോ ? കൊഞ്ചം ,കൊഞ്ചം . ശെ ഇതൊക്കെ പഠിക്കണ്ടേ ? .

കടയിലിരുന്ന ചെക്കനോട് അണ്ണൈ രണ്ടു ചായെയ്.. കട്ടൻ മതിയോ ചേട്ടാ ? എന്നുള്ള ആ ചെക്കന്റെ മറുചോദ്യത്തിന് ഉത്തരം പറയാതെ ഞാൻ അരുണിന്റെ മുഖത്തേക്ക് നോക്കി .. ഒരു ‘ ആക്കിയ ഒരു ചിരിയോടെ അവനെന്നെ നോക്കിയിട്ട് “രണ്ട് കട്ടൻ” എന്ന് ആ ചെക്കനോട് അവൻ മറുപടി നൽകി . കടയുടെ ഒരരിക് പിടിച്ച് അവൻ നീട്ടിയ സിഗരറ്റിന് തീ കൊളുത്തുമ്പോൾ നല്ല ചൂടോടെ ഒരു കട്ടൻ ചായയും ഒപ്പമുണ്ടായിരുന്നു. അതേ അരുണേ, രണ്ടും, മൂന്നും എണ്ണത്തെ ഒരെ പോലെ തേച്ചോണ്ടിരുന്നവനാ നീ, എന്നിട്ട് ഇപ്പൊ അതെല്ലാം വിട്ട് ഈ ഒരെണ്ണത്തിൽ എങ്ങനാ ?, അത് എനിക്കങ്ങു ഒരു പിടുത്തോം കിട്ടണില്ല . ഇതെന്താ കേറിയങ്ങു അസ്ഥിക്ക് പിടിച്ചോ ?. ഒരു പുഞ്ചിരിയിൽ മാത്രമുള്ള അവന്റെ മറുപടിയിൽ ഞാൻ ചോദിച്ചതിന്റെ പൂർണ്ണമായ ഒരു ഉത്തരമായി തോന്നി . അവളെന്നാ പറയുന്നു , ആര് ? നിന്റെ മറ്റവളെ ?, എന്നതാരുന്നു ,മിർനാലിനി ? വേണ്ടാ ,… അവന്റെ ഉത്തരം മുട്ടുന്ന ചോദ്യത്തിന് മുന്നിൽ ശരിക്കും മുട്ട് മടക്കേണ്ടി വന്നു.കാലി ഗ്ലാസ് പെട്ടി കടക്കാരന്റെ കൈയ്യിൽ , കൊടുത്ത് ബൈക്കിൽ കയറി ഇരിക്കുമ്പോൾ , ഞാനാകെ ഒന്ന് പതിറപ്പോയ പോലായിരുന്നു . യാത്ര മുന്നോട്ട് പോയ് കൊണ്ടിരുന്നപ്പോളും , ഉളളിൽ ഓർക്കാനാഗ്രഹിക്കാത്ത പഴയ ഓർമ്മകൾ ശരിക്കും ദേക്ഷ്യം പിടിച്ചു .. ആ ദേഷ്യം വേഗതയിൽ കാണിച്ചപ്പോൾ തോളിൽ ബലത്തോടെ വീണ ഒരു അടിയിലും , “പതിയെ പോടാ”… എന്നുള്ള നിലവിളിയിലും ഒതുങ്ങി തീർന്നു .അവളിങ്ങനെ മിനിറ്റിന്, മിനിറ്റിന് വിളിക്കുമ്പോ നിനക്ക് വെറുപ്പീരായി തോന്നണില്ലേ ? അവള് ഭയങ്കര ഡിപ്പന്റാ ടാ , ഒരു ചെറിയ കാര്യത്തിന് പോലും . ശരിക്കും അസൂയ തോന്നണുണ്ടെടാ .. എന്റെ കാര്യം നിനക്കറിയാല്ലോ, വിളിച്ചാ വിളിച്ചു , നിനക്കത് വിട്ട് കളഞ്ഞൂടെ മനു .. കഴിയണില്ലടാ , ഞാൻ ശ്രമിക്കണുണ്ട് , അങ്ങോട്ട് പോയി മിണ്ടി വില കളയുന്ന ആ ഏർപ്പാട് നിർത്തി. അരുണേ വേറേ എന്തേലും പറ.. മനുഷ്യന്റെ മൂഡ് കളയാൻ !. ആ സംഭാക്ഷണം അവിടെ നിർത്തുമ്പോൾ , ഞാൻ റോഡിനിരുവശമുള്ള കാഴ്ചകൾ ശരിക്കും ആസ്വദിച്ചു . എല്ലാം നഷ്ടമായി ഇരിക്കുമ്പോൾ ഒരു യാത്ര പോണം, നാമെന്താണെന്നും,ചുറ്റുമുള്ളതെന്താണെന്നും നമുക്ക് ആ യാത്ര മനസിലാക്കി തരും.

