Connect with us

ബന്ധങ്ങൾ

ഞാൻ നിരീക്ഷണത്തിലാണ്… അവരും!

Published

on

രചന: സാനി മേരി ജോൺ

ഞാൻ നിരീക്ഷണത്തിലാണ്… അവരും! കല്യാണ പിറ്റേന്ന്, അതിരാവിലെ തന്നെ കുളിച്ചൊരുങ്ങി ,ഉറങ്ങി കിടക്കുന്ന അച്ചായനെ പ്രേമപൂർവമൊന്നു നോക്കി, ഞാനടുക്കളയിലേക്കു നടന്നു. പഠിപ്പും പത്രാസുമുണ്ടേലുമില്ലേലും, പെണ്ണുങ്ങൾക്ക്, അതിപ്പം മണവാട്ടിയാണേലും, അടുക്കള തന്നെ ശരണമെന്ന അലംഘിത നിയമം അടിവരയിട്ടു കൊണ്ട്…. കെട്ടുറപ്പിച്ച നാള് മുതൽ സ്വന്തം അമ്മച്ചി നാഴികക്ക് നാൽപ്പതു വട്ടം എന്നെ ഓർമ്മിപ്പിക്കുമായിരുന്നു “എടീ പെണ്ണേ, കെട്ടിയവന്റെ വീട്ടിൽ ചെന്നാൽ പോത്തു പോലെ ഉറങ്ങി കളയരുത്. അവര് നിന്നെ എടുത്തിട്ട് പെരുമാറും.കുട്ടിക്കളിയൊക്കെയങ് മാറ്റിയേര്” അടുക്കളയിലേക്ക് പ്രവേശിക്കുമ്പോൾ,കുളി കഴിഞ്ഞു പിന്നിൽ വിടർത്തിയിട്ടിരിക്കുന്ന നീണ്ട സമൃദ്ധമായ മുടിയിൽ നിന്നും വെള്ളം ഇറ്റിറ്റായി വീണു കൊണ്ടിരുന്നു.ആദ്യ ദിവസത്തെ അടുക്കള പ്രവേശനത്തിന് കാല താമസം വന്നാലോയെന്ന് ഭയന്ന് മുടി ശരിക്കൊന്നു തുവർത്തി കൂടിയില്ല . നനഞ്ഞ്, തലയോടൊട്ടിക്കിടക്കുന്ന മുടി കണ്ടിട്ടും അമ്മായി അമ്മക്ക് സംശയം- “മോളെ, കുളിച്ചിട്ടല്ലേ നീ അടുക്കളേല് കേറീത് ?” പിന്നിൽ കിടന്ന നനഞ്ഞ മുടി അമ്മ നല്ലവണ്ണം കണ്ടോട്ടെയെന്ന മട്ടിൽ മുന്നിലേക്കെടുത്തിട്ട് മുഖത്ത് ലേശം നാണം വരുത്തി , ഞാൻ തലയാട്ടി. മുടി എടുപിടീന്ന് മുന്നിലേക്കിട്ടപ്പോൾ രണ്ടു തുള്ളി വെള്ളം അമ്മയുടെ ദേഹത്തേക്ക്തെറിച്ചു വീണു. പുരികമൊന്ന് ചുളിച്ചു, അവരെന്റെ മുടിയിലേക്കു നോക്കി. “വെള്ളം മാറി കുളിച്ചതാണേ . തല നന്നായി തുവർത്തിക്കോ കൊച്ചേ. വെറുതെ പാട്ക്കേടൊന്നും വരുത്തിവെക്കണ്ട ” ഈ നേരം കൊണ്ട് ഞാനമ്മയുടെ ചന്ദ്രക്കല പോലെ തിളങ്ങുന്ന, കഷണ്ടി കയറി തുടങ്ങിയ വിശാലമായ നെറ്റിയിൽ, തെളിഞ്ഞു കാണുന്ന നരച്ച മുടിയിലേക്കു നോക്കി. പെണ്ണ് കാണാൻ വന്നപ്പോൾ ഈ നരകൾ കണ്ടില്ലായിരുന്നു. ഒരു പക്ഷെഹെയർ ഡൈയിൽ വിദഗ്ദമായ് ഒളിപ്പിച്ചു കാണും. എന്തായാലും എന്റെമ്മച്ചിയെക്കാൾ നല്ല പ്രായമുണ്ട്. ഇവിടത്തെ അമ്മക്കെന്നാ പ്രായമുണ്ടെന്നു കല്യാണം ഉറപ്പു കഴിഞ്ഞ നാൾ മുതൽ അമ്മച്ചിക്ക് സംശയം. രണ്ടു ദിവസം കഴിയുമ്പോൾ അമ്മായിഅമ്മയോട് ഒന്നും രണ്ടും മിണ്ടീം പറഞ്ഞും സൂത്രത്തിൽ വയസ് ചോദിച്ചറിയണം. അതറിയുമ്പോൾ മൂത്തമകൾ കെട്ടി പോയതിന്റെ മനപ്രയാസം വല്ലതുമുണ്ടേൽ എന്റെ അമ്മച്ചിക്കങ്ങു തീരും. അടുപ്പിൽ നിന്നും തിളച്ചു കൊണ്ടിരുന്ന ചായ പാത്രം, ഒരു തട തുണിയുടെ സഹായം പോലുമില്ലാതെ അമ്മ കൂളായെടുത്തു ഗ്ലാസ്സിലേക്കു പകർന്നു. ഇടം കണ്ണിലൂടെ ഞാനവരുടെ കൈ വെള്ള നോക്കി കണ്ടു .

