ബന്ധങ്ങൾ
സ്നേഹത്തിന്റെ ഭാഷ
രചന: ആദർശ് മോഹനൻ
” നീ എന്തോരം മുള്ളിയിട്ടുള്ളതാ ഈ മടീലെന്നുള്ളേന് വല്ല കണക്കും ഉണ്ടോ കണ്ണാ ” അമ്മ വയ്യാതെ കിടക്കുമ്പോൾ തന്നെ പുരാണം ചിക്കി മാന്തിക്കൊണ്ട് അമ്മേടെ അനിയത്തി അതായത് എന്റെ മേമേടെ പാറേല് ചിരട്ട കൂട്ടിയൊരക്കണ മാതിരിയുള്ളയാ ശബ്ദം കേട്ടപ്പോൾ പല്ലിറുമ്മിയവിടെ നിന്നും മുഖം തിരിക്കുകയാണ് ഞാനും ചെയ്തത് ആഴ്ച്ചേല് ഒരിക്കലുള്ള വീട്ടിലേക്കുള്ള വരവില് ഇതുപോലുള്ള ബന്ധുക്കളുടെ നിറസാന്നിധ്യം കൂടെ ആവുമ്പോ എല്ലാം ഉഷാറായി, പോരാത്തേന് തിരിച്ചു പോകുമ്പോൾ പല്ലിളിച്ചു കൊണ്ട് പോക്കറ്റിലേക്ക് നോക്കി കയ്യും നീട്ടി നിൽക്കുന്നവരെ കണ്ടില്ലെന്നെങ്ങനെയാ നടിക്കാ അതു കൊണ്ടു തന്നെ മേമേടെ സുഖിപ്പിക്കലിനു ഞാൻ വഴങ്ങിക്കൊടുത്തില്ല, വീട്ടിലേക്ക് വന്ന് കാലു കുത്തിയില്ല അപ്പോഴേക്കും പെണ്ണുമ്പിള്ളേടെ അച്ഛന് വലിവ് കൂടുതലാണെന്നും പറഞ്ഞ് ഒറ്റ ഇറങ്ങിയോട്ടമായിരുന്നവൾ പണ്ടാരടങ്ങാനായിട്ട് തിന്നാൻ വല്ലതും ഒണ്ടാക്കി വെച്ചിട്ട് പോവോ , അതും ചെയ്തില്ല കടന്നലുകുത്തിയ പോലത്തെ എന്റെ മോന്തയും പ്രകി പ്രാകി പിറുപിറുത്തു കൊണ്ടുള്ളയെന്റെ നടത്തവും കണ്ടിട്ടാകണം മറ്റൊന്നും ശ്രദ്ധിക്കാതെ അടുക്കളയിൽ അരി കഴുകി വെടിപ്പാക്കി അടുപ്പത്തിടുന്നുണ്ടായിരുന്നു മേമ പച്ചക്കറിയരിയുന്നതിന്റെ ഇടയിൽ എണ്ണിപ്പറുക്കൊണ്ടെന്റെ ബാല്യലീലകൾ വിളംബരം ചെയ്യുമ്പോഴും എന്റെ ശ്രദ്ധ പുറത്തു നിൽക്കണ പൂവാലിപ്പശുവിന്റെ പുള്ളികളിലേക്കായിരുന്നു പലപ്പോഴും മേമയുടെ ചോദ്യങ്ങളെ മനപ്പൂർവ്വം ഞാൻ അവഗണിച്ചത് അങ്ങനെയെങ്കിലും അൽപ്പം ചെവിതല കേൾക്കാമല്ലോ എന്നു കരുതിയിട്ടാണ് അത് വ്യക്തമായി മനസ്സിലായതുകൊണ്ടാകണം പിന്നെയാ വഴിക്ക് മിണ്ടിക്കൊണ്ട് വന്നിട്ടില്ല മേമ വീട്ടിലേക്ക് വന്നിട്ടിതുവരെ അമ്മേടെയാ മുറിയുടെ പടി ഞാൻ താണ്ടിയിട്ടില്ല എന്നത് സത്യം തന്നെയാണ്, അല്ലെങ്കിലും അത് പതിവാണ് എല്ലാ കാര്യങ്ങളും അവളെ ഏൽപ്പിച്ച് എല്ലാത്തീന്നും ഒഴിഞ്ഞു നിൽക്കുക എന്നത് ശീലമാക്കിയിരുന്നു. അനുസരണ ശീലമുള്ള ഭാര്യയെ കിട്ടുക എന്നതും ഒരു ഭാഗ്യമാണ് പലപ്പോഴും എന്റെയീ ഒളിച്ചോടലിൽ സ്വയം കുറ്റബോധം തോന്നിയിട്ടുണ്ടെങ്കിലും അമ്മേടെ കാര്യങ്ങൾ ശ്രദ്ധിക്കുന്നതിൽ ഇന്നോളം പരാതി പറഞ്ഞിട്ടില്ലവൾ അമ്മേടെ ചെക്കപ്പിനായി ഡോക്ടറെയും കാത്തിരിക്കുകയായിരുന്നു ഞാൻ. വേറൊന്നുമല്ല ആ മുറികടന്നു ചെന്ന് നീണ്ടു നിവർന്നുള്ളയാ കിടപ്പ് കാണാനുള്ള ധൈര്യം ഇല്ലാത്തതുകൊണ്ടാണത് ഇടയ്ക്കൊക്കെ ആ മുറിയിൽ നിന്നും ശ്വാസോച്ഛ്വാശത്തിന്റെ ശബ്ദം പരന്നൊഴുകിയെന്റെ കാതിൽപ്പതിക്കാറുണ്ട് നെടുവീർപ്പോടെ ഞാനൊന്ന് എത്തി നോക്കുന്നതിനു മുൻപേ മേമയങ്ങോട്ട് ഓടിയെത്തിയിട്ടുണ്ടാകും കാര്യം തിരക്കും മുൻപേ മേമയെന്നോട് പറയാറുണ്ട് പേടിക്കാനൊന്നുമില്ലട കണ്ണാ ഇതൊരു പതിവാണ് അമ്മയിടക്ക് കോട്ടുവായ ഇടണതാണത് എന്ന് ഡോക്ടർ വന്നു അമ്മേനെ ചെക്ക് ചെയ്തപ്പോഴാണ് പാതി ആശ്വാസം കിട്ടിയത്, ആള് പഴയതിനേക്കാൾ ഉഷാറാണല്ലോയെന്നു ഡോക്ടർ പറഞ്ഞപ്പോൾ അമ്മേനെ ഞാനൊന്നു എത്തിച്ച് നോക്കി, അല്ല ഡോക്ടർ കള്ളം