ഏതാണ്ട് മൈസൂരടുക്കുന്നതിന് മുന്നേ സുഹ്രുത്തായ സുബിന്റെ റൂമിൽ കയറി ഒരു നീണ്ട കുളിയും പരിപാടിയുമൊക്കെ കഴിഞ്ഞ് വീണ്ടുമൊരു സിഗരറ്റിന് തീ കൊളുത്തി നിന്നപ്പോൾ അരുണും കുളി കഴിഞ്ഞ് പുറത്തേക്കിറങ്ങി .”എന്താ തണുപ്പല്ലേ” ? . “ദാ, രണ്ട് പൊക എടുക്ക് തണുപങ്ങ് പോകും”. “വേണ്ട അളിയാ അവൾടെ കൈയ്യീന്ന് തല്ല് വാങ്ങാൻ വയ്യ”. “എന്തേ, കിട്ടിട്ടുണ്ടെന്ന് തോന്നണുണ്ടല്ലോ”.”ഉണ്ടോന്നോ” പാൻസ് വലിച്ച് കേറ്റി ഇടുന്നതിനിടയിൽ അവൻ മറുപടി നൽകി . “മനു നീ സമയം നോക്കിയേ” , പത്തേകാല് . ഞാൻ മറുപടി നൽകി. പോവാം, പോവാം.

അരുണിന്റെ തിരക്കിനിടയിൽ അവനോട് യാത്ര പറഞ്ഞ് വീണ്ടും യാത്ര തുടങ്ങുമ്പോൾ മൈസൂരിലേക്കുള്ള ദൂരം ഏതാണ്ട് ആറ് കിലോ മീറ്ററിൽ ഒതുങ്ങി . ടൗണിലേക്ക് കടന്നു ചെല്ലുമ്പോൾ അരുണിന് പരിചിതമായ വഴിയിലൂടെ മുന്നോട്ട് നീങ്ങി. “ടാ അടുത്ത ലെഫ്റ്റ് “.. ടാ അവളെവിടെ അവളെവിടെ വരാന്നാ പറഞ്ഞേ ?. ഒരു സെക്കന്റെ , നീ എവിടാ ശ്രീകുട്ടി ? കേട്ടില്ലാ ? പതിയെ പോവാനെന്ന സിഗ്നലെന്ന വണ്ണം അവനെന്റെ പുറത്ത് തട്ടി… ഒന്ന് ഒതുക്കി നിർത്തിക്കെ മനു.. ഹൈവേയുടെ നടപ്പാതയോട്‌ ചേർന്ന്, ഞാൻ വണ്ടി ഒതുക്കി നിറുത്തി.. ടാ ഞാനൊന്നു ലൊക്കേഷൻ നോക്കട്ടെ ,. അവള് ലൊക്കേഷൻ വാട്സ്ആപ്പ് ചെയ്തോ ? ഉം. ഒരു മൂളലിൽ അരുൺ മറുപടി നൽകി. മനു അടുത്ത റൈറ്റ് കട്ട് ചെയ്ത് യൂ ടേൺ എടുക്കണം .