ചൂട് പാത്രമെടുത്തിട്ടും കൈ ഒരു നുള്ള് പോലും ചുവന്നിട്ടില്ല. പണി ചെയ്തു തഴമ്പ് വീണ കൈകൾ. നോക്കീം കണ്ടും നിന്നാലെനിക്കു തന്നെ കൊള്ളാം. അല്ലേൽ ആ കൈ കൊണ്ട് ഒന്ന് കൊണ്ടാൽ ജീവിതം പാഴാവും. “കൊണ്ട് പോയി അവനു കൊട് കൊച്ചേ.അവനുണരുമ്പോൾ തന്നെ ചായ വേണം. നല്ല ചൂടോടെ ..” ചായ ഗ്ളാസ് പിടിക്കാൻ വലതു കൈ നീട്ടിയപ്പോൾ അമ്മ ,അത് ശ്രദ്ധിക്കാതെ ഗ്ലാസ് അടുക്കളയുടെ പാതകത്തിൽ വെച്ചിട്ടെന്റെ കൈയിൽ പിടിച്ചു . അപ്രതീക്ഷിതമായ അവരുടെ കരുത്തുറ്റ കൈകളുടെ സ്പർശം ഞെട്ടലുളവാക്കി.മുരുക്ക് മരത്തിൽ പിടിച്ച പോലെ. ഞാനതു പുറത്തു കാണിക്കാതെ സംയമനം പാലിച്ചു. ” അല്ല മോളേ , കല്യാണ മോതിരമെന്തിയേ ? അവന്റെ പേരെഴുതിയതേ ” ഒരുപാട് ആഭരങ്ങളണിഞ്ഞു നടന്നെനിക്കു പതിവില്ല. ഉറങ്ങാൻ നേരത്തും കുളിക്കാൻ നേരത്തും പ്രത്യേകിച്ചും . കുളിക്കാൻ നേരം ഊരിവെച്ച കല്യാണ മോതിരം കുളി കഴിഞ്ഞ് എടുത്തണിയാഞ്ഞതു തെറ്റ് തന്നെ. “ അയ്യോ അമ്മച്ചി.. കുളിക്കാൻ നേരത്തു ഞാനതു ..” “എന്നാൽ മതി. ഞാനങ്ങു പേടിച്ചു പോയി.. മോള് വേഗം പോയി എടുത്തിട്. ഇനിയിപ്പം ആരേലുമൊക്കെ കാണാൻ വരും. നൂറ് ചോദ്യങ്ങളുമുണ്ടാവും.പെണ്ണിന്റെ പൊന്നെല്ലാം കെട്ടി വന്ന പിറ്റേന്ന് തന്നെ അമ്മായിഅമ്മ പെട്ടിയിലാക്കിയെന്നവരെ കൊണ്ട് വെറുതെ പറയിക്കണ്ട. എല്ലാമെടുത്തിട്ടോ .കാണുന്നവർക്കു കണ്ണ് തെളിയട്ടെ ” തലകുലുക്കി അതും സമ്മതിച്ച് ചായയുമായി മുറിയിലേക്ക് നടന്നു. അപ്പോഴാണ് അച്ചായന്റെ ഏറ്റവും മൂത്ത ചേച്ചി അടുക്കളയിലേക്കു പ്രവേശിക്കുന്നത്- പുഷ്പി നാത്തൂൻ. പേരിൽ മാത്രമേ പുഷ്പമുള്ളൂ. നല്ല വണ്ണവും പൊക്കവും പോരാത്തതിന് കരിക്കട്ട പോലുള്ള നിറവും . എന്നെ കണ്ടപ്പോൾ വെളുക്കനെയവർ ചിരിച്ചെങ്കിലും ,അവരമ്മയോട് പറഞ്ഞത് എന്റെ ചങ്കിൽ തന്നെ കൊണ്ടു. പുതുപ്പെണ്ണു രണ്ടു കണ്ണും കാതും തുറന്നു പിടിക്കണമല്ലോ? വായ അടച്ചും. ” നമ്മള് കാണാൻ ചെന്നപ്പം മെറ്റിക്കിതിലും നല്ല നിറമുണ്ടായിരുന്നില്ലേ അമ്മേ ?” കല്യാണ പിറ്റേന്ന് തന്നെ നാത്തൂന്റെ പോര് തുടങ്ങി. അതും ഏത് പെണ്ണും പൊറുക്കാത്ത അവളുടെ ചന്തത്തിൽ തന്നെ കുത്തിക്കൊണ്ട്. ഇന്നലെ രാത്രി അച്ചായൻ ചേർത്ത് നിർത്തി പറഞ്ഞത് തന്നെ നമ്മളും രാവും പകലും പോലുണ്ടല്ലേ മെറ്റീന്നാ. കല്യാണ തിരക്കിലും വീട് വിട്ടു പോരുന്ന മനഃപ്രയാസത്തിലും ഞാൻ മൊത്തമൊന്നു വാടി പോയതാണെന്ന് ഈ കരിമന്തിയെ ആര് പറഞ്ഞു മനസിലാക്കും? എന്നതായാലും എന്റെ മുഖമൊന്നു വാടി. അത് ചായ വാങ്ങി കുടിച്ച അച്ചായൻ കണ്ട് പിടിക്കുകയും ചെയ്തു.** എട്ട് മണിയോടെ എല്ലാവരും കൂടെ പ്രാതലിനിരുന്നു. അമ്മയും ചേച്ചിയും വിളമ്പാൻ നിന്നപ്പോൾ അവരുടെ കൂടെ നിന്ന എന്നെയവർ ബലമായി പിടിച്ചു അച്ചായനരികെയിരുത്തി. അമ്മച്ചി സ്നേഹപൂർവ്വം എന്റെ പാത്രത്തിലേക്കു മൂന്ന് വെള്ളയപ്പവും മുട്ട കറിയും വിളമ്പി. :” യ്യോ .. വേണ്ടമ്മേ രണ്ടെണ്ണം തന്നെ കൂടുതലാണ് ? “ “ രണ്ടപ്പം തിന്നിട്ടാണോ ഈ തടി? “ അച്ചായന്റെ കല്യാണം കൂടാൻ വന്നിട്ട് ഇനി എന്റെ പേറും കൂടെയെടുക്കാൻ അവിടെ തന്നെ താമസമാക്കിയ അമ്മയുടെ വകയിലെ അകന്ന ബന്ധുവിന്റെ കമന്റ് . അവരുടെ മുഖമൊന്ന് കാണാനായ് ഞാൻ മുഖമുയർത്തി .പക്ഷെ പാത്രത്തിൽ അടുക്കടുക്കായ് വെച്ചിരുന്ന അപ്പം കൊണ്ട് അവരുടെ മുഖത്തിന്റെ കാഴ്ച അപൂർണ്ണം. എന്നാലും, കല്യാണത്തിന് ഈർക്കിലിയിൽ സാരി ചുറ്റിയ പോലെ ഓടി നടന്ന അവരെയെനിക്ക് നല്ല ഓർമ്മയുണ്ട്. ഇത്ര തിന്നിട്ടും ദേഹം കൊഴുക്കാത്തത് കൈയ്യിലിരിപ്പ് തന്നെ. വിവാഹത്തിന്റെ ആദ്യനാളുകൾ പുതുമണവാട്ടിയുടെ ക്ഷമയുടെ പരീക്ഷണ കാലവും മറ്റുള്ളവർക്കവളെ അടിമുടി നിരീക്ഷിക്കാനുള്ള കാലവുമാണ് . പ്രാതൽ കഴിഞ്ഞു ഡൈനിങ്ങ് റൂമിന്റെ സൈഡിലുള്ള വാഷ് ബേസിനിൽ കൈ കഴുകുന്ന എന്നോട് അമ്മ പറഞ്ഞു- “ മോള് പോയി ഈ സാരി മാറ്റി നല്ലൊരു സാരി എടുത്തുടുക്കു. ആരേലും വരും, പെണ്ണിനെ കാണാൻ. ഇന്നലെ കല്യാണ തിരക്കിൽ അവരാരും പെണ്ണിനെ നല്ലോണം കണ്ടു കാണില്ല” അമ്മച്ചി എന്റെ നീല കോട്ടൺ സാരിയിലേക്ക് വലിയ മതിപ്പിലാതെ നോക്കി. “അല്ലേലും ഞാൻ പറയണമെന്ന് കരുതിയതാ .വാ.. ഇന്നലെ കൊണ്ട് വന്ന പെട്ടി കാണിച്ചേ. അതിലുണ്ടാവുമല്ലോ സാരി. ഞാൻ നോക്കിത്തരാം ” കൈ കഴുകി തിരിഞ്ഞയെന്നെ ചേച്ചി പിടിച്ചു വലിച്ച് മുറിക്കകത്തേക്കു കൊണ്ട് പോയി. വീട്ടിൽ നിന്ന് കൊണ്ട് വന്ന അഞ്ചാറ് സാരിയും മറ്റും അടങ്ങുന്ന പെട്ടി, ചേച്ചി തന്നെ കട്ടിലിനടിയിൽ നിന്നും കണ്ടു പിടിച്ചു തുറന്നു. അതിനുള്ളിൽ നിന്നും രണ്ടു മൂന്ന് സാരി എടുത്തു പുറത്തേക്കിട്ടു. ക്രിസ്ത്യാനികൾക്ക് പുതു ഞായറാഴ്ചയാണ് അലമാരയും തുണികളും പെണ്ണിന്റെ വീട്ടിൽ നിന്നും കൊണ്ട് വരുന്നത്. അത് വരെ ചെറുക്കന്റെ വീട്ടിൽ കഴിയാനുള്ള വകകൾ മാത്രം ചെറിയ പെട്ടിയിലാക്കി കല്യാണത്തിന്റെന്ന് കൊണ്ട് വരും. ആ പെട്ടിയിലാണ് ചേച്ചി കൈ വെച്ചിരിക്കുന്നത്. വില കൂടിയ സാരികൾ രണ്ടെണ്ണമേ അതിൽ ഉണ്ടായിരുന്നുള്ളു. അത് രണ്ടും അവരെടുത്തു സ്വന്തം ദേഹത്ത് വെച്ച് തിരിച്ചും മറിച്ചും നോക്കി. പിന്നെയതിൽ ഒരു റോസ് സാരിയെടുത്തു എന്റെ നേർക്ക് നീട്ടി ” ഇതുടുത്തൊ .