പറയുകയാണ് എന്റെ പഴയ അമ്മ ഇങ്ങനല്ല ഞാനിവിടുന്ന് ഇറങ്ങും മുൻപേ ഉള്ളയാ മുഖത്തേ തേജസ്സ് എനിക്കിപ്പോഴും ഓർത്തെടുക്കാനാകുന്നുണ്ട്. ” കാലത്ത് എന്താ മരുന്നു കഴിച്ചില്ലെ “? ഡോക്ടറുടെയാ ചോദ്യം കേട്ടപ്പോ മേമയിലേക്കെന്റെ ദൃഷ്ടി പതിഞ്ഞു. ” ഒരു വറ്റ് കഞ്ഞിയെങ്കിലും കുടിച്ചാലല്ലെ ഡോക്ടറെ മരുന്ന് കൊടുക്കാൻ പറ്റു, നല്ല ഡോസ് കൂടിയ മരുന്നാണെന്നും ഭക്ഷണം കഴിക്കാതെ മരുന്നു കഴിച്ചാൽ ശരീരo താങ്ങില്ലെന്ന് ഡോക്ടർ തന്നെയല്ലെ പറഞ്ഞതും ” ? “എത്ര ശ്രമിച്ചിട്ടും കൂട്ടാക്കണില്ലന്നേ” അത് കേട്ടപ്പോ എന്റെയുള്ളിലൽപ്പo ദേഷ്യവും അമർഷവും അരിച്ചു കയറി. അമ്മയെ ഞാൻ കനപ്പിച്ചൊന്നു നോക്കി. ” ഇങ്ങനെ ഭക്ഷണം കഴിക്കാതെ ഇരുന്നാ എങ്ങനാ അമ്മേ മരുന്നു കഴിക്കാ? ഇക്കാര്യത്തിലെങ്കിലും ഒരു അനുസരണ കാണിച്ചോടെ? വെറുതെ ബാക്കിയുള്ളോർക്കു കൂടെ ബുദ്ധിമുട്ടുണ്ടാക്കി വെക്കരുത് ,” ആ മുഖത്ത് നോക്കാതെയാണ് ഞാനത് പറഞ്ഞത് അതിനിടയിൽ അമ്മയെന്തൊക്കെയൊ എന്നോട് പിറുപിറുക്കുന്നുണ്ടായിരുന്നു മനസ്സിലാകാത്ത പക്ഷം ഞാനമ്മയോടായി ചോദിച്ചു ” എന്താ പറഞ്ഞത് ? മനസ്സിലായില്ല ഒന്നൂടെ പറയു അമ്മേ” അമ്മ വീണ്ടും എന്തൊക്കെയോ പിറുപിറുക്കുന്നുണ്ടു ഞാൻ വീണ്ടും വീണ്ടും അതേ ചോദ്യം ആവർത്തിച്ചുകൊണ്ടിരുന്നു ഒന്നും മനസ്സിലാകാതായപ്പോ ചോദ്യഭാവത്തിൽ മേമയെയൊന്നു നോക്കി, അൽപ്പം പുഞ്ചിയോടെയെന്റെ നോട്ടത്തിന് മറുപടിയെന്നോണം നിറകണ്ണുകളാൽ മേമയെന്നോടായ് പറയുന്നുണ്ടായിരുന്നു ” ഒന്നും മനസ്സിലാകുന്നില്ല അല്ലേ കണ്ണാ?” എങ്ങിനെ മനസ്സിലാകാനാ ല്ലേ? ,വളർന്നു വല്യ ആളായിപ്പോയില്ലേ നീ ?, പലതും മനസ്സിലാക്കാതിരിക്കാനും പാകത്തില് വളർന്നു പന്തലിച്ച വല്യ ഉദ്യോഗസ്ഥൻ” ” മൂന്നാം വയസ്സിൽ നീ മുലപ്പാല് വേണമെന്ന് വാശി പിടിച്ച് കരഞ്ഞപ്പോ, അന്നു നിന്റെ ഭാഷ മനസ്സിലായില്ലെന്ന് പറഞ്ഞിട്ടില്ലവൾ, മറിച്ച് നിന്റെ വിശപ്പടക്കുകയായിരുന്നവൾ ” “മച്ചിൻ പുറത്തു കിടന്ന കളിപ്പാട്ടത്തിനു വേണ്ടി നീ വാശി പിടിച്ച് കരഞ്ഞപ്പോളും നീ എന്തിനാണ് കിടന്നു കാറുന്നതെന്ന് ചോദിച്ചിട്ടില്ലവൾ , പകരം മച്ചിൻ പുറത്തേക്ക് വലിഞ്ഞു കയറി ആ കളിപ്പാട്ടം എടുത്തു നിനക്ക് തരികയായിരുന്നവൾ” “അന്ന് ചെവിവേദനയെടുത്തിട്ട് അലറി വിളിച്ചു നീ കരഞ്ഞപ്പോ ,എന്റെ മോന് ചെവിവേദയാണ് ആശുപത്രിയിൽ കൊണ്ടു പോകണമെന്ന് കണ്ടു പിടിക്കാൻ ഗണിച്ചൊന്നുo നോക്കേണ്ടി വന്നിട്ടില്ല അവൾക്ക് , നിന്നെ നെഞ്ചോടക്കിപ്പിടിച്ച് നെട്ടോട്ടമോടുകയാണവളന്ന് ചെയ്തത്” “ഇന്നവളുടെ ഭാഷ നിനക്ക് മനസ്സിലാകുന്നില്ല . അല്ലേടാ ” നിന്റെ അമ്മ എന്താ പറയാൻ ഉദ്ദേശിച്ചേന്ന് നിനക്കറിയോ കണ്ണാ ” അവൾക്ക്, അവൾക്ക് നിന്റെ കൈകൊണ്ടിത്തിരി കഞ്ഞി വാരിക്കൊടുക്കോന്നാ ചോദിച്ചത് ” ” അത്……….. അത് മാത്രമേ ഒരു ആഗ്രഹമായിട്ട് മനസ്സിലുള്ളോ എന്നാ പറയുന്നത് ” പറഞ്ഞു തീരുമ്പോഴും മേമ കരയുകയായിരുന്നു, ദയനീയതയോടുകൂടെയുള്ള ഡോക്ടറുടെ മുഖം കൂടെ കണ്ടപ്പോൾ എന്റെ കണ്ണുകളും നിറഞ്ഞു തുടങ്ങിയിരുന്നു. കഞ്ഞി വാരിക്കൊടുക്കുന്നതിനിടയിൽ പാടുപെട്ട് ഓരോ ഇറക്കും അമ്മ കഴിക്കുന്നതു കാണുമ്പോൾ , ആ കഴുത്തിലെ ഞെരമ്പുകൾ തടിച്ചു വരുന്നതു കാണുമ്പോൾ നെഞ്ച് കീറണ അനുഭൂതിയായിരുന്നു ഉണ്ടായിരുന്നത്