അവളെവിടാ ? . Depth and Green എന്നൊരു കോഫി ഷോപ്പ് ഉണ്ട് ,നമ്മക്കേ അങ്ങോട്ടാ പോണ്ടെ അവളവിടെ കാണും.വെല്ല ലവേഴ്‌ കോഫി ഷോപ്പായിരിക്കും അല്ലേടാ ? . അതേല്ലോ , ഞാൻ അവിടെ മൂഞ്ചി കുത്തി ഇരിക്കണം അല്ലേ ?. പിന്നല്ലാണ്ട് . അവൻ പറഞ്ഞു തന്ന വഴിയിലൂടെ , കുറച്ചങ്ങ് മുന്നോട്ട് പോയപ്പോൾ ഇടത് വശം ചേർന്ന് ആ കോഫി ഷോപ്പ് കണ്ടു. അതിന്റെ പാർക്കിംങ്ങിൽ ബൈക്ക് ഒതുക്കി നിറുത്തി ഇട്ട് , ഞങ്ങൾ രണ്ടു പേരും ആ കോഫി ഷോപ്പിന് ഉള്ളിലേക്ക് ‘കടന്നു ചെന്നു. “അരൂ ദേ ഇവിടെ”. ശബ്ദം കേട്ടിടത്തേക്ക് തിരിഞ്ഞു നോക്കിയപ്പോൾ ശ്രീ ഒരരികിൽ ഞങ്ങളെ നോക്കി കൈ കാണിക്കുന്നത് കണ്ട് ഞങ്ങൾ അവളുടെ അടുത്തേക്ക് നടന്നു.

ഞാൻ പറഞ്ഞതാ അരു ബൈക്കിനു വരണ്ട, ബസിനു വന്നാ മതിയെന്ന്,ഇവിടെ ഇരുന്ന് തീ തിന്നുവാരുന്നു ഞാൻ, അറിയാവോ നിനക്ക്. കണ്ടോ മുഖമൊക്കെ ആകെ കരിവാളിച്ചു. അവന്റെ ഒരുകൈയിൽ പിടിച്ചുകൊണ്ടു അവളുടെ പരിഭവം അവൾ പറഞ്ഞു തീർത്തു. മനു… നമ്മളാദ്യായിട്ടാ കാണണല്ലേ ?. അതേ. ഒരു ചെറു പുഞ്ചിരിയോടെ അവൾ എന്റെ മുഖത്തു നോക്കിക്കൊണ്ടു പറഞ്ഞു. ഇരിക്ക്. നിങ്ങളിരിക്ക് , ഞാനൊന്ന് മുഖം കഴുകീട്ട് വരാം. കൈയ്യിലിരുന്ന ബാഗ് കസേരയിൽ വെച്ചിട്ട് അങ്ങോട്ട് വാഷ് റൂമിലേക്ക് നടക്കുന്നതിനിടയിൽ നിങ്ങൾ വെല്ലോം കഴിച്ചാരുന്നോ ?’ എന്ന ചോദ്യം അവൾ അരുണിനോട് ചോദിക്കുന്നത് കേൾക്കാമായിരുന്നു. വാഷ് റൂമിലെ വാഷ്ബേസിനു മുന്നിലെ കണ്ണാടിയിൽ നോക്കി മുഖമൊന്ന് കഴുകി , എന്നിട്ട് മുടി കൈകൊണ്ടൊന്ന് മാടിയൊതുക്കി , ഒരു മൂളിപ്പാട്ടും പാടി പുറത്തേക്ക് ഇറങ്ങി,