ഇച്ചിരി നിറം തോന്നിക്കും ” പൂവൻ പഴം പോലിരിക്കുന്ന എന്റെ മുഖത്ത് നോക്കിയാണ് ആ കരിമന്തിയത് പറഞ്ഞത്.എല്ലാം കൂടെ കണക്കു തീര്ക്കുന്ന ദിവസം വരുമെന്ന് കണക്കു കൂട്ടി സാരി വാങ്ങിച്ചു. കൈയിലിരുന്ന പച്ച സാരി നോക്കി അവർക്കു സംശയം “ഇതു പട്ടു തന്നെയാണോ ..അല്ല, പട്ടു സാരിയൊക്കെ പല തരത്തിലല്ലേ? “. കോട്ടയത്തെ ശീമാട്ടിയിൽ നിന്നും ഏഴായിരം രൂപയ്ക്കു വാങ്ങിയ സാരി നോക്കിയാണവരുടെ കമന്റ്. ഇവരൊന്നു പോയിരുന്നെങ്കിൽ സാരി മാറ്റാമായിരുന്നു. എന്റെ ചിന്തയെ തകിടം മറിച്ചു അടുത്ത വാക്ക്. “കൊച്ചു സാരി മാറിക്കോ .സാരിയൊക്കെ ഞാൻ പിടിച്ചു ശരിയാക്കിത്തരാം .അല്ലേൽ പെണ്ണിന് സാരിയുടുക്കാൻ പോലുമറിയത്തില്ലെന്ന് വരുന്നവര് പറയും.” അടിപാവാടയും ബ്ലൗസുമിട്ടു നിൽക്കുന്ന എന്നെ കട്ടിലിലിരുന്നവർ അടിമുടി നോക്കി. “ഉം.. ജോണിയുടെ സെലെക്ഷൻ മോശമല്ല. അല്ല, എങ്ങനെ മോശമാകും? പെണ്ണ് കാണാൻ ഞാനും വന്നല്ലോ അവന്റെ കൂടെ ” ചേച്ചി തുടർന്നു ” മെറ്റീടേ വയറൊക്കെ ഇപ്പോഴേ ചാടികിടക്കുവാ . പെണ്ണുങ്ങള് കല്യാണം കഴിയുമ്പം ഒന്ന് മിനുങ്ങും. സൂക്ഷിക്കണം .അവനാണേൽ എന്നാ തിന്നാലും തടി വെക്കാത്തയിനമാ .അമ്മച്ചി കൊച്ചിലെ ഞങ്ങളു കാണാതെ എന്തെല്ലാം കുത്തി കേറ്റി അവനു കൊടുത്തിരിക്കുന്നു. ഉം ഹും… നന്നാവൂല” ഓ .. അപ്പോൾ അതിന്റെ ദെണ്ണമാ മറുതയെന്നോട് തീര്ക്കുന്നത്.. അവരുടെ നോട്ടം വേണ്ടാത്തിടത്തേക്കു പോവുന്നത് കണ്ടു ഞാൻ വേഗം സാരി മാറിലേക്ക് വലിച്ചിട്ടു. “ എന്തായാലും നിറമിത്തിരി കുറഞ്ഞിട്ടുണ്ട്. ആഹ്….കല്യാണ തിരക്കിന്റെയാവും. ഇനി പുരക്കകത്തു തന്നെയല്ലേ. നിറം വന്നോളും. “ എന്നെ അകത്തിട്ടു പൂട്ടാനുള്ള നടപടികൾ. പെട്ടിയുടെ മൂലയ്ക്ക് ഭദ്രമായ് സൂക്ഷിച്ചു വെച്ചിരുന്ന സെന്റ് കുപ്പി ചേച്ചി തപ്പിയെടുത്തു. അടപ്പ് തുറന്ന് അതിന്റെ മണം മൂക്കിലോട്ട് വലിച്ചു കയറ്റി. ആദ്യം മണം കൊണ്ട് ചുളിഞ്ഞ മുഖം പിന്നെ പതിയെ തൃപ്തിയിൽ വിടർന്നു. അവർ നിന്ന നിൽപ്പിൽ കുനിഞ്ഞും നിവർന്നും, രണ്ട് വട്ടം “ശൂ”ന്ന് സെന്റ് മേലാസകലം പൂശി. “കൊള്ളാം, നല്ല മണമുണ്ട്. ” എന്റെ മുഖവും തെളിഞ്ഞു. എന്തിലെങ്കിലുമൊന്നിൽ അവർ തൃപ്തയായല്ലോ? “സ്വർണ്ണമെല്ലാം എടുത്തിട്ടോ .നിങ്ങടെ പട്ടണം പോലെയല്ല. ഇവിടെയെല്ലാരും പൊങ്ങച്ചക്കാരാണ്. അവർക്കു കണ്ണ് നിറയെ കാണണം. തിന്നാനായാലും ശരി പൊന്നായാലും ശരി“ ആഭരണ പെട്ടിയിൽ നിന്നും പാലക്കാ മാല എടുത്തു അവരെനിക്ക് നേരെ നീട്ടി. “അല്ല മെറ്റീ, ഇന്നലെ ഒരു ചെറിയ കുരുമുളക് മാല ഉണ്ടായിരുന്നല്ലോ കഴുത്തേല് . അതെവിടെ ?” ചേച്ചി വേവലാതിയോടെ മണിമാലയും വളകളും നെക്ലേസുമെല്ലാം പെട്ടിയിൽ നിന്ന് വാരിവലിച്ച് പുറത്തേക്കിട്ടു. ഓര്മക്കുറവിനെ പഴിച്ചു കൊണ്ട്തലയണക്കടിയിൽ നിന്നും ഞാൻ മാലയെടുത്തു. “ഉം … നല്ല സൂക്ഷക്കുറവ് .. പൊന്നൊക്കെ കെട്ടി പൂട്ടി സൂക്ഷിക്കണം .കെട്ടിയവന്റെ വീടായാലും സ്വന്തം വീടായാലും.” കുരുമുളക് മാല അണിഞ്ഞയെന്നെ അവർ വലത്തോട്ടും ഇടത്തോട്ടും തിരിച്ചു നിർത്തി ആപാദചൂഡം നോക്കി. “പൌഡറിച്ചിരി കൂടെ മുഖത്ത് തൂത്തേര്” .പുറത്ത് വന്ന വാക്കുകൾ അതായിരുന്നെങ്കിലും എന്റെ ഒരുക്കത്തിൽ പൂർണ്ണ തൃപ്തിയുണ്ടെന്നാ മുഖം പറഞ്ഞു. ” മുടി ചീവി കെട്ടിക്കോ. ഇപ്പോളുണങ്ങി കാണും ” എന്റെ മുടിയിൽ അവർ വിരലോടിച്ചു. ഞാൻ ചീർപ്പെടുത്തു മുടി വിടർത്തി ചീകാൻ തുടങ്ങി. “എന്നാ എണ്ണയാ മുടിയേല് തേക്കുന്നേ മെറ്റീ?. “ചേച്ചി പിന്നിൽ വന്ന് അഞ്ചാറ് മുടിയെടുത്ത് മൂക്കിലടുപ്പിച്ചു. ചേച്ചിയുടെ മുഖം കാഞ്ഞിരക്കുരു കഴിച്ച പോലെ ചുളുങ്ങി. മൂക്ക്, ബലൂണിൽ കാറ്റ് കടത്തിയ പോലെ വിടർന്നു.രണ്ടും ഞൊടിയിടയിൽ. “അമ്മച്ചി പറമ്പിലെ കയ്യോന്നി വെളിച്ചെണ്ണേല് കാച്ചിയെടുക്കുന്നതാ “ എലിവാല് പോലെ പിന്നിൽ കിടക്കുന്ന സ്വന്തം മുടി നോക്കി ചേച്ചി നെടുവീർപ്പിട്ടു. “പെറ്റുകഴിഞ്ഞപ്പം എന്റെ മുടി മൊത്തമങ്ങു പോയ്.. “ വാതിലിൽ മുട്ടി അനുവാദം മേടിച്ച്അച്ചായൻ അകത്തേക്ക് കടന്നു വന്നു. സർവ്വാഭരണ വിഭൂഷിതയായി ഒരുങ്ങി നിൽക്കുന്നയെന്നെ കണ്ട് ആ കണ്ണുകളിൽ കുസൃതി . “മെറ്റി ഒരുങ്ങി കഴിഞ്ഞില്ലേ? ദേ കാണാനുള്ളവർ കുറെപേർ വന്നിട്ടുണ്ട് ” “ആഹ് ഞാൻ പറഞ്ഞില്ലേ ?സമയം തെറ്റാതെ അവരെത്തി.. “ എന്റെ സാരി ഒന്നുകൂടെ പിന്നിൽ നിന്നും വലിച്ചിട്ട് , ചേച്ചി കൈയിൽ പിടിച്ചു മുറിക്കു പുറത്തേക്കു നടന്നു. കല്യാണ പന്തലിൽ കയറിയപ്പോൾ പോലും എന്റെ ചങ്ക് ഇത്രമേലിടിച്ചിട്ടില്ല.അറവ് ശാലയിലേക്ക് കൊണ്ട് പോവുന്ന മാടിനെ പോലെ ചേച്ചിയുടെ പിന്നാലെ മടിച്ച് മടിച്ച് ഞാൻ ഉമ്മറത്തേക്ക് … മണവാട്ടി പെണ്ണ് കുറച്ചു ദിവസത്തേക്ക് സകലമാന മനുഷ്യരുടെയും നിരീക്ഷണത്തിലാണെന്ന അലംഘിത നിയമം അടിവരയിട്ടു കൊണ്ട്….