അമ്മിഞ്ഞപ്പാലു നുണയുന്ന കുഞ്ഞു പൈതലിനെ പോലെ വറ്റുകൾ നുണയുന്ന അമ്മയുടെ നെറുകിൽ മെല്ലെ ഞാനെന്റെ വിരലുകളോടിച്ചു. പാതി കഴിച്ചിട്ട് വേണ്ട വയറു നിറഞ്ഞു എന്നമ്മയെന്നോട് പറഞ്ഞതെനിക്ക് മനസ്സിലാക്കാൻ കീഴടക്കിയ യൂണിവേഴ്സിറ്റിയുടെ സഹായമൊന്നും വേണ്ടി വന്നില്ല. ഇതും കൂടെ കഴിക്ക് എന്നു പറഞ്ഞ് മൊത്തം കഞ്ഞിയും ആ വായ്ക്കകത്തേക്ക് ഇറ്റിറ്റ് കൊടുക്കുമ്പോഴും മനസ്സിൽ ഞാനുറപ്പിച്ചിരുന്നു എനിക്കറിയാത്ത അമ്മേടെയീ ഭാഷ, എനിക്കുo പഠിക്കണം എന്ന്, അതിനായിട്ട് ലീവെടുത്ത് അമ്മോടൊപ്പം സമയം ചിലവഴിക്കണം എന്ന്, ഇന്നുവരെ ഒരു മണിക്കൂർ സമയം പോലും എന്റെ അമ്മേടെ കൂടെ ചിലവഴിക്കാത്ത എനിക്ക്, എനിക്കറിയാമായിരുന്നു ഏതൊരമ്മയും ഈ സമയത്ത് ആഗ്രഹിക്കുന്നത് മക്കളുടെ സാന്നിധ്യo തന്നെയാണെന്ന് പടിയിറങ്ങാൻ നേരം മേമയുടെ ഉള്ളം കൈയ്യിലേക്ക് ഞാനാ 2000 ത്തിന്റെ നോട്ട് കൂട്ടി വെച്ചു മുറുക്കിപ്പിടിച്ചപ്പോൾ ആ ഒടിയാത്ത നോട്ട് അതേപടിയെന്നെ തിരികേ ഏൽപ്പിച്ചു കൊണ്ട് മേമ പറയുന്നുണ്ടായിരുന്നു. ” കണ്ണാ എല്ലാർടെം കൂട്ടത്തില് ഈ മേമേനേയും പെടുത്തിയോ നീ , നിനക്ക് അവൾ അമ്മയായിരിക്കാം കണ്ണാ എനിക്കവളെന്റെ കൂടെപ്പിറപ്പാണ്, പണം കൊണ്ട് നേടാനാകാത്ത ഒരുപാട് കാര്യങ്ങളുണ്ട് കണ്ണാ” എന്ന് “കൂടെപ്പിറപ്പിനുള്ള കൂലി എണ്ണിത്തിട്ടപ്പെടുത്താൻ മാത്രം ശക്തി നിന്റെ കൈകൾക്ക് പോരാതെ വരും കണ്ണാ ” എന്ന് സ്നേഹ ബന്ധങ്ങളെയെല്ലാം ഒരേ ത്രാസിൽ അളന്നു തൂക്കിയ എന്നോട് തന്നെ ഒരുപാട് വെറുപ്പു തോന്നിയ നിമിഷങ്ങളായിരുന്നു അത് പൊട്ടിക്കരഞ്ഞുകൊണ്ട് ഞനാ കാലിൽ വീണ് ഒന്നേ പറഞ്ഞുള്ളോ. “മാപ്പ്…….. ചെയ്ത തെറ്റിന് എല്ലാത്തിനും മാപ്പ് ” എന്നെ വാരിയെടുത്ത് ചേർത്തു നിർത്തിയിട്ട് മേമ ഒന്നു കൂടെ പറഞ്ഞു മക്കളില്ലാത്ത ഞാൻ ഇടയ്ക്കൊക്കെ ഞാനിങ്ങോട്ട് വരണത് ആ കുറവ് മറക്കുവാൻ വേണ്ടിത്തന്നെയാണ് എന്ന് നീ എന്റെ പൊന്നു മോനാണ് , എന്റെ ചേച്ചിക്കു പിറന്ന എന്റെ പൊന്നുമോൻ, നിന്നെ കാണാൻ വരാൻ തൽക്കാലം മറ്റൊരാൾടെയും സമ്മതത്തിന്റെ ആവശ്യം ഇന്നെനിക്കാവശ്യമില്ല എന്ന്.
(-നിങ്ങളുടെ സ്വന്തം രചനകൾ വളപ്പൊട്ടുകൾ പേജിൽ ഉൾപ്പെടുത്തുവാൻ പേജ്‌ ഇൻബോക്സിലേക്ക്‌ മെസേജ്‌ അയക്കൂ…)
രചന: ഉണ്ണി കെ പാർത്ഥൻ
“ഇവള് ഇത് എവിടെ പോയി കിടക്കുവാ.. വിളിച്ചിട്ട് എടുക്കുന്നില്ല ലോ..” പലവട്ടം ഫോൺ വിളിച്ചിട്ടും കാൾ അറ്റൻഡ് ചെയ്യാതിരുന്ന ഭാര്യയെ മനസ്സിൽ ആവോളം തെറി വിളിച്ചു കൊണ്ട് സുധി ബസിന്റെ സീറ്റിലേക്ക് ഒന്നുടെ ചാരിയിരുന്നു.. “വാട്സാപ്പ് ചെയ്തു നോക്കാം..” മൊബൈൽ ഒന്നുടെ എടുത്തു നെറ്റ് ഓൺ ചെയ്തു.. “ആഹാ.. ഇവൾ ഓൺലൈനിൽ ഉണ്ടല്ലോ… ഡീ..” സുധി ഒരു മെസ്സേജ് വാട്സാപ്പ് ചെയ്തു.. ഒരു മിനിറ്റ്.. രണ്ട് മിനിറ്റ്.. നിമിഷങ്ങൾ അങ്ങനെ കടന്നു പോയി.. അപ്പുറത്ത് ഓൺലൈൻ തെളിഞ്ഞു കിടപ്പുണ്ട്… “ഡീ..” സുധി ഒന്നുടെ മെസ്സേജ് ചെയ്തു… നോ രെക്ഷ.. “എങ്കിൽ ഒന്നുടെ വിളിച്ചു നോക്കാം..” വാട്സാപ്പ് കാൾ ചെയ്തു… അനക്കമില്ല..