അവരുടെ മറുവശത്ത് ചെന്നിരുന്ന പാടെ , “ഞങ്ങളൊന്ന് കൈ കഴുകീട്ട് വരാട്ടോ”, എന്ന് പറഞ്ഞ് അവരും വാഷ് റൂമിലേക്ക് പോയി. കൈ ഷർട്ടിൽ ഒന്ന് തുടച്ചു ഫോൺ എടുത്ത് നെറ്റ് ഓൺ ചെയ്ത പാടെ , ഒരാൾ എന്റെ തോളിൽ വന്നു തട്ടിയിട്ട് ഇംഗ്ലീഷിൽ ഇങ്ങനെ പറഞ്ഞു. Hey if you dont mind can you move to next table ? Is it okey? ആദ്യമൊന്നു പകച്ചു പോയെങ്കിലും ഞാൻ തിരിച്ചു ഒരു ചിരിയോടെ ഇങ്ങനെ മറുപടി നൽകി.
“Yeah that’s fine”.ഒഴിവായി കൊടുത്തതിനും ഒരു കാരണമുണ്ട് അവര് ഒരു പെയർ ആയിരുന്നു. എന്നാലും മനസിലാവുന്നില്ല ഈ സീറ്റ് ഒഴിഞ്ഞായിരുന്നല്ലോ കിടന്നേ ?. അവർക്കിവിടെ ഇരുന്നൂടായിരുന്നില്ലേ ?. ടാ അരുണേ ഇവിടെ… വാഷ് റൂമിന് വെളിയിലേക്കു ഇറങ്ങി നേരത്തെ ഇരുന്നിടത്തേക്കു ചെന്നിരിക്കാൻ പോയ അവരെ, ഞാൻ ഇരുന്നിടത്തേക്കു വിളിച്ചു. ടാ നീ എന്തിനാ സീറ്റ് മാറി കൊടുത്തേ ?, എല്ലാം ഒരു o നിമിത്തമാണ് അളിയാ .. ടാ മനു ഇത് അവളല്ലേ ?മിർനാലിനി ?ഹേയ് നിനക്ക് തോന്നണതാടാ. ഞാൻ അരുണിന് മറുപടി നൽകി .അല്ലെടാ അതവള് തന്നാ . ഒറപ്പാണോ ? . ആടാ, എന്നാ അവള് തന്നാ .. അവരായി അവരുടെ പാടായി , നീ ഒന്നും മിണ്ടിയില്ലേ ? എന്ത് മിണ്ടണം? നീ പറ , വലിയൊരു ഭാരാ അവൻ കൊണ്ട് നടക്കാൻ പോണേ .. ഞാൻ രക്ഷപ്പെട്ടില്ലേ ? അവനിതിലും വലുതെന്തോ വരാനിരുന്നതാ ..

ഇപ്പോ മനസ്സിലായെടാ , അവള് വിളിക്കാതിരുന്നതെന്താണെന്ന് .. മനു അവള് നോക്കണുണ്ട് ട്ടോ , ശ്രീ അവളെ നോക്കി കൊണ്ടെന്നോട് പറഞ്ഞു. ഇനി എന്നാന്ന് നടക്കാൻ പോണത് എന്ന് പറയണോ ? അവള് വല്ലാണ്ട് ഇറിറ്റേറ്റ് ആവണുണ്ടോ ? ഉണ്ട്. മനു ഒരു കോള് വരണുണ്ട് ഇപ്പോ വരാവേ , അരൂ ഇവിടിരുന്ന് വിളിച്ചാ പോരേ എഴുന്നേറ്റ് മാറാൻ ഒരുങ്ങിയ അവനോട് ശ്രീക്കുട്ടി പറഞ്ഞു .. ഇച്ചിരി ‘സീക്രട്ടാ.. പ്ലീസ് … ആയിക്കോട്ടെ എന്ന വണ്ണം അവളവനെ നോക്കി തലയാട്ടി. ബാക്കി കേക്കടോ … ഞാൻ പറഞ്ഞത് ‘കറക്റ്റ് അല്ലേ ?പിന്നല്ലാതെ , ഇനി അവളവനേം വിളിച്ച് പുറത്തേക്ക് പോവും… ദേ പോയല്ലോ … ഞാൻ ശ്രീയെ നോക്കി പുച്ചിച്ചൊന്നു ചിരിച്ചു. അതേ ഇതേ പോലത്തെ വെല്ല പ്ലാനുണ്ടേ ഞാൻ കൊന്നു കളയും പറഞ്ഞേക്കാം ..