ബന്ധങ്ങൾ

ആ ചെറുപ്പക്കാരനെ ചേർത്ത് പിടിച്ചു സുധി ഒരു സെൽഫി എടുത്തു…

Published

on

By

രചന: ഉണ്ണി കെ പാർത്ഥൻ

“ഇവള് ഇത് എവിടെ പോയി കിടക്കുവാ.. വിളിച്ചിട്ട് എടുക്കുന്നില്ല ലോ..” പലവട്ടം ഫോൺ വിളിച്ചിട്ടും കാൾ അറ്റൻഡ് ചെയ്യാതിരുന്ന ഭാര്യയെ മനസ്സിൽ ആവോളം തെറി വിളിച്ചു കൊണ്ട് സുധി ബസിന്റെ സീറ്റിലേക്ക് ഒന്നുടെ ചാരിയിരുന്നു.. “വാട്സാപ്പ് ചെയ്തു നോക്കാം..” മൊബൈൽ ഒന്നുടെ എടുത്തു നെറ്റ് ഓൺ ചെയ്തു.. “ആഹാ.. ഇവൾ ഓൺലൈനിൽ ഉണ്ടല്ലോ… ഡീ..” സുധി ഒരു മെസ്സേജ് വാട്സാപ്പ് ചെയ്തു.. ഒരു മിനിറ്റ്.. രണ്ട് മിനിറ്റ്.. നിമിഷങ്ങൾ അങ്ങനെ കടന്നു പോയി.. അപ്പുറത്ത് ഓൺലൈൻ തെളിഞ്ഞു കിടപ്പുണ്ട്… “ഡീ..” സുധി ഒന്നുടെ മെസ്സേജ് ചെയ്തു… നോ രെക്ഷ.. “എങ്കിൽ ഒന്നുടെ വിളിച്ചു നോക്കാം..” വാട്സാപ്പ് കാൾ ചെയ്തു… അനക്കമില്ല..

“ഇവള് ഈ മൊബൈലും കു ത്തി ഇരുന്നു ഉറങ്ങിപോയോ…” മനസ്സിൽ ഒന്നുടെ പറഞ്ഞിട്ട് സുധി നോട്ടം തൊട്ടടുത്ത സീറ്റിൽ ഇരിക്കുന്ന ചെറുപ്പകാരന്റെ മൊബൈലിലേക്ക് ഒരു നിമിഷം പാളി നോക്കി.. “ങ്ങേ… ഇത് ദേവി അല്ലേ.. എന്റെ ഭാര്യ.. ഇവളെ എങ്ങനെ ഇയ്യാൾക്ക് അറിയാം..” ആ ചെറുപ്പക്കാരൻ ഇടതടവില്ലാതെ വാട്സാപ്പ് മെസ്സേജ് ദേവിക്ക് അയച്ചു കൊണ്ടേ ഇരിക്കുന്നുണ്ടായിരുന്നു.. അപ്പുറത്ത് നിന്നും ഉരുളക്ക് ഉപ്പേരി പോലേ റിപ്ലൈയും.. “ചേട്ടാ.. ഒരു മിനിറ്റ്.. ആ ഫോൺ ഒന്ന് തരോ.. എന്റെ ഭാര്യക്ക് ഒരു മെസ്സേജ് ഇടാൻ ആണ്..” ആ ചെറുപ്പക്കാരനെ നോക്കി സുധി പതിയേ ചോദിച്ചു… “പിന്നെന്താ.. ദാ ചേട്ടാ ഫോൺ..” വിനീത പുളകിതനായി അയ്യാൾ ഫോൺ സുധിക്ക് നേരെ നീട്ടി.. “ഡീ.. ഞാൻ നിന്നെ കൊറേ നേരമായി വിളിക്കുന്നു… മെസ്സേജ് ഇടുന്നു..

നീ എന്റെ മെസ്സേജ് തുറന്നു നോക്കിയില്ല ലോ.. ഇത് ആരാ നിന്റെ ഫ്രണ്ട് ആണോ.. എന്റെ തൊട്ടടുത്ത സീറ്റിൽ ഇരിക്കുന്നത് കൊണ്ട് ഞാൻ ഈ ചേട്ടന്റെ ഫോൺ വാങ്ങി മെസ്സേജ് ഇടുവാ.. അതേ.. ഞാൻ ഇന്ന് വീട്ടിലേക്ക് വരുന്നുണ്ട്…വൈകുന്നേരം ആവുമ്പോളേക്കും എത്തും ട്ടോ..” മെസ്സേജ് സെന്റ്… “ങ്ങേ..” അപ്പുറത്തു നിന്നു മറുപടി വിത്ത് സ്മൈലി.. “ഓൾക്ക് മനസിലായില്ല ന്ന് തോന്നുന്നു… ചേട്ടാ മ്മക്ക് ഒരു സെൽഫി എടുത്താലോ..” ആ ചെറുപ്പക്കാരനെ ചേർത്ത് പിടിച്ചു സുധി ഒരു സെൽഫി എടുത്തു പിക്ക് ദേവിക്ക് സെന്റ് ചെയ്തു… അപ്പുറം മെസ്സേജ് ഓപ്പൺ ചെയ്തു… അപ്പുറത്ത് നിന്നു ഒരു റിപ്ലൈയും ഇല്ല… “ഓൾടെ നെറ്റ് കഴിഞ്ഞു കാണും.. അതാണ് റിപ്ലൈ ഇല്ലാത്തത്.. സർപ്രൈസ് കൊടുക്കാന്നു കരുതിയതാ.. ഇനി ഇപ്പൊ അത് വേണ്ടാ ലോ…” മൊബൈൽ തിരിച്ചു നൽകി കൊണ്ട് നിഷ്കളങ്കമായി സുധി ആ ചെറുപ്പക്കാരനെ നോക്കി.. “ചേട്ടാ ആളിറങ്ങാൻ ണ്ട്..” ചെറുപ്പക്കാരൻ സീറ്റിൽ നിന്നും ചാടിയെഴുന്നേറ്റ് കണ്ടക്ടറേ നോക്കി ഉറക്കേ വിളിച്ചു പറഞ്ഞു… “ഇനി അടുത്ത സ്റ്റോപ്പ്‌ കൊല്ലത്തു ആണ്..”