“ഇവള് ഈ മൊബൈലും കു ത്തി ഇരുന്നു ഉറങ്ങിപോയോ…” മനസ്സിൽ ഒന്നുടെ പറഞ്ഞിട്ട് സുധി നോട്ടം തൊട്ടടുത്ത സീറ്റിൽ ഇരിക്കുന്ന ചെറുപ്പകാരന്റെ മൊബൈലിലേക്ക് ഒരു നിമിഷം പാളി നോക്കി.. “ങ്ങേ… ഇത് ദേവി അല്ലേ.. എന്റെ ഭാര്യ.. ഇവളെ എങ്ങനെ ഇയ്യാൾക്ക് അറിയാം..” ആ ചെറുപ്പക്കാരൻ ഇടതടവില്ലാതെ വാട്സാപ്പ് മെസ്സേജ് ദേവിക്ക് അയച്ചു കൊണ്ടേ ഇരിക്കുന്നുണ്ടായിരുന്നു.. അപ്പുറത്ത് നിന്നും ഉരുളക്ക് ഉപ്പേരി പോലേ റിപ്ലൈയും.. “ചേട്ടാ.. ഒരു മിനിറ്റ്.. ആ ഫോൺ ഒന്ന് തരോ.. എന്റെ ഭാര്യക്ക് ഒരു മെസ്സേജ് ഇടാൻ ആണ്..” ആ ചെറുപ്പക്കാരനെ നോക്കി സുധി പതിയേ ചോദിച്ചു… “പിന്നെന്താ.. ദാ ചേട്ടാ ഫോൺ..” വിനീത പുളകിതനായി അയ്യാൾ ഫോൺ സുധിക്ക് നേരെ നീട്ടി.. “ഡീ.. ഞാൻ നിന്നെ കൊറേ നേരമായി വിളിക്കുന്നു… മെസ്സേജ് ഇടുന്നു..
നീ എന്റെ മെസ്സേജ് തുറന്നു നോക്കിയില്ല ലോ.. ഇത് ആരാ നിന്റെ ഫ്രണ്ട് ആണോ.. എന്റെ തൊട്ടടുത്ത സീറ്റിൽ ഇരിക്കുന്നത് കൊണ്ട് ഞാൻ ഈ ചേട്ടന്റെ ഫോൺ വാങ്ങി മെസ്സേജ് ഇടുവാ.. അതേ.. ഞാൻ ഇന്ന് വീട്ടിലേക്ക് വരുന്നുണ്ട്…വൈകുന്നേരം ആവുമ്പോളേക്കും എത്തും ട്ടോ..” മെസ്സേജ് സെന്റ്… “ങ്ങേ..” അപ്പുറത്തു നിന്നു മറുപടി വിത്ത് സ്മൈലി.. “ഓൾക്ക് മനസിലായില്ല ന്ന് തോന്നുന്നു… ചേട്ടാ മ്മക്ക് ഒരു സെൽഫി എടുത്താലോ..” ആ ചെറുപ്പക്കാരനെ ചേർത്ത് പിടിച്ചു സുധി ഒരു സെൽഫി എടുത്തു പിക്ക് ദേവിക്ക് സെന്റ് ചെയ്തു… അപ്പുറം മെസ്സേജ് ഓപ്പൺ ചെയ്തു… അപ്പുറത്ത് നിന്നു ഒരു റിപ്ലൈയും ഇല്ല… “ഓൾടെ നെറ്റ് കഴിഞ്ഞു കാണും.. അതാണ് റിപ്ലൈ ഇല്ലാത്തത്.. സർപ്രൈസ് കൊടുക്കാന്നു കരുതിയതാ.. ഇനി ഇപ്പൊ അത് വേണ്ടാ ലോ…” മൊബൈൽ തിരിച്ചു നൽകി കൊണ്ട് നിഷ്കളങ്കമായി സുധി ആ ചെറുപ്പക്കാരനെ നോക്കി.. “ചേട്ടാ ആളിറങ്ങാൻ ണ്ട്..” ചെറുപ്പക്കാരൻ സീറ്റിൽ നിന്നും ചാടിയെഴുന്നേറ്റ് കണ്ടക്ടറേ നോക്കി ഉറക്കേ വിളിച്ചു പറഞ്ഞു… “ഇനി അടുത്ത സ്റ്റോപ്പ്‌ കൊല്ലത്തു ആണ്..”
കണ്ടക്ടർ വിളിച്ചു പറഞ്ഞു… “അതൊന്നും പറ്റില്ല.. എനിക്ക് ഇവിടെ ഇപ്പൊ ഇറങ്ങണം…” ചെറുപ്പക്കാരൻ ബെൽ അടിച്ചു.. ഡ്രൈവർ വണ്ടി നിർത്തി.. ചെറുപ്പക്കാരൻ ഇറങ്ങി.. തിരിഞ്ഞു നോക്കാതെ ഓടി… സുധി മൊബൈൽ എടുത്തു ഒന്നുടെ ഭാര്യയെ വിളിച്ചു… “നിങ്ങൾ വിളിക്കുന്ന നമ്പർ മറ്റൊരു കോളിൽ ആണ്… ദയവായി അൽപ്പനേരം കഴിഞ്ഞു വിളിക്കുക..” സുധി ഒന്നുടെ വിളിച്ചു… “നിങ്ങൾ വിളിക്കുന്ന നമ്പർ ഇപ്പൊ സ്വിച് ഓഫ് ആണ്.. ദയവായി അൽപ്പ നേരം കഴിഞ്ഞു വിളിക്കുക…” “ഇന്നലെ നല്ല മഴ അല്ലായിരുന്നോ.. ഫോൺ ചാർജ് പോയി കാണും..” അതും പറഞ്ഞു സുധി സീറ്റിലേക്ക് ചാരി കണ്ണുകൾ അടച്ചു… ശുഭം.. ഉണ്ണി കെ പാർത്ഥന്റെ സ്റ്റോറി എന്തേ ഇങ്ങനെ എന്ന് ചോദിക്കുന്നവരോട് മാത്രമായി രണ്ട് വരി.. വിഡ്ഢിത്തത്തോടെ ചില ആശയങ്ങളേ കൂടെ കൂട്ടി നോക്കും.. അത് പണ്ട് മുതലേ ഉള്ള ശീലമാണ്.. സാമാന്യ യുക്തിക്ക് നിരക്കാത്തത് എന്ന് വേണേൽ പറയാം.. എഴുതി നോക്കും.. വായിക്കുന്നവരുടെ അഭിരുചിക്ക് വിടും.. അവരേ കേൾക്കും അതാണ് പതിവ്.. ജീവനുള്ള കഥയുമായി വീണ്ടും കാണാം..