“പോടാ ഒന്ന്” ,അവൾ ഒരു ചിരിയോടെ എനിക്ക് മറുപടി നൽകി.. ടാ മനു അവര് പോയല്ലോ ?.. നിനക്ക് പിടിച്ച് നിറുത്തി ഒരെണ്ണം പൊട്ടിക്കാരുന്നു… ഫോൺ ചെയ്ത് തിരികെ വന്ന അരുൺ എന്നോട് പറഞ്ഞു. ചിലതൊക്കെ പ്രതികരിക്കാതെ ഇരിക്കുന്നതാ ഏറ്റവും നല്ല പ്രതികാരം, നീയാരാ മഹേഷ്‌ ഭാവനയോ ? ഒരു പുഞ്ചിരിയിൽ ഒതുക്കി അവന് മറുപടി നൽകുമ്പോൾ വലിയൊരു ഭാരം ഒഴിവായ പോലെ ആയിരുന്നു ഉള്ളിൽ. അതേ മനു എനിക്ക് ബൈക്കിന്റെ ചാവി ഒന്ന് വേണം. ഇല്ല തരത്തില്ല മോനെ രണ്ടും കൂടി കറങ്ങാൻ അങ്ങ് പോയ ഞാൻ ഇവിടെ അണ്ടിപോയ അണ്ണാനെ പോലെ ഇരിക്കേണ്ടി വരും. അതല്ലടാ എനിക്ക് നാളെ രാവിലെ കണ്ണൂർ എത്തണം. ഞങ്ങളുടെ രെജിസ്റ്റർ ആടാ.. പിന്നെ ഒന്ന് പോടാ, ശ്രീ പറഞ്ഞു കൊടുക്കെടി… നാളത്തെ കാര്യം ഓക്കേ ആയോ ? കാര്യായിട്ടും ആയി. ടാ മനു ഞാനിവളെ കൂട്ടാനായിട്ടു വന്നതാ, ഒറപ്പില്ലായിരുന്നു നാളത്തെ കാര്യം, പിന്നെ നിന്നോട് പറയാണ്ടിരുന്നത് നീ ഇങ്ങനെ വണ്ടർ അടിച്ചിരിക്കുന്നതൊന്ന് കാണാനാ … നാളെ നീയും അവിടെ ഉണ്ടാവണം നീയാ ഒരു സാക്ഷി ‘… അളിയാ … നിനക്കെന്നെ ജീവനോടെ കാണണോന്നൊന്നും ഇല്ല അല്ലേ ടാ ? അതെന്നാ നീ അങ്ങനെ പറഞ്ഞേ, സാക്ഷിക്കാ ആദ്യം അടി വരണേ , അതോണ്ട് പറഞ്ഞതാ …. കൊള്ളാം ഞാൻ ഹാപ്പിയാടാ .. ഒരു തേപ്പ് കഥ കൂടി കേക്കേണ്ടി വന്നില്ലല്ലോ ? .. അപ്പോ ഇറങ്ങിയാലോ ശ്രീ ? . ഞങ്ങൾ എല്ലാവരും പുറത്തേക്ക് നടന്നു ..

അപ്പോ കഴിക്കണ്ടാരുന്നോ? . സാരമില്ല ഞങ്ങള് വഴീന്ന് കഴിച്ചോളാം ,അപ്പോ ഞാനോ ? ശ്രീ നിന്റെ കൈയ്യിൽ പൈസയുണ്ടേ ഇവന് ഒരു 500 കൊടുത്തേ .. അവൾ എടുത്ത് നീട്ടിയ നോട്ട് വാങ്ങി അവനത് എന്റെ കീശയിൽ ഇട്ടു തന്നു. അളിയാ മനു നിന്റെ കൈയ്യിൽ പൈസ വെല്ലോം ഉണ്ടാ ? കൈയ്യില് നീ തന്നതും കൂട്ടി ആയിരത്തി അഞ്ഞൂറ് ഉണ്ട്. വേറെ എന്തേലും ,?