കണ്ടക്ടർ വിളിച്ചു പറഞ്ഞു… “അതൊന്നും പറ്റില്ല.. എനിക്ക് ഇവിടെ ഇപ്പൊ ഇറങ്ങണം…” ചെറുപ്പക്കാരൻ ബെൽ അടിച്ചു.. ഡ്രൈവർ വണ്ടി നിർത്തി.. ചെറുപ്പക്കാരൻ ഇറങ്ങി.. തിരിഞ്ഞു നോക്കാതെ ഓടി… സുധി മൊബൈൽ എടുത്തു ഒന്നുടെ ഭാര്യയെ വിളിച്ചു… “നിങ്ങൾ വിളിക്കുന്ന നമ്പർ മറ്റൊരു കോളിൽ ആണ്… ദയവായി അൽപ്പനേരം കഴിഞ്ഞു വിളിക്കുക..” സുധി ഒന്നുടെ വിളിച്ചു… “നിങ്ങൾ വിളിക്കുന്ന നമ്പർ ഇപ്പൊ സ്വിച് ഓഫ് ആണ്.. ദയവായി അൽപ്പ നേരം കഴിഞ്ഞു വിളിക്കുക…” “ഇന്നലെ നല്ല മഴ അല്ലായിരുന്നോ.. ഫോൺ ചാർജ് പോയി കാണും..” അതും പറഞ്ഞു സുധി സീറ്റിലേക്ക് ചാരി കണ്ണുകൾ അടച്ചു… ശുഭം.. ഉണ്ണി കെ പാർത്ഥന്റെ സ്റ്റോറി എന്തേ ഇങ്ങനെ എന്ന് ചോദിക്കുന്നവരോട് മാത്രമായി രണ്ട് വരി.. വിഡ്ഢിത്തത്തോടെ ചില ആശയങ്ങളേ കൂടെ കൂട്ടി നോക്കും.. അത് പണ്ട് മുതലേ ഉള്ള ശീലമാണ്.. സാമാന്യ യുക്തിക്ക് നിരക്കാത്തത് എന്ന് വേണേൽ പറയാം.. എഴുതി നോക്കും.. വായിക്കുന്നവരുടെ അഭിരുചിക്ക് വിടും.. അവരേ കേൾക്കും അതാണ് പതിവ്.. ജീവനുള്ള കഥയുമായി വീണ്ടും കാണാം..

Continue Reading

ബന്ധങ്ങൾ

ഈ സാരിയുടെ ഞൊറിയൊന്ന് പിടിച്ചേ..

Published

on

By

രചന: സജി തൈപ്പറമ്പ്

“ചേട്ടാ.. ഈ സാരിയുടെ ഞൊറിയൊന്ന് പിടിച്ചേ” “പിന്നേ.. എനിക്കതല്ലേ ജോലി ?,ചുരിദാറിട്ടിരുന്നേൽ ഈ പാടുണ്ടായിരുന്നോ? ഈ നേരമില്ലാത്ത നേരത്ത്,സാരിയുടുക്കാൻ നിന്നോടാരെങ്കിലും പറഞ്ഞോ?” “എന്താ ജയേട്ടാ.. ഈ പറയുന്നത്? ഇതൊരു സാധാരണ കല്യാണമല്ലല്ലോ? എൻ്റെ വല്യച്ഛൻ്റെ മകൾടെ കല്യാണമല്ലേ? അവിടെയുള്ളവർക്കൊക്കെ സാരിയെടുത്ത കൂട്ടത്തിൽ എനിക്കും വല്യച്ഛൻ,സാരിയെടുത്ത് തന്നത്, കല്യാണത്തിന് ഉടുക്കാൻ വേണ്ടിയല്ലേ?” ഓഹ് പിന്നേ, സാരിയുടുക്കാൻ പറ്റിയൊരു കോലം, നീയൊന്ന് വേഗമിറങ്ങാൻ നോക്ക് , പുശ്ചത്തോടെ പറഞ്ഞിട്ട് ജയേട്ടൻ പുറത്തേയ്ക്ക് പോയപ്പോൾ ,എനിക്ക് കടുത്ത നിരാശ തോന്നി. രാവിലെ മുതല് തുടങ്ങിയ കഷ്ടപ്പാടാണ് ,നന്നായൊന്ന് ഒരുങ്ങിയിട്ട് എത്ര നാളായി, രണ്ട് കൊല്ലം മുൻപ് അനുജത്തിയുടെ കല്യാണത്തിനാണ് ഇതിന് മുമ്പ് സമയമെടുത്തൊന്ന് ഒരുങ്ങിയത് ,അല്ലാതെയുള്ള എന്ത് ചടങ്ങിന് പോയാലും ജയേട്ടൻ്റെ ധൃതി കാരണം ഏതെങ്കിലുമൊരു ചുരിദാറുമെടുത്തിട്ട് വെളിച്ചെണ്ണ തേച്ച മുടിയൊന്ന് കോതിയൊതുക്കി കണ്ണാടിയിലൊട്ടിച്ചിരിക്കുന്ന ഒരു പൊട്ടുമെടുത്ത് നെറ്റിയിലൊട്ടിച്ചിട്ട് വേഗം ഇറങ്ങാറാണ് പതിവ്, ഇതിപ്പോൾ പുറം നാട്ടിലൊക്കെ പോയിട്ട് വന്ന കസിൻസെല്ലാം കെട്ടിയൊരുങ്ങി വരുമെന്നറിയാവുന്നത് കൊണ്ട് ,അവരുടെ മുന്നിൽ ചെറുതാവണ്ടന്ന് കരുതിയാണ്, ഇന്നലെ രാത്രി മുതൽ പോയസൗന്ദര്യമൊന്ന് തിരിച്ച് പിടിക്കാനുള്ള ശ്രമം തുടങ്ങിയത് രാത്രി തന്നെ പറമ്പിൽ നിന്ന് കറ്റാർവാഴയുടെ തണ്ട് മുറിച്ചെടുത്ത്, തൊലി കളഞ്ഞ്, അതിൻ്റെ മുകളിൽ അരിപ്പൊടി വിതറി മുഖത്ത് തേച്ച് വച്ചു, ഏറെ നേരം കഴിഞ്ഞു് അത് കഴുകിയതിന് ശേഷമാണ്, ഇന്നലെ ഉറങ്ങാൻ കിടന്നത് തന്നെ എന്നിട്ട് അതിരാവിലെയെഴുന്നേറ്റ് ബാക്കിയുണ്ടായിരുന്ന കറ്റാർവാഴയുടെ ജെല്ലെടുത്ത് ജ്യൂസാക്കി, തലയിൽ തേച്ച് പിടിപ്പിച്ചു ,മുടിക്ക് തിളക്കം കിട്ടുമെന്നാരോ മുമ്പ് പറഞ്ഞത് കൊണ്ടാണങ്ങനെ ചെയ്തത് അങ്ങേതിലെ ശോഭേച്ചി മിക്കപ്പോഴും ബ്യൂട്ടി പാർലറിൽ പോകുമ്പോൾ ചോദിക്കാറുണ്ട്, ഗീതയ്ക്ക് ബ്യൂട്ടി പാർലറിലൊന്നും പോകാൻ താല്പര്യമില്ലേന്ന്?