രചന: സജി തൈപ്പറമ്പ്
“ചേട്ടാ.. ഈ സാരിയുടെ ഞൊറിയൊന്ന് പിടിച്ചേ” “പിന്നേ.. എനിക്കതല്ലേ ജോലി ?,ചുരിദാറിട്ടിരുന്നേൽ ഈ പാടുണ്ടായിരുന്നോ? ഈ നേരമില്ലാത്ത നേരത്ത്,സാരിയുടുക്കാൻ നിന്നോടാരെങ്കിലും പറഞ്ഞോ?” “എന്താ ജയേട്ടാ.. ഈ പറയുന്നത്? ഇതൊരു സാധാരണ കല്യാണമല്ലല്ലോ? എൻ്റെ വല്യച്ഛൻ്റെ മകൾടെ കല്യാണമല്ലേ? അവിടെയുള്ളവർക്കൊക്കെ സാരിയെടുത്ത കൂട്ടത്തിൽ എനിക്കും വല്യച്ഛൻ,സാരിയെടുത്ത് തന്നത്, കല്യാണത്തിന് ഉടുക്കാൻ വേണ്ടിയല്ലേ?” ഓഹ് പിന്നേ, സാരിയുടുക്കാൻ പറ്റിയൊരു കോലം, നീയൊന്ന് വേഗമിറങ്ങാൻ നോക്ക് , പുശ്ചത്തോടെ പറഞ്ഞിട്ട് ജയേട്ടൻ പുറത്തേയ്ക്ക് പോയപ്പോൾ ,എനിക്ക് കടുത്ത നിരാശ തോന്നി. രാവിലെ മുതല് തുടങ്ങിയ കഷ്ടപ്പാടാണ് ,നന്നായൊന്ന് ഒരുങ്ങിയിട്ട് എത്ര നാളായി, രണ്ട് കൊല്ലം മുൻപ് അനുജത്തിയുടെ കല്യാണത്തിനാണ് ഇതിന് മുമ്പ് സമയമെടുത്തൊന്ന് ഒരുങ്ങിയത് ,അല്ലാതെയുള്ള എന്ത് ചടങ്ങിന് പോയാലും ജയേട്ടൻ്റെ ധൃതി കാരണം ഏതെങ്കിലുമൊരു ചുരിദാറുമെടുത്തിട്ട് വെളിച്ചെണ്ണ തേച്ച മുടിയൊന്ന് കോതിയൊതുക്കി കണ്ണാടിയിലൊട്ടിച്ചിരിക്കുന്ന ഒരു പൊട്ടുമെടുത്ത് നെറ്റിയിലൊട്ടിച്ചിട്ട് വേഗം ഇറങ്ങാറാണ് പതിവ്, ഇതിപ്പോൾ പുറം നാട്ടിലൊക്കെ പോയിട്ട് വന്ന കസിൻസെല്ലാം കെട്ടിയൊരുങ്ങി വരുമെന്നറിയാവുന്നത് കൊണ്ട് ,അവരുടെ മുന്നിൽ ചെറുതാവണ്ടന്ന് കരുതിയാണ്, ഇന്നലെ രാത്രി മുതൽ പോയസൗന്ദര്യമൊന്ന് തിരിച്ച് പിടിക്കാനുള്ള ശ്രമം തുടങ്ങിയത് രാത്രി തന്നെ പറമ്പിൽ നിന്ന് കറ്റാർവാഴയുടെ തണ്ട് മുറിച്ചെടുത്ത്, തൊലി കളഞ്ഞ്, അതിൻ്റെ മുകളിൽ അരിപ്പൊടി വിതറി മുഖത്ത് തേച്ച് വച്ചു, ഏറെ നേരം കഴിഞ്ഞു് അത് കഴുകിയതിന് ശേഷമാണ്, ഇന്നലെ ഉറങ്ങാൻ കിടന്നത് തന്നെ എന്നിട്ട് അതിരാവിലെയെഴുന്നേറ്റ് ബാക്കിയുണ്ടായിരുന്ന കറ്റാർവാഴയുടെ ജെല്ലെടുത്ത് ജ്യൂസാക്കി, തലയിൽ തേച്ച് പിടിപ്പിച്ചു ,മുടിക്ക് തിളക്കം കിട്ടുമെന്നാരോ മുമ്പ് പറഞ്ഞത് കൊണ്ടാണങ്ങനെ ചെയ്തത് അങ്ങേതിലെ ശോഭേച്ചി മിക്കപ്പോഴും ബ്യൂട്ടി പാർലറിൽ പോകുമ്പോൾ ചോദിക്കാറുണ്ട്, ഗീതയ്ക്ക് ബ്യൂട്ടി പാർലറിലൊന്നും പോകാൻ താല്പര്യമില്ലേന്ന്?
തൻ്റെ നല്ല തിക്നസ്സുള്ള മുടിയല്ലേ? ഒന്ന് സ്ട്രെയ്റ്റ് ചെയ്തിട്ടിരുന്നേൽ നല്ല വെറ്റായി കിടന്നേനെയെന്ന് അത് കേട്ടപ്പോഴെനിക്ക് ആത്മനിന്ദയാണ് തോന്നി . ഏത് പെണ്ണുങ്ങൾക്കാണ്, ബ്യൂട്ടി പാർലറിൽ പോകാനും, ഫേഷ്യല് ചെയ്യാനും ,മുടിയൊന്ന് സ്ട്രെയ്റ്റ് ചെയ്യാനുമൊക്കെ ആഗ്രഹമില്ലാത്തത്? ,പക്ഷേ അതിനൊക്കെ സപ്പോർട്ട് ചെയ്യുന്നൊരു ഹസ്ബൻ്റ് കൂടിയുണ്ടാവണ്ടെ? വെറും മുപ്പത് രൂപാ മുടക്കി പുരികമൊന്ന് ത്രെഡ് ചെയ്യാൻ പോലും, പുള്ളിക്കാരൻ പൈസ തരില്ല, പഠിക്കാൻ പോയ സമയത്ത്, അമ്മ ഒരുപാട് പറഞ്ഞതാണ്, മോളേ.. നീയെങ്കിലും പഠിച്ച് ഒരു ജോലി വാങ്ങാൻ നോക്ക്, ഇല്ലെങ്കിൽ കല്യാണം കഴിയുമ്പോൾ ,അമ്മയെ പോലെ സ്വന്തം ആവശ്യങ്ങൾക്കെല്ലാം ഭർത്താവിൻ്റെ മുന്നിൽ കൈ നീട്ടി നില്ക്കേണ്ടി വരുമെന്ന് , ആര് കേൾക്കാൻ ? അതിൻ്റെയാണീ അനുഭവിക്കുന്നത്, ഞാനൊരുവിധം സാരി