അക്കൗണ്ടിൽ ഒരു ആയിരം ഉണ്ട് . കീശയി ലെ പേഴ്സിൽ നിന്നും അവന്റെ അടുത്ത ചോദ്യത്തിന് മുന്നേ ATM കാർഡെടുത്ത് അവന്റെ കൈയ്യിൽ കൊടുത്തു . നമ്പറ് 2623… ഒരച്ച് ഒരച്ച് അതിന്റെ കാന്തോം കൂടി കളയണേടാ പന്നി. ഒരു ചെറു ചിരിയോടെ അവനെന്നെ ഒന്ന് കെട്ടി പിടിച്ചു, നിങ്ങള് ‘ എത്തണമുന്നേ ഞാൻ അവിടുണ്ടാവും … നാളെ കാണാട്ടാ .. അതേ പെണ്ണേ ഈ ഓട്ടോക്കാരനോട് ബസ് സ്റ്റാർൻഡിൽ പോവാൻ പറ്റുവോന്ന് എങ്ങനാ കന്നഡയിൽ ചോദിക്കണേ ? ബസ്റ്റാൻഡ് ഹോഗ ബെക്കു’.. ഈശ്വരാ ഇതൊന്ന് പഠിക്കണോല്ലോ ‘. മനു ഫോണിൽ ടൈപ്പ് ചെയ്ത് വെയ്ക്കെടാ … അവൾ വീണ്ടും പറഞ്ഞു. ‘ ഫോണെടുത്ത് വാട്സ് ആപ്പിലെ ചാറ്റ് ലിസ്റ്റിൽ ഒരു ഇൻ ബോക്സ് തുറന്ന് ടൈപ്പ് ചെയ്യാൻ തുടങ്ങിയപ്പോൾ അരികിൽ നിന്ന അരുൺ ആരുടെ ഇൻബോക്സാണെന്ന് അവൻ വായിച്ചെടുത്തു… മിർനാലിനി .. ബ്ലോക്ക് ചെയ്ത് കഴിഞ്ഞാ ഇത് കൊണ്ട് ഇങ്ങനത്തെ ചില പരിപാടിക്ക് കൊള്ളാല്ലേ ? പിന്നല്ലാതെ ഒരു ചിരിയോടെ അവന് ഞാൻ മറുപടി നൽകി.ദാ ചാവി നിങ്ങള് വിട്ടോ ഞാൻ പതിയെയുള്ളു . അതേ പതിയെ അങ്ങ് പോയാ മതിട്ടാ ‘. ബൈക്ക് സ്റ്റാർട്ട് ചെയ്ത് പോകാൻ ഒരുങ്ങി നിന്ന അരുണിനോട് ഞാൻ പറഞ്ഞു. ടാറ്റ പറഞ്ഞ് അവര് പോവുന്നത് നോക്കി ഞാൻ കുറച്ച് നേരം നോക്കി നിന്നു.

അമ്മേ’ പെട്രോളിന് 81 രൂപ ആയി അവ നീ റിസേർവ് വെച്ചു എവിടെ വരെ പോവോ എന്തോ ? രണ്ടും കൂടി തളളി പെട്രോൾ പമ്പ് വരെ കൊണ്ടോകേണ്ടി വരും . ഏതായാലും നേരേ ചൊവ്വേ നടക്കൂല്ലാന്ന് ഒറപ്പായിരുന്നു. എന്റെ വക ഇരിക്കട്ടെ ചെറിയൊരു പണി.. തൊട്ടടുത്ത പെട്ടിക്കടയിൽ നിന്ന് ഒരു ഗോൾഡ് വാങ്ങി തീ കൊളുത്തുമ്പോൾ ഇവിടെ ‘ഒഴിവാക്കിയിട്ട് പോണ്ട’ രണ്ടാമത്തെ ഭാരമാണ് ഇതെന്ന് തോന്നി.. ചവിട്ടി കെടുത്തി എതിരെ പോയ ഓട്ടോ കൈ കാട്ടി നിർത്തി , “ബസ്റ്റാൻഡ് ഹോഗ ബേക്കു” പറഞ്ഞപ്പോൾ ,ഓട്ടോക്കാരന്റെ മറുപടി എന്താണെന്ന് മനസ്സിലാകാതെ കയറി ഇരുന്നപ്പോളാണ് ‘തോന്നിയത്,ഇനി ഇറങ്ങുമ്പോൾ എത്രയാണെന്ന് കന്നഡയിൽ എന്ത് ചോദിക്കുമെന്ന് ഒരു എത്തും പിടിയും ഇല്ലായിരുന്നു.

 

(-നിങ്ങളുടെ സ്വന്തം രചനകൾ വളപ്പൊട്ടുകൾ പേജിൽ ഉൾപ്പെടുത്തുവാൻ പേജ്‌ ഇൻബോക്സിലേക്ക്‌ മെസേജ്‌ അയക്കൂ…)