തൻ്റെ നല്ല തിക്നസ്സുള്ള മുടിയല്ലേ? ഒന്ന് സ്ട്രെയ്റ്റ് ചെയ്തിട്ടിരുന്നേൽ നല്ല വെറ്റായി കിടന്നേനെയെന്ന് അത് കേട്ടപ്പോഴെനിക്ക് ആത്മനിന്ദയാണ് തോന്നി . ഏത് പെണ്ണുങ്ങൾക്കാണ്, ബ്യൂട്ടി പാർലറിൽ പോകാനും, ഫേഷ്യല് ചെയ്യാനും ,മുടിയൊന്ന് സ്ട്രെയ്റ്റ് ചെയ്യാനുമൊക്കെ ആഗ്രഹമില്ലാത്തത്? ,പക്ഷേ അതിനൊക്കെ സപ്പോർട്ട് ചെയ്യുന്നൊരു ഹസ്ബൻ്റ് കൂടിയുണ്ടാവണ്ടെ? വെറും മുപ്പത് രൂപാ മുടക്കി പുരികമൊന്ന് ത്രെഡ് ചെയ്യാൻ പോലും, പുള്ളിക്കാരൻ പൈസ തരില്ല, പഠിക്കാൻ പോയ സമയത്ത്, അമ്മ ഒരുപാട് പറഞ്ഞതാണ്, മോളേ.. നീയെങ്കിലും പഠിച്ച് ഒരു ജോലി വാങ്ങാൻ നോക്ക്, ഇല്ലെങ്കിൽ കല്യാണം കഴിയുമ്പോൾ ,അമ്മയെ പോലെ സ്വന്തം ആവശ്യങ്ങൾക്കെല്ലാം ഭർത്താവിൻ്റെ മുന്നിൽ കൈ നീട്ടി നില്ക്കേണ്ടി വരുമെന്ന് , ആര് കേൾക്കാൻ ? അതിൻ്റെയാണീ അനുഭവിക്കുന്നത്, ഞാനൊരുവിധം സാരി അരക്കെട്ടിലുറപ്പിച്ചു. അമ്പലത്തിൽ വച്ചായിരുന്നു വിവാഹം അവിടെ ചെന്നയുടനെ എന്നെയും മക്കളെയും മണ്ഡപത്തിലേക്ക് പറഞ്ഞ് വിട്ടിട്ട് ജയേട്ടൻ കൂട്ടുകാരുടെയടുത്തേയ്ക്ക് പോയി. ഹായ് നാത്തൂനെ, ഇതെന്തായീ കാണുന്നത്? കാവിലെ ഭഗവതി നേരിട്ടിറങ്ങി വന്നതോ ? ചുവന്ന പട്ട് സാരി, നാത്തൂന് നന്നായി ചേരുന്നുണ്ട് കെട്ടോ? വല്യച്ഛൻ്റെ ഇളയ മരുമകള് വന്നെന്നോടങ്ങനെ പറഞ്ഞപ്പോൾ മനസ്സിനൊരു കുളിർമ്മ തോന്നി ,അവളങ്ങനെ ആരെയും പുകഴ്ത്തിപ്പറയുന്നൊരാളല്ല ങ്ഹാ ഗീതേച്ചി… പൊളിച്ചല്ലോ ? നിങ്ങൾക്കൊരു പത്ത് വയസ്സ് കുറഞ്ഞിട്ടുണ്ട്, ഗീതേച്ചി വെളുത്തതായത് കൊണ്ടാവാം ചുവപ്പ് നിറം നന്നായി മാച്ച് ചെയ്യുന്നുണ്ട്, അത് മാത്രമല്ല രശ്മി ,ഗീതേച്ചിക്ക് നല്ല ബോഡി ഷെയ്പുള്ളത് കൊണ്ട് സാരി നന്നായി ചേരുന്നുമുണ്ട് എൻ്റെ കൃഷ്ണാ … എനിക്കിനി മരിച്ചാലും വേണ്ടില്ല ബാംഗ്ളൂരിൽ മോഡലിങ്ങ് ചെയ്യുന്ന അമ്മാവൻ്റെ മക്കളാണത് പറഞ്ഞത് ഇതിൽപരം ഈയുള്ളവർക്ക് മറ്റൊന്നും വേണ്ട അതോടെ എൻ്റെ മൂഡ് ഔട്ടെല്ലാം മാറി. താലികെട്ടും, സദ്യയുമൊക്കെ കഴിഞ്ഞപ്പോൾ തിരിച്ച് പോകാൻ ജയേട്ടൻ ധൃതിവച്ചു. കുറച്ച് കൂടി നില്ക്ക് ജയേട്ടാ… ഇത്രവേഗം തിരിച്ച് പോകാൻ നമ്മള് അന്യരൊന്നുമല്ലല്ലോ? മനസ്സില്ലാ മനസ്സോടെയാണെങ്കിലും പുള്ളിക്കാരൻ കുറച്ച് നേരം കൂടി നിന്നു.

നാല് മണിയായപ്പോൾ ജയേട്ടന് പോയിട്ട് തിരക്കുണ്ടെന്ന് വല്യച്ഛനോട് കളവ് പറഞ്ഞിട്ട് ഞങ്ങളവിടുന്നിറങ്ങി. ഗീതേ .. നീ മുന്നിലോട്ടിരിക്ക് മക്കള് രണ്ട് പേരും കൂടി പിന്നിലിരുന്നോളും കാറിൻ്റെ പിൻഡോറ് തുറക്കാനൊരുങ്ങിയ എന്നോടത് പറഞ്ഞത്, ജയേട്ടൻ തന്നെയാണോ,? എന്ന് വിശ്വസിക്കാനാവാതെ ആ മുഖത്തേയ്ക്ക് ഞാൻ പകച്ച് നോക്കി . കുറച്ച് നാളുകളായി പത്താം ക്ളാസ്സിൽ പഠിക്കുന്ന മൂത്ത മകനാണ്, എന്നും ഇടത് വശത്തെ ഫ്രണ്ട് സീറ്റിലിരിക്കുന്നത്, ഒരു ദിവസം അവനോട് ഞാൻ ബാക്ക് സീറ്റിലേക്കിരിക്കാൻ പറഞ്ഞപ്പോൾ ജയേട്ടൻ സമ്മതിച്ചില്ല നിനക്ക് മുന്നിൽ തന്നെയിരിക്കണമെന്ന് ഇത്ര നിർബന്ധമെന്താണ്? ആ ചോദ്യം അന്നെന്നെ വല്ലാതെ വേദനിപ്പിച്ചിരുന്നു. വേണ്ട, ഞാനിവിടെ തന്നെയിരുന്ന് കൊള്ളാം ഉള്ളിലെ സന്തോഷം മറച്ച് പിടിച്ച്, ഞാൻ വെറുതെയൊരു നമ്പരിറക്കി. ഹാ, പറയുന്നത് കേൾക്ക് ഗീതേ .. എനിക്കത് മതിയായിരുന്നു, എൻ്റെ ഭർത്താവ് എന്നെ നിർബന്ധിച്ചാലേ, ഞാനിനി മുൻ സീറ്റിലിരിക്കു, എന്നൊരു പിടിവാശി എനിക്കന്നുണ്ടായിരുന്നു. അല്ല, നമ്മളിതെങ്ങോട്ടാ പോകുന്നത് ? വീട്ടിലേക്കുള്ള റോഡിലേക്ക് തിരിയാതെ, കാറ് ഹൈവേയിലൂടെ തന്നെ സഞ്ചരിക്കുന്നത് കണ്ട് ,ഞാൻ ജിജ്ഞാസയോടെ ചോദിച്ചു. നീയെപ്പോഴും പറയാറില്ലേ ? ഞാൻ വർക്ക് ചെയ്യുന്ന കമ്പനിയിൽ, ഒരിക്കലൊന്ന് പോകണമെന്നും, അവിടുള്ളവരെയൊക്കെ ഒന്ന് പരിചയപ്പെടണമെന്നുമൊക്കെ അയ്യോ അങ്ങോട്ടാണോ പോകുന്നത്? ,ജയേട്ടാ .. ഞാനീ പട്ട് സാരിയൊക്കെയുടുത്ത് വന്നാൽ ,അവരെന്ത് വിചാരിക്കും? നമുക്ക് വേറൊരു ദിവസം പോകാം ഹേയ് അതൊന്നും സാരമില്ല, ഇന്നാണ് അതിന് പറ്റിയ ദിവസം ഈ മനുഷ്യനിതെന്ത് പറ്റി? ആകെയൊരു മാറ്റം ?