അരക്കെട്ടിലുറപ്പിച്ചു. അമ്പലത്തിൽ വച്ചായിരുന്നു വിവാഹം അവിടെ ചെന്നയുടനെ എന്നെയും മക്കളെയും മണ്ഡപത്തിലേക്ക് പറഞ്ഞ് വിട്ടിട്ട് ജയേട്ടൻ കൂട്ടുകാരുടെയടുത്തേയ്ക്ക് പോയി. ഹായ് നാത്തൂനെ, ഇതെന്തായീ കാണുന്നത്? കാവിലെ ഭഗവതി നേരിട്ടിറങ്ങി വന്നതോ ? ചുവന്ന പട്ട് സാരി, നാത്തൂന് നന്നായി ചേരുന്നുണ്ട് കെട്ടോ? വല്യച്ഛൻ്റെ ഇളയ മരുമകള് വന്നെന്നോടങ്ങനെ പറഞ്ഞപ്പോൾ മനസ്സിനൊരു കുളിർമ്മ തോന്നി ,അവളങ്ങനെ ആരെയും പുകഴ്ത്തിപ്പറയുന്നൊരാളല്ല ങ്ഹാ ഗീതേച്ചി… പൊളിച്ചല്ലോ ? നിങ്ങൾക്കൊരു പത്ത് വയസ്സ് കുറഞ്ഞിട്ടുണ്ട്, ഗീതേച്ചി വെളുത്തതായത് കൊണ്ടാവാം ചുവപ്പ് നിറം നന്നായി മാച്ച് ചെയ്യുന്നുണ്ട്, അത് മാത്രമല്ല രശ്മി ,ഗീതേച്ചിക്ക് നല്ല ബോഡി ഷെയ്പുള്ളത് കൊണ്ട് സാരി നന്നായി ചേരുന്നുമുണ്ട് എൻ്റെ കൃഷ്ണാ … എനിക്കിനി മരിച്ചാലും വേണ്ടില്ല ബാംഗ്ളൂരിൽ മോഡലിങ്ങ് ചെയ്യുന്ന അമ്മാവൻ്റെ മക്കളാണത് പറഞ്ഞത് ഇതിൽപരം ഈയുള്ളവർക്ക് മറ്റൊന്നും വേണ്ട അതോടെ എൻ്റെ മൂഡ് ഔട്ടെല്ലാം മാറി. താലികെട്ടും, സദ്യയുമൊക്കെ കഴിഞ്ഞപ്പോൾ തിരിച്ച് പോകാൻ ജയേട്ടൻ ധൃതിവച്ചു. കുറച്ച് കൂടി നില്ക്ക് ജയേട്ടാ… ഇത്രവേഗം തിരിച്ച് പോകാൻ നമ്മള് അന്യരൊന്നുമല്ലല്ലോ? മനസ്സില്ലാ മനസ്സോടെയാണെങ്കിലും പുള്ളിക്കാരൻ കുറച്ച് നേരം കൂടി നിന്നു.
നാല് മണിയായപ്പോൾ ജയേട്ടന് പോയിട്ട് തിരക്കുണ്ടെന്ന് വല്യച്ഛനോട് കളവ് പറഞ്ഞിട്ട് ഞങ്ങളവിടുന്നിറങ്ങി. ഗീതേ .. നീ മുന്നിലോട്ടിരിക്ക് മക്കള് രണ്ട് പേരും കൂടി പിന്നിലിരുന്നോളും കാറിൻ്റെ പിൻഡോറ് തുറക്കാനൊരുങ്ങിയ എന്നോടത് പറഞ്ഞത്, ജയേട്ടൻ തന്നെയാണോ,? എന്ന് വിശ്വസിക്കാനാവാതെ ആ മുഖത്തേയ്ക്ക് ഞാൻ പകച്ച് നോക്കി . കുറച്ച് നാളുകളായി പത്താം ക്ളാസ്സിൽ പഠിക്കുന്ന മൂത്ത മകനാണ്, എന്നും ഇടത് വശത്തെ ഫ്രണ്ട് സീറ്റിലിരിക്കുന്നത്, ഒരു ദിവസം അവനോട് ഞാൻ ബാക്ക് സീറ്റിലേക്കിരിക്കാൻ പറഞ്ഞപ്പോൾ ജയേട്ടൻ സമ്മതിച്ചില്ല നിനക്ക് മുന്നിൽ തന്നെയിരിക്കണമെന്ന് ഇത്ര നിർബന്ധമെന്താണ്? ആ ചോദ്യം അന്നെന്നെ വല്ലാതെ വേദനിപ്പിച്ചിരുന്നു. വേണ്ട, ഞാനിവിടെ തന്നെയിരുന്ന് കൊള്ളാം ഉള്ളിലെ സന്തോഷം മറച്ച് പിടിച്ച്, ഞാൻ വെറുതെയൊരു നമ്പരിറക്കി. ഹാ, പറയുന്നത് കേൾക്ക് ഗീതേ .. എനിക്കത് മതിയായിരുന്നു, എൻ്റെ ഭർത്താവ് എന്നെ നിർബന്ധിച്ചാലേ, ഞാനിനി മുൻ സീറ്റിലിരിക്കു, എന്നൊരു പിടിവാശി എനിക്കന്നുണ്ടായിരുന്നു. അല്ല, നമ്മളിതെങ്ങോട്ടാ പോകുന്നത് ? വീട്ടിലേക്കുള്ള റോഡിലേക്ക് തിരിയാതെ, കാറ് ഹൈവേയിലൂടെ തന്നെ സഞ്ചരിക്കുന്നത് കണ്ട് ,ഞാൻ ജിജ്ഞാസയോടെ ചോദിച്ചു. നീയെപ്പോഴും പറയാറില്ലേ ? ഞാൻ വർക്ക് ചെയ്യുന്ന കമ്പനിയിൽ, ഒരിക്കലൊന്ന് പോകണമെന്നും, അവിടുള്ളവരെയൊക്കെ ഒന്ന് പരിചയപ്പെടണമെന്നുമൊക്കെ അയ്യോ അങ്ങോട്ടാണോ പോകുന്നത്? ,ജയേട്ടാ .. ഞാനീ പട്ട് സാരിയൊക്കെയുടുത്ത് വന്നാൽ ,അവരെന്ത് വിചാരിക്കും? നമുക്ക് വേറൊരു ദിവസം പോകാം ഹേയ് അതൊന്നും സാരമില്ല, ഇന്നാണ് അതിന് പറ്റിയ ദിവസം ഈ മനുഷ്യനിതെന്ത് പറ്റി? ആകെയൊരു മാറ്റം ?