എൻ്റെ ജിജ്ഞാസ വർദ്ധിച്ചു. അങ്ങനെ കുറെ നാള് കൊണ്ടുള്ള ആഗ്രഹം സാധിച്ചു. കമ്പനിയിലുള്ള ജയേട്ടൻ്റെ സബ്ഓർഡിനേറ്റ്സൊക്കെ എന്നെ ,മാഡം എന്ന് വിളിച്ച് സംബോധന ചെയ്തപ്പോൾ, ഞാനങ്ങ് വല്ലാതായി. അവിടുന്നിറങ്ങിയിട്ടും, വീട്ടിലേക്ക് പോകാതെ, ജയേട്ടൻ ഞങ്ങളെയും കൊണ്ട് നേരെ ബീച്ചിലേക്കാണ് പോയത്, ൻ്റെ കൃഷ്ണാ… ഇന്ന് മൊത്തം സർപ്രൈസുകളാണല്ലോ? എല്ലാ ദിവസവും, ഈ മനുഷ്യന് ഇങ്ങനെ തോന്നിയിരുന്നെങ്കിയെന്ന്, ഞാൻ വല്ലാതെ കൊതിച്ച് പോയി. ഞാനൊരു കാര്യം ചോദിച്ചാൽ, സത്യം പറയുമോ ? രാത്രിയിൽ ജയേട്ടനൊപ്പം കട്ടിലിൽ കിടക്കുമ്പോൾ, ഞാനദ്ദേഹത്തോട് ചോദിച്ചു ഉം ചോദിക്ക്, ഇന്നെന്താ ജയേട്ടന് പറ്റിയത്? ഇപ്പഴും എനിക്ക്, ഒന്നുമങ്ങട്ട് വിശ്വസിക്കാനാവുന്നില്ല, ചില തിരിച്ചറിവുകളുണ്ടാകുന്നത് മറ്റുള്ളവരിൽ നിന്നാണ് ,കല്യാണ പന്തലിൽ വച്ച് ,എനിക്കങ്ങനെയൊരു തിരിച്ചറിവ് കിട്ടി ,ഇപ്പോൾ നീ അത്രയും മനസ്സിലാക്കിയാൽ മതി. ################### അതാരാ ചേട്ടാ… ആ ചുവന്ന സാരിയുടുത്ത് നില്ക്കുന്നത്, എന്തൊരു ലുക്കാണ് ആ ചേച്ചിക്ക്? അറിയില്ലെടാ, പക്ഷേ ഒരു കാര്യം ഉറപ്പാണ്, ഏതോ ഭാഗ്യം ചെയ്തവൻ്റെ ഭാര്യയാണ് , ഈശ്വരാ … നമുക്കൊന്നും നീ ഇത് പോലൊരു ഭാര്യയെ തന്നില്ലല്ലോ? ശരിയാ ചേട്ടാ… ഇതിനെയൊക്കെ കാണുമ്പോഴാണ് ,സുരാജേട്ടൻ പറഞ്ഞത് പോലെ വീട്ടിലിരിക്കുന്നതിനെയെടുത്ത് കിണറ്റിലെറിയാൻ തോന്നുന്നത് #################### കല്യാണ പന്തലിൽ വച്ച് ,ഗീതയെ ചൂണ്ടിക്കാണിച്ച്, ക്യാമറാമാൻ്റെ സഹായിയായ പയ്യൻ ചോദിച്ച സംശയവും, അതിനയാൾ കൊടുത്ത മറുപടിയുമാണ്, തന്നിലുണ്ടായ മാറ്റത്തിന് കാരണമെന്ന് അയാൾ ഗീതയോട് പറഞ്ഞില്ല. NB :- ശരീരത്തിൽ കസ്തൂരിയുണ്ടെന്നറിയാതെ അതിൻ്റെ സുഗന്ധമന്വേഷിച്ച് നടക്കുന്ന മാനുകളെ പോലെയാണ് ചില പുരുഷൻമാർ, എന്ന് പറയാതെ വയ്യ ലൈക്ക് കമന്റ് ചെയ്യണേ…

Continue Reading

ബന്ധങ്ങൾ

വേണം എനിക്ക് ഇഷ്ടാ ഈ പെൺകുട്ടിയെ…

Published

on

By

രചന: Anu Swaroop

 

വീട്ടിലെ രണ്ടുപെണ്മക്കളിൽ ഇളയത് ആണെങ്കിലും വീട്ടുകാർക്ക് എന്നും ഒരു ഭാരം ആയിരുന്നു ഞാൻ,, ഞാൻ ജനിച്ചു പിറ്റേദിവസം ഒരു ആക്സിഡന്റ് പറ്റി അച്ഛൻ മരിച്ചു എന്ന കാരണം പറഞ്ഞു ആയിരുന്നു എന്നെ വീട്ടിലെ ഭാഗ്യദോഷി ആക്കിയത്, അമ്മക്ക് എന്നും പ്രിയപെട്ടവൾ ചേച്ചി തന്നെ ആയിരുന്നു, അമ്മയുടെ ഓരോ വാക്കിലും, പ്രവർത്തിയിലും അത് പ്രകടമായിരുന്നു എന്നേക്കാൾ രണ്ടു വയസ്സിനു മൂത്ത ചേച്ചി സ്കൂൾ പഠനം കഴിഞ്ഞു പട്ടണത്തിലെ കോളേജിൽ പോയപ്പോൾ ഞാനും ഒരുപാട് ആഗ്രഹിച്ചു,, പെൺകുട്ടികൾ പഠിച്ചിട്ട് എന്ത് കിട്ടാനാ എന്നുള്ള ചോദ്യം ആയിരുന്നു മറുപടി,.. അമ്മയെ വിധവയാക്കിയവൾ എന്ന പട്ടം നേരത്തെ ചാർത്തി കിട്ടിയതിനാൽ ബാല്യത്തിന്റെ നിറവും സ്വപ്നങ്ങളും ഒക്കെ എന്നേ പൊഴിഞ്ഞു പോയിരുന്നു,.. അമ്മയും ചേച്ചിയും ഉണ്ടായിട്ടും ഒരിറ്റ് സ്നേഹം തരാൻ ആരും ഇല്ലാതെ ഒറ്റപെട്ട ജീവിതം ആയിരുന്നു എന്നും,,.. കുത്തുവാക്കുകളും, ശാപവാക്കുകളും കേട്ടു കണ്ണുനീര് തുടക്കാൻ വേണ്ടി മാത്രം ഒരു ജന്മം,, എന്റെ ജന്മത്തെ ഞാൻ തന്നെ വെറുത്ത ദിനങ്ങൾ,,

ഗ്രാമത്തിലെ തയ്യൽ യൂണിറ്റിലെ തയ്യൽ പഠിത്തവും, വീട്ടിലെ അടുക്കളജോലിയും ആയിരുന്നു അമ്മ എനിക്ക് വേണ്ടി കരുതി വെച്ചിരുന്നത്… ഡിഗ്രി കഴിഞ്ഞു ഇറങ്ങിയ ചേച്ചിക്ക് വേണ്ടി വിവാഹആലോചന തുടങ്ങിയപ്പോൾ ആണ് അമ്മക്ക് ഞാൻ വീണ്ടും ഒരു ബാധ്യത ആവുന്നത്..,, കടമ തീർക്കാൻ എന്ന പേരിൽ ഇരുപത്തിരണ്ടുകാരിയായ തന്നെക്കാൾ ഇരട്ടി പ്രായം ഉള്ള ഒരാളെ ആയിരുന്നു അമ്മ കണ്ടെത്തിയത്,, മറ്റ് ആരുടെയോ നിർബന്ധത്തിൽ ആണ് അയാൾ ഈ വിവാഹത്തിന് സമ്മതിച്ചതെന്ന് ഒറ്റ നോട്ടത്തിൽ തന്നെ തോന്നിക്കും വിധം ആയിരുന്നു അയാളുടെ പെരുമാറ്റം, അത് അമ്മയോട് സൂചിപ്പിച്ച എന്നെ ചേച്ചിയുടെ മുന്നിൽ വെച്ചു തന്നെ പരിഹസിച്ചു വിട്ടു..,, “പിറന്നു വീണതെ എന്റെ താലിചരടും നെറ്റിയിലെ സിന്ദൂരവും മായിച്ചു, ഇനി കഴുത്തിൽ താലി ചാർത്തുന്നവന് എന്തൊക്കെയാണാവോ വരാൻ പോകുന്നത്” അമ്മയുടെ ആക്രോശത്തിനു മുന്നിൽ ഒന്നും പറയാൻ ഇല്ലാതെ തലയും താഴ്ത്തി മിണ്ടാതെ പോരേണ്ടി വന്നു എനിക്ക്,,, രണ്ടുമാസത്തിനപ്പുറം ചേച്ചിയോടൊപ്പം അണിഞ്ഞൊരുങ്ങി മനസ്സിൽ നിറയെ ഭയശങ്കകളോടെ മുഹൂർത്തം പ്രതീക്ഷിച്ചു കാത്തിരിക്കുമ്പോൾ ആണ് വീടിനുള്ളിൽ അടക്കിപിടിച്ച സംസാരവും, കുശുകുശുക്കലും കേട്ടത്… എന്തോ പ്രശ്നം ഉണ്ടെന്നു കൂടെ ഉണ്ടാരുന്നവരുടെ മുഖത്ത് നിന്നും മനസ്സിൽ ആക്കാൻ കഴിഞ്ഞു, ചോദിച്ചിട്ട് ആരും ഒന്നും പറയുന്നില്ല,,

മുറിക്കുള്ളിൽ കൂടി നിന്നവർ ഓരോരുത്തരായി പുറത്തേക്കു ഇറങ്ങി പൊയ്‌കൊണ്ടിരുന്നു എന്താ സംഭവിച്ചേ എന്നു അറിയാൻ ഉള്ള ആകാംഷ കൊണ്ടു ഇരുന്നിടത്തുനിന്നും എഴുന്നേറ്റു വാതിലിനു നേർക്കു നടക്കാൻ തുടങ്ങിയപ്പോൾ ആണ് അമ്മ കൊടുംകാറ്റ് പോലെ ഉള്ളിലേക്ക് കയറി വന്നത്,,… “എന്നോട് എല്ലാവരും പറഞ്ഞതാ ഈ അശ്രീകരത്തെ എന്റെ മോളുടെ കൂടെ പന്തലിൽ ഇറക്കണ്ട എന്നു.., അന്ന് ഞാൻ അത് കേട്ടില്ല,അത് എന്റെ തെറ്റ്‌..,,നിന്നെ താലികെട്ടാൻ വരാം എന്നു സമ്മതിച്ചവൻ വേറെ ഒരു പെണ്ണിനേയും കൊണ്ടു ഓടി പോയെടി… പെൺകുട്ടികൾ ആയാൽ കുറച്ചു ഒക്കെ ഭാഗ്യം വേണം,.. നിനക്കിപ്പോൾ മതിയായല്ലോ എല്ലാം, എന്റെ കുഞ്ഞിന്റെ ജീവിതം കൂടി നീ കാരണം നശിക്കുമല്ലോ എന്റെ ദേവിയെ….” അമ്മേ ഞാൻ….പറയാൻ വന്നത് മുഴുവൻ ആക്കാൻ കഴിയാതെ നിന്നു പോയി താൻ..,, അമ്മ അലമുറ ഇട്ടു കരഞ്ഞു കൊണ്ടിരുന്നു,,

“ലീലേടത്തി… ഇങ്ങനെ കരഞ്ഞു ബഹളം വെച്ചിട്ട് കാര്യം ഒന്നും ഇല്ലല്ലോ?? പ്രശ്നം പരിഹരിക്കാൻ ഉള്ള വഴി അല്ലെ നോക്കണ്ടത് നമ്മൾ… നിങ്ങൾക്ക് സമ്മതം ആണെങ്കിൽ ഒരു പയ്യൻ ഉണ്ട് ഞങ്ങളുടെ കൂടെ, മുഹൂർത്തം തെറ്റാതെ നമുക്ക് നടത്താം ഇത്,.. പയ്യന്റെ അമ്മാവന്റെ മകൻ ആണ് ഇത്, എല്ലാ കാര്യങ്ങൾക്കും അവൻ കൂടെ ഉണ്ടാരുന്നത് കൊണ്ടു ഇനി ഒരു ചർച്ചയുടെ ആവശ്യം വരുന്നില്ല” “അത് വേണോ?? എന്നുള്ള അമ്മയുടെ ചോദ്യത്തിന് അകത്തേക്ക് കയറി വന്ന എന്റെ പ്രിയപ്പെട്ടവൻ തന്നെ ആയിരുന്നു ഉത്തരം കൊടുത്തത്…. “വേണം എനിക്ക് ഇഷ്ടാ ഈ പെൺകുട്ടിയെ…

അവളെ എനിക്ക് തന്നേരെ അമ്മേ….,,,” മഞ്ഞനൂലിൽ കോർത്ത താലി കഴുത്തിൽ ചാർത്തി തന്നു, ഹാരവും അണിയിച്ചു, നെറ്റിയിൽ സിന്ദൂരവും തൊടുവിച്ചു തന്നു, കയ്യോട് കയ്യ് ചേർത്തു പിടിച്ചു മണ്ഡപം ചുറ്റുന്ന ഞങ്ങളെ എവിടെ നിന്നോ വന്ന ഒരിളം കാറ്റ് തഴുകി കടന്നു പോയി…ആ കാറ്റു എന്റെ ചെവിയിൽ പറഞ്ഞു മോളെ അച്ഛന്റെ അനുഗ്രഹം എന്നും മോൾക്ക്‌ ഉണ്ടാവും എന്നു…… അത് അങ്ങനെയാണ് ആരും ഇല്ലാത്തവർക്ക് ദൈവം ഉണ്ടാകും എന്തിനും.. ഏതിനും കൂടെ..,,, ലൈക്ക് ചെയ്ത് അഭിപ്രായങ്ങൾ അറിയിക്കൂ… നിങ്ങളുടെ സ്വന്തം രചനകൾ പേജിലേക്ക് അയച്ചു തരിക…

 

Continue Reading

Most Popular