എൻ്റെ ജിജ്ഞാസ വർദ്ധിച്ചു. അങ്ങനെ കുറെ നാള് കൊണ്ടുള്ള ആഗ്രഹം സാധിച്ചു. കമ്പനിയിലുള്ള ജയേട്ടൻ്റെ സബ്ഓർഡിനേറ്റ്സൊക്കെ എന്നെ ,മാഡം എന്ന് വിളിച്ച് സംബോധന ചെയ്തപ്പോൾ, ഞാനങ്ങ് വല്ലാതായി. അവിടുന്നിറങ്ങിയിട്ടും, വീട്ടിലേക്ക് പോകാതെ, ജയേട്ടൻ ഞങ്ങളെയും കൊണ്ട് നേരെ ബീച്ചിലേക്കാണ് പോയത്, ൻ്റെ കൃഷ്ണാ… ഇന്ന് മൊത്തം സർപ്രൈസുകളാണല്ലോ? എല്ലാ ദിവസവും, ഈ മനുഷ്യന് ഇങ്ങനെ തോന്നിയിരുന്നെങ്കിയെന്ന്, ഞാൻ വല്ലാതെ കൊതിച്ച് പോയി. ഞാനൊരു കാര്യം ചോദിച്ചാൽ, സത്യം പറയുമോ ? രാത്രിയിൽ ജയേട്ടനൊപ്പം കട്ടിലിൽ കിടക്കുമ്പോൾ, ഞാനദ്ദേഹത്തോട് ചോദിച്ചു ഉം ചോദിക്ക്, ഇന്നെന്താ ജയേട്ടന് പറ്റിയത്? ഇപ്പഴും എനിക്ക്, ഒന്നുമങ്ങട്ട് വിശ്വസിക്കാനാവുന്നില്ല, ചില തിരിച്ചറിവുകളുണ്ടാകുന്നത് മറ്റുള്ളവരിൽ നിന്നാണ് ,കല്യാണ പന്തലിൽ വച്ച് ,എനിക്കങ്ങനെയൊരു തിരിച്ചറിവ് കിട്ടി ,ഇപ്പോൾ നീ അത്രയും മനസ്സിലാക്കിയാൽ മതി. ################### അതാരാ ചേട്ടാ… ആ ചുവന്ന സാരിയുടുത്ത് നില്ക്കുന്നത്, എന്തൊരു ലുക്കാണ് ആ ചേച്ചിക്ക്? അറിയില്ലെടാ, പക്ഷേ ഒരു കാര്യം ഉറപ്പാണ്, ഏതോ ഭാഗ്യം ചെയ്തവൻ്റെ ഭാര്യയാണ് , ഈശ്വരാ … നമുക്കൊന്നും നീ ഇത് പോലൊരു ഭാര്യയെ തന്നില്ലല്ലോ? ശരിയാ ചേട്ടാ… ഇതിനെയൊക്കെ കാണുമ്പോഴാണ് ,സുരാജേട്ടൻ പറഞ്ഞത് പോലെ വീട്ടിലിരിക്കുന്നതിനെയെടുത്ത് കിണറ്റിലെറിയാൻ തോന്നുന്നത് #################### കല്യാണ പന്തലിൽ വച്ച് ,ഗീതയെ ചൂണ്ടിക്കാണിച്ച്, ക്യാമറാമാൻ്റെ സഹായിയായ പയ്യൻ ചോദിച്ച സംശയവും, അതിനയാൾ കൊടുത്ത മറുപടിയുമാണ്, തന്നിലുണ്ടായ മാറ്റത്തിന് കാരണമെന്ന് അയാൾ ഗീതയോട് പറഞ്ഞില്ല. NB :- ശരീരത്തിൽ കസ്തൂരിയുണ്ടെന്നറിയാതെ അതിൻ്റെ സുഗന്ധമന്വേഷിച്ച് നടക്കുന്ന മാനുകളെ പോലെയാണ് ചില പുരുഷൻമാർ, എന്ന് പറയാതെ വയ്യ ലൈക്ക് കമന്റ് ചെയ്യണേ…
രചന: Anu Swaroop
വീട്ടിലെ രണ്ടുപെണ്മക്കളിൽ ഇളയത് ആണെങ്കിലും വീട്ടുകാർക്ക് എന്നും ഒരു ഭാരം ആയിരുന്നു ഞാൻ,, ഞാൻ ജനിച്ചു പിറ്റേദിവസം ഒരു ആക്സിഡന്റ് പറ്റി അച്ഛൻ മരിച്ചു എന്ന കാരണം പറഞ്ഞു ആയിരുന്നു എന്നെ വീട്ടിലെ ഭാഗ്യദോഷി ആക്കിയത്, അമ്മക്ക് എന്നും പ്രിയപെട്ടവൾ ചേച്ചി തന്നെ ആയിരുന്നു, അമ്മയുടെ ഓരോ വാക്കിലും, പ്രവർത്തിയിലും അത് പ്രകടമായിരുന്നു എന്നേക്കാൾ രണ്ടു വയസ്സിനു മൂത്ത ചേച്ചി സ്കൂൾ പഠനം കഴിഞ്ഞു പട്ടണത്തിലെ കോളേജിൽ പോയപ്പോൾ ഞാനും ഒരുപാട് ആഗ്രഹിച്ചു,, പെൺകുട്ടികൾ പഠിച്ചിട്ട് എന്ത് കിട്ടാനാ എന്നുള്ള ചോദ്യം ആയിരുന്നു മറുപടി,.. അമ്മയെ വിധവയാക്കിയവൾ എന്ന പട്ടം നേരത്തെ ചാർത്തി കിട്ടിയതിനാൽ ബാല്യത്തിന്റെ നിറവും സ്വപ്നങ്ങളും ഒക്കെ എന്നേ പൊഴിഞ്ഞു പോയിരുന്നു,.. അമ്മയും ചേച്ചിയും ഉണ്ടായിട്ടും ഒരിറ്റ് സ്നേഹം തരാൻ ആരും ഇല്ലാതെ ഒറ്റപെട്ട ജീവിതം ആയിരുന്നു എന്നും,,.. കുത്തുവാക്കുകളും, ശാപവാക്കുകളും കേട്ടു കണ്ണുനീര് തുടക്കാൻ വേണ്ടി മാത്രം ഒരു ജന്മം,, എന്റെ ജന്മത്തെ ഞാൻ തന്നെ വെറുത്ത ദിനങ്ങൾ,,
ഗ്രാമത്തിലെ തയ്യൽ യൂണിറ്റിലെ തയ്യൽ പഠിത്തവും, വീട്ടിലെ അടുക്കളജോലിയും ആയിരുന്നു അമ്മ എനിക്ക് വേണ്ടി കരുതി വെച്ചിരുന്നത്… ഡിഗ്രി കഴിഞ്ഞു ഇറങ്ങിയ ചേച്ചിക്ക് വേണ്ടി വിവാഹആലോചന തുടങ്ങിയപ്പോൾ ആണ് അമ്മക്ക് ഞാൻ വീണ്ടും ഒരു ബാധ്യത ആവുന്നത്..,, കടമ തീർക്കാൻ എന്ന പേരിൽ ഇരുപത്തിരണ്ടുകാരിയായ തന്നെക്കാൾ ഇരട്ടി പ്രായം ഉള്ള ഒരാളെ ആയിരുന്നു അമ്മ കണ്ടെത്തിയത്,, മറ്റ് ആരുടെയോ നിർബന്ധത്തിൽ ആണ് അയാൾ ഈ വിവാഹത്തിന് സമ്മതിച്ചതെന്ന് ഒറ്റ നോട്ടത്തിൽ തന്നെ തോന്നിക്കും വിധം ആയിരുന്നു അയാളുടെ പെരുമാറ്റം, അത് അമ്മയോട് സൂചിപ്പിച്ച എന്നെ ചേച്ചിയുടെ മുന്നിൽ വെച്ചു തന്നെ പരിഹസിച്ചു വിട്ടു..,, “പിറന്നു വീണതെ എന്റെ താലിചരടും നെറ്റിയിലെ സിന്ദൂരവും മായിച്ചു, ഇനി കഴുത്തിൽ താലി ചാർത്തുന്നവന് എന്തൊക്കെയാണാവോ വരാൻ പോകുന്നത്” അമ്മയുടെ ആക്രോശത്തിനു മുന്നിൽ ഒന്നും പറയാൻ ഇല്ലാതെ തലയും താഴ്ത്തി മിണ്ടാതെ പോരേണ്ടി വന്നു എനിക്ക്,,, രണ്ടുമാസത്തിനപ്പുറം ചേച്ചിയോടൊപ്പം അണിഞ്ഞൊരുങ്ങി മനസ്സിൽ നിറയെ ഭയശങ്കകളോടെ മുഹൂർത്തം പ്രതീക്ഷിച്ചു കാത്തിരിക്കുമ്പോൾ ആണ് വീടിനുള്ളിൽ അടക്കിപിടിച്ച സംസാരവും, കുശുകുശുക്കലും കേട്ടത്… എന്തോ പ്രശ്നം ഉണ്ടെന്നു കൂടെ ഉണ്ടാരുന്നവരുടെ മുഖത്ത് നിന്നും മനസ്സിൽ ആക്കാൻ കഴിഞ്ഞു, ചോദിച്ചിട്ട് ആരും ഒന്നും പറയുന്നില്ല,,
മുറിക്കുള്ളിൽ കൂടി നിന്നവർ ഓരോരുത്തരായി പുറത്തേക്കു ഇറങ്ങി പൊയ്‌കൊണ്ടിരുന്നു എന്താ സംഭവിച്ചേ എന്നു അറിയാൻ ഉള്ള ആകാംഷ കൊണ്ടു ഇരുന്നിടത്തുനിന്നും എഴുന്നേറ്റു വാതിലിനു നേർക്കു നടക്കാൻ തുടങ്ങിയപ്പോൾ ആണ് അമ്മ കൊടുംകാറ്റ് പോലെ ഉള്ളിലേക്ക് കയറി വന്നത്,,… “എന്നോട് എല്ലാവരും പറഞ്ഞതാ ഈ അശ്രീകരത്തെ എന്റെ മോളുടെ കൂടെ പന്തലിൽ ഇറക്കണ്ട എന്നു.., അന്ന് ഞാൻ അത് കേട്ടില്ല,അത് എന്റെ തെറ്റ്‌..,,നിന്നെ താലികെട്ടാൻ വരാം എന്നു സമ്മതിച്ചവൻ വേറെ ഒരു പെണ്ണിനേയും കൊണ്ടു ഓടി പോയെടി… പെൺകുട്ടികൾ ആയാൽ കുറച്ചു ഒക്കെ ഭാഗ്യം വേണം,.. നിനക്കിപ്പോൾ മതിയായല്ലോ എല്ലാം, എന്റെ കുഞ്ഞിന്റെ ജീവിതം കൂടി നീ കാരണം നശിക്കുമല്ലോ എന്റെ ദേവിയെ….” അമ്മേ ഞാൻ….പറയാൻ വന്നത് മുഴുവൻ ആക്കാൻ കഴിയാതെ നിന്നു പോയി താൻ..,, അമ്മ അലമുറ ഇട്ടു കരഞ്ഞു കൊണ്ടിരുന്നു,,
“ലീലേടത്തി… ഇങ്ങനെ കരഞ്ഞു ബഹളം വെച്ചിട്ട് കാര്യം ഒന്നും ഇല്ലല്ലോ?? പ്രശ്നം പരിഹരിക്കാൻ ഉള്ള വഴി അല്ലെ നോക്കണ്ടത് നമ്മൾ… നിങ്ങൾക്ക് സമ്മതം ആണെങ്കിൽ ഒരു പയ്യൻ ഉണ്ട് ഞങ്ങളുടെ കൂടെ, മുഹൂർത്തം തെറ്റാതെ നമുക്ക് നടത്താം ഇത്,.. പയ്യന്റെ അമ്മാവന്റെ മകൻ ആണ് ഇത്, എല്ലാ കാര്യങ്ങൾക്കും അവൻ കൂടെ ഉണ്ടാരുന്നത് കൊണ്ടു ഇനി ഒരു ചർച്ചയുടെ ആവശ്യം വരുന്നില്ല” “അത് വേണോ?? എന്നുള്ള അമ്മയുടെ ചോദ്യത്തിന് അകത്തേക്ക് കയറി വന്ന എന്റെ പ്രിയപ്പെട്ടവൻ തന്നെ ആയിരുന്നു ഉത്തരം കൊടുത്തത്…. “വേണം എനിക്ക് ഇഷ്ടാ ഈ പെൺകുട്ടിയെ…
അവളെ എനിക്ക് തന്നേരെ അമ്മേ….,,,” മഞ്ഞനൂലിൽ കോർത്ത താലി കഴുത്തിൽ ചാർത്തി തന്നു, ഹാരവും അണിയിച്ചു, നെറ്റിയിൽ സിന്ദൂരവും തൊടുവിച്ചു തന്നു, കയ്യോട് കയ്യ് ചേർത്തു പിടിച്ചു മണ്ഡപം ചുറ്റുന്ന ഞങ്ങളെ എവിടെ നിന്നോ വന്ന ഒരിളം കാറ്റ് തഴുകി കടന്നു പോയി…ആ കാറ്റു എന്റെ ചെവിയിൽ പറഞ്ഞു മോളെ അച്ഛന്റെ അനുഗ്രഹം എന്നും മോൾക്ക്‌ ഉണ്ടാവും എന്നു…… അത് അങ്ങനെയാണ് ആരും ഇല്ലാത്തവർക്ക് ദൈവം ഉണ്ടാകും എന്തിനും.. ഏതിനും കൂടെ..,,, ലൈക്ക് ചെയ്ത് അഭിപ്രായങ്ങൾ അറിയിക്കൂ… നിങ്ങളുടെ സ്വന്തം രചനകൾ പേജിലേക്ക് അയച്ചു